KA ʻEUANELIO I KĀKAU ʻIA AI E MATAIO 19 - Ka Baibala Hemolele

3 No ka haʻalele ʻana o ke kāne i ka wahine. 10 Ka pono o ka mare ʻana. 13 Ua hoʻomaikaʻi i nā kamaliʻi. 16 Ke kanaka waiwai ʻōpio. 23 He pilikia ke komo ʻana o ka mea waiwai i loko o ke ola. 27 Ka pōmaikaʻi ʻana o ka poʻe haʻalele i nā mea a pau e hahai iā ia.

MOKUNA XIX.

¹ ¶ A pau aʻela ia ʻōlelo ʻana a Iesū, hele akula ia mai Galilaia aku, a hiki akula ma ka mokuna ʻo Iudea ma kēlā ʻaoʻao o Ioredane.

² A he nui ka poʻe kānaka i hahai aku iā ia, a hoʻōla ihola ia i ko lākou poʻe maʻi.

³ ¶ Hele maila kekahi poʻe Parisaio i ona lā, e hoʻāʻo aku iā ia, ʻī maila, “He mea pono anei ke hōʻoki ke kāne i kāna wahine i kēlā hala i kēia hala?”

⁴ ʻŌlelo akula ia, ʻī akula iā lākou, “ʻAʻole anei ʻoukou i heluhelu, ʻO ka mea nāna lāua i hana i kinohou, «hana ihola ia, he kāne, he wahine»?

⁵ “ʻĪ ihola ia, ‘«No kēia mea, e haʻalele ke kanaka i kona makua kāne a me kona makuahine, a e pili aku ia me kāna wahine, a e lilo lāua ʻelua i ʻiʻo hoʻokahi».’

⁶ “No laila, ʻaʻole e lilo hou lāua i ʻelua, hoʻokahi o lāua ʻiʻo. No ia hoʻi, ʻo ka mea a ke Akua i hoʻopili pū iho ai, mai noho a hoʻokaʻawale aʻe ke kanaka.”

⁷ ʻĪ maila lākou iā ia, “No ke aha hoʻi ʻo Mose i kauoha mai ai, «e hāʻawi aku na ka wahine i palapala hoʻohemo, a e hōʻoki aku iā ia»?”

⁸ ʻĪ akula ʻo ia iā lākou, “No ka paʻakikī o ko ʻoukou naʻau i ʻae mai ai ʻo Mose iā ʻoukou e hōʻoki i nā wāhine a ʻoukou; ʻaʻole pēlā ia mai kinohi mai.

⁹ “Ke ʻōlelo aku nei au iā ʻoukou, ʻo ka mea nāna e hōʻoki i kāna wahine, ke moekolohe ʻole ia, a e mare i ka wahine hou, ua moekolohe ia kāne; a ʻo ka mea nāna e mare ua wahine hemo lā, ua moekolohe hoʻi ia.”

¹⁰ ʻĪ akula kāna poʻe haumāna iā ia, “Inā paha pēlā ke kāne me kāna wahine, e aho nō ke mare ʻole.”

¹¹ ʻĪ maila kēlā iā lākou, “ʻAʻole e hiki i nā kānaka a pau ke hoʻomanawanui pēlā; aia i ka poʻe nāna kēia pono i hāʻawi ʻia mai.

¹² “No ka mea, he poʻe ʻeunuha kekahi mai ko lākou hānau ʻana mai, a he poʻe ʻeunuha kekahi i hōʻeunuha ʻia e kānaka, a he poʻe ʻeunuha kekahi i hōʻeunuha ʻia e lākou iho no ke aupuni o ka lani. ʻO ka mea e hiki iā ia ia mea, e pono nō ia pēlā.”

¹³ ¶ A laila, lawe ʻia mai i ona lā nā kamaliʻi, e kau aku ai ia i nā lima ma luna o lākou, a e pule aku; a pāpā akula ka poʻe haumāna iā lākou.

¹⁴ ʻĪ maila Iesū, “E kuʻu mai ʻoukou i nā kamaliʻi, me ka pāpā ʻole iā lākou i ka hele mai i oʻu nei; no ka mea, no ka poʻe e like me lākou nei ke aupuni o ka lani.”

¹⁵ A kau ihola ia i nā lima ma luna o lākou, a hele akula.

¹⁶ ¶ Aia hoʻi, hele maila kekahi kanaka, ʻī maila iā ia, “E ke Kumu maikaʻi, he aha ka mea maikaʻi aʻu e hana ai, i loaʻa iaʻu ke ola mau loa?”

¹⁷ ʻĪ akula ʻo ia iā ia, “No ke aha lā ʻoe e kapa mai nei iaʻu he maikaʻi? ʻAʻohe mea maikaʻi ʻē aʻe, hoʻokahi wale nō, ʻo ke Akua. Inā e makemake ʻoe e komo i loko o ke ola, e mālama ʻoe i nā kānāwai.”

¹⁸ ʻĪ maila kēlā, “ʻO nā kānāwai hea?” ʻĪ akula Iesū, “ʻO nēia, ‘«Mai pepehi kanaka ʻoe; Mai moekolohe ʻoe; Mai ʻaihue ʻoe; Mai hōʻike wahaheʻe ʻoe;

¹⁹ E hoʻomaikaʻi i kou makua kāne a me kou makuahine; a E aloha ʻoe i kou hoalauna me ʻoe iā ʻoe iho».’”

²⁰ ʻĪ maila ua kanaka ʻōpiopio lā iā ia, “Ua mālama au ia mau mea a pau mai kuʻu wā kamaliʻi mai; he aha koʻu hemahema?”

²¹ ʻĪ akula Iesū iā ia, “A i makemake ʻoe e hemolele, ʻeā, e hele ʻoe, e kūʻai lilo aku i kou waiwai a pau, a e hāʻawi aku na ka poʻe ʻilihune, a e loaʻa iā ʻoe ka waiwai i loko o ka lani; a e hele mai ʻoe e hahai mai iaʻu.”

²² Lohe aʻela ua kanaka ʻōpiopio lā ia ʻōlelo, hele akula ia me ka minamina; no ka mea, he nui loa kona waiwai.

²³ ¶ ʻŌlelo maila ʻo Iesū i kāna poʻe haumāna, “He ʻoiaʻiʻo kaʻu e ʻōlelo aku nei iā ʻoukou, e komo ʻāpuʻepuʻe ke kanaka waiwai i loko o ke aupuni o ka lani.

²⁴ “Eia hou ke ʻōlelo aku nei au iā ʻoukou, e hiki ʻē ke kāmelo ke komo ma ka puka o ke kui kele ma mua o ke komo ʻana o ke kanaka waiwai i loko o ke aupuni o ka lani.”

²⁵ Lohe aʻela nā haumāna āna, kāhāhā nui ihola lākou, ʻī aʻela, “ʻO wai lā auaneʻi ke ola?”

²⁶ Nānā maila ʻo Iesū iā lākou, ʻī maila, “He mea hiki ʻole ia i kānaka; akā, e hiki ʻiʻo nō nā mea a pau i ke Akua.”

²⁷ A laila, ʻōlelo akula ʻo Petero iā ia, ʻī akula, “Eia hoʻi, ua haʻalele mākou i nā mea a pau, a ua hahai aku mākou iā ʻoe; he aha lā uaneʻi kā mākou e loaʻa ai?”

²⁸ ʻĪ maila ʻo Iesū iā lākou, “He ʻoiaʻiʻo kaʻu e ʻōlelo aku nei iā ʻoukou, i ke ola hou ʻana, i ka wā e noho ai ke Keiki a ke Kanaka ma luna o kona noho aliʻi nani; ʻoukou hoʻi ka poʻe i hahai mai iaʻu, e noho nō ʻoukou ma luna o nā noho aliʻi he ʻumikumamālua, i poʻe luna kānāwai no nā ʻohana o ʻIseraʻela he ʻumikumamālua.

²⁹ “ʻO ka mea haʻalele i nā hale, i nā hoahānau kāne, i nā hoahānau wahine, i ka makua kāne, i ka makuahine, i ka wahine, i nā keiki, i nā ʻāina hoʻi, no koʻu inoa, e loaʻa mai iā ia he pāhaneri, a e lilo mai iā ia ke ola mau loa.

³⁰ “A he nui nā mea mua e lilo ana i hope, a ʻo nā mea hope e lilo ana i mua.”