MIKA 6 - Ka Baibala Hemolele

1 ʻO ko Iēhova hakakā ʻana me kona poʻe kānaka, no ko lākou aloha ʻole. 6 ʻO ka mea e hōʻoluʻolu ai i ke Akua. 9 ʻO ka leo o Iēhova e hoʻolohe ʻia. 10 ʻO ke aʻo ʻana i kā ʻIseraʻela no ka hewa a no ka hoʻomana kiʻi.

MOKUNA VI.

¹ ¶ E hoʻolohe mai ʻoukou ʻānō i ka mea a Iēhova i ʻōlelo mai ai; “E kū i luna, e hakakā i mua o nā mauna, A e hoʻolohe nā puʻu i kou leo.

² “A hoʻolohe ʻoukou, e nā mauna i ka hoʻopaʻapaʻa o Iēhova, A me ʻoukou nā kumu paʻa o ka honua; No ka mea, he hoʻopaʻapaʻa ko Iēhova me kona poʻe kānaka, A e hoʻopaʻapaʻa nō ia me kā ʻIseraʻela.

³ “E kuʻu poʻe kānaka, he aha kaʻu i hana aku ai iā ʻoe? He aha kaʻu i hoʻoluhi ai iā ʻoe? E hōʻike mai iaʻu.

⁴ “No ka mea, ua lawe mai au iā ʻoe mai ka ʻāina ʻo ʻAigupita mai, A ua hoʻōla au iā ʻoe ma ka hale o nā kauā mai; A ua hoʻouna aku au i mua ou iā Mose, iā ʻAʻarona, a me Miriama.

⁵ “E kuʻu poʻe kānaka, e hoʻomanaʻo ʻānō I ka mea a Balaka, ke aliʻi o Moaba, i noʻonoʻo ai, A i ka mea hoʻi a Balaʻama ke keiki a Beora i ʻōlelo mai ai iā ia, Mai Sitima mai a Gilegala; I ʻike ʻoukou i ka pono o Iēhova.”

⁶ ¶ Me ke aha lā wau e hele aku ai i mua o Iēhova, A kūlou iho i mua o ke Akua Kiʻekiʻe? E hele anei au i mua ona me nā mōhai kuni, Me nā keiki bipi o ka makahiki hoʻokahi?

⁷ E ʻoluʻolu anei ʻo Iēhova i nā tausani hipa kāne? A me ka ʻumi tausani muliwai ʻaila? E hāʻawi anei au i kuʻu makahiapo no kuʻu hala, I ka hua o kuʻu kino no ka hewa o koʻu ʻuhane?

⁸ Ua hōʻike mai nō ia iā ʻoe, e ke kanaka, i ka mea maikaʻi; A he aha ka mea a ke Akua i kauoha mai ai iā ʻoe, Ke ʻole e hana i ka pono, a e aloha i ka lokomaikaʻi, A e hoʻohaʻahaʻa i ka hele ʻana me ke Akua?

⁹ ¶ Ke kāhea mai nei ka leo o Iēhova i ke kūlanakauhale, A ʻo ka mea naʻauao e ʻike i kou inoa; “E hoʻolohe ʻoukou i ka hoʻopaʻi ʻana, a me ka mea nāna ia i hōʻike mai.

¹⁰ “ʻAʻole anei, i kēia wā, nā waiwai hewa Ma ka hale o ka poʻe hewa, A me ka ʻepa ʻuʻuku e hoʻowahāwahā ʻia?

¹¹ “E maʻemaʻe anei au me nā mea kaupaona hewa, A me ka ʻaʻa paona hoʻopunipuni?

¹² “No ka mea, ua piha kona poʻe kānaka waiwai i ka hana ʻino, A ua ʻōlelo wahaheʻe kona poʻe kānaka, A ua hoʻopunipuni ko lākou alelo ma ko lākou waha.

¹³ “No ia hoʻi, e hoʻonāwaliwali au iā ʻoe, ma ka hahau ʻana iā ʻoe, Ma ka hoʻoneoneo ʻana iā ʻoe no kou hewa.

¹⁴ “A e ʻai iho ʻoe, ʻaʻole e māʻona; Aia nō i loko ou ka maʻule ana; A e lawe aku ʻoe, ʻaʻole e hoʻopakele, A ʻo ka mea āu e hoʻopakele ai, ʻO ia kaʻu e hāʻawi aku no ka pahi kaua.

¹⁵ “E lūlū iho nō ʻoe; akā, ʻaʻole ʻoe e ʻohi mai; E hehi iho ʻoe i nā ʻoliva, ʻaʻole naʻe e poni ʻia ʻoe i ka ʻaila; A i ka waina hou, ʻaʻole naʻe ʻoe e inu i ka waina.

¹⁶ “No ka mea, ua mālama ʻia nā kānāwai o ʻOmeri, A me nā hana a pau a ko ka hale o ʻAhaba, A ua hele ʻoukou ma ko lākou manaʻo; No laila, e hoʻolilo aku ai au iā ʻoe i neoneo, A i kona poʻe kānaka i mea hoʻowahāwahā ʻia; A e lawe ʻoukou i ka hōʻino o kuʻu poʻe kānaka.”