KA ʻEUANELIO I KĀKAU ʻIA AI E MATAIO 21 - Ka Baibala Hemolele

1 Ko Iesū komo ʻana i loko o Ierusalema ma luna o ka hoki. 12 Hoʻolei aku nō ia i ka poʻe kūʻai ma waho o ka luakini. 17 Hōʻino aku i ka lāʻau fiku. 23 Paʻa ka waha o nā kāhuna iā ia. 28 Ka nane no nā keiki kāne ʻelua; 35 a no ka haku nona ka pā waina.

MOKUNA XXI.

¹ ¶ A kokoke akula lākou i Ierusalema, ua hiki akula i Betepage ma ka Mauna ʻOliveta, a laila, hoʻouna akula ʻo Iesū i nā haumāna ʻelua;

² ʻī akula iā lāua, “E hele aku ʻolua i ke kauhale e kūpono mai ana iā ʻolua, a e loaʻa koke iā ʻolua ka hoki ua nakiki ʻia, a me ke keiki me ia; e wehe aʻe ʻolua, a e kaʻi mai i oʻu nei.

³ “Inā paha e ʻōlelo mai kekahi iā ʻolua, e ʻī aku, ‘Na ka Haku ia mau mea e pono ai:’ a laila e kuʻu koke mai nō ia i nā hoki.”

⁴ Ua pau ia mau mea i ka hana ʻia, i kō ai ka mea i ʻōlelo ʻia mai e ke kāula, i ka ʻī ʻana:

⁵ “«E haʻi aku ʻoukou i ke kaikamahine a Ziona, ‘Aia hoʻi, ke hele akahai mai nei kou Aliʻi i ou lā, E noho ana ma luna o ka hoki, ʻO ke keiki hoʻi a ka hoki.»’”

⁶ Hele akula ua mau haumāna lā, a hana akula e like me kā Iesū i kauoha mai ai iā lāua.

⁷ Kaʻi maila lāua i ua hoki lā, a me ke keiki, hohola aʻela lākou i nā kapa o lākou ma luna o lāua, a hoʻēʻe akula iā Iesū ma luna iho.

⁸ Hohola ihola ka nui o ka poʻe kānaka i ko lākou kapa ma ke alanui, a ʻokiʻoki aʻela kekahi poʻe i nā lālā lāʻau, a hāliʻiliʻi ihola ma ke alanui.

⁹ Hoʻokani aʻela ka poʻe hele ma mua, a me ka poʻe hahai ma hope, ʻī akula, “Hōsana i ka Mamo a Dāvida! «E hoʻonani ʻia ka Mea e hele mai nei ma ka inoa o ka Haku»! Hōsana i ka lani kiʻekiʻe loa!”

¹⁰ A hiki akula ia i Ierusalema, pīhoihoi aʻela ko ke kūlanakauhale a pau, nīnau maila lākou, “ʻO wai kēia?”

¹¹ ʻĪ akula ka poʻe kānaka, “ʻO Iesū kēia, ke kāula no Nazareta i Galilaia.”

¹² ¶ Komo akula Iesū i loko o ka luakini o ke Akua, a hoʻokuke akula i waho i ka poʻe kūʻai lilo aku, a me ka poʻe kūʻai lilo mai a pau i loko o ka luakini; hoʻokahuli aʻela ia i nā papa o ka poʻe kūʻai moni, a me nā noho o ka poʻe kūʻai manu nūnū.

¹³ ʻĪ akula ʻo ia iā lākou, “Ua palapala ʻia, ‘«E kapa ʻia koʻu hale, he hale pule»’; a ua hoʻolilo iho nei ʻoukou iā ia «i ana no nā pōā».”

¹⁴ Hele maila ka poʻe makapō a me ka poʻe ʻoʻopa i ona lā ma ka luakini, a hoʻōla akula ʻo ia iā lākou.

¹⁵ ʻIke maila ka poʻe kāhuna nui a me ka poʻe kākau ʻōlelo i nā mea kupanaha āna i hana ai, a me nā kamaliʻi e hoʻokani ana i loko o ka luakini, “Hōsana i ka Mamo a Dāvida;” ukiuki maila lākou,

¹⁶ ʻĪ maila iā ia, “Ke lohe nei anei ʻoe i kā lākou nei ʻōlelo?” ʻĪ akula ʻo Iesū iā lākou, “ʻAe, ʻaʻole anei ʻoukou i heluhelu, ‘«Ua hoʻomākaukau ʻoe i ka hoʻoleʻa mai loko mai o nā waha kamaliʻi a me nā keiki waiū»’?”

¹⁷ Haʻalele akula ʻo ia iā lākou, a hele akula i waho o ke kūlanakauhele i Betania, ma laila i noho ai a ao ka pō.

¹⁸ ¶ A kakahiaka aʻe, i kona hoʻi ʻana i ke kūlanakauhale, pōloli ihola ia.

¹⁹ ʻIke aʻela ia i kekahi lāʻau fiku ma kapa alanui, hele akula ia i laila, a ʻo nā lau wale nō i loaʻa iā ia ma luna ona; ʻī aku ia i ua lāʻau lā, “Mai noho a ulu ka hua ma luna ou ma ia hope a mau loa aku.” Maloʻo koke ihola ua lāʻau fiku lā.

²⁰ A ʻike aʻela ka poʻe haumāna, kāhāhā ihola lākou, ʻī aʻela, “ʻEmo ʻole ka maloʻo ʻana o ka lāʻau fiku!”

²¹ ʻŌlelo maila ʻo Iesū, ʻī maila iā lākou, “He ʻoiaʻiʻo kaʻu e ʻōlelo aku nei iā ʻoukou, inā he manaʻoʻiʻo ko ʻoukou, ʻaʻole ʻoukou kānalua, e hana nō ʻoukou ʻaʻole i kēia wale nō ʻo ka lāʻau fiku; akā, inā e ʻōlelo aku ʻoukou i kēia mauna, ‘E kaʻikaʻi ʻia aʻe ʻoe, a e hoʻolei ʻia aku i loko o ka moana;’ e hana ʻia nō ia.

²² “ʻO ia hoʻi, ʻo nā mea a pau a ʻoukou e nonoi ai ma ka pule me ka manaʻoʻiʻo, e loaʻa nō ia iā ʻoukou.”

²³ ¶ Iā ia i komo aku ai i loko o ka luakini, a aʻo maila i laila, hele maila i ona lā ka poʻe kāhuna nui, a me ka poʻe lunakahiko o nā kānaka, ʻī maila, “Na wai mai kāu mana e hana aku ai i kēia mau mea? Na wai hoʻi i hāʻawi mai kēia mana iā ʻoe?”

²⁴ ʻŌlelo akula ʻo Iesū iā lākou, ʻī akula, “ʻO wau kekahi e nīnau aku iā ʻoukou, a i haʻi mai ʻoukou ia, e haʻi aku nō hoʻi au iā ʻoukou ia ka mea nāna i hāʻawi mai iaʻu e hana kēia mau mea.

²⁵ “ʻO ka bapetizo ʻana a Ioane, no hea ia? No ka lani mai anei? No kānaka anei?” Kūkā ihola lākou iā lākou iho, ʻī aʻela, “Inā e haʻi aku kākou, ‘No ka lani mai;’ a laila, e nīnau mai kēlā iā kākou, ‘No ke aha lā ʻoukou i manaʻoʻiʻo ʻole ai iā ia?’

²⁶ “A i haʻi aku kākou, ‘No kānaka,’ ke makaʻu aku nei kākou i nā kānaka; no ka mea, ke manaʻo nei lākou a pau, he kāula nō ʻo Ioane.”

²⁷ ʻŌlelo maila lākou iā Iesū, ʻī maila, “ʻAʻole mākou i ʻike.” ʻĪ akula hoʻi ʻo ia iā lākou, “ʻAʻole hoʻi au e haʻi aku iā ʻoukou i ka mea nāna i hāʻawi mai iaʻu e hana i kēia mau mea.

²⁸ “Akā, he aha kā ʻoukou manaʻo? He wahi kanaka iā ia nā keiki kāne ʻelua; a hele akula ia i ka mua, ʻī akula, ‘E kuʻu keiki, e hele aku ʻoe e hana i kēia lā ma kuʻu pā waina.’

²⁹ “Hōʻole maila kēlā, ʻī maila, ‘ʻAʻole au e hiki.’ A ma hope mihi ihola ia, a hele akula.

³⁰ “Hele akula hoʻi ʻo ia i kāna keiki muli, a ʻōlelo akula pēlā iā ia. ‘ʻAe maila ia,’ ʻī maila, ‘E hele nō wau, e kuʻu haku’; ʻaʻole naʻe ia i hele.

³¹ “ʻO wai ko lāua mea nāna i hana ka makemake o ka makua?” ʻĪ maila lākou iā ia, “ʻO ka mua.” ʻĪ akula Iesū iā lākou, “He ʻoiaʻiʻo kaʻu e ʻōlelo aku nei iā ʻoukou, e komo ʻē ka poʻe luna ʻauhau a me nā wāhine hoʻokamakama ma mua o ʻoukou i loko o ke aupuni o ke Akua.

³² “No ka mea, i hele mai nei ʻo Ioane i o ʻoukou nei ma ka ʻaoʻao o ka pono, ʻaʻole naʻe ʻoukou i manaʻoʻiʻo iā ia; akā, manaʻoʻiʻo ka poʻe luna ʻauhau a me nā wāhine hoʻokamakama iā ia; a iā ʻoukou i ʻike iā ia, ʻaʻole ʻoukou i mihi ma hope me ka manaʻoʻiʻo iā ia.

³³ ¶ “E hoʻolohe mai ʻoukou i kekahi ʻōlelo nane hou. «Kanu ihola kekahi mea hale i ka māla waina, hana ihola ia i pā a puni, ʻeli ihola i wahi kaomi waina i loko o laila, kūkulu ihola i hale kiaʻi», hāʻawi akula ia wahi i nā hoaʻāina, a hele akula ia i ka ʻāina ʻē.

³⁴ “A i ka wā i kokoke e oʻo ai ka hua, hoʻouna maila ia i kāna mau kauā i ka poʻe hoaʻāina i loaʻa mai ai ka hua nona.

³⁵ “A hopu akula nā hoaʻāina i kāna mau kauā, hahau ihola lākou i kekahi, pepehi ihola i kekahi a make, a hailuku akula i kekahi me ka pōhaku.

³⁶ “Hoʻouna hou maila ia i nā kauā ʻē aʻe, he nui aku i ka poʻe ma mua, a hana hou pēlā nā hoaʻāina iā lākou.

³⁷ “A ma hope iho, hoʻouna maila ia i kāna keiki i o lākou lā, ʻī ihola, ‘E hoʻomaikaʻi mai paha lākou i kaʻu keiki.’

³⁸ “ʻIke akula ka poʻe hoaʻāina i ua keiki lā, ʻōlelo aʻela kekahi i kekahi, ‘Eia aʻe ka hoʻoilina, inā kākou, e pepehi iā ia, a lilo mai kona ʻāina no kākou.’

³⁹ “Hopu akula lākou iā ia, hoʻokuke akula iā ia i waho o ka pā waina, pepehi ihola iā ia a make.

⁴⁰ “Aia hiki mai ka haku nona ka pā waina, he aha kāna e hana mai ai i ua poʻe hoaʻāina nei?”

⁴¹ ʻĪ maila lākou iā ia, “E pepehi hoʻomāinoino ia i kēlā poʻe ʻino, a e hāʻawi aku ia i ka pā waina, no kekahi poʻe hoaʻāina ʻē aʻe, nāna e hoʻokupu mai nona nā hua i ka wā e oʻo ai.”

⁴² ʻŌlelo akula ʻo Iesū iā lākou, “ʻAʻole anei ʻoukou i heluhelu i loko o ka Palapala Hemolele, ‘«ʻO ka pōhaku a ka poʻe hana hale i haʻalele ai, Ua lilo ia i pōhaku kumu kihi? ʻO kā ka Haku hana kēia, A he mea mahalo hoʻi ia i ko kākou mau maka»’?

⁴³ “No laila, ke ʻōlelo aku nei au iā ʻoukou, e lawe ʻia ana ke aupuni o ke Akua mai o ʻoukou mai, a e hāʻawi ʻia aku ia i ka lāhui kanaka nāna e hua mai kona hua.

⁴⁴ “A ʻo ka mea e hāʻule iho ma luna o kēia pōhaku, e haʻihaʻi ʻia ʻo ia; akā, ʻo ka mea i hāʻule ʻia iho e ua pōhaku lā ma luna, e pēpē loa ia.”

⁴⁵ Lohe aʻela ka poʻe kāhuna nui a me ka poʻe Parisaio i kāna mau ʻōlelo nane, ʻike ihola lākou, no lākou iho kāna i ʻōlelo ai.

⁴⁶ Makemake ihola lākou e lālau mai iā ia, a makaʻu akula lākou i ka poʻe kānaka; no ka mea, manaʻo ihola lākou he kāula ia.