KA ʻEUANELIO I KĀKAU ʻIA AI E MATAIO 27 - Ka Baibala Hemolele

1 Alakaʻi ʻia ʻo Iesū i o Pilato lā. 3 Kāʻawe ʻo Iuda iā ia iho. 18 Ka hana ʻana a Pilato. 26 No Baraba.

MOKUNA XXVII.

¹ ¶ A kakahiaka aʻela, kūkākūkā ihola ka poʻe kāhuna nui a pau, a me ka poʻe lunakahiko o nā kānaka, i ka mea e make ai ʻo Iesū.

² Hīkiʻikiʻi ihola lākou iā ia, kaʻi akula iā ia, a hāʻawi akula iā Ponetio Pilato ke kiaʻāina.

³ ¶ A laila, ʻike aʻela ʻo Iuda nāna ia i kumakaia aku, ua hoʻohewa ʻia ʻo Iesū e make, mihi ihola ia, hoʻihoʻi akula ia i nā moni he kanakolu i ka poʻe kāhuna nui a me nā lunakahiko,

⁴ ʻī akula, “Ua hewa wau i kuʻu kumakaia ʻana aku i ke koko hala ʻole.” ʻĪ maila lākou, “He aha ia iā mākou? Iā ʻoe aku nō ia mea!”

⁵ Hoʻolei ihola ia i nā moni i lalo, ma loko o ka luakini, haʻalele akula a hele, a kāʻawe ihola iā ia iho.

⁶ Lawe aʻela ka poʻe kāhuna nui i ua mau moni lā, ʻī aʻela, “ʻAʻole pono ke waiho aku ia mea me nā moni laʻa; no ka mea, ʻo ke kumu kēia i kūʻai ai i ke koko.”

⁷ Kūkākūkā ihola lākou, a kūʻai akula me ia mau mea i ka ʻāina o ka potera, i wahi e kanu ai i nā malihini.

⁸ No ia mea, ua kapa ʻia ua ʻāina lā, ka ʻāina koko, a hiki i nēia manawa.

⁹ I laila i kō ai ka ʻōlelo a ke kāula a Ieremia, i ʻī mai ai, “«Ua lawe aku lākou i nā moni he kanakolu, ke kumu kūʻai no ka mea i kūʻai ʻia», ka mea a ka poʻe mamo a ʻIseraʻela i kūʻai ai;

¹⁰ «a hāʻawi akula lākou ia mau mea no ka ʻĀina o ka Potera, e like me kā ka Haku i kauoha mai ai iaʻu».”

¹¹ ¶ Kū aʻela ʻo Iesū i mua o ke kiaʻāina, nīnau maila ke kiaʻāina iā ia, ʻī maila, “ʻO ʻoe nō anei ke Aliʻi o ka poʻe Iudaio?” ʻĪ akula Iesū iā ia, “ʻO ia nō kāu i ʻōlelo maila.”

¹² Iā ia i ʻāhewa ʻia ai e ua kahuna nui a me nā lunakahiko, ʻaʻole ia i ʻōlelo iki aku.

¹³ A laila, ʻī maila ʻo Pilato iā ia, “ʻAʻole anei ʻoe e lohe ia mau mea he nui wale a lākou e hōʻike mai nei nou?”

¹⁴ ʻAʻole hoʻi ʻo ia i ʻōlelo iki aku iā ia, a kāhāhā nui ihola ke kiaʻāina.

¹⁵ Ia ʻahaʻaina he mea mau nō i ke kiaʻāina ke kuʻu aku i kekahi paʻahao no nā kānaka, i ka mea a lākou i makemake ai.

¹⁶ He paʻahao kaulana iā lākou ia manawa, ʻo Baraba ka inoa.

¹⁷ A ʻākoakoa maila lākou, nīnau akula ʻo Pilato iā lākou, “ʻO wai kā ʻoukou e makemake nei e kala aku au no ʻoukou, ʻo Baraba anei, a ʻo Iesū anei i kapa ʻia ka Mesia?”

¹⁸ No ka mea, ua ʻike ihola ia, no ka huāhuā i hoʻōpeʻa aku ai lākou iā ia.

¹⁹ A i kona noho ʻana ma ka noho hoʻokolokolo, hoʻouna maila kāna wahine i ona lā, ʻī maila, “Mai mea iki aku ʻoe i ua Kanaka hala ʻole lā; no ka mea, ua kaumaha loa wau nona i kēia lā ma ka moeʻuhane.”

²⁰ Akā, hoʻokonokono akula ka poʻe kāhuna nui a me ka poʻe lunakahiko i nā kānaka, e noi mai iā Baraba, a e pepehi iā Iesū.

²¹ ʻŌlelo akula ke kiaʻāina, ʻī akula iā lākou, “ʻO wai ko ʻoukou mea makemake o lāua nei, e kuʻu aku ai au no ʻoukou?” ʻĪ maila lākou, “ʻO Baraba!”

²² Nīnau akula ʻo Pilato iā lākou, “He aha hoʻi kaʻu e hana aku ai iā Iesū, i kapa ʻia ka Mesia?” ʻĪ maila lākou a pau iā ia, “E kaulia ia ma ke keʻa!”

²³ Nīnau akula ke kiaʻāina, “No ke aha? He aha ka hewa āna i hana ai?” A nui loa aʻela kā lākou ʻuā ʻana mai, ʻī mai, “E kaulia ma ke keʻa!”

²⁴ ʻIke aʻela ʻo Pilato, ʻaʻole e hiki kāna; akā, he nui loa ka haunaele ʻana mai, lālau akula ia i ka wai, a holoi ihola i kona mau lima i mua o ka poʻe kānaka, ʻī akula, “ʻAʻohe oʻu hala i ke koko o kēia kanaka pono; iā ʻoukou aku nō ia.”

²⁵ ʻŌlelo maila ka poʻe kānaka a pau, “I luna iho o mākou kona koko, i luna hoʻi o kā mākou kamaliʻi!”

²⁶ A laila, kuʻu aʻela ia iā Baraba no lākou; akā, hahau akula ʻo ia iā Iesū, a hāʻawi akula iā ia e kaulia ai ma ke keʻa.

²⁷ ¶ A laila, kaʻi akula ka poʻe koa o ke kiaʻāina iā Iesū i loko o kahi hoʻokolokolo, a hōʻuluʻulu maila lākou i ka poʻe koa a pau i ona lā.

²⁸ Wehe aʻela lākou i kona kapa, a kāhiko ihola iā ia i ka ʻaʻahu ʻulaʻula.

²⁹ Ulana ihola lākou i lei aliʻi kākalaioa, a kau akula ia ma luna o kona poʻo, a me ka ʻohe ma kona lima ʻākau; kukuli ihola i mua ona, hoʻomāʻewaʻewa akula lākou iā ia, ʻī akula, “Aloha ʻoe, e ke Aliʻi o ka poʻe Iudaio!”

³⁰ A kuha akula lākou iā ia, lālau aku hoʻi i ka ʻohe, a hahau akula hoʻi i kona poʻo.

³¹ A pau ko lākou hoʻomāʻewaʻewa ʻana iā ia, wehe aʻela lākou i ua ʻaʻahu lā, a hōʻaʻahu aʻela iā ia i kona ʻaʻahu, a kaʻi akula iā ia e kaulia ai ma ke keʻa.

³² ¶ I ko lākou hele ʻana i waho, loaʻa ihola iā lākou kekahi kanaka no Kurene, ʻo Simona kona inoa; koi akula lākou iā ia e amo i kona keʻa.

³³ ¶ A hiki akula lākou i kahi i kapa ʻia ʻo Golegota, ʻo ia hoʻi kēia i hōʻike ʻia, he Wahi Iwi Poʻo,

³⁴ hāʻawi akula lākou i ka vīnega i kāwili pū ʻia me ka lāʻau ʻawaʻawa, e inu; a i ka hoʻāʻo ʻana iho, ʻaʻole ia i makemake e inu.

³⁵ Kau akula lākou iā ia ma ke keʻa, a puʻunaue akula i kona mau kapa, a puʻu ihola hoʻi; i kō ai ka mea i ʻōlelo ʻia e ke kāula, “«Ua puʻunaue aʻe lākou i kuʻu mau kapa ʻaʻahu no lākou, A no koʻu kapa komo ua puʻu nō lākou».”

³⁶ Noho ihola lākou i laila, a kiaʻi akula iā ia.

³⁷ Kau akula lākou ma luna aʻe o kona poʻo i ka palapala o kona ʻāhewa ʻana, “ʻO IESŪ KĒIA, KE ALIʻI O KA POʻE IUDAIO.”

³⁸ ʻElua hoʻi kānaka pōā i kaulia pū me ia ma ke keʻa, ma ka lima ʻākau kekahi, ma ka lima hema hoʻi kekahi.

³⁹ ʻO ka poʻe māʻalo aʻe, kūamuamu akula lākou iā ia, e hoʻoluliluli ana i ko lākou poʻo,

⁴⁰ Me ka ʻī ʻana, “ʻO ʻoe ka mea nāna e wāwahi ka luakini, a hoʻokū hou aʻe i nā lā ʻekolu, e hoʻōla ʻoe iā ʻoe iho! A ʻo ke Keiki ʻoe a ke Akua, e iho mai ʻoe i lalo mai luna mai o ke keʻa.”

⁴¹ Hoʻomāʻewaʻewa akula nō hoʻi ka poʻe kāhuna nui, me ka poʻe kākau ʻōlelo, a me ka poʻe lunakahiko, ʻī akula,

⁴² “Ua hoʻōla kēlā iā haʻi, ʻaʻole kā e hiki iā ia ke hoʻōla iā ia iho. A ʻo ke Aliʻi ia no kā ʻIseraʻela, e iho iho ia i lalo mai ke keʻa mai, a e manaʻoʻiʻo aku mākou iā ia.

⁴³ “«Ua paulele aku nō ia i ke Akua, a inā makemake mai ke Akua iā ia, e hoʻōla mai kēlā iā ia ʻānō»; no ka mea, ua ʻōlelo mai nō ia, ‘ʻO wau nō ke Keiki a ke Akua.’”

⁴⁴ Pēlā mai nō hoʻi nā pōā e kau pū ana me ia, hōʻino maila iā ia.

⁴⁵ ¶ Mai ka hora ʻaono a hiki i ka hora ʻaiwa, ua pouli ka honua a pau.

⁴⁶ A i ka iwa o ka hora, kāhea akula ʻo Iesū me ka leo nui, ʻī akula, “«ʻEli, ʻEli, lama sabaketani»?” ʻo ia hoʻi kēia, “«E kuʻu Akua, e kuʻu Akua; no ke aha lā ʻoe i haʻalele mai ai iaʻu»?”

⁴⁷ A lohe aʻela kekahi poʻe o lākou, e kū ana ma laila, ʻī maila lākou, “Ke kāhea aku nei ʻo ia iā ʻElia.”

⁴⁸ Holo koke akula kekahi o lākou, lālau aʻela i ka huʻahuʻa kai, hoʻoʻū ihola i ka vīnega, kau akula ia ma ka ʻohe, a hāʻawi akula iā ia e inu.

⁴⁹ ʻĪ maila kekahi poʻe, “Alia, a ʻike kākou, e hele mai paha ʻo ʻElia e hoʻōla iā ia.”

⁵⁰ Kāhea hou akula ʻo Iesū me ka leo nui, a laila kuʻu akula ia i ka ʻuhane.

⁵¹ Aia hoʻi, nahae ihola ka pākū o ka luakini i waena, mai luna a hala i lalo; nāueue aʻela ka honua, nahā aʻela hoʻi nā pōhaku.

⁵² Hāmama aʻela nā hale kupapaʻu, a he nui nā haipule e hiamoe ana i ala hou mai,

⁵³ a hele maila i waho o nā hale kupapaʻu ma hope iho o kona ala hou ʻana mai, a komo akula i loko o ke kūlanakauhale hoʻāno, a ua ʻikea e nā mea he nui loa.

⁵⁴ A ʻike aʻela ka luna haneri, a ʻo nā mea me ia e kiaʻi ana iā Iesū i ke ōlaʻi, a me nā mea i hana ʻia, makaʻu loa ihola lākou, ʻī aʻela, “He ʻoiaʻiʻo nō, ʻo ke Keiki nō kēia a ke Akua!”

⁵⁵ He nui nō hoʻi ka poʻe wāhine ma kahi mamao aku, e mākaʻikaʻi mai ana; na lākou i ukali iā Iesū mai Galilaia mai e lawelawe ana nāna.

⁵⁶ Me lākou pū ʻo Maria no Magedala, a ʻo Maria ka makuahine o Iakoba lāua ʻo Iose, a me ka makuahine o nā keiki a Zebedaio.

⁵⁷ ¶ A ahiahi aʻela, hele maila kekahi kanaka waiwai no ʻArimataia, ʻo Iosepa kona inoa, he haumāna hoʻi ia na Iesū.

⁵⁸ Hele akula ia i o Pilato lā, a noi akula i ke kino o Iesū. A laila kauoha akula ʻo Pilato, e hāʻawi ʻia mai ke kino.

⁵⁹ Lawe aʻela ʻo Iosepa i ke kino, a wahī ihola iā ia i loko o ka lole olonā maʻemaʻe;

⁶⁰ a waiho ihola iā ia ma kona hale kupapaʻu hou i kālai ʻia i loko o ka pōhaku; a ʻolokaʻa akula ia i pōhaku nui ma ka puka o ua hale kupapaʻu lā, a hoʻi akula.

⁶¹ Ma laila nō ʻo Maria no Magedala, a me kekahi Maria, e noho ana ma kahi kū pono i ua hale kupapaʻu lā.

⁶² ¶ I ka lā ma hope iho o ka lā hoʻomalolo, hele ʻākoakoa akula ka poʻe kāhuna nui a me ka poʻe Parisaio i o Pilato lā,

⁶³ ʻī akula, “E ka haku, ke hoʻomanaʻo nei mākou, i ʻōlelo mai ua kanaka hoʻopunipuni lā i kona wā e ola ana, ‘A pō ʻakolu aʻe, e ala hou mai ana au.’

⁶⁴ “No laila, e kauoha aku ʻoe i kiaʻi pono ʻia ai ka hale kupapaʻu a hiki i ka pō ʻakolu, o hele mai ka poʻe haumāna āna, a ʻaihue malū iā ia, a e ʻōlelo aku i nā kānaka, ‘Ua ala mai ia mai ka make mai;’ a e nui loa aku ka hewa o kēia hoʻopunipuni hope i kēlā ma mua.”

⁶⁵ ʻĪ maila ʻo Pilato iā lākou, “Aia iā ʻoukou he poʻe kiaʻi; a haele ʻoukou, e hoʻopaʻa loa i ka hale kupapaʻu.”

⁶⁶ Hele akula lākou, hoʻopaʻa ihola i ka hale kupapaʻu, hōʻailona ihola i ka pōhaku, a hoʻonoho ihola i poʻe kiaʻi.