MIKA 7 - Ka Baibala Hemolele

1 ʻO ka emi ʻana o nā kānaka pono; a no ka hewa o nā kānaka, hōʻoluʻolu ke kāula i kona manaʻo ma ke Akua. 8 Manaʻo ka ʻekalesia e lanakila ma luna o kona poʻe ʻenemi, a loaʻa ka pōmaikaʻi. 14 ʻO ka pule a me ka wānana no nā manawa pōmaikaʻi; a no ka lokomaikaʻi o ke Akua i kona poʻe kānaka.

MOKUNA VII.

¹ ¶ Auē iaʻu! No ka mea, ua like au Me ka ʻohi ʻai ʻana o ke kau, e like me nā koena hua waina o ka ʻohi ʻana; ʻAʻohe huhui e ʻai ai; Makemake ihola kuʻu naʻau i ka hua fiku mua.

² Ua nalo ka mea lokomaikaʻi mai ka ʻāina aku; ʻAʻohe mea pono i waena o nā kānaka; Ke hoʻohālua nei lākou a pau no ke koko; Hoʻohei iho lākou, ʻo kēlā mea kēia mea i kona hoahānau, i ka ʻupena.

³ Hana hewa ikaika hoʻi lākou me nā lima; Noi aku ka luna, a me ka luna kānāwai i uku; A ʻo ke kanaka nui, ʻo ia ke hōʻike aku i ka makemake o kona naʻau; Pēlā nō lākou e huikau ai ia mea.

⁴ ʻO ka mea maikaʻi o lākou ua like me ka lāʻau ʻoʻoi; A ʻo ka mea pono, ua ʻoiʻoi ia ma mua o ka pā lāʻau ʻoiʻoi. ʻO ka lā o kou poʻe kiaʻi, A ʻo kou hoʻopaʻi ʻana, e hiki mai nō ia; ʻĀnō e hiki mai ai ko lākou pōpilikia.

⁵ Mai hilinaʻi ʻoukou i ka makamaka, Mai paulele i ka hoalauna; E hoʻopaʻa i ka puka o kou waha Mai ka mea e moe ana ma kou poli.

⁶ No ka mea, hoʻowahāwahā ke keiki kāne i kona makua kāne, Kūʻē mai ke kaikamahine i kona makuwahine, ʻO ka hūnōna wahine i kona makuahūnōwai wahine, ʻO nā ʻenemi o ke kanaka, ʻo nā kānaka nō ia o kona hale iho.

⁷ ¶ A e nānā aku au iā Iēhova; E kali aku au i ke Akua o kuʻu ola; E hoʻolohe mai koʻu Akua iaʻu.

⁸ Mai hauʻoli ʻoe ma luna oʻu, e koʻu ʻenemi; No ka mea, a i hāʻule iho au, e ala hou aʻe nō; A i noho au i ka pouli, ʻo Iēhova ka mālamalama noʻu.

⁹ ¶ E hoʻomanawanui nō au i ka inaina o Iēhova, No ka mea, ua hana hewa nō au iā ia, A hoʻāpono mai ia i kaʻu mea, a e hoʻopaʻi aku nō ia noʻu; A lawe mai nō ia iaʻu i waho i ka mālamalama, A e ʻike aku au i kona pono.

¹⁰ A e ʻike kou ʻenemi ia mea, A e uhi mai ka hilahila i ka mea i ʻōlelo mai ai iaʻu, “ʻAuhea ʻo Iēhova kou Akua?” E ʻike auaneʻi koʻu mau maka iā ia; ʻĀnō e hehi ʻia ʻo ia i lalo, e like me ka lepo o nā alanui.

¹¹ I ka lā e hana ʻia ai kou mau pā pōhaku, Ia lā e lawe loa ʻia aku ke kānāwai.

¹² Ia lā e hele mai ia i ou lā mai ʻAsuria mai, a i ʻAigupita, A mai ʻAigupita a ka muliwai, A mai ke kai a ke kai, A mai ka mauna a ka mauna.

¹³ Akā, e lilo ka ʻāina i neoneo no ka poʻe e noho ana i loko, A no ka hua o kā lākou mau hana.

¹⁴ ¶ E hānai ʻoe i kou poʻe kānaka me kou koʻokoʻo, Ka poʻe o kou hoʻoilina, Ka poʻe e noho mehameha ana ma ka ulu lāʻau, I waena o Karemela; E ʻai lākou ma Basana, a ma Gileada, E like me ka manawa kahiko.

¹⁵ “E like me nā lā o kou puka ʻana, mai ka ʻāina ʻo ʻAigupita mai, E hōʻike aku au iā ia i nā mea kupanaha.”

¹⁶ E ʻike mai nā lāhui kanaka, A e hilahila nō ko lākou ikaika a pau; A e kau lākou i ka lima ma luna o ka waha, E kuli hoʻi ko lākou mau pepeiao.

¹⁷ E palu lākou i ka lepo me he nahesa lā, E kolo lākou mai kā lākou mau lua mai, E like me nā mea kolo o ka honua, E weliweli lākou iā Iēhova ko kākou Akua, A e makaʻu lākou nou.

¹⁸ ʻO wai lā ke Akua e like me ʻoe, e kala ana i ka hewa, A e māʻalo aʻe ana i ka hala o ke koena o kona hoʻoilina? ʻAʻole ia e hoʻomau loa aku i kona inaina; No ka mea, ke makemake nei nō ia i ke aloha.

¹⁹ E hoʻi hou mai nō ia, a e aloha mai nō ia iā kākou; A hehi i lalo nō ia i ko kākou mau hewa; A e hoʻolei aku ʻoe i ko lākou hewa a pau I loko o ka hohonu o ke kai.

²⁰ A e hāʻawi mai nō ʻoe i ka ʻoiaʻiʻo iā Iakoba, A me ka lokomaikaʻi iā ʻAberahama, Ka mea āu i hoʻohiki ai i ko mākou mau kūpuna Mai ka wā kahiko mai.