MIKA 2 - Ka Baibala Hemolele

1 ʻO ke aʻo ʻana i kānaka no ko lākou hewa; a ʻo ke kanikau ʻana, e hōʻike ana i ka ʻino e hiki mai ana ma luna o lākou. 12 Wānana no ka hoʻākoakoa ʻana i kā ʻIseraʻela i o Kristo lā, ʻo kona lanakila, a ʻo kona aupuni.

MOKUNA II.

¹ ¶ Auē ka poʻe e noʻonoʻo ana i ka ʻino, A e ʻimi ana i ka hewa, ma luna o ko lākou wahi moe! I ka mālamalama o ke ao, hana lākou ia mea; No ka mea, ma ka ikaika o ko lākou lima e hiki ai ia.

² A kuko aku lākou i nā mahina ʻai, i kāʻili wale, A me nā hale, a lawe hoʻi ia mau mea; A ʻālunu lākou i kā ke kanaka, a me kona hale, I kā ke kanaka a me kona ʻāina hoʻoili.

³ No ia mea, pēnēia i ʻōlelo mai ai ʻo Iēhova; “Aia hoʻi, ke manaʻo nei au i ka hewa no kēia ʻohana, ʻAʻole ʻoukou e hiki ke hoʻoneʻe aku i ko ʻoukou mau ʻāʻī mai ia mea aku; ʻAʻole hoʻi ʻoukou e hele hoʻokiʻekiʻe; No ka mea, he manawa ʻino kēia.

⁴ “Ia lā e lawe kekahi i mele no ʻoukou, A e kanikau i ke kanikau nui, i ka ʻī ʻana aʻe, ‘I ka luku ʻana ua luku ʻia kākou; Ua hoʻololi ʻia ka hoʻoilina o kuʻu poʻe kānaka; Nani ka lawe ʻia aku ia mai oʻu lā! A no ka mea hoʻihoʻi, ua puʻunaue ʻia ko kākou mau mahina ʻai.’”

⁵ No laila, ʻaʻohe ou mea nāna e hoʻolei ke kaula ma ka hailona, I loko o ka ʻaha kanaka o Iēhova.

⁶ ¶ “Mai haʻi aku i ka wānana,” ʻAʻole lākou e wānana iā lākou, ʻAʻole e lawe i ka hilahila.

⁷ E ka mea i kapa ʻia ʻo ka hale o Iakoba, “Ua pauaho anei ka ʻUhane o Iēhova? ʻO kēia anei kāna mau hana? ʻAʻole anei he maikaʻi kaʻu mau ʻōlelo I ka mea e hele pono ana?

⁸ “ʻĀnō iho nei ua kūʻē mai kuʻu poʻe kānaka me he ʻenemi lā; Ke kāʻili nei ʻoukou i ka ʻaʻahu, A me ka lole komo o ka poʻe e hele maluhia ana, Me he poʻe lā e hoʻi ana, mai ke kaua mai.

⁹ “Ua hoʻokuke aku ʻoukou i nā wāhine o kuʻu poʻe kānaka, Mai ko lākou hale maikaʻi aku; Ua lawe loa aku ʻoukou i kuʻu nani mai kā lākou poʻe keiki aku.

¹⁰ “E kū mai ʻoukou, a hele aku; No ka mea, ʻaʻohe kēia ko ʻoukou wahi maha; No ka mea, ua haumia ia, e luku aku ia iā ʻoukou Me ka luku nui.

¹¹ “Inā e hele ke kanaka ma ka makani, a ma ka hoʻopunipuni, A wahaheʻe ʻo ia, i ka ʻī ʻana aʻe, ‘E wānana aku au iā ʻoe no ka waina, a me ka mea inu ʻawaʻawa’; ʻO ia nō ke kāula o kēia poʻe kānaka.

¹² ¶ “E hoʻākoakoa ʻiʻo ana au i kāu a pau, e Iakoba; E hōʻuluʻulu ʻiʻo ana au i ke koena o kā ʻIseraʻela; E hui pū aku au iā lākou e like me nā hipa a Bozera, E like me ka poʻe hipa i waenakonu o ko lākou pā hipa; E piʻoloke nui lākou no ka nui o nā kānaka.

¹³ “Ua piʻi aʻe ka mea wāwahi i mua o lākou; Ua wāwahi iho lākou, a ua komo lākou ma ka puka pā, a ua hele aku ma laila; A e hele ko lākou aliʻi i mua o lākou, ʻO Iēhova ma ko lākou poʻo.”