KA ʻEUANELIO I KĀKAU ʻIA AI E MATAIO 3 - Ka Baibala Hemolele

1 Ka ʻoihana a Ioane Bapetite. 13 Ka bapetizo ʻia ʻana o Iesū.

MOKUNA III.

¹ ¶ Ia mau lā lā i hele mai ai ʻo Ioane Bapetite, e aʻo ana ma ka wao nahele i Iudea, i ka ʻī ʻana aʻe,

² “E mihi ʻoukou; no ka mea, ua kokoke mai nei ke aupuni o ka lani.”

³ ʻO ia nō ka mea i ʻōlelo ʻia mai e ke kāula e ʻIsaia, i ka ʻī ʻana mai, “«Ka leo o ka mea e kala ana ma ka wao nahele, ‘E hoʻomākaukau ʻoukou i alanui no Iēhova, E hana i kona mau kuamoʻo i pololei»!’”

⁴ Ua ʻaʻahu ihola ʻo ua Ioane lā i ke kapa hulu kāmelo, a he kāʻei ʻili ma kona pūhaka; a he ʻūhini kāna ʻai, a me ka meli o ka nāhelehele.

⁵ A laila, hele akula ko Ierusalema a me ko Iudea a pau i ona lā, a me ko nā wahi a pau e kokoke ana ma Ioredane.

⁶ A bapetizo ʻia ihola lākou e ia i loko o Ioredane, me ka haʻi ʻana mai i ko lākou hewa.

⁷ A ʻike akula ia, he nui nā Parisaio a me nā Sadukaio i hele mai e bapetizo ʻia ai e ia, ʻī akula ʻo ia iā lākou, “E ka hanauna moʻo niho ʻawa, na wai ʻoukou i ao aku e holo i pakele ai i ka inaina e kau mai ana?

⁸ “E hua aʻe ʻoukou i ka hua e kū i ka mihi.

⁹ “Mai manaʻo ʻoukou e ʻōhumu i loko o ʻoukou iho, ‘ʻO ʻAberahama ko kākou kupuna’; no ka mea, ke ʻī aku nei au iā ʻoukou, e hiki nō i ke Akua ke hoʻāla aʻe mai kēia mau pōhaku mai i poʻe mamo na ʻAberahama.

¹⁰ “ʻĀnō hoʻi, ke waiho nei ke koʻi lipi ma ke kumu o nā lāʻau, a ʻo kēlā lāʻau ʻo kēia lāʻau e hua ʻole mai ana i ka hua maikaʻi, e kua ia i lalo a e kiola ʻia aku ia i ke ahi.

¹¹ “ʻO wau nō ke bapetizo aku nei iā ʻoukou i ka wai, no ka mihi; akā, ʻo ka Mea e hele mai ana ma hope oʻu, he nui aku kona mana i koʻu, ʻaʻole au e pono ke lawe i kona mau kāmaʻa; nāna ʻoukou e bapetizo aku i ka ʻUhane Hemolele a me ke ahi.

¹² “Aia nō ma kona lima kāna peʻahi, a e hoʻomaʻemaʻe pono ana ia i kāna hua ʻai; a e hōʻiliʻili hoʻi ia i kāna palaoa i loko o ka hale papaʻa, a e hoʻopau aku i ka ʻōpala i ke ahi pio ʻole.”

¹³ ¶ A laila, hele maila ʻo Iesū, mai Galilaia mai i Ioredane i o Ioane lā, e bapetizo ʻia ai e ia.

¹⁴ Hōʻole akula ʻo Ioane iā ia, ʻī aku ia, “ʻO wau kāu e bapetizo mai e pono ai; a ke hele mai nei anei ʻoe i oʻu nei?”

¹⁵ ʻŌlelo maila ʻo Iesū, ʻī maila iā ia, “E ʻae mai ʻoe ʻānō; no ka mea, pēlā kāua e pono ai ke mālama i ka pono a pau.” A laila, ʻae akula kēlā iā ia.

¹⁶ A bapetizo ʻia ʻo Iesū, a laila, piʻi koke maila ia mai ka wai mai; aia hoʻi, hāmama aʻela ka lani nona, a ʻikea akula ka ʻUhane o ke Akua e iho mai ana me he manu nūnū lā, a kau ihola ma luna iho ona.

¹⁷ Aia hoʻi, he leo mai ka lani mai, e ʻī mai ana, “ʻO kaʻu Keiki punahele kēia, ka Mea aʻu i ʻoliʻoli loa ai.”