KA ʻEUANELIO I KĀKAU ʻIA AI E MATAIO 15 - Ka Baibala Hemolele

1 Ua hoʻohewa ʻia nā moʻoʻōlelo a nā lunakahiko. 11 Ka mea hoʻohaumia. 21 Ua hoʻōla ʻia ke kaikamahine a ka wahine Kanaʻana. 32 Ua hānai ʻia ka poʻe ʻehiku tausani.

MOKUNA XV.

¹ ¶ A laila hele maila i o Iesū lā nā kākau ʻōlelo a me nā Parisaio no Ierusalema mai, nīnau maila,

² “No ke aha lā e pale nei kāu poʻe haumāna i ka moʻoʻōlelo a ka poʻe lunakahiko? No ka mea, ʻaʻole lākou e holoi i nā lima o lākou i kā lākou ʻai ʻana.”

³ ʻŌlelo akula ʻo ia iā lākou, ʻī akula, “No ke aha lā hoʻi ʻoukou e pale nei i ke kānāwai o ke Akua ma kā ʻoukou moʻoʻōlelo?

⁴ “Ua kauoha mai ke Akua, i ka ʻī ʻana mai, ‘«E mālama ʻoe i ka makua kāne a me ka makuahine»; a «ʻo ka mea ʻōlelo hōʻino aku i ka makua kāne a i ka makuahine paha, e make ia».’

⁵ “A ke ʻōlelo nei ʻoukou, ‘ʻO ka mea e ʻōlelo aku i ka makua kāne a i ka makuahine paha, “Ua laʻa, ʻo kaʻu mea e pono ai ʻoe;”

⁶ ʻaʻole ia e mālama hou aku i kona makua kāne, a me kona makuahine.’ Pēlā ʻoukou i hōʻole ai i ke kānāwai o ke Akua ma kā ʻoukou moʻoʻōlelo.

⁷ “E ka poʻe hoʻokamani, pono ʻiʻo kā ʻIsaia i ʻōlelo mai ai no ʻoukou, i ka ʻī ʻana:

⁸ ‘«ʻO kēia poʻe kānaka, ke hoʻokokoke mai nei lākou iaʻu me ko lākou waha, a ke hoʻomaikaʻi mai nei iaʻu me nā lehelehe; Akā, ʻo ko lākou naʻau lā, he mamao loa ia iaʻu.

⁹ ‘Makehewa ko lākou mālama ʻana mai iaʻu, I kā lākou aʻo ʻana aku i nā kauoha a nā kānaka i kumu e mālama ʻia ai».’”

¹⁰ Kāhea akula ia i ka poʻe kānaka, ʻī akula, “E hoʻolohe mai ʻoukou, a e hoʻomaopopo hoʻi.

¹¹ “ʻAʻole e haumia ke kanaka i ka mea i komo ma ka waha; akā, ʻo ka mea i puka aʻe mai loko mai o ka waha, ʻo ia ka mea e haumia ai ke kanaka.”

¹² A laila, hele akula kāna poʻe haumāna, ʻī akula iā ia, “Ke ʻike nei anei ʻoe, ua huhū ka poʻe Parisaio i ko lākou lohe ʻana i kēia ʻōlelo?”

¹³ ʻŌlelo maila ia, ʻī maila, “ʻO nā mea kanu a pau ʻaʻole i kanu ʻia e koʻu Makua i ka lani, e pau ia i ka uhuki ʻia.

¹⁴ “E waiho pēlā iā lākou; he poʻe alakaʻi makapō lākou no nā makapō; inā he makapō e alakaʻi i ka makapō, e hāʻule pū lāua i loko o ka lua.”

¹⁵ ʻŌlelo akula ʻo Petero iā ia, ʻī akula, “E hoʻākāka mai ʻoe i kēia ʻōlelo nane.”

¹⁶ ʻĪ maila ʻo Iesū, “ʻOukou anei kekahi i hoʻomaopopo ʻole?

¹⁷ “ʻAʻole anei ʻoukou i ʻike, ʻo ka mea komo ma ka waha, ua hele iho nō ia ma loko o ka ʻōpū, a ua hoʻolei ʻia aku ia ma ke kiʻona?

¹⁸ “Akā, ʻo ka mea e puka ana mai loko mai o ka waha, mai loko mai ia o ka naʻau; ʻo ia ka mea e haumia ai ke kanaka.

¹⁹ “No ka mea, mai loko mai o ka naʻau ke puka mai nei nā manaʻo ʻino, ka pepehi kanaka ʻana, ka moekolohe ʻana, ka hoʻokamakama ʻana, ka ʻaihue ʻana, ka hoʻopunipuni ʻana, a me nā ʻōlelo ʻino.

²⁰ “ʻO ia nā mea e haumia ai ke kanaka; akā, ʻo ka ʻai ʻana me nā lima holoi ʻole ʻia, ʻaʻole e haumia ke kanaka ia mea.”

²¹ ¶ Hele akula ʻo Iesū mai ia wahi aku, a hiki akula ma nā mokuna ʻo Turo a me Sidona.

²² Aia i laila kekahi wahine Kanaʻana no ia ʻāina i hele mai ai, kāhea maila iā ia, ʻī maila, “E ka Haku, ka Mamo a Dāvida, e aloha mai ʻoe iaʻu, ua uluhia loa kuʻu kaikamahine e ka daimonio.”

²³ ʻAʻole ia i ʻōlelo iki aku iā ia. Hele akula kāna mau haumāna, a noi akula iā ia, “E hoʻihoʻi aku ʻoe iā ia; no ka mea, ke walaʻau mai nei ia ma hope o kākou.”

²⁴ ʻŌlelo maila ia, ʻī maila, “Ua hoʻouna ʻia mai nei au i ka ʻohana hipa ʻauana o kā ʻIseraʻela wale nō.”

²⁵ Hele maila ua wahine lā, moe ihola ia i mua ona, ʻī maila, “E ka Haku, e kōkua mai ʻoe iaʻu!”

²⁶ ʻŌlelo akula ʻo Iesū, ʻī akula, “ʻAʻole e pono ke lawe i ka ʻai a nā kamaliʻi, a hoʻolei aku na nā ʻīlio.”

²⁷ ʻĪ maila kēlā, “He ʻoiaʻiʻo, e ka Haku; ua ʻai nō naʻe nā ʻīlio i nā hunahuna i heleleʻi iho ma lalo o ka papa ʻaina a ko lākou haku.”

²⁸ A laila, ʻōlelo akula ʻo Iesū iā ia, ʻī akula, “E ka wahine, nui kou manaʻoʻiʻo; me kāu makemake, pēlā e hana ʻia aku ai nou.” A ola ihola kāna kaikamahine ia hora.

²⁹ ¶ Hele akula ʻo Iesū ma ia wahi aku, a hiki akula ma ke kaʻe loko i Galilaia; piʻi akula ia i luna i kekahi mauna, a noho ihola i laila.

³⁰ He nui ka poʻe kānaka i hele mai i ona lā, e halihali pū mai ana i nā ʻoʻopa, i nā makapō, i nā ʻāʻā, i nā mumuku, a me nā mea ʻē aʻe he nui wale, a waiho ihola iā lākou ma nā wāwae o Iesū; a hoʻōla ihola ʻo ia iā lākou.

³¹ Mahalo akula ua poʻe kānaka lā i ko lākou ʻike ʻana aʻe i nā ʻāʻā e ʻōlelo ana, i nā mumuku e ola ana, i nā ʻoʻopa e hele ana, a i nā makapō e ʻike ana; a hoʻonani akula lākou i ke Akua o kā ʻIseraʻela.

³² ¶ Kāhea maila ʻo Iesū i kāna poʻe haumāna, ʻī maila, “Ke aloha aku nei koʻu naʻau i kēia poʻe kānaka; no ka mea, eia ke kolu o ka lā i noho ai lākou me aʻu, ʻaʻole hoʻi a lākou mea e ʻai ai; ʻaʻole au makemake e hoʻihoʻi aku iā lākou me ka pōloli, o maʻule auaneʻi lākou ma ke ala.”

³³ ʻĪ akula kāna poʻe haumāna iā ia, “No hea lā e loaʻa ai iā kākou ka berena ma kēia wahi wao nahele, i māʻona ai ka poʻe nui me nēia?”

³⁴ Nīnau maila ʻo Iesū iā lākou, “ʻEhia nā pōpō berena a ʻoukou?” ʻĪ akula lākou, “ʻEhiku, a he mau wahi iʻa liʻiliʻi.”

³⁵ ʻŌlelo akula ia i ua poʻe kānaka lā, e noho i lalo ma ka honua.

³⁶ Lālau akula ia i nā pōpō berena ʻehiku, a me nā iʻa, hoʻoalohaloha akula, wāwahi ihola, hāʻawi akula i nā haumāna āna, a hāʻawi akula hoʻi nā haumāna i ka poʻe kānaka.

³⁷ ʻAi ihola lākou a pau a māʻona; hōʻiliʻili ihola lākou i nā hakina i koe, ʻehiku hīnaʻi i piha.

³⁸ ʻO ka poʻe i ʻai, ʻehā tausani kānaka, he ʻokoʻa nā wāhine a me nā kamaliʻi.

³⁹ A hoʻihoʻi akula ia i ua poʻe lā, eʻe akula ia ma luna o ka moku, a holo akula ma kekahi kaʻe o Magedala.