MIKA 4 - Ka Baibala Hemolele

1 He wānana no ka pōmaikaʻi o ka ʻekalesia i nā lā ma hope. 9 Ka pōmaikaʻi o Ziona ma hope o kona hōʻino ʻia, a e luku ʻia kona poʻe ʻenemi.

MOKUNA IV.

¹ ¶ A i nā lā ma hope e hoʻokūpaʻa ʻia ka mauna o ka hale o Iēhova, ma luna o nā mauna, A e hoʻokiʻekiʻe ʻia ʻo ia ma luna o nā puʻu; a e holo nā kānaka i ona lā.

² A e hele nā lāhui kanaka he nui, a e ʻōlelo aku, “E hele mai, a e piʻi aku kākou i ka mauna o Iēhova, A i ka hale o ke Akua o Iakoba; A e aʻo mai ia iā kākou i kona mau ʻaoʻao, A e hele kākou ma kona mau alanui.” No ka mea, e hele ke kānāwai mai Ziona aku, A ʻo ka ʻōlelo a Iēhova mai Ierusalema aku.

³ A e hoʻoponopono nō ia i waena o nā kānaka he nui, A e aʻo aku i nā lāhui kanaka ikaika, lōʻihi loa aku; A e kuʻi lākou i kā lākou mau pahi kaua i ʻōʻō palau, A i kā lākou mau ihe i pahi paʻipaʻi; ʻAʻole e hāpai ka lāhui kanaka i ka pahi kaua kūʻē i ka lāhui kanaka, ʻAʻole hoʻi e aʻo hou lākou i ke kaua.

⁴ A e noho kēlā kanaka kēia kanaka ma lalo o kona kumu waina, A ma lalo o kona lāʻau fiku, ʻAʻohe mea nāna e hoʻomakaʻu mai; No ka mea, ʻo ka waha o Iēhova o nā kaua, kai ʻōlelo mai.

⁵ No ka mea, e hele nā kānaka a pau, ʻO kēlā kanaka kēia kanaka ma ka inoa o kona akua, A e hele kākou ma ka inoa ʻo Iēhova ko kākou Akua, ia ao aku ia ao aku.

⁶ ¶ “I kēlā lā,” wahi a Iēhova, “Hōʻuluʻulu au i ka mea ʻoʻopa, A e hoʻākoakoa i ka mea i hoʻokuke ʻia aku, A i ka mea aʻu i hoʻokaumaha ai.

⁷ “A e hoʻolilo au i ka mea ʻoʻopa i koena, A i ka mea i hoʻokuke lōʻihi ʻia aku, i lāhui kanaka ikaika; A e noho aliʻi ʻo Iēhova ma luna o lākou ma ka mauna ʻo Ziona, Mai ia manawa aku, a i ka wā mau loa aku nō.

⁸ “A ʻo ʻoe, e ka hale kiaʻi o ka poʻe holoholona, Ka puʻu o ke kaikamahine a Ziona, E hele mai nō ia i ou lā, ʻO ke aliʻi ʻana ma mua; E hele mai ke aupuni i ke kaikamahine o Ierusalema.

⁹ ¶ “ʻĀnō, no ke aha lā kou uwē nui ʻana? ʻAʻole anei he aliʻi i loko ou? Ua make anei kou kākāʻōlelo? No ka mea, ua loʻohia ʻoe e ka ʻeha, e like me ka wahine nahu kuakoko.

¹⁰ “E haʻalulu, a e kuakoko, E ke kaikamahine o Ziona, Me he wahine hānau lā; No ka mea, ʻānō e hele aku ʻoe mai ke kūlanakauhale aku, A e noho ʻoe ma ke kula, A e hele aku ʻoe a Babulona; A ma laila e hoʻopakele ʻia ʻoe; Ma laila e hoʻōla mai ai ʻo Iēhova iā ʻoe Mai ka lima mai o ko ʻoukou poʻe ʻenemi.

¹¹ “ʻĀnō hoʻi, ua nui nā lāhui kanaka i ʻākoakoa kūʻē mai iā ʻoe, Ka mea e ʻōlelo ana, ‘E hoʻohaumia ʻia ʻo ia, A e nānā aku ko kākou maka i Ziona.’

¹² “Akā, ʻaʻole lākou i ʻike i nā manaʻo o Iēhova, ʻAʻole i ʻike lākou i kona noʻonoʻo ʻana; No ka mea, e hoʻākoakoa ʻo ia iā lākou, me he pūʻā lā ma kahi hehi palaoa.

¹³ “E kū i luna, a e hehi iho, e ke kaikamahine o Ziona; No ka mea, e hoʻolilo aku au i kou pepeiaohao i hao, A e hoʻolilo hoʻi au i kou mau māiʻuʻu wāwae i keleawe; A e kuʻi iho ʻoe a liʻiliʻi nā kānaka he nui; A e hoʻolaʻa aku au i kā lākou loaʻa no Iēhova, A i ko lākou waiwai no ka Haku o ka honua a pau.