KA ʻEUANELIO I KĀKAU ʻIA AI E MATAIO 23 - Ka Baibala Hemolele

1 Aʻo mai ʻo Iesū e hoʻolohe i nā mea pono a ka poʻe kākau ʻōlelo i aʻo mai ai, ʻaʻole naʻe e hana like me lākou. 13 Nā pōʻino o ka poʻe kākau ʻōlelo a me ka poʻe Parisaio.

MOKUNA XXIII.

¹ ¶ A laila, ʻōlelo maila ʻo Iesū i ka poʻe kānaka a me kāna poʻe haumāna.

² ʻĪ maila, “Ke noho nei ka poʻe kākau ʻōlelo a me ka poʻe Parisaio ma ka noho o Mose.

³ “No laila, ʻo nā mea a pau a lākou e kauoha mai ai e mālama, e mālama ʻoukou ia a e hana aku pēlā; akā, mai hana ʻoukou e like me kā lākou hana ʻana; no ka mea, ke ʻōlelo nei lākou, ʻaʻole naʻe e hana.

⁴ “Ke nakinaki nei lākou i nā ukana kaumaha, a he luhi hoʻi ke hali, a ke kau nei i luna o nā hokua o nā kānaka; ʻaʻole naʻe lākou e hoʻopā iki aku ia mau mea me kekahi manamana lima o lākou.

⁵ “Ke hana nei lākou i kā lākou mau hana a pau, i ʻikea mai ai e nā kānaka. Ke hoʻopālahalaha nei lākou i nā ʻāpana kānāwai o lākou; a ke hoʻonui nei hoʻi lākou i nā lepa o kā lākou ʻaʻahu.

⁶ “Ke makemake nei lākou i nā wahi maikaʻi ma nā ʻahaʻaina, a me nā noho kiʻekiʻe ma nā hale hālāwai;

⁷ a me ka uē aloha ʻia aku ma nā ʻaha kanaka, a me ke kapa ʻia e nā kānaka, ‘E Rabi, e Rabi.’

⁸ “Akā, ʻo ʻoukou, mai kapa ʻia ʻoukou he Rabi; no ka mea, hoʻokahi a ʻoukou Kumu, ʻo ka Mesia, a he poʻe hoahānau ʻoukou a pau.

⁹ “ʻAʻole hoʻi e hoʻomakua aku ʻoukou i kekahi kanaka ma ka honua nei; hoʻokahi o ʻoukou Makua, aia i ka lani.

¹⁰ “ʻAʻole hoʻi ʻoukou e kapa ʻia mai nā haku, hoʻokahi o ʻoukou Haku, ʻo ka Mesia.

¹¹ “ʻO ka mea nui i waena o ʻoukou, he pono e lilo ia i kauā na ʻoukou.

¹² “ʻO ka mea hoʻokiʻekiʻe aʻe iā ia iho, e hoʻohaʻahaʻa ʻia iho nō ia; a ʻo ka mea hoʻohaʻahaʻa iā ia iho, e hoʻokiʻekiʻe ʻia aʻe ʻo ia.

¹³ ¶ “Auē ʻoukou, e ka poʻe kākau ʻōlelo a me ka poʻe Parisaio, nā hoʻokamani! No ka mea, ke papani nei ʻoukou i ke aupuni o ka lani i mua o nā kānaka; no ka mea, ʻaʻole ʻoukou e komo aʻe, ʻaʻole hoʻi ʻoukou e ʻae aku e komo i loko ka poʻe e komo ana.

¹⁴ “Auē ʻoukou, e ka poʻe kākau ʻōlelo a me nā Parisaio, nā hoʻokamani! No ka mea, ua pau iā ʻoukou nā hale o nā wāhine kāne make; a ke hoʻolōʻihi nei ʻoukou i nā pule i mea e ʻikea ai. No ia hoʻi, e loaʻa uaneʻi iā ʻoukou ka make nui loa.

¹⁵ ¶ “Auē ʻoukou, e ka poʻe kākau ʻōlelo a me ka poʻe Parisaio, nā hoʻokamani! No ka mea, ke pōʻai haele nei ʻoukou i ke kai a me ka ʻāina, i kaʻana mai ai na ʻoukou kekahi haumāna; a loaʻa, ua hana ʻoukou iā ia, a ʻoi pāpālua kona keiki ʻana no Gehena ma mua o ko ʻoukou.

¹⁶ ¶ “Auē ʻoukou, e nā alakaʻi makapō, kai ʻōlelo, ‘ʻO ka hoʻohiki aku ma ka luakini, he mea ʻole ia; akā, ʻo ka mea hoʻohiki aku ma ke gula o ka luakini, he ʻaiʻē kāna!’

¹⁷ “He poʻe naʻaupō a me ka makapō; he aha ka mea ʻoi, ʻo ke gula anei, a ʻo ka luakini anei, ka mea e laʻa ai ke gula?

¹⁸ “A, ‘ʻO ka mea hoʻohiki aku ma ke kuahu, he mea ʻole ia; akā, ʻo ka mea hoʻohiki aku ma ka mōhai i luna iho, he ʻaiʻē kāna.’

¹⁹ “He poʻe naʻaupō a me ka makapō; he aha ka mea ʻoi, ʻo ka mōhai anei, a ʻo ke kuahu anei, ka mea e laʻa ai ka mōhai?

²⁰ “ʻO ka mea hoʻohiki ma ke kuahu, ʻo ia nō ka hoʻohiki ma ia mea a me nā mea a pau ma luna iho.

²¹ “A ʻo ka mea hoʻohiki aku ma ka luakini, ʻo ia nō ke hoʻohiki aku ma ia mea, a me ka mea e noho ana i loko.

²² “A ʻo ka mea hoʻohiki ma ka lani, ʻo ia ke hoʻohiki ma ka noho aliʻi o ke Akua, a me ka mea e noho ana i luna iho.

²³ ¶ “Auē ʻoukou, e ka poʻe kākau ʻōlelo a me ka poʻe Parisaio, nā hoʻokamani! No ka mea, ke hoʻokupu nei ʻoukou i ka hapaʻumi o ka mineta me ka ʻaneto a me ke kumino; a ke haʻalele nei i nā mea nui o ke kānāwai, i ka hoʻopono, i ke aloha a me ka hōʻoiaʻiʻo; ʻo kā ʻoukou mau mea kēia e pono ai ke hana, ʻaʻole hoʻi e haʻalele i kēlā.

²⁴ “E nā alakaʻi makapō, ke kānana nei i ka naonao, me ke ale wale iho i ke kāmelo!

²⁵ ¶ “Auē ʻoukou, e ka poʻe kākau ʻōlelo a me ka poʻe Parisaio, nā hoʻokamani! No ka mea, ke holoi nei ʻoukou iā waho o ke kīʻaha a me ke pā; akā, ua piha o loko i ka mea i kāʻili wale ʻia a me ka liki ʻole i ka hoʻomanawanui.

²⁶ “E ka Parisaio makapō, e holoi mua ʻoe iā loko o ke kīʻaha a me ke pā, i maʻemaʻe pū ia me ko waho.

²⁷ ¶ “Auē ʻoukou, e ka poʻe kākau ʻōlelo a me ka poʻe Parisaio, nā hoʻokamani! No ka mea, ua like ʻoukou me nā hale kupapaʻu keʻokeʻo; ua ʻikea naʻe ko waho he maikaʻi; akā, ua piha ʻo loko i nā iwi kupapaʻu a me ka pelapela.

²⁸ “Pēlā hoʻi ʻoukou, ua ʻikea e nā kānaka, he maikaʻi ma waho; aka, ua piha ʻo loko i ka hoʻopunipuni a me ka pono ʻole.

²⁹ ¶ “Auē ʻoukou, e ka poʻe kākau ʻōlelo a me ka poʻe Parisaio, nā hoʻokamani! No ka mea, ke hana nei ʻoukou i nā hale kupapaʻu no ka poʻe kāula, a ke hoʻonani nei hoʻi i nā hale kupapaʻu no ka poʻe haipule;

³⁰ a ke ʻōlelo nei ʻoukou, ‘Inā mākou i ola pū i ka wā o kā mākou poʻe kūpuna, ʻaʻole mākou i hoʻokahe pū me lākou i ke koko o ka poʻe kāula.’

³¹ “Pēlā ʻoukou e hōʻike mai nei iā ʻoukou iho, he mamo ʻoukou na ka poʻe pepehi kāula.

³² “E hoʻopiha aʻe hoʻi ʻoukou i ke ana o ko ʻoukou poʻe kūpuna.

³³ “E ka poʻe nahesa, ka ʻohana moʻo niho ʻawa, pehea lā auaneʻi ʻoukou e pakele ai i ka make ma Gehena?

³⁴ “No laila hoʻi, ke hoʻouna aku nei au iā ʻoukou lā i nā kāula a me nā kānaka naʻauao, a me nā kākau ʻōlelo; a na ʻoukou e pepehi a e kau ma ke keʻa i kekahi poʻe o lākou; a e hahau hoʻi i kekahi poʻe o lākou ma nā hale hālāwai; a e alualu hoʻi iā lākou mai kēia kūlanakauhale a kēlā kūlanakauhale.

³⁵ “I hoʻokau ʻia ma luna iho o ʻoukou ke koko hala ʻole a pau i hoʻokahe ʻia ma luna o ka honua, mai ke koko o ʻAbela o ke kanaka pono mai, a hiki i ke koko o Zekaria ke keiki a Barakia, a ʻoukou i pepehi ai ma waena o ka luakini a me ke kuahu.

³⁶ “He ʻoiaʻiʻo kaʻu e ʻōlelo aku nei iā ʻoukou, e kau mai ana kēia mau mea a pau ma luna o kēia hanauna.

³⁷ ¶ “E Ierusalema, e Ierusalema! Ka mea nāna i pepehi i nā kāula, a i hailuku hoʻi i ka poʻe i hoʻouna ʻia mai i ou nei; nani kuʻu makemake e hōʻuluʻulu mai i kāu poʻe keiki, e like me ka hōʻuluʻulu ʻana a ka moa i kāna ʻohana keiki ma lalo iho o kona mau ʻēheu; ʻaʻole naʻe ʻoukou i makemake mai.

³⁸ “Aia hoʻi, ua waiho neoneo ʻia no ʻoukou ko ʻoukou hale e noho ai!

³⁹ “No ka mea, ke ʻōlelo aku nei au iā ʻoukou, ʻAʻole ʻoukou e ʻike hou mai iaʻu, a hiki i ka wā e ʻōlelo mai ai ʻoukou, ‘«E hoʻomaikaʻi ʻia ka Mea e hele mai ana ma ka inoa o ka Haku»!’”