MIKA 1 - Ka Baibala Hemolele

1 ʻO ka ʻino e hiki mai ana ma luna o Samaria, a me Ierusalema no ko lākou hewa. ʻO ka auē a me ke kanikau no ka ʻino.

MOKUNA I.

¹ ¶ Ka ʻōlelo a Iēhova ka mea i hiki mai iā Mika no Moreseta, i nā lā o Iotama, ʻAhaza, a ʻo Hezekia, nā aliʻi o kā Iuda, ka mea āna i ʻike ai no Samaria, a no Ierusalema.

² E hoʻolohe, e nā kānaka a pau; E hāliu mai, e ka honua, a me kona mea i piha ai; A e lilo ʻo Iēhova ka Haku i mea hōʻike kūʻē iā ʻoukou, ʻO ka Haku mai kona luakini hoʻāno mai.

³ No ka mea, aia hoʻi, e hele mai ʻo Iēhova mai kona wahi mai, A e iho i lalo, a e hehi ma luna o nā wahi kiʻekiʻe o ka honua.

⁴ A heheʻe nā mauna ma lalo iho ona, A e wāhi ʻia nā awāwa, E like me ke kēpau i mua o ke ahi, A me ka wai i ninini ʻia ma kahi pali.

⁵ No ka lawehala ʻana o kā Iakoba kēia mea a pau, a no nā hewa o ko ka hale o ʻIseraʻela. He aha ka hala o kā Iakoba? ʻAʻole anei ʻo Samaria? A ʻo wai nā wahi kiʻekiʻe o Iuda? ʻAʻole anei ʻo Ierusalema?

⁶ “A e hoʻohālike au iā Samaria me he puʻu lā o ke kula, A me he wahi kanu lā no ka pā waina; A e hoʻolei iho au i nā pōhaku ona ma ke awāwa, A e hōʻike aku au i kona mau kahua.

⁷ “A e ʻulupā ʻia kona mau kiʻi kālai a pau, A ʻo kona waiwai moekolohe e puhi ʻia i ke ahi, A e luku aku au i kona mau kiʻi a pau; No ka mea, ua loaʻa iā ia ua mea lā no ka uku o ka wahine moekolohe, A e hoʻihoʻi ʻia aku ia i ka uku o ka wahine moekolohe.”

⁸ ¶ No kēia mea, e auwē iho au, a e ʻaoa, A e hele wale au, me ke kapa ʻaʻahu ʻole; E hoʻohālike au i ka auē ʻana me ko ka ʻīlio hihiu, A i ka ʻalalā ʻana me ko ka iana wahine.

⁹ No ka mea, ʻo kona ʻeha he ʻeha make ia, a ua hiki mai ia i kā Iuda; Ua hiki mai i ka puka pā o koʻu poʻe kānaka, a i Ierusalema.

¹⁰ Mai haʻi aku ʻoukou ia ma Gata, Mai auē ʻoukou i ka auē ʻana; Ma ka Hale o ʻApera e kau i ka lepo ma luna iho ou.

¹¹ E hele aku ʻoe, e ka mea e noho ana ma Sapira, me kou hilahila uhi ʻole; ʻAʻole i hele mai i waho ka mea e noho ana ma Zaʻanana, Ma ka auē ʻana o Bete ʻEzela: E lawe nō ia i kona noho ʻana mai o ʻoukou aku.

¹² No ka mea, ʻo ka mea e noho ana ma Marota, Ua nāwaliwali ia no ka ʻiʻini i ka maikaʻi; Akā, iho maila ka ʻino mai Iēhova Mai ma ka puka pā o Ierusalema.

¹³ E ka mea e noho lā ma Lakisa, E hoʻopaʻa i ka hale kaʻa i ka lio māmā; ʻO ia ke poʻo o ka hewa no ke kaikamahine o Ziona; No ka mea, ua loaʻa nā lawehala o kā ʻIseraʻela i loko ou.

¹⁴ No ia mea, e hāʻawi aku ʻoe i nā makana No Moreseta Gata; E lilo nā hale o ʻAkeziba i mea hoʻopunipuni No nā aliʻi o kā ʻIseraʻela.

¹⁵ Akā hoʻi, e lawe mai nō au i hoʻoilina nou, E ka mea e noho ana ma Maresa; A e hele mai ka nani o kā ʻIseraʻela i ʻAdulama.

¹⁶ E hoʻoʻōhule ʻoe, a e ʻako i ke oho No nā keiki o kou makemake; E hoʻomāhuahua ʻoe i kou ʻōhule ʻana, e like me ka ʻaeto; No ka mea, ua hele pio akula lākou mai ou aku lā.