KA ʻEUANELIO I KĀKAU ʻIA AI E MATAIO 7 - Ka Baibala Hemolele

1 Ua pāpā ʻia ka manaʻo ʻino. 6 Ka momi. 7 Ka noi pono. 15 Nā kāula wahaheʻe. 21 Ka poʻe komo i ke aupuni o ka lani. 24 Ka mea mālama a me ka mea mālama ʻole. 28 Ka hope o ka ʻōlelo ma ka mauna.

MOKUNA VII.

¹ ¶ “Mai manaʻo ʻino aku, o manaʻo ʻino ʻia mai ʻoukou.

² “No ka mea, me ka manaʻo ʻino a ʻoukou e manaʻo ʻino aku ai, pēlā hoʻi e manaʻo ʻino ʻia mai ai ʻoukou. Me ke ana a ʻoukou e ana aku ai, pēlā nō hoʻi e ana ʻia mai ai no ʻoukou.

³ “He aha kāu e nānā aku ai i ka pula iki i loko o ka maka o kou hoahānau, ʻaʻole hoʻi ʻoe i ʻike i ke kaola i loko o kou maka iho?

⁴ “Pehea lā hoʻi ʻoe e ʻōlelo aku ai i kou hoahānau, ‘E ʻae mai naʻu e unuhi ka pula iki no loko mai o kou maka,’ a he kaola nō kā hoʻi i loko o kou maka iho?

⁵ “E ka hoʻokamani, e unuhi mua ʻoe i ke kaola mai loko aʻe o kou maka iho, a laila ʻoe e ʻike pono ai ke unuhi aʻe i ka pula iki ma loko o ka maka a kou hoahānau.

⁶ ¶ “Mai hāʻawi aku i ka mea hoʻāno na nā ʻīlio, ʻaʻole hoʻi e hoʻolei i kā ʻoukou mau momi i mua o nā puaʻa, o hehi ʻia i lalo e ko lākou mau wāwae, a e kepa mai hoʻi lākou e moku ʻoukou.

⁷ ¶ “E noi, a e hāʻawi ʻia na ʻoukou; e ʻimi, a e loaʻa hoʻi iā ʻoukou; e kīkēkē, a e wehe ʻia no ʻoukou.

⁸ “No ka mea, ʻo ka mea noi, ua hāʻawi ʻia nāna; ʻo ka mea ʻimi, ua loaʻa nō iā ia; a ʻo ka mea kīkēkē, ua wehe ʻia nona.

⁹ “ʻO wai lā ke kanaka o ʻoukou e hāʻawi aku i ka pōhaku na kāna keiki, ke noi mai ia i berena?

¹⁰ “A i noi mai ia i iʻa, e hāʻawi aku anei ʻo ia i nahesa nāna?

¹¹ “Inā paha ʻoukou he poʻe hewa i ʻike i ka hāʻawi aku i nā mea maikaʻi na kā ʻoukou mau keiki, he ʻoi nui aku ko ʻoukou Makua i ka lani ma kona hāʻawi ʻana mai i nā mea maikaʻi na ka poʻe e noi aku iā ia.

¹² “ʻO nā mea a pau a ʻoukou e makemake ai e hana ʻia mai iā ʻoukou e nā kānaka, ʻo ia kā ʻoukou e hana aku ai iā lākou; no ka mea, pēlā nō kā ke Kānāwai a me kā ka poʻe Kāula.

¹³ ¶ “E komo aʻe ʻoukou ma ka puka pilikia; no ka mea, he ākea ka puka, he pālahalaha hoʻi ke alanui e hiki aku ai i ka make; a nui wale hoʻi ka poʻe komo i laila.

¹⁴ “Akā, he pilikia ka puka, he ʻololī hoʻi ke ala e hiki aku ai i ke ola, a kākaʻikahi wale ka poʻe loaʻa ia.

¹⁵ ¶ “E mālama hoʻi iā ʻoukou no ka poʻe kāula hoʻopunipuni ke hele mai i o ʻoukou nei me ka ʻaʻahu hipa; akā, ma loko, he poʻe ʻīlio hihiu hae lākou.

¹⁶ “Ma ko lākou hua e ʻike aku ai ʻoukou iā lākou. E ʻohi ʻia anei ka hua waina no luna mai o ke kākalaioa, a ʻo nā fiku hoʻi no luna mai o ka pua kala?

¹⁷ “ʻO ia hoʻi, ʻo nā lāʻau maikaʻi a pau, ua hua mai nō lākou i nā hua maikaʻi; akā, ʻo ka lāʻau ʻino, ua hua mai nō hoʻi ia i nā hua ʻino.

¹⁸ “ʻAʻole e hiki i ka lāʻau maikaʻi ke hua mai i ka hua ʻino; ʻaʻole hoʻi e hiki i ka lāʻau ʻino ke hua mai i ka hua maikaʻi.

¹⁹ “ʻO kēlā lāʻau a ʻo kēia lāʻau ke hua ʻole mai ia i ka hua maikaʻi, ua kua ʻia ʻo ia i lalo, a ua kiola ʻia aku hoʻi ia i loko o ke ahi.

²⁰ “No laila hoʻi, ma ko lākou hua, e ʻike aku ai ʻoukou iā lākou.

²¹ “ʻO ka poʻe e ʻōlelo mai iaʻu, ‘E ka Haku, E ka Haku,’ ʻaʻole e pau lākou i ke komo mai i loko o ke aupuni o ka lani; akā, ʻo ka mea e mālama i ka makemake o koʻu Makua i loko o ka lani.

²² “He nui ka poʻe e ʻōlelo mai ana iaʻu ia lā, ‘E ka Haku, E ka Haku, ʻaʻole anei mākou i aʻo aku ma kou inoa? I mahiki aku hoʻi i nā ʻuhane ʻino ma kou inoa? A i hana aku i nā hana mana he nui ma kou inoa?’

²³ “A laila, e haʻi aku au iā lākou, ‘ʻAʻole au i ʻike iā ʻoukou; «e haele ʻoukou pēlā mai oʻu aku nei, e ka poʻe hana ʻino».’

²⁴ ¶ “No laila hoʻi, ʻo ka mea lohe i kēia mau ʻōlelo aʻu, a mālama hoʻi ia, e hoʻohālike au iā ia me ke kanaka naʻauao, nāna i kūkulu kona hale ma luna o ka pōhaku.

²⁵ “A hāʻule maila ka ua, kahe maila ka wai, nou maila ka makani, a pā ma ua hale lā, ʻaʻole naʻe ia i hiolo; no ka mea, ua hoʻokumu ʻia ʻo ia ma luna o ka pōhaku.

²⁶ “A ʻo ka mea lohe ia mau ʻōlelo aʻu, a mālama ʻole hoʻi ia, e hoʻohālike ʻia hoʻi ia me ke kanaka naʻaupō, nāna i kūkulu kona hale ma luna o ke one.

²⁷ “A hāʻule maila ka ua, kahe maila ka wai, nou maila ka makani, a pā ma ua hale nei, a hiolo ihola ia; nani wale hoʻi kona hiolo ʻana.”

²⁸ ¶ A hoʻōki aʻela Iesū ia mau ʻōlelo, kāhāhā ihola nā kānaka i kāna aʻo ʻana.

²⁹ No ka mea, aʻo akula ia iā lākou me he mea mana lā, ʻaʻole e like me ka poʻe kākau ʻōlelo.