KA ʻEUANELIO I KĀKAU ʻIA AI E MATAIO 22 - Ka Baibala Hemolele

1 Ka nane no ka ʻahaʻaina mare. 12 Hoʻohewa ʻia ka mea i nele i ke kapa mare. 17 No ka hoʻokupu iā Kaisara. 23 Ua pili pū nā Sadukaio iā ia. 34 Ko ke kākāʻōlelo manaʻo. 41 Kā Iesū nīnau ʻana i ka poʻe Parisaio no ka Mesia.

MOKUNA XXII.

¹ ¶ ʻŌlelo hou akula ʻo Iesū iā lākou i nā ʻōlelo nane, ʻī akula,

² “Ua like ke aupuni o ka lani me kekahi aliʻi nāna i hoʻomākaukau ka ʻahaʻaina no kāna keiki.

³ “Hoʻouna akula ia i kāna poʻe kauā e kiʻi i ka poʻe i ʻōlelo ʻia e hele mai i ka ʻahaʻaina; akā, ʻaʻole lākou i makemake e hele mai.

⁴ “Hoʻouna hou akula ia i nā kauā ʻē aʻe, ʻī akula, ‘E ʻī aku ʻoukou i ka poʻe i ʻōlelo ʻia, “Eia hoʻi, ua hoʻomākaukau nō wau i kaʻu ʻahaʻaina, ua kālua ʻia kaʻu mau bipi a me nā mea i kūpalu ʻia, ua mākaukau hoʻi nā mea a pau; e hele mai ʻoukou i ka ʻahaʻaina.”’

⁵ “Hoʻowahāwahā maila lākou, hele akula; ʻo kekahi ma kona ʻāina, a ʻo kekahi ma kāna kūʻai ʻana.

⁶ “A ʻo ka poʻe i koe, lālau maila lākou i kāna mau kauā, hoʻomāinoino maila iā lākou, pepehi ihola a make.

⁷ A lohe aʻela ke aliʻi, huhū ihola ia, hoʻouna akula ia i kona poʻe kaua, luku akula ia poʻe pepehi kanaka, a puhi akula i ko lākou kūlanakauhale.

⁸ “A laila, ʻōlelo akula ia i kāna poʻe kauā, ‘Ua mākaukau naʻe ka ʻahaʻaina; ʻaʻole hoʻi i pono kēlā poʻe i ʻōlelo ʻia.

⁹ ‘No laila, e hele aku ʻoukou ma nā huina alanui, a e koi aku i nā mea a pau i loaʻa iā ʻoukou, e hele mai i ka ʻahaʻaina.’

¹⁰ “Hele akula ua poʻe kauā lā i waho ma ke alanui, a hōʻuluʻulu maila i nā mea a pau i loaʻa iā lākou, ʻo ka poʻe ʻino a me ka poʻe maikaʻi; a nui ihola nā hoa ʻai ma ua ʻahaʻaina lā.

¹¹ “Komo akula ke aliʻi i loko e nānā i ka poʻe hoa ʻai, ʻike akula ia i laila i kekahi kanaka ʻaʻole i kāhiko ʻia i ke kapa ʻahaʻaina.

¹² “ʻĪ akula kēlā iā ia, ‘E ka hoalauna, pehea lā ʻoe i hele mai nei, ʻaʻole i kāhiko ʻia i ke kapa ʻahaʻaina?’ Mumule loa ihola ia.

¹³ “A laila, ʻī akula ua aliʻi lā i ka poʻe lawelawe, ‘E nakiki iho iā ia a paʻa ma nā wāwae a me nā lima, e lawe aku iā ia, a e hoʻolei aku i loko o ka pouli ma waho; i laila e uē ai a e ʻuī ai nā niho.’

¹⁴ “No ka mea, he nui ka poʻe i kāhea ʻia, he ʻuʻuku hoʻi ka poʻe i wae ʻia.”

¹⁵ ¶ A laila hele akula ka poʻe Parisaio, kūkākūkā aʻela i ka mea e hoʻohihia iā ia i kāna ʻōlelo ʻana.

¹⁶ Hoʻouna maila lākou i ona lā i nā haumāna a lākou me kekahi poʻe Herodiano, ʻī maila, “E ke Kumu, ke ʻike nei mākou, he ʻoiaʻiʻo kāu, a ke aʻo mai nei ʻoe i ka ʻaoʻao o ke Akua me ka ʻoiaʻiʻo, ʻaʻole ʻoe i pāʻewaʻewa ma kā kekahi, ʻaʻole hoʻi i manaʻo i ko waho o ke kanaka.

¹⁷ “E haʻi mai hoʻi ʻoe, he aha kou manaʻo? He mea pono anei ke hoʻokupu waiwai iā Kaisara? ʻAʻole anei?”

¹⁸ ʻIke aʻela ʻo Iesū i ko lākou manaʻo ʻino ʻana, ʻī akula, “E ka poʻe hoʻokamani, no ke aha lā ʻoukou e hoʻāʻo mai nei iaʻu?

¹⁹ “E hōʻike mai iaʻu i kekahi moni hoʻokupu.” A lawe maila lākou i ona lā i kekahi denari.

²⁰ Nīnau akula ʻo ia iā lākou, “No wai kēia kiʻi a me ka palapala?”

²¹ ʻĪ maila lākou iā ia, “No Kaisara.” A laila, ʻī akula ʻo ia iā lākou, “E hāʻawi aku i kā Kaisara iā Kaisara, a i kā ke Akua hoʻi i ke Akua.”

²² A lohe aʻela lākou, kāhāhā ihola, haʻalele maila lākou iā ia a hele akula.

²³ ¶ Ia lā hoʻi, hele maila i ona lā ka poʻe Sadukaio, ka poʻe i ʻōlelo, ʻAʻole ala hou ʻana; nīnau maila lākou iā ia,

²⁴ ʻī maila, “E ke Kumu, i ʻōlelo mai ʻo Mose, ‘«Inā e make kekahi kanaka ʻaʻohe āna keiki, e mare nō kona kaikaina i kāna wahine e hoʻāla mai i hua na kona kaikuaʻana».’

²⁵ “ʻEhiku mau hoahānau me mākou: mare ihola ka makahiapo i wahine, a make ihola, ʻaʻohe āna keiki; a lilo akula kāna wahine na kona kaikaina.

²⁶ “Pēlā aku hoʻi ka lua a me ke kolu a hiki akula i ka hiku o lākou.

²⁷ “Ma hope iho o lākou a pau, make ihola hoʻi ua wahine lā.

²⁸ “No laila, i ke ala hou ʻana, na ka mea hea o lākou a ʻehiku ua wahine lā? No ka mea, he wahine ia na lākou a pau ma mua.”

²⁹ ʻŌlelo akula ʻo Iesū iā lākou, ʻī akula, “Ua lalau ʻoukou, i ka ʻike ʻole i ka Palapala Hemolele, a me ka mana o ke Akua.

³⁰ “No ka mea, i ke ala hou ʻana, ʻaʻole lākou e mare, ʻaʻole hoʻi e hoʻopalau; akā, ua like lākou me nā ʻānela o ke Akua i ka lani.

³¹ “A, no ke ala hou ʻana o ka poʻe i make, ʻaʻole anei ʻoukou i heluhelu i kā ke Akua ʻōlelo iā ʻoukou, e ʻī mai ana,

³² ‘«ʻO wau nō ke Akua o ʻAberahama, ke Akua o ʻIsaʻaka, ke Akua o Iakoba»’? ʻO ke Akua, ʻaʻole ia he Akua no ka poʻe i make, no ka poʻe ola nō.”

³³ A lohe aʻela ka poʻe kānaka, kāhāhā ihola lākou i kāna aʻo ʻana.

³⁴ ¶ Lohe aʻela ka poʻe Parisaio, ua paʻa iā ia ka waha o ka poʻe Sadukaio, ʻākoakoa maila lākou i ona lā.

³⁵ A nīnau maila kekahi o lākou, he kākāʻōlelo, hoʻāʻo maila iā ia, ʻī maila,

³⁶ “E ke Kumu, he aha ke kauoha nui i loko o ke Kānāwai?”

³⁷ ʻĪ akula ʻo Iesū iā ia, “‘«E aloha aku ʻoe iā Iēhova i kou Akua me kou naʻau a pau, a me kou ʻuhane a pau, a me kou manaʻo a pau».’

³⁸ “ʻO ka mua kēia a me ke kauoha nui.

³⁹ “Ua like hoʻi ka lua me ia, ‘«E aloha aku ʻoe i kou hoalauna me ʻoe iā ʻoe iho».’

⁴⁰ “Ma luna o kēia mau kauoha ʻelua, ke kau nei ke Kānāwai a pau a me nā Kāula.”

⁴¹ ¶ A ʻākoakoa mai ka poʻe Parisaio, nīnau akula Iesū iā lākou,

⁴² ʻĪ akula, “He aha ko ʻoukou manaʻo no ka Mesia. He mamo ia na wai?” ʻĪ maila lākou, “Na Dāvida.”

⁴³ ʻĪ akula ʻo ia iā lākou, “Pehea lā hoʻi ʻo Dāvida i kapa ai iā ia ma ka ʻUhane, ‘he Haku,’ I ka ʻī ʻana,

⁴⁴ ‘«ʻŌlelo akula ka Haku i kuʻu Haku, “E noho mai ʻoe ma kuʻu lima ʻākau, A hoʻolilo iho ai au i kou poʻe ʻenemi i keʻehana wāwae nou»”’?

⁴⁵ “Inā hoʻi ʻo Dāvida i kapa aku iā ia ‘he Haku,’ pehea lā ia e mamo ai nāna?”

⁴⁶ ʻAʻole i hiki i kekahi ke ʻekemu iki mai iā ia, ʻaʻole hoʻi kekahi i ʻaʻa e nīnau hou mai iā ia mai ia wā iho.