MIKA 3 - Ka Baibala Hemolele

1 ʻO ke aʻo ʻana i nā aliʻi no kā lākou hana ʻino, a i nā kaula no ko lākou wahaheʻe. 8 Ua uluhia ʻo ia e ka ʻUhane e ʻōlelo aku i nā aliʻi, i nā kāhuna, a me nā kāula, no ko lākou hewa; a hōʻike mai hoʻi i ka luku ʻana i ke kūlanakauhale, a me ka luakini.

MOKUNA III.

¹ ¶ A ʻōlelo akula au, “Ke noi aku nei au, e hoʻolohe ʻoukou, e nā luna o kā Iakoba, A, e nā luna kānāwai o ka hale o kā ʻIseraʻela, ʻAʻole anei no ʻoukou ka ʻike i ka hoʻopono?

² “Ke inaina nei ʻoukou i ka maikaʻi, a makemake i ka hewa; Ke lole nei i ko lākou ʻili mai o lākou aku, A me ka haehae i ko lākou ʻiʻo mai ko lākou mau iwi aku;

³ “Ka poʻe e ʻai ana i ka ʻiʻo o kuʻu poʻe kānaka, A hoʻolole i ko lākou ʻili mai o lākou aku, A haʻi iho i ko lākou mau iwi, A ʻoki liʻiliʻi iā lākou e like me ka mea no ka ipu hao, A e like hoʻi me ka ʻiʻo i loko o ka ipu keleawe.”

⁴ A laila, e kāhea aku lākou iā Iēhova, Akā, ʻaʻole ia e hoʻolohe mai iā lākou; A e hūnā nō ia i kona maka mai o lākou aku i kēlā manawa; No ka mea, ua hana hewa lākou ma ko lākou noʻonoʻo ʻana.

⁵ ¶ Pēnēia i ʻōlelo mai ai ʻo Iēhova no nā kāula, Ka poʻe i hoʻoʻauana i kuʻu poʻe kānaka, Ka poʻe i nahu me ko lākou niho, A kāhea aku, “Ua maluhia”; A ʻo ka mea hāʻawi ʻole aku no ko lākou waha, Hoʻomākaukau nō lākou i ke kaua iā ia.

⁶ No ia hoʻi, e hiki mai ai ka pō iā ʻoukou, ʻaʻohe hihiʻo; A iā ʻoukou ka pouli, ʻaʻohe wānana; A e napoʻo ana ka lā ma luna o nā kāula, A he pouli ke ao ma luna o lākou.

⁷ A laila, e hilahila nā mea ʻike, A e pilihua ka poʻe wānana; A e uhi lākou a pau i ko lākou lehelehe; No ka mea, ʻaʻole ke Akua i hōʻike mai.

⁸ Akā hoʻi, ua piha wau i ka mana Ma ka ʻUhane o Iēhova, A me ka pono, a me ka ikaika, E haʻi aku iā Iakoba i kona hala, A i kā ʻIseraʻela i kona hewa.

⁹ Ke noi aku nei au iā ʻoukou, e hoʻolohe i kēia, e nā luna o kā Iakoba, A me nā luna kānāwai o kā ʻIseraʻela, Ka poʻe e hoʻowahāwahā ana i ka pono, A e hoʻololi ana i ka pololei a pau.

¹⁰ Ua kūkulu lākou iā Ziona me ke koko, A iā Ierusalema me ka hewa.

¹¹ Ua hoʻoponopono ka luna ona no ka uku, A ua aʻo aku kāna mau kāhuna no ke kumu, A ua wānana kāna mau kāula no ke kālā; Akā, e hilinaʻi lākou ma luna o Iēhova, i ka ʻī ʻana aʻe, “ʻAʻole anei ʻo Iēhova i waena o kākou? ʻAʻole e hiki mai ka ʻino ma luna o kākou.”

¹² No laila, no ʻoukou E hoʻōʻō palau ʻia ʻo Ziona me he kīhāpai lā, A e lilo ʻo Ierusalema i mau puʻu, A ʻo ka mauna o ka hale e like me nā wahi kiʻekiʻe o ka ulu lāʻau.