KA ʻEUANELIO I KĀKAU ʻIA AI E MATAIO 13 - Ka Baibala Hemolele

3 Ka nane no ke kanaka lūlū hua. 18 Ua hoʻākāka ʻia ua nane lā. 24 Ka nane no ka zīzānia. 31 No ka hua mākeke. 44 Ka waiwai hūnā. 45 Ka momi. 47 Ka ʻupena. 53 Ua hoʻowahāwahā ʻia ʻo ia e nā kānaka o kona ʻāina.

MOKUNA XIII.

¹ ¶ Ia lā lā, hele akula ʻo Iesū i waho o ka hale, a noho ihola ia ma kapa o ka loko.

² He nui loa ka poʻe kānaka i ʻākoakoa mai i ona lā, eʻe akula ia ma luna o kekahi moku, noho ihola; a kū nui maila ua poʻe kānaka lā ma uka.

³ Aʻo maila ʻo ia iā lākou i kēlā mea kēia mea ma nā ʻōlelo nane, i ka ʻī ʻana mai, “Aia hoʻi, hele akula kekahi kanaka lūlū hua e lūlū.

⁴ “A i kāna lūlū ʻana, heleleʻi ihola kekahi ma kapa alanui, lele maila nā manu, a pau aʻela ia i ke kikoa.

⁵ “Akā heleleʻi ihola kekahi ma kahi hāpapa, ʻaʻohe nui o ka lepo; kupu wawe aʻela ia no ka pāpaʻu o ka lepo.

⁶ “A puka mai ka lā, mae ihola ia, maloʻo akula no ke aʻa ʻole.

⁷ “Akā heleleʻi ihola kekahi ma kahi kākalaioa, kupu aʻela ke kākalaioa a kāhihi akula ia mea.

⁸ “Akā heleleʻi ihola hoʻi kekahi ma ka lepo maikaʻi, a hua maila i ka hua, he pāhaneri kā kekahi, he pākanaono kā kekahi, a he pākanakolu kā kekahi.

⁹ “ʻO ka mea pepeiao lohe lā, e hoʻolohe ia.”

¹⁰ ¶ Hele maila kāna poʻe haumāna, nīnau akula iā ia, “No ke aha lā ʻoe e ʻōlelo mai ai iā lākou ma nā ʻōlelo nane?”

¹¹ ʻŌlelo maila ʻo ia iā lākou, ʻī maila, “No ka mea, ua hāʻawi ʻia aku iā ʻoukou e ʻike i nā mea pohihihi o ke aupuni o ka lani, ʻaʻole naʻe i hāʻawi ʻia aku iā lākou.

¹² “ʻO ka mea ua loaʻa, e hāʻawi hou ʻia aku nāna a māhuahua; akā, ʻo ka mea ua loaʻa ʻole, e lawe ʻia aku kāna mai ona aku lā.

¹³ “No laila kaʻu e ʻōlelo aku nei iā lākou ma nā ʻōlelo nane; no ka mea, i ka nānā ʻana, ʻaʻole lākou i ʻike; a i ka lohe ʻana, ʻaʻole lākou i hoʻolohe, ʻaʻole hoʻi i hoʻomaopopo.

¹⁴ “A i kō ai ka wānana a ʻIsaia iā lākou, i ka ʻī ʻana, ‘«I ka lohe ʻana, e lohe auaneʻi ʻoukou, ʻaʻole naʻe e hoʻomaopopo; A i ka nānā ʻana, e nānā auaneʻi ʻoukou, ʻaʻole naʻe e ʻike.

¹⁵ ‘No ka mea, ua palaka ka naʻau o kēia poʻe kānaka, Ua hoʻokuli lākou i ko lākou mau pepeiao, Ua hoʻopaʻa hoʻi i ko lākou mau maka; O ʻike auaneʻi ko lākou mau maka, O lohe hoʻi ko lākou mau pepeiao, O manaʻo hoʻi ko lākou naʻau, o huli mai lākou, A hoʻōla aku au iā lākou».’

¹⁶ “Pōmaikaʻi ko ʻoukou mau maka; no ka mea, ua ʻike; a me ko ʻoukou mau pepeiao, ua lohe.

¹⁷ “He ʻoiaʻiʻo kaʻu e ʻōlelo aku nei iā ʻoukou, he nui nā kāula a me nā kānaka pono i ake e ʻike i nā mea a ʻoukou e ʻike nei, ʻaʻole naʻe lākou i ʻike; a e lohe hoʻi i nā mea a ʻoukou e lohe nei, ʻaʻole naʻe i lohe.

¹⁸ “E hoʻolohe ʻoukou i ke ʻano o ka ʻōlelo nane no ke kanaka lūlū hua.

¹⁹ “ʻO kēlā mea kēia mea lohe i ka ʻōlelo no ke aupuni me ka hoʻomaopopo ʻole; a laila, hele mai nō ka mea ʻino, a kāʻili aku ia i ka mea i lūlū ʻia i loko o kona naʻau. ʻO ia ka mea i lūlū ʻia ma kapa alanui.

²⁰ “ʻO ka mea i lūlū ʻia ma kahi hāpapa, ʻo ia ka mea i lohe i ka ʻōlelo, a hopu koke ihola ia me ka ʻoliʻoli.

²¹ “ʻAʻole naʻe he aʻa i loko ona; no laila, ua pōkole kona kūpaʻa ʻana; a hiki mai ka pilikia a me ka hōʻino no ka ʻōlelo, a laila hāʻule koke ihola ia.

²² “ʻO ka mea i lūlū ʻia ma kahi kākalaioa, ʻo ia ka mea i lohe i ka ʻōlelo; a na ka manaʻo ʻana i nā mea o kēia ao, a me ka hoʻopunipuni ʻana o ka waiwai e kinai iho ka ʻōlelo, a lilo ia i mea hua ʻole.

²³ “A ʻo ka mea i lūlū ʻia ma kahi lepo maikaʻi, ʻo ia ka mea i lohe i ka ʻōlelo me ka hoʻomaopopo; a hua mai i ka hua he pāhaneri kā kekahi, he pākanaono kā kekahi, a he pākanakolu kā kekahi.”

²⁴ ¶ Haʻi maila ʻo ia i kekahi ʻōlelo nane hou iā lākou, ʻī maila, “Ua hoʻohālike ʻia ke aupuni o ka lani me kekahi kanaka nāna i lūlū iho ka hua maikaʻi ma kāna mahina ʻai.

²⁵ “A i ka wā i hiamoe ai nā kānaka, hele maila kona ʻenemi, a lūlū ihola i ka zīzānia i loko pū me ka palaoa, a hoʻi akula.

²⁶ “A kupu mai ke kino, a ʻōpuʻu aʻela, a laila ʻikea ihola ka zīzānia.

²⁷ “Hele maila nā kauā a ua mea hale lā, ʻī maila iā ia, ‘E ka haku, ʻaʻole anei ʻoe i lūlū iho i ka hua maikaʻi ma kāu mahina ʻai? No hea maila hoʻi ka zīzānia?’

²⁸ “ʻĪ akula ʻo ia iā lākou, ‘Na ke kanaka ʻenemi ia i hana!’ Nīnau maila ka poʻe kauā iā ia, ‘E kiʻi anei mākou e uhuki ia mea?’

²⁹ “ʻĪ akula ia, ‘ʻAʻole, o uhuki pū ʻoukou i ka palaoa i ko ʻoukou waele ʻana i ka zīzānia.

³⁰ ‘E waiho nō pēlā, e ulu pū lāua a hiki i ka ʻohi ʻana: a i ka wā e ʻohi ai, naʻu e ʻōlelo aku i ka poʻe ʻokiʻoki, “E hōʻuluʻulu mua ʻoukou i ka zīzānia, e pūʻā a paʻa i mea e puhi ai i ke ahi; a ʻo ka palaoa lā, e hōʻiliʻili ia i loko o koʻu hale papaʻa.”’”

³¹ ¶ Haʻi akula ʻo ia iā lākou i kekahi ʻōlelo nane hou, ʻī akula, “Ua like ke aupuni o ka lani me kekahi hua mākeke a ke kanaka i lawe a kanu iho i kāna mahina ʻai.

³² “He makaliʻi kēia hua i nā hua a pau, a kupu aʻe ia, ua ʻoi kona kino i nā laʻalāʻau a pau, a lilo aʻela ia i lāʻau, a lele mai «nā manu o ka lewa», a «kau iho i luna o kona mau lālā».”

³³ ¶ ʻŌlelo maila hoʻi ʻo ia iā lākou i kekahi ʻōlelo nane hou. “Ua like ke aupuni o ka lani me ka mea hū a kekahi wahine i lawe ai, a hui pū me nā sato palaoa ʻekolu, a pau aʻela ia i ka hū.”

³⁴ ¶ ʻO ia mau mea a pau kā Iesū i ʻōlelo aku ai i nā kānaka ma nā ʻōlelo nane; a ma nā ʻōlelo nane wale nō kāna ʻōlelo ʻana aku iā lākou.

³⁵ I kō ai ka mea i ʻōlelo ʻia e ke kāula, i ka ʻī ʻana mai, “«E pane aku kuʻu waha i nā ʻōlelo nane, E haʻi aku hoʻi au i nā mea i haʻi ʻole ʻia, mai ke kumu mai o ke ao nei».”

³⁶ ¶ A laila, haʻalele akula Iesū i ka poʻe kānaka, a hele maila i loko o ka hale. Hele akula nā haumāna i ona lā, ʻī akula, “E hoʻākāka mai ʻoe iā mākou i ka ʻōlelo nane no ka zīzānia ma ka mahina ʻai.”

³⁷ ʻŌlelo maila ia, ʻī maila iā lākou, “ʻO ka mea nāna i lūlū i ka hua maikaʻi, ʻo ia ke Keiki a ke Kanaka.

³⁸ “ʻO ka mahina ʻai, ʻo ia ke ao nei; ʻo ka hua maikaʻi, ʻo ia nā keiki no ke aupuni; a ʻo ka zīzānia, ʻo ia nā keiki o ka mea ʻino.

³⁹ “ʻO ka ʻenemi nāna i lūlū ia mea, ʻo ia ka diabolō; ʻo ka wā e ʻohi ai, ʻo ka hopena ia o kēia ao; a ʻo ka poʻe nāna e ʻokiʻoki, ʻo ka poʻe ʻānela ia.

⁴⁰ “Me ka zīzānia i hōʻiliʻili ʻia ai a puhi ʻia ai i ke ahi, pēlā nō hoʻi i ka hopena o kēia ao.

⁴¹ “Na ke Keiki a ke Kanaka e hoʻouna i kona poʻe ʻānela, a e hōʻuluʻulu mai lākou i nā mea hoʻohihia wale, a me nā mea hana ʻino a pau mai loko mai o kona aupuni;

⁴² a e hoʻolei aku iā lākou i loko o ka lua ahi; i laila ka uē ʻana a me ka ʻuī ʻana o nā niho.

⁴³ “A laila «e lilelile aʻe ka poʻe pono e like me ka lā» i loko o ke aupuni o ko lākou Makua. ʻO ka mea pepeiao lohe lā, e hoʻolohe ia.

⁴⁴ ¶ “Eia hou, ua like ke aupuni o ka lani me ka waiwai i hūnā ʻia i loko o kahi kīhāpai; a loaʻa ia i ke kanaka, hūnā hou iho nō ia, a hele aku me ka ʻoliʻoli, a kūʻai lilo aku nō i kāna mau mea a pau, a kūʻai lilo mai ia kīhāpai nona.

⁴⁵ ¶ “Eia hou, Ua like ke aupuni o ka lani me ke kanaka kūʻai, e ʻimi ana i nā momi maikaʻi.

⁴⁶ “A ʻike aku ia i kekahi momi maikaʻi loa, hele aku nō ia, a kūʻai lilo aku i kāna mau mea a pau, a kūʻai lilo mai ia momi nona.

⁴⁷ ¶ “Eia hou, ua like ke aupuni o ka lani me ka ʻupena i kuʻu i ke kai, a puni aʻela nā iʻa he nui wale ke ʻano.

⁴⁸ “A piha ia, huki aʻe lākou i uka, noho iho, a hahao iho i nā mea maikaʻi i loko o nā ipu; akā, hoʻolei aku nō i nā mea ʻino.

⁴⁹ “Pēlā nō i ka hopena o kēia ao; e kiʻi mai auaneʻi ka poʻe ʻānela, a e hoʻokaʻawale lākou i ka poʻe hewa mai waena aʻe o ka poʻe pono;

⁵⁰ a e hoʻolei aku iā lākou i loko o ka lua ahi; i laila e uē ai a e ʻuī ai nā niho.

⁵¹ ¶ Nīnau maila ʻo Iesū iā lākou, “Ua ʻike pono anei ʻoukou i nēia mau mea a pau?” ʻĪ akula lākou iā ia, “ʻAe, e ka Haku.”

⁵² ʻŌlelo maila kēlā iā lākou, “No ia mea, kēlā kākau ʻōlelo kēia kākau ʻōlelo i aʻo ʻia i nā mea o ke aupuni o ka lani, ua like nō ia me ke kanaka mea hale, nāna i lawe mai nā mea hou a me nā mea kahiko mai loko mai o kona waihona waiwai.”

⁵³ ¶ A oki aʻela kā Iesū ʻōlelo ʻana mai i kēia mau ʻōlelo nane, hele akula ia mai ia wahi aku.

⁵⁴ A hiki akula ia i kona ʻāina, aʻo akula ia i nā kānaka i loko o ko lākou hale hālāwai; a kāhāhā ihola lākou, ʻī aʻela, “No hea lā ka naʻauao a me ka hana mana a ua kanaka lā?

⁵⁵ “ʻAʻole anei kēia ke keiki a ke kamanā? ʻAʻole anei ʻo Maria ka inoa o kona makuahine? A ʻo nā hoahānau ona, ʻo Iakobo, ʻo Iose, ʻo Simona, a ʻo Iuda?

⁵⁶ “A ʻo nā kaikuāhine ona, ʻaʻole anei lākou a pau me kākou? No hea maila iā ia kēia mau mea a pau?”

⁵⁷ A ukiuki ihola lākou iā ia. ʻĪ akula Iesū iā lākou, “ʻAʻole he kāula i hoʻowahāwahā ʻia ma kahi ʻē, aia nō ma kona ʻāina a ma kona hale iho nō.”

⁵⁸ ʻAʻohe nui nā hana mana āna i hana ai i laila, no ko lākou hoʻomaloka.