MIKA 5 - Ka Baibala Hemolele

1 He wānana no ka hānau ʻana, a me ke aupuni o Kristo. 6 No ka māhuahua ʻana, no ka maʻemaʻe ʻana, a me ke kuʻikahi ʻana o kona ʻekalesia; a me ka luku ʻana o kona poʻe ʻenemi.

MOKUNA V.

¹ ¶ “ʻĀnō, e hoʻākoakoa ʻia ʻoe, e ke kaikamahine o ka poʻe hao wale; Ua hoʻopilikia ʻia kākou; E hahau mai lākou i ka luna kānāwai o kā ʻIseraʻela me ke koʻokoʻo ma ka pāpālina.

² “A ʻo ʻoe, Betelehema ʻEperata, Ka mea ʻuʻuku i waena o nā tausani o Iuda, Mai loko mai ou e hele mai ai i oʻu nei, Ka mea e aliʻi ana i loko o kā ʻIseraʻela; Ma mua mai kona puka ʻana, mai ka manawa kahiko loa mai.”

³ No ia hoʻi, e hoʻolilo aku ʻo ia iā lākou, A hiki i ka manawa e hānau ai ka mea e hānau ana; A laila hoʻi, e hoʻi hou mai ke koena o kona mau hoahānau I nā mamo a ʻIseraʻela.

⁴ A e kū mai nō ia, e hānai ma ka ikaika o Iēhova, Ma ka mana o ka inoa ʻo Iēhova kona Akua; A e noho iho lākou; No ka mea, ʻānō e nui auaneʻi ʻo ia A hiki i nā palena o ka honua.

⁵ A ʻo ia ka Mea e maluhia ai, I ka manawa e hele mai ai ko ʻAsuria, ma ko kākou ʻāina; A i ka wā e hele ai ia i loko o ko kākou mau hale aliʻi, A laila, e hoʻokūʻē kākou iā ia i nā kahu hipa ʻehiku, A me nā aliʻi, nā kānaka ʻewalu.

⁶ A e ʻai lākou i ka ʻāina ʻo ʻAsuria, me ka pahi kaua, A i ka ʻāina ʻo Nimeroda ma kona mau wahi komo; A e hoʻopakele nō ia mai ko Suria mai, I ka wā e komo mai ia i loko o ko kākou ʻāina, A i ka wā e hehi iho ia ma loko o ko kākou mau mokuna.

⁷ ¶ A ʻo ke koena o Iakoba I waena o nā lāhui kanaka he nui, E like ia me ka hau mai o Iēhova mai, Me ka ua ma luna o ka weuweu, Ka mea kali ʻole no ke kanaka, ʻAʻohe hoʻi e hoʻokaʻulua no ke keiki a ke kanaka.

⁸ A lilo ke koena o Iakoba I waena o ko nā ʻāina ʻē, I waena o nā lāhui kanaka he nui, E like me ka liona i waena o nā holoholona o ka ulu lāʻau, E like me ka liona ʻōpio i waena o ka ʻohana hipa; No ka mea, i kona hele ʻana aʻe, Hehi iho i lalo, a e haehae wale, ʻAʻohe mea nāna e hoʻopakele.

⁹ E hoʻokiʻekiʻe ʻia kou lima ma luna o kou poʻe kūʻē mai, A e hōʻoki ʻia aku kou poʻe ʻenemi a pau.

¹⁰ ¶ “A i kēlā manawa,” wahi a Iēhova, “E ʻoki aku au i kou poʻe lio mai waena mai ou, A e luku aku au i kou poʻe hale kaʻa.

¹¹ “A e ʻoki aku au i nā kūlanakauhale o kou ʻāina, A e hoʻohiolo au i kou mau wahi paʻa a pau.

¹² “A e ʻoki aku i ka poʻe ʻanāʻanā mai kou lima aku, ʻAʻole ʻoe e mālama hou i nā kupua.

¹³ “A e ʻoki aku au i kou mau kiʻi kālai ʻia, A i kou mau kiʻi mai waena mai ou, ʻAʻole hoʻi ʻoe e hoʻomana hou aku I ka hana a kou mau lima.

¹⁴ “A e hoʻokuke aku au i kou mau kiʻi akua mai waena mai ou, A e luku aku au i kou mau kūlanakauhale.

¹⁵ “A e hoʻopaʻi aku au me ka huhū a me ka inaina i nā lāhui kanaka, Ka mea a lākou i lohe ʻole ai.”