KA ʻEUANELIO I KĀKAU ʻIA AI E MATAIO 8 - Ka Baibala Hemolele

2 Ua hoʻōla ʻia ka maʻi lēpera, 5 a me ka maʻi lōlō. 5 Ka manaʻoʻiʻo o ka luna haneri. 14 Hoʻōla ʻia ka makuahōnōai wahine o Petero. 18 Ke kākau ʻōlelo hahai, a me ka haumāna lohi. 23 Pāpā akula Iesū i ka makani a mālie ia. 28 Nā kānaka ʻelua i uluhia e nā daimonio.

MOKUNA VIII.

¹ ¶ A iho maila ia mai ka mauna mai, he nui loa ka poʻe i ukali iā ia.

² Aia hoʻi kekahi lēpero i hele mai i ona lā, moe ihola i mua ona, ʻī maila, “E ka Haku, a i makemake ʻoe, e hiki nō iā ʻoe ke huikala mai iaʻu.”

³ ʻŌ akula Iesū i kona lima, hoʻopā ihola iā ia, ʻī akula, “Ke makemake nei au, e huikala ʻia hoʻi ʻoe.” Ola koke ihola kona maʻi lēpera.

⁴ ʻĪ akula ʻo Iesū iā ia, “E ao ʻoe, mai haʻi aku iā haʻi. Akā, e hele ʻoe e hōʻike aku iā ʻoe iho i ke kahuna, e hāʻawi i ka mōhai a Mose i kauoha mai ai, i mea e ʻike ai lākou.”

⁵ ¶ A hiki akula ʻo Iesū i Kaperenauma, hele maila kekahi luna haneri i ona lā, noi maila iā ia,

⁶ ʻī maila, “E ka Haku, ke moe ihola nō kuʻu kauā ma ka hale i ka maʻi lōlō, ua ʻehaʻeha loa.”

⁷ ʻĪ akula ʻo Iesū iā ia, “E hele aku nō au e hoʻōla iā ia.”

⁸ ʻŌlelo maila ka luna haneri, ʻī maila, “E ka Haku, ʻaʻole oʻu pono e komo aʻe ʻoe i loko o koʻu hale; e ʻōlelo wale mai nō ʻoe, a e ola nō kuʻu kauā.

⁹ “No ka mea, he kanaka aku wau ma lalo o ke aliʻi, he poʻe koa ma lalo iho oʻu; a ʻōlelo aku nō au i kekahi, ‘E hele aku,’ a hele aku nō ia, a i kekahi hoʻi, ‘E hele mai,’ a hele mai nō ia; a i kuʻu kauā, ‘E hana ia mea,’ a hana nō ia.”

¹⁰ A lohe aʻela ʻo Iesū, mahalo aʻela ia, ʻī maila i ka poʻe e ukali aku ana, “He ʻoiaʻiʻo kaʻu e ʻōlelo aku nei iā ʻoukou, ʻaʻole au i ʻike i ka manaʻoʻiʻo nui e like me kēia i loko o kā ʻIseraʻela.

¹¹ “Ke ʻī aku nei au iā ʻoukou, he nui ka poʻe e hele mai, mai ka hikina a me ke komohana mai, a e noho pū lākou me ʻAberahama, a me ʻIsaʻaka, a me Iakoba i loko o ke aupuni o ka lani.

¹² “A ʻo nā keiki o ke aupuni, e kipaku ʻia aku lākou i loko o ka pouli i waho, ma laila e uē ai, a e ʻuī ai nā niho.”

¹³ ʻŌlelo akula ʻo Iesū i ka luna haneri, “Ō hoʻi ʻoe; a e like me kāu i manaʻoʻiʻo mai ai, pēlā hoʻi e hana ʻia aku ai nou.” Ola ihola nō kāna kauā ia hora.

¹⁴ ¶ Komo aʻela ʻo Iesū i loko o ka hale o Petero, ʻike ihola ia i kona makuahōnōai wahine e moe ana i ka maʻi kuni.

¹⁵ Hoʻopā akula ia i kona lima, haʻalele ihola ke kuni iā ia, ala aʻela ia, a lawelawe na lākou.

¹⁶ A ahiahi aʻela, halihali ʻia mai i ona lā nā mea he nui wale i uluhia e nā daimonio; mahiki akula ia i nā ʻuhane ma ka ʻōlelo, a hoʻōla ihola i ka poʻe maʻi a pau.

¹⁷ Pēlā i kō ai ka ʻōlelo a ke kāula a ʻIsaia, i ʻī mai ai, “«Nāna nō i lawe ko kākou nāwaliwali, nāna hoʻi i halihali ko kākou maʻi».”

¹⁸ ¶ A ʻike aʻela ʻo Iesū, ua puni ia i ka poʻe kānaka he nui wale, kēnā maila ia e holo ma kēlā kapa.

¹⁹ Hele maila kekahi kākau ʻōlelo, ʻī akula iā ia, “E ke Kumu, e hahai aku nō au iā ʻoe i nā wahi a pau āu e hele ai.”

²⁰ ʻĪ maila Iesū iā ia, “He mau lua ko nā ʻalopeke, he mau pūnana ko nā manu o ka lewa; akā, ʻo ke Keiki a ke Kanaka, ʻaʻohe ona wahi e hoʻomoe ai i kona poʻo.”

²¹ ʻŌlelo akula iā ia kekahi haumāna āna, “E ka Haku, e ʻae mai ʻoe iaʻu e hele mua au e kanu i kuʻu makua kāne.”

²² ʻŌlelo maila Iesū iā ia, “E hahai mai ʻoe iaʻu, na ka poʻe make nō e kanu i ko lākou poʻe make.”

²³ ¶ Eʻe akula ia ma luna o ka moku, a hahai akula kāna mau haumāna iā ia.

²⁴ Aia hoʻi, he ʻino nui ma ka moana wai, a popoʻi ʻia aʻela ka moku e nā ʻale; akā, ua hiamoe ʻo ia.

²⁵ A hele akula nā haumāna āna e hoʻāla iā ia, ʻī akula, “E ka Haku, e hoʻōla mai iā mākou, o make mākou!”

²⁶ ʻĪ maila ʻo ia iā lākou, “He aha kā ʻoukou e makaʻu ai, e ka poʻe paulele kāpekepeke?” Kū aʻela ia i luna, pāpā akula ia i ka makani a me ka loko, a mālie loa ihola.

²⁷ Mahalo akula ua poʻe kānaka lā, ʻī akula, “He aha ke ʻano o ia nei, i hoʻolohe mai ai ka makani a me ka moana wai iā ia?”

²⁸ ¶ A hiki akula ia i kēlā kapa, i ka ʻāina o ko Gadara, hālāwai maila me ia ʻelua kānaka i uluhia e nā daimonio, i hōʻea mai, mai nā hale kupapaʻu mai, ua nui loa ke kū o ka hau, ʻaʻohe kanaka i ʻaʻa aku e māʻalo ma ia wahi.

²⁹ Aia hoʻi, kāhea maila lāua, ʻī maila, “He aha kāu iā mākou nei, e Iesū ke Keiki a ke Akua? Ua hiki ʻē mai nei anei ʻoe e hana ʻeha mai iā mākou ma mua o ka manawa?”

³⁰ A i kahi mamao aku, he kumu puaʻa e ʻai ana.

³¹ Noi maila ia mau daimonio iā ia, ʻī maila, “A i mahiki aku ʻoe iā mākou, e ʻae mai ʻoe e haele mākou e komo aku i loko o ke kumu puaʻa.”

³² ʻĪ akula ia iā lākou, “Ō uhaele!” A hemo lākou i waho, komo akula lākou i loko o ua kumu puaʻa lā; aia hoʻi, naholo kikī akula ua kumu puaʻa lā a pau i lalo ma ka pali i ka moana wai, a pau lākou i ka make ma loko o ka wai.

³³ ʻAuheʻe akula ka poʻe kahu puaʻa, a hiki akula i ke kūlanakauhale, haʻi akula lākou ia mau mea a pau, a me ka mea o ua mau kānaka lā i uluhia e nā daimonio.

³⁴ Aia hoʻi, hele nui maila ko ke kūlanakauhale i waho, e hālāwai me Iesū, a ʻike maila iā ia, nonoi nui maila lākou iā ia e hele aku ia mai ko lākou ʻāina aku.