KA ʻEUANELIO I KĀKAU ʻIA AI E MATAIO 17 - Ka Baibala Hemolele

1 Ke ʻano ʻē ʻana o Iesū. 14 Hoʻōla ia i ke keiki i uluhia e ka daimonio. 22 Hōʻike mai hoʻi ia i kona make ʻana. 24 A hoʻokupu aku hoʻi i ka diderama.

MOKUNA XVII.

¹ ¶ A hala aʻela nā lā ʻeono, kono aʻela ʻo Iesū iā Petero me Iakobo a me Ioane kona kaikaina, a kaʻi akula iā lākou ma kahi mehameha ma ka mauna kiʻekiʻe.

² Hoʻopāhaʻohaʻo ʻia ihola ia i mua o lākou; ʻalohi maila kona helehelena e like me ka lā, a keʻokeʻo maila kona ʻaʻahu e like me ka mālamalama.

³ Aia hoʻi, ʻikea aʻela e lākou ʻo Mose a me ʻElia e kamaʻilio pū ana me ia.

⁴ ʻŌlelo akula ʻo Petero iā Iesū, ʻī akula, “E ka Haku, he pono no kākou ke noho ma ʻaneʻi; inā ʻoe e makemake, e kūkulu mākou i mau halelewa i ʻekolu, nou kekahi, no Mose kekahi, a no ʻElia kekahi.”

⁵ Iā ia i ʻōlelo aku ai, aia hoʻi, he ao ʻālohilohi i uhi mai iā lākou; a he leo mai loko mai o ke ao i paʻē maila, “ʻO kaʻu Keiki punahele kēia, ka Mea aʻu i ʻoliʻoli loa ai; e hoʻolohe ʻoukou iā ia!”

⁶ A lohe aʻela nā haumāna, moe ihola lākou, i lalo ke alo, makaʻu loa aʻela.

⁷ Hele maila ʻo Iesū, hoʻopā ihola iā lākou, ʻī maila, “E ala aʻe, mai makaʻu ʻoukou.”

⁸ ʻAlawa aʻela ko lākou maka i luna, ʻaʻole lākou i ʻike i ke kanaka ʻē aʻe, iā Iesū wale nō.

⁹ ¶ A iho maila lākou mai ka mauna mai, pāpā maila ʻo Iesū iā lākou, ʻī maila, “Mai haʻi aku ʻoukou i kā ʻoukou mea i ʻike iho nei, a ala mai ke Keiki a ke Kanaka mai ka make mai.”

¹⁰ Nīnau akula nā haumāna āna iā ia, ʻī akula, “No ke aha lā e ʻōlelo mai nei ka poʻe kākau ʻōlelo, ʻo ʻElia ke hele ʻē mai ma mua e pono ai?”

¹¹ ʻŌlelo maila ʻo Iesū iā lākou, ʻī maila, “ʻO ʻElia nō ke hele ʻē mai ma mua e pono ai, a e hoʻoponopono i nā mea a pau.

¹² “Ke ʻōlelo aku nei nō hoʻi au iā ʻoukou, ua hiki ʻē mai nō ʻo ʻElia, ʻaʻole naʻe lākou i ʻike iā ia; akā, ua hana aku lākou iā ia i ka mea a lākou i makemake ai. Pēlā nō hoʻi ke Keiki a ke Kanaka e hana ʻeha ʻia ai e lākou.”

¹³ A laila ʻike ihola nā haumāna, ʻo Ioane Bapetite kāna i ʻōlelo mai ai iā lākou.

¹⁴ ¶ A hiki aʻela lākou i ka poʻe kānaka, hele maila kekahi kanaka i ona lā, kukuli ihola i mua ona, ʻī maila,

¹⁵ “E ka Haku, e aloha mai ʻoe i kaʻu keiki; no ka mea, ua loʻohia ia e ka maʻi hina, ua ʻeha loa, ua hina pinepine ia i loko o ke ahi, a i loko o ka wai.

¹⁶ “A lawe maila au iā ia i kāu poʻe haumāna, ʻaʻole hoʻi i hiki iā lākou ke hoʻōla iā ia.”

¹⁷ ʻŌlelo maila ʻo Iesū, ʻī maila, “E ka hanauna manaʻoʻiʻo ʻole a me ka hewa! Pehea hoʻi ka lōʻihi o koʻu noho pū ʻana me ʻoukou? Pehea hoʻi ka lōʻihi o koʻu hoʻomanawanui ʻana aku iā ʻoukou? E lawe mai iā ia i oʻu nei.”

¹⁸ Pāpā akula ʻo Iesū iā ia, a puka akula ka daimonio i waho ona; a ola ihola ua keiki lā mai ia hora mai.

¹⁹ ¶ A laila, hele malū akula nā haumāna i o Iesū lā, nīnau akula, “No ke aha lā i hiki ʻole ai iā mākou ke mahiki aku iā ia?”

²⁰ ʻĪ maila ʻo Iesū iā lākou, “No ko ʻoukou manaʻoʻiʻo ʻole. He ʻoiaʻiʻo kaʻu e ʻōlelo aku nei iā ʻoukou, inā he like ko ʻoukou manaʻoʻiʻo me kekahi hua mākeke, a ʻōlelo aku paha ʻoukou i kēia mauna, ‘E neʻe aku ʻoe i ʻō,’ a e neʻe aku nō ia; ʻaʻole mea hiki ʻole iā ʻoukou.

²¹ “Akā, ʻaʻole e puka wale aku ka mea me nēia, aia ma ka pule a me ka hoʻokē ʻai wale nō.”

²² ¶ I ko lākou noho ʻana ma Galilaia, ʻī maila ʻo Iesū iā lākou, “E kumakaia aku ke Keiki a ke Kanaka i loko o nā lima o kānaka;

²³ na lākou ia e pepehi a make, a pō ʻakolu aʻe e hoʻāla ʻia mai ai ia.” A kaumaha loa ihola lākou.

²⁴ ¶ A hiki akula lākou i Kaperenauma, hele maila ka poʻe ʻauhau hapahā i o Petero lā, ʻī maila, “ʻAʻole anei e hoʻokupu mai kā ʻoukou Kumu i ka hapahā?”

²⁵ ʻĪ akula ia, “ʻAe.” A komo akula ia i loko o ka hale, ʻōlelo mua maila ʻo Iesū iā ia, ʻī maila, “He aha kou manaʻo, e Simona, ʻo wai ka poʻe hoʻokupu aku i ka mea ʻauhau a me ka uku i nā aliʻi o kēia ao? ʻO kā lākou poʻe keiki anei, a ʻo nā kānaka ʻē paha?”

²⁶ ʻĪ akula Petero iā ia, “ʻO kānaka ʻē.” ʻĪ maila Iesū iā ia, “A laila, ua kaʻawale nā keiki.

²⁷ “Akā, o hoʻonāukiuki kākou iā lākou, e hele aku ʻoe i ka moana wai, e hoʻolei aku i ka makau, a e huki mai i ka iʻa mua e lou mai ana; a i ka wehe ʻana i kona waha, e loaʻa iā ʻoe kekahi hapalua; ʻo ia kāu e lawe ai, a e hāʻawi aku iā lākou no kāua.”