KA ʻEUANELIO I KĀKAU ʻIA AI E MATAIO 9 - Ka Baibala Hemolele

1 Ua hoʻōla ʻia ka maʻi lōlō. 9 Ke kāhea ʻana iā Mataio, a me ka ʻai ʻana me nā luna ʻauhau. 14 Hele mai nā haumāna a Ioane. 18 Ka hoʻōla ʻana i ke kaikamahine i make, a me ka wahine heʻe koko. 27 Ua hoʻokaʻakaʻa ʻia nā makapō. 35 Kaʻahele ʻo Iesū.

MOKUNA IX.

¹ ¶ Eʻe aʻela ia ma luna o ka moku, holo akula ia, a hiki akula i kona kūlanakauhale.

² Aia hoʻi, hali maila lākou i ona lā i kekahi maʻi lōlō, e moe ana i luna o kahi moe. A ʻike akula ʻo Iesū i ko lākou manaʻoʻiʻo, ʻī akula ia i ka maʻi lōlō, “E kuʻu keiki, e hoʻolana i kou manaʻo, ua kala ʻia kou hewa.”

³ A laila, ʻōhumu ihola kekahi poʻe kākau ʻōlelo i loko o lākou iho, “He ʻōlelo hōʻino kā ia nei.”

⁴ ʻIke ihola Iesū i ko lākou manaʻo, nīnau akula, “No ke aha lā ʻoukou e manaʻo ʻino ai i loko o ko ʻoukou naʻau?

⁵ “Ma hea ka hiki pono ke ʻōlelo, ‘Ua kala ʻia kou hewa,’ a ke ʻōlelo paha, ‘E ala aʻe a e hele?’

⁶ “I ʻike hoʻi ʻoukou, he mana nō ko ke Keiki a ke Kanaka e kala aku ai i nā hewa ma ka honua nei, ‘E kū aʻe, (wahi āna i ka maʻi lōlō,) e lawe ʻoe i kou wahi moe, a e hoʻi i kou hale.’”

⁷ A kū aʻela ia, a hoʻi akula i kona hale.

⁸ A ʻike akula nā kānaka, mahalo akula, a hoʻonani akula lākou i ke Akua, nāna i hāʻawi mai ia mana no nā kānaka.

⁹ ¶ A hele akula ʻo Iesū mai ia wahi aku, ʻike maila ia i kekahi kanaka e noho ana ma kahi hoʻokupu, ʻo Mataio kona inoa; ʻī maila ʻo ia iā ia, “E hahai mai ʻoe iaʻu!” Kū aʻela ia a hahai akula iā ia.

¹⁰ ¶ A i ko Iesū noho ʻana i ka ʻahaʻaina i loko o ka hale, aia hoʻi, he nui nā luna ʻauhau a me nā lawehala i hele mai, a noho pū me ia a me kāna poʻe haumāna.

¹¹ A ʻike akula ka poʻe Parisaio, ʻī maila lākou i kāna poʻe haumāna, “No ke aha lā e ʻai pū ai kā ʻoukou Kumu me nā luna ʻauhau a me nā lawehala?”

¹² Lohe aʻela ʻo Iesū, ʻī akula ʻo ia iā lākou, “ʻAʻole no ka poʻe ola ke kahuna lapaʻau, no ka poʻe maʻi nō ia.

¹³ “E hele hoʻi ʻoukou e aʻo i ke ʻano o kēia, ‘«ʻO ke aloha koʻu makemake, ʻaʻole ka mōhai»;’ ua hele mai nei au e aʻo aku i ka poʻe hewa e mihi, ʻaʻole i ka poʻe pono.”

¹⁴ ¶ A laila, hele maila nā haumāna a Ioane i ona lā, ʻī maila, “Ke hoʻokē ʻai pinepine nei mākou a me ka poʻe Parisaio, he aha hoʻi ka mea e hoʻokē ʻai ʻole ai kāu poʻe haumāna?”

¹⁵ ʻĪ akula Iesū iā lākou, “E hiki anei i nā keiki o ke kāne mare ke kaniʻuhū, i ka wā e noho pū ai ia me lākou? E hiki mai ana ka manawa e lawe ʻia aku ai ke kāne mare mai o lākou aku, i laila lākou e hoʻokē ʻai ai.

¹⁶ “ʻAʻole nō kekahi e pīnaʻi i ka ʻāpana lole hou ma luna o ka lole kahiko, o moku ka mea kahiko i ka mea hou, a nui aku ka nahae.

¹⁷ “ʻAʻole hoʻi e ukuhi nā kānaka i ka waina hou ma loko o nā hue ʻili kahiko, o nahae nā hue, a kahe aku ka waina, a pau nā hue; akā, ukuhi nō lākou i ka waina hou i loko o nā hue hou, a koe pū ia mau mea i ka mālama ʻia.”

¹⁸ ¶ I kāna ʻōlelo ʻana ia mau mea iā lākou, aia hoʻi, hele mai kekahi luna, moe ihola ia, ʻī maila iā ia, “Ua make iho nei kaʻu kaikamahine; akā, e hele mai ʻoe, a kau i kou lima ma luna ona, a e ola ia.”

¹⁹ Kū aʻela ʻo Iesū i luna, hahai akula iā ia me kāna poʻe haumāna.

²⁰ Aia hoʻi, he wahine heʻe koko i nā makahiki he ʻumikumamālua, hele akula ia ma hope iho ona, a hoʻopā akula i ka lepa o kona ʻaʻahu;

²¹ no ka mea, ʻī ihola ia i loko ona, “A i hoʻopā wale aku au i kona ʻaʻahu, e ola au.”

²² Hāliu aʻela ʻo Iesū, ʻike aʻela iā ia, ʻī akula, “E ke kaikamahine, e hoʻolana i kou manaʻo; ua hoʻōla mai kou manaʻoʻiʻo iā ʻoe.” A ola koke ihola ua wahine lā ia hora.

²³ A hiki akula ʻo Iesū i ka hale o ua luna lā, ʻike aʻela ia i ka poʻe hoʻokiokio, a me nā kānaka e kūmākena ana,

²⁴ ʻī akula ʻo ia iā lākou, “Ō uhoʻi ʻoukou, ʻaʻole i make ke kaikamahine, ua hiamoe nō.” A hoʻowahāwahā maila lākou iā ia.

²⁵ A pau aʻela ka poʻe kānaka i ka hoʻokuke ʻia i waho, komo akula ia i loko, lālau ihola i kona lima, a ala aʻela ua kaikamahine nei.

²⁶ A kaulana akula ia mea ma ia ʻāina a pau.

²⁷ ¶ A hele akula ʻo Iesū mai ia wahi aku, ʻelua kānaka makapō i hahai iā ia, kāhea maila lāua, ʻī maila, “E ka Mamo a Dāvida, e aloha mai ʻoe iā māua!”

²⁸ Komo aʻela ia i loko o ka hale, a hele mai ua mau makapō lā i ona lā, nīnau akula Iesū iā lāua, “Ke manaʻoʻiʻo nei anei ʻolua, e hiki nō iaʻu ke hana i kēia mea?” ʻĪ akula lāua iā ia, “ʻAe, e ka Haku.”

²⁹ A laila, hoʻopā akula ia i ko lāua mau maka, ʻī akula, “E like me ko ʻolua manaʻoʻiʻo ʻana mai, pēlā e hana ʻia aku ai no ʻolua.”

³⁰ Kaʻakaʻa aʻela ko lāua mau maka. Pāpā akula Iesū iā lāua, ʻī akula, “E mālama ʻolua o ʻikea ia e haʻi!”

³¹ Akā, hele akula lāua, a hoʻokaulana akula iā ia ma ia ʻāina a puni.

³² ¶ A hele akula lākou i waho, aia hoʻi, hali ʻia mai i ona lā he kanaka ʻāʻā, ua uluhia e ka daimonio.

³³ A mahiki ʻia aku ka daimonio, ʻōlelo maila ua ʻāʻā lā, a mahalo aʻela ka poʻe kānaka, ʻī aʻela, “ʻAʻole i ʻikea ka mea like me nēia i waena o kā ʻIseraʻela.”

³⁴ Akā, ʻōlelo akula ka poʻe Parisaio, “Ke mahiki aku nei ʻo ia nei i nā daimonio ma ke aliʻi o nā daimonio.”

³⁵ ¶ Kaʻahele aʻela ʻo Iesū ma nā kūlanakauhale a pau, a me nā kauhale, e aʻo ana i loko o nā hale hālāwai o lākou, a e haʻi mai ana i ka ʻeuanelio no ke aupuni, me ka hoʻōla i nā maʻi a pau, a me nā nāwaliwali a pau o nā kānaka.

³⁶ A ʻike maila ia i ka ʻaha kanaka, hū aʻela kona aloha iā lākou; no ka mea, ua māluhiluhi lākou, ua ʻauana hoʻi e like me nā hipa kahu ʻole.

³⁷ A laila, ʻī maila ia i kāna poʻe haumāna, “He nui ke kīhāpai ʻai, ua hapa nō naʻe ka poʻe lawehana.

³⁸ “No ia mea, e noi ʻoukou i ka Haku nāna ke kīhāpai ʻai, e hoʻouna ʻo ia i nā lawehana i loko o kāna kīhāpai.”