KA ʻEUANELIO I KĀKAU ʻIA AI E MATAIO 24 - Ka Baibala Hemolele

1 Hōʻike mua mai ʻo Iesū i ka luku ʻia ʻana o Ierusalema, a me nā pōpilikia ma ia ʻāina. 29 Nā hōʻailona no ka hele hou ʻana mai o Kristo. 36 ʻAʻole i ʻike ʻia ua lā lā; no laila e pono kākou ke kiaʻi.

MOKUNA XXIV.

¹ ¶ I ko Iesū hele ʻana aku i waho, haʻalele akula ia i ka luakini, a hele maila kāna poʻe haumāna e kuhikuhi iā ia i nā hale o ka luakini.

² ʻĪ maila ʻo Iesū iā lākou, “Ke ʻike nei anei ʻoukou i kēia mau mea a pau? He ʻoiaʻiʻo kaʻu e ʻōlelo aku nei iā ʻoukou, e pau ia mau mea i ka hoʻohiolo ʻia; ʻaʻole e koe kekahi pōhaku ma luna o kekahi pōhaku.”

³ ¶ I kona noho ʻana ma luna o ka Mauna ʻOliveta, hele malū akula ka poʻe haumāna i ona lā, ʻī akula, “E haʻi mai ʻoe iā mākou, i ka manawa hea e hiki mai ai ia mau mea? He aha hoʻi ka hōʻailona no kou hiki ʻana mai, a me ka hope o kēia ao?”

⁴ ʻŌlelo maila ʻo Iesū iā lākou, ʻī akula, “E mālama iā ʻoukou, o hoʻopunipuni mai kekahi iā ʻoukou.

⁵ “No ka mea, he nui nā mea e hele mai ma koʻu inoa, me ka ʻī ʻana mai, ‘ʻO wau nō ka Mesia,’ a he nui nō ka poʻe e hoʻopunipuni ʻia e lākou.

⁶ “E lohe auaneʻi ʻoukou i nā kaua, a me nā lono no nā kaua; e ao iā ʻoukou iho, mai hopohopo; no ka mea, e hiki ʻiʻo mai ia mau mea a pau, ʻaʻole naʻe ia ka hopena.

⁷ “E kūʻē ana kekahi lāhui kanaka i kekahi lāhui kanaka; a ʻo kekahi aupuni i kekahi aupuni; a e hiki mai nō nā wī a me nā ahulau, a me nā ōlaʻi i kēlā wahi a i kēia wahi.

⁸ “ʻO kēia mau mea ka hoʻomaka ʻana o nā pōpilikia.

⁹ “Ia manawa, e hāʻawi lākou iā ʻoukou e hoʻomāinoino ʻia mai ai, a e pepehi mai lākou iā ʻoukou a make; a e inaina ʻia mai hoʻi ʻoukou e nā lāhui kanaka a pau no koʻu inoa.

¹⁰ “A laila hoʻi, he nui nā mea e hihia ana; a e kumakaia aku kekahi i kekahi, e inaina aku hoʻi kekahi i kekahi.

¹¹ “E kū mai nō hoʻi nā kāula wahaheʻe he nui loa, a e hoʻopunipuni aku hoʻi lākou i nā kānaka he nui loa.

¹² “No ka nui ʻana mai o ka hewa, e mālili nō ke aloha o ka lehulehu.

¹³ “Akā, ʻo ka mea hoʻomanawanui aku a hiki i ka hopena, e ola ia.

¹⁴ “A e haʻi ʻia aku nō kēia ʻeuanelio o ke aupuni ma nā wahi aukanaka a pau, i mea e ʻike ai nā lāhui kanaka a pau; a laila iho e hiki mai ka hopena.

¹⁵ ¶ “Aia ʻike ʻoukou i «ka mea ʻino e hoʻoneoneo ai» e kū ana ma kahi hoʻāno, ka mea i ʻōlelo ʻia mai e ke kāula e Daniʻela; (ʻo ka mea heluhelu, e pono e hoʻomaopopo iho ʻo ia,)

¹⁶ a laila, ʻo ka poʻe e noho ana ma Iudea, e holo lākou ma nā kuahiwi.

¹⁷ “ʻO ka mea ma luna o ka hale, mai iho iho ia e lawe i nā mea o loko o kona hale.

¹⁸ “A ʻo ka mea ma ka waena, mai hoʻi hou ia i hope e kiʻi i kona kapa ʻaʻahu.

¹⁹ “Auē ka poʻe wāhine hāpai, a me ka poʻe hānai waiū ia mau lā!

²⁰ “E pule hoʻi ʻoukou, i holo ʻole ai ʻoukou i ka wā hoʻoilo, ʻaʻole hoʻi i ka lā Sābati.

²¹ “A laila, e nui loa mai nō ka pōpilikia, ʻaʻohe pōpilikia me nēia mai ke kumu mai o ka honua, ʻaʻole hoʻi ma ia hope aku.

²² “Inā e hoʻopōkole ʻole ʻia ua mau lā lā, inā ʻaʻole loa e ola kekahi kanaka; akā, no ka poʻe i wae ʻia, e hoʻopōkole ʻia ua mau lā lā.

²³ “Inā e ʻōlelo mai kekahi iā ʻoukou ia manawa, ‘Ē, eia ma ʻaneʻi ka Mesia;’ a, ‘Aia ma ʻō,’ mai manaʻo ʻoukou he ʻoiaʻiʻo.

²⁴ “No ka mea, e kū aʻe nō nā mesia wahaheʻe, a me nā kāula wahaheʻe, a e hōʻike aku lākou i nā hōʻailona nui, a me nā mea kupanaha; a inā he mea hiki, inā e hoʻopunipuni hoʻi lākou i ka poʻe i wae ʻia.

²⁵ “Aia hoʻi, ua haʻi ʻē au ma mua iā ʻoukou.

²⁶ “No laila, a i ʻōlelo mai lākou iā ʻoukou, ‘Aia lā, ma ka wao nahele ʻo ia,’ mai hele aku ʻoukou i laila, ‘Aia hoʻi ia ma ke keʻena mehameha;’ mai manaʻo ʻoukou he ʻoiaʻiʻo.

²⁷ “No ka mea, e like me ka uila i ʻanapu mai ai, mai ka hikina mai, a hoʻomālamalama aku i ke komohana; pēlā nō hoʻi ka hiki ʻana mai o ke Keiki a ke Kanaka.

²⁸ “No ka mea, i kahi e waiho ai ka heana, i laila nō e ʻākoakoa ai nā ʻaeto.

²⁹ ¶ “Ma hope iho o ia mau lā pōpilikia, «e pōʻeleʻele ana ka lā, ʻaʻole hoʻi e mālamalama mai ka mahina, e hāʻule iho hoʻi nā hōkū» mai ka lani mai, a e hoʻonaue ʻia nā mea mana o ka lani.

³⁰ “A laila, e ʻikea mai ai ka hōʻailona no ke Keiki a ke Kanaka ma ka lani; a e uē nā lāhui kanaka a pau o ka honua, aia ʻike lākou i «ke Keiki a ke Kanaka e hele mai ana ma luna o nā ao o ka lani», me ka mana a me ka nani nui.

³¹ “A e hoʻouna aku ia i kāna poʻe ʻānela me «ka pū kani nui, a e hoʻākoakoa mai lākou» i kona poʻe i wae ʻia, mai nā makani ʻehā, a mai kēlā ʻaoʻao o ka lani a mai kēia ʻaoʻao hoʻi.

³² ¶ “E aʻo ʻoukou i ka ʻōlelo nane no ka lāʻau fiku; aia ʻōpiopio nā lālā, a ulu aʻe nā lau, ua ʻike ʻoukou, ke kokoke mai nei ke kau.

³³ “Pēlā hoʻi, a ʻike ʻoukou i kēia mau mea a pau, a laila e ʻike ʻoukou, ua kokoke mai ia, aia ma ka puka.

³⁴ “He ʻoiaʻiʻo kaʻu e ʻōlelo aku nei iā ʻoukou, ʻaʻole e hala aku kēia hanauna, a hiki ʻē mai ua mau mea lā a pau.

³⁵ “E lilo ana ka lani a me ka honua; akā, ʻaʻole loa e lilo kaʻu mau ʻōlelo.

³⁶ “ʻAʻole i ʻike kekahi kanaka ia lā a me ia hora, ʻaʻole hoʻi nā ʻānela o ka lani; ʻo koʻu Makua wale nō.

³⁷ “Me nā lā o Noa, pēlā hoʻi ka hiki ʻana mai o ke Keiki a ke Kanaka.

³⁸ “No ka mea, i nā lā ma mua o ke kai a Kahinaliʻi, ʻai lākou a inu hoʻi, mare lākou a hoʻopalau no ka mare ʻana, a hiki i ka lā i komo ai ʻo Noa i loko o ka hale lana;

³⁹ ʻaʻole lākou i ʻike, a hiki mai ke kai a Kahinaliʻi, a pau loa aʻela lākou i ka make; pēlā nō hoʻi ka hiki ʻana mai o ke Keiki a ke Kanaka.

⁴⁰ “A laila, ʻelua kānaka ma ka waena, e lawe ʻia kekahi, a e koe nō kekahi.

⁴¹ “ʻElua wāhine e wili palaoa ana, a lawe ʻia kekahi, a e koe nō kekahi.

⁴² “No laila, e kiaʻi ʻoukou; no ka mea, ʻaʻole ʻoukou ʻike i ka hora e hiki mai ai ko ʻoukou Haku.

⁴³ “Ua ʻike ʻoukou i kēia, inā paha i ʻike ka mea hale i ka wati e hiki mai ai ka ʻaihue, inā ua kiaʻi ia, i wāwahi ʻole ʻia ai kona hale.

⁴⁴ “Pēlā hoʻi ʻoukou e noho ai me ka mākaukau; no ka mea, i ka hora e manaʻo ʻole ʻia ai e ʻoukou, e hiki mai nō ke Keiki a ke Kanaka.

⁴⁵ ¶ “ʻO wai lā ke kauā mālama pono, naʻauao, i hoʻonoho ʻia aʻe e kona haku i luna no kona mau ʻōhua e hāʻawi aku i ʻai na lākou i ka manawa pono.

⁴⁶ “E pōmaikaʻi ana ua kauā lā, ke ʻike mai kona haku iā ia e hana ana pēlā i kona hoʻi ʻana mai.

⁴⁷ “He ʻoiaʻiʻo kaʻu e ʻōlelo aku nei iā ʻoukou, e hoʻonoho kēlā iā ia ma luna o kona waiwai a pau.

⁴⁸ “Akā, ʻo ke kauā ʻino lā, i ʻōlelo iho i loko o kona naʻau, ‘Ke hoʻohākālia nei kuʻu haku i kona hoʻi ʻana mai;’

⁴⁹ a ke hoʻomaka ia e pepehi i nā hoa kauā ona, a e ʻai pū a e inu pū me ka poʻe ʻona;

⁵⁰ e hoʻi hou mai nō ka haku o ua kauā lā, i ka lā i kiaʻi ʻole ai ia, a me ka hora i manaʻo ʻole ai ia;

⁵¹ a e hoʻokaʻawale aku kēlā iā ia, a e hāʻawi aku i kāna kuleana me ka poʻe hoʻokamani; i laila ka uē ʻana a me ka ʻuī ʻana o nā niho.”