KA ʻEUANELIO I KĀKAU ʻIA AI E MATAIO 4 - Ka Baibala Hemolele

1 Ka hoʻowalewale ʻia ʻo Iesū e ka diabolō. 12 Hoʻi aku ia i Galilaia. 18 Hea aku i nā haumāna. 23 Kaʻahele ia e aʻo i ka ʻeuanelio.

MOKUNA IV.

¹ ¶ A laila, alakaʻi ʻia akula ʻo Iesū e ka ʻUhane i ka wao nahele, e hoʻowalewale ʻia aku ai e ka diabolō.

² Hoʻokē ʻai ihola ia i hoʻokahi kanahā lā, a me nā pō he kanahā, a ma hope iho, pōloli ihola ia.

³ A hiki aku ka mea hoʻowalewale i ona lā, ʻī akula ia, “Inā ʻo ke Keiki ʻoe a ke Akua, e ʻī mai ʻoe i kēia mau pōhaku i lilo i berena.”

⁴ Akā, ʻōlelo maila ʻo Iesū, ʻī maila, “Ua palapala ʻia, ‘«ʻAʻole e ola ke kanaka i ka berena wale nō; akā, ma nā mea a pau mai ka waha mai o ke Akua».’”

⁵ A laila, lawe akula ka diabolō iā ia i ke kūlanakauhale hoʻāno; a hoʻokau akula iā ia ma luna iho o kahi ʻoiʻoi o ka luakini;

⁶ ʻī akula iā ia, “Inā ʻo ʻoe ke Keiki a ke Akua, e lele iho ʻoe i lalo; no ka mea, ua palapala ʻia, ‘«E kauoha mai nō ia i kona poʻe ʻānela nou, E kaʻikaʻi lākou iā ʻoe ma ko lākou mau lima, O kū ʻia kou wāwae i ka pōhaku».’”

⁷ ʻĪ maila ʻo Iesū, “Ua palapala ʻia nō hoʻi, ‘«Mai hoʻāʻo aku ʻoe i ka Haku i kou Akua».’”

⁸ Lawe hou akula ka diabolō iā ia i kahi mauna kiʻekiʻe loa, a hōʻike akula iā ia i nā aupuni a pau o ka honua, a me ko lākou nani;

⁹ ʻī akula hoʻi iā ia, “ʻO kēia mau mea a pau kaʻu e hāʻawi aku ai iā ʻoe, ke kukuli iho ʻoe, a hoʻomana mai iaʻu.”

¹⁰ A laila, ʻōlelo maila Iesū iā ia, “E hele pēlā ʻoe, e Sātana; no ka mea, ua palapala ʻia, ‘«E hoʻomana aku ʻoe i ka Haku i kou Akua, a e mālama aku ʻoe iā ia wale nō».’”

¹¹ A laila, haʻalele akula ka diabolō iā ia; aia hoʻi, hele maila nā ʻānela, a lawelawe nāna.

¹² ¶ Lohe aʻela ʻo Iesū, ua hoʻolei ʻia ʻo Ioane i loko o ka hale paʻahao, hele akula ia i Galilaia.

¹³ Haʻalele aʻela ʻo ia iā Nazareta, hele akula a noho ma Kaperenauma ma ke kaha loko, ma ka mokuna ʻo Zebuluna a me Napetali.

¹⁴ Pēlā i kō ai ka mea i ʻōlelo ʻia e ke kāula e ʻIsaia, i ka ʻī ʻana mai:

¹⁵ “«ʻO ka ʻāina ʻo Zebuluna, a ʻo ka ʻāina ʻo Napetali, Ma ke ala o ka loko ma kēlā ʻaoʻao o Ioredane, ʻo Galilaia no nā kānaka ʻē;

¹⁶ ʻO ka poʻe kānaka e noho ana ma ka pouli, ʻike aʻela lākou i ka mālamalama nui; A ma luna o ka poʻe e noho ana ma ka malu o ka make, Ua puka mai ka mālamalama».”

¹⁷ ¶ Mai ia manawa mai, hoʻomaka ʻo Iesū e haʻi mai a e ʻōlelo mai, “E mihi ʻoukou; no ka mea, ua kokoke mai nei ke aupuni o ka lani.”

¹⁸ ¶ Hele akula ʻo Iesū ma ke kaʻe o ka loko ʻo Galilaia, ʻike maila ia i nā hoahānau ʻelua, ʻo Simona i kapa ʻia ʻo Petero, a me kona kaikaina ʻo ʻAnederea, e kuʻu ana i ka ʻupena i ka loko; no ka mea, he mau lawaiʻa lāua.

¹⁹ ʻĪ maila ʻo ia iā lāua, “E hahai mai ʻolua iaʻu, a e hoʻolilo au iā ʻolua i mau lawaiʻa kanaka.”

²⁰ Haʻalele koke ihola lāua i nā ʻupena, a hahai akula iā ia.

²¹ A hele akula ia ma laila aku, ʻike maila ia i nā hoahānau ʻē aʻe ʻelua, ʻo Iakobo ke keiki a Zebedaio, a me kona kaikaina ʻo Ioane, ma luna nō o ka moku me ko lāua makua kāne ʻo Zebedaio, e hono ana i kā lākou mau ʻupena, a kāhea maila ʻo ia iā lāua.

²² Haʻalele koke akula lāua i ka moku, a me ko lāua makua kāne, a hahai akula iā ia.

²³ ¶ Kaʻahele aʻela ʻo Iesū ma Galilaia a puni, e aʻo mai ana i loko o ko lākou mau hale hālāwai, a e haʻi mai ana i ka ʻeuanelio no ke aupuni, a e hoʻōla ana hoʻi i ka maʻi a me ka nāwaliwali a pau o nā kānaka.

²⁴ Kuʻi akula kona kaulana i Suria a puni, halihali maila lākou i ona lā i ko lākou poʻe maʻi a pau, i loʻohia e kēlā maʻi kēia maʻi a me nā ʻeha, ʻo ka poʻe i uluhia e nā daimonio, a me ka poʻe hehena, a me ka poʻe lōlō; a hoʻōla maila ʻo ia iā lākou.

²⁵ He nui loa ka poʻe kānaka i hahai mai iā ia no Galilaia mai, no Dekapoli mai, a no Ierusalema mai, no Iudea mai, a no kēlā kapa mai o Ioredane.