KA ʻEUANELIO I KĀKAU ʻIA AI E MATAIO 20 - Ka Baibala Hemolele

1 Ka nane no ka poʻe paʻaua. 17 Haʻi mua mai Iesū i kona make. 20 Kāna ʻōlelo me nā keiki a Zebedaio. 30 Ua hoʻōla ʻia nā makapō ʻelua.

MOKUNA XX.

¹ ¶ “No ka mea, ua like ke aupuni o ka lani me kekahi kanaka mea hale, i hele akula i kakahiaka nui e hoʻolimalima i ka poʻe paʻaua no kona pā waina.

² “Hoʻolimalima ʻo ia i kekahi poʻe paʻaua i ka denari hoʻokahi no ka lā hoʻokahi; hoʻouna akula ʻo ia iā lākou ma kona pā waina.

³ “Hele hou akula ia i waho i ke kolu o ka hora, ʻike akula ia i kekahi poʻe kānaka e kū hana ʻole ana ma kahi kūʻai.

⁴ “ʻĪ akula ʻo ia iā lākou, ‘E haele hoʻi ʻoukou i ka pā waina, a ʻo ka mea pono, naʻu ia e uku aku iā ʻoukou.’ A hele akula lākou.

⁵ “Hele hou akula ia i waho, i ke ono a i ka iwa o ka hora, a hana ihola e like ma mua.

⁶ “A i ka hora ʻumikumamākahi, hele akula ia i waho, ʻike akula i kekahi poʻe e kū hana ʻole ana, ʻī akula ʻo ia iā lākou, ‘He aha kā ʻoukou e kū hana ʻole nei a pau ka lā?’

⁷ “ʻĪ maila lākou iā ia, ‘No ka mea, ʻaʻohe mea nāna mākou i hoʻolimalima.’ ʻĪ akula ʻo ia iā lākou, ‘E haele hoʻi ʻoukou i ka pā waina, a ʻo ka mea pono, e loaʻa hoʻi ia iā ʻoukou.’

⁸ “A ahiahi aʻela, ʻī akula ka haku nona ka pā waina i kona puʻukū, ‘E kāhea, aku ʻoe i ka poʻe paʻaua, a e hāʻawi aku iā lākou i ka uku, mai ka poʻe hope mai a hiki aku i ka poʻe mua.’

⁹ “A hele maila ka poʻe i hoʻolimalima ʻia i ka hora ʻumikumamākahi, loaʻa pākahi iā lākou ka denari.

¹⁰ “A hele maila ka poʻe i hoʻolimalima ʻia ma mua, manaʻo ihola lākou e loaʻa mai ka pākela uku, a loaʻa pākahi iā lākou ka denari.

¹¹ “A loaʻa ihola, ʻōhumu ihola lākou i ka mea hale,

¹² “ʻī aʻela, ‘ʻO kēia poʻe hope, hoʻokahi wale nō hora o kā lākou hana ʻana, a ua hoʻohālike mai ʻoe iā lākou me mākou, ka poʻe hoʻoikaika i ka wā luhi a me ka wela o ka lā.’

¹³ “ʻŌlelo akula ia, ʻī akula i kekahi o lākou, ‘E ka hoalauna, ʻaʻole au i hana ʻino aku iā ʻoe, ʻaʻole anei ʻoe i ʻae mai iaʻu no ka denari hoʻokahi?

¹⁴ ‘E lawe ʻoe i kāu, a e hele. ʻO koʻu makemake nō e hāʻawi aku na kēia poʻe ma hope e like me kāu.

¹⁵ ‘ʻAʻole anei au e pono ke hana aku me kaʻu ma muli o koʻu makemake? Ua hewa anei kou maka i koʻu lokomaikaʻi?’

¹⁶ “Pēlā hoʻi ka poʻe hope e lilo i mua, a ʻo ka poʻe mua i hope; no ka mea, he nui nā mea i hea ʻia; akā, he ʻuʻuku ka poʻe i wae ʻia.”

¹⁷ ¶ I ko Iesū hele ʻana i Ierusalema, kaʻi akula ia i ka poʻe haumāna he ʻumikumamālua i kahi kaʻawale ma ke alanui, ʻī maila iā lākou,

¹⁸ “Eia ke piʻi nei kākou i Ierusalema, a e kumakaia ʻia aku ke Keiki a ke Kanaka i ka poʻe kāhuna nui a me ka poʻe kākau ʻōlelo; a e hoʻohewa lākou iā ia e make;

¹⁹ a e hāʻawi aku hoʻi lākou iā ia i ko nā ʻāina ʻē e hoʻomāʻewaʻewa ʻia mai ai, a e hahau ʻia mai ai, a e kaulia ai ma ke keʻa; a pō ʻakolu aʻe, e ala hou mai ia.”

²⁰ ¶ A laila, pūneʻe mai i ona lā ka makuahine o nā keiki a Zebedaio, ʻo ia me nā keiki āna; moe ihola ia i mua ona, a noi akula iā ia i kekahi mea.

²¹ Nīnau maila ʻo Iesū iā ia, “He aha kou makemake?” ʻĪ akula kēlā, “E kauoha ʻoe e noho kēia mau keiki aʻu ʻelua, ʻo kekahi ma kou lima ʻākau, a ʻo kekahi ma kou lima hema i loko o kou aupuni.”

²² ʻŌlelo maila ʻo Iesū, ʻī maila, “ʻAʻole ʻoukou i ʻike i kā ʻoukou mea e noi mai nei. E hiki nō anei iā ʻolua ke inu i ko ke kīʻaha aʻu e inu ai; a e bapetizo ʻia i ka bapetizo ʻana aʻu e bapetizo ʻia mai ai?” ʻĪ akula lāua iā ia, “E hiki nō iā māua.”

²³ ʻŌlelo maila ʻo Iesū iā lāua, “E inu nō auaneʻi ʻolua i ko ke kīʻaha oʻu, a e bapetizo ʻia hoʻi i ka bapetizo ʻana aʻu e bapetizo ʻia ai; akā, ʻo ka noho ma koʻu lima ʻākau, a ma koʻu lima hema, ʻaʻole kaʻu ia e hāʻawi aku; aia nō ia no ka poʻe nona i hoʻomākaukau ʻia ai ia mea e koʻu Makua.”

²⁴ A lohe aʻela ka ʻumi, ukiuki akula lākou i ua mau hoahānau lā ʻelua.

²⁵ Kāhea maila ʻo Iesū iā lākou, ʻī maila, “Ua ʻike ʻoukou, ʻo nā aliʻi o nā lāhui kanaka, ua hoʻokiʻekiʻe ma luna o lākou, a ʻo nā luna hoʻi, ua hoʻounauna iā lākou.

²⁶ “ʻAʻole pēlā iā ʻoukou; a i manaʻo kekahi o ʻoukou i nui, e pono nō e lilo ia i mea lawelawe na ʻoukou.

²⁷ “A i manaʻo kekahi e lilo i poʻokela i waena o ʻoukou, e pono nō e lilo ia i kauā na ʻoukou.

²⁸ “Pēlā hoʻi, ʻaʻole i hele mai ke Keiki a ke Kanaka no ka lawelawe ʻia mai; akā, no ka lawelawe aku, a me ka hāʻawi aku i kona ola i kumu hoʻōla no nā mea he nui loa.”

²⁹ ¶ I ko lākou hele ʻana aʻe mai Ieriko aku, he nui ka poʻe kānaka i hahai iā ia.

³⁰ Aia hoʻi, ʻelua makapō e noho ana ma kapa alanui; lohe aʻela lāua, ʻo Iesū ke māʻalo aʻe, kāhea mai iā lāua, ʻī maila, “E aloha mai ʻoe iā māua, e ka Haku, e ka Mamo a Dāvida!”

³¹ Pāpā akula ka poʻe kānaka iā lāua, e hāmau; a nui loa aʻela kā lāua kāhea ʻana, “E aloha mai ʻoe iā māua, e ka Haku, e ka Mamo a Dāvida!”

³² Kū mālie ihola ʻo Iesū, hea akula iā lāua, ʻī akula, “He aha ko ʻolua makemake e hana aku ai au iā ʻolua?”

³³ ʻĪ maila lāua iā ia, “E ka Haku, e hoʻokaʻakaʻa ʻia mai ko māua mau maka.”

³⁴ Aloha akula ʻo Iesū, hoʻopā akula i ko lāua mau maka; ʻike koke aʻela ko lāua mau maka, a hahai akula lāua iā ia.