KA ʻEUANELIO I KĀKAU ʻIA AI E MATAIO 12 - Ka Baibala Hemolele

1 No ka mālama ʻana i ka lā Sābati. 13 Hoʻōla ʻo ia i ka lima maloʻo ia lā. 22 Hoʻōla ʻia ka mea makapō leo paʻa. 31 No ka ʻōlelo hōʻino i ka ʻUhane Hemolele. 38 Ka poʻe ʻimi i hōʻailona. 46 Kona makuahine a me nā hoahānau.

MOKUNA XII.

¹ ¶ Ia wā lā, hele akula ʻo Iesū i ka lā Sābati ma waena o nā mahina ʻai, pōloli ihola nā haumāna āna, a hoʻomaka akula lākou e lālau i nā huhui palaoa, a ʻai ihola.

² ʻIke akula ka poʻe Parisaio, ʻī akula lākou iā ia, “Aia ke hana nei kāu poʻe haumāna i ka mea kū ʻole i ke kānāwai ke hana i ka lā Sābati.”

³ ʻĪ maila ʻo ia iā lākou, “ʻAʻole anei ʻoukou i heluhelu i ka mea a Dāvida i hana ai, a me ka poʻe me ia, i ka wā i pōloli ai lākou?

⁴ “Iā ia i komo aku ai i loko o ka hale o ke Akua, a ʻai ihola i ka berena hōʻike, ka mea kū pono ʻole iā ia ke ʻai, ʻaʻole hoʻi i ka poʻe me ia, na ka poʻe kāhuna wale nō.

⁵ “ʻAʻole anei ʻoukou i heluhelu ma ke kānāwai, ʻo ka poʻe kāhuna i loko o ka luakini i nā lā Sābati, ua hana lākou i ka lā Sābati, ʻaʻole hoʻi a lākou hala?

⁶ “Ke ʻōlelo aku nei au iā ʻoukou, eia ma ʻaneʻi kekahi, ua ʻoi aku ia ma mua o ka luakini.

⁷ “Inā paha i ʻike ʻoukou i ke ʻano o kēia, ‘ʻO ke aloha koʻu makemake, ʻaʻole ka mōhai»,’ inā ua hoʻohewa ʻole mai ʻoukou i ka poʻe hala ʻole.

⁸ “No ka mea, ʻo ke Keiki a ke Kanaka, ʻo ia ka Haku no ka lā Sābati.”

⁹ ¶ Hele akula ia mai ia wahi aku, a komo akula i loko o ko lākou hale hālāwai.

¹⁰ Aia i laila he kanaka, ua maloʻo kona lima; nīnau maila lākou iā ia, i mea e hoʻopiʻi aku ai lākou iā ia, ʻī maila, “He mea pono anei ke hoʻōla aku i ka lā Sābati?”

¹¹ ʻĪ akula ʻo ia iā lākou, “ʻO wai lā ke kanaka o ʻoukou hoʻokahi hipa kāna, a i hāʻule iho i ka lua i ka lā Sābati, ʻaʻole anei ia e lālau aku iā ia, a e huki mai i luna?

¹² “ʻAʻole anei e ʻoi aku ke kanaka ma mua o ka hipa? He mea pono nō ke hana maikaʻi i ka lā Sābati.”

¹³ A laila, ʻōlelo akula ia i ua kanaka lā, “E ʻō mai kou lima;” ʻō maila ia, a ola aʻela ia e like me kēlā lima.

¹⁴ Hele akula ka poʻe Parisaio i waho, kūkākūkā aʻela lākou i mea e make ai ʻo ia iā lākou.

¹⁵ ¶ A ʻike ihola ʻo Iesū ia mea, hele akula ia mai ia wahi aku; a he nui ka poʻe kānaka i hahai aku iā ia, hoʻōla ihola ʻo ia iā lākou a pau.

¹⁶ Pāpā maila ʻo ia iā lākou, ʻaʻole lākou e haʻi hōʻike aku iā ia.

¹⁷ I kō ai ka ʻōlelo a ke kāula a ʻIsaia, i ʻī mai ai:

¹⁸ “«Aia hoʻi kuʻu kauā aʻu i koho ai, Kuʻu mea aloha, iā ia ka ʻoliʻoli o kuʻu naʻau; E kau aku ana au i kuʻu ʻUhane ma luna iho ona, A e haʻi aku ia i ke kānāwai i nā lāhui kanaka.

¹⁹ “ʻAʻole ia e hakakā, ʻaʻole hoʻi e walaʻau aku, ʻAʻole hoʻi e lohea kona leo ma nā alanui.

²⁰ “ʻAʻole e haʻi iā ia ka ʻohe pēpē, ʻAʻole hoʻi ia e kinai i ka ʻuiki e hoʻopīpī ana, A kuʻi aku ia i ke kānāwai a lanakila.

²¹ “A e paulele hoʻi nā lāhui kanaka ma kona inoa».”

²² ¶ A laila, hali ʻia mai i ona lā kekahi kanaka i uluhia e ka daimonio, ua makapō, ua paʻa hoʻi ka leo; a hoʻōla ihola kēlā iā ia, a ʻōlelo aʻela ka leo paʻa, a ʻike aʻela ka makapō.

²³ Kāhāhā ihola nā kānaka a pau, ʻī aʻela, “ʻO ka Mamo anei kēia a Dāvida?”

²⁴ A lohe aʻela ka poʻe Parisaio, ʻī aʻela lākou, “Ma o Belezebuba lā wale nō, ke aliʻi o nā daimonio, kāna mahiki ʻana aku i nā daimonio.”

²⁵ ʻIke aʻela ʻo Iesū i ko lākou manaʻo ʻana, ʻī akula iā lākou, “ʻO ke aupuni i mokuāhana iā ia iho, e pau ia, a ʻo ke kūlanakauhale a ʻo ka poʻe ʻohana i mokuāhana iā ia iho, ʻaʻole ia e mau.

²⁶ “Inā paha ʻo Sātana e mahiki aku iā Sātana, ua mokuāhana ʻo ia iā ia iho, a pehea lā hoʻi e mau ai kona aupuni?

²⁷ “Inā paha ʻo wau e mahiki aku i nā daimonio ma o Belezebuba lā, ma o wai lā hoʻi e mahiki aku ai nā keiki a ʻoukou iā lākou? No laila, e lilo lākou i poʻe hoʻoponopono iā ʻoukou.

²⁸ “Inā paha ʻo wau e mahiki aku i nā daimonio ma ka ʻUhane o ke Akua, inā ua kokoke mai ke aupuni o ke Akua i o ʻoukou nei.

²⁹ “Pehea lā e hiki ai i kekahi ke komo i loko o ka hale o ke kanaka ikaika, a hao i kona waiwai? Aia nakinaki ia ma mua i ke kanaka ikaika a paʻa, a laila e hao ia i nā mea o kona hale.

³⁰ “ʻO ka mea ʻaʻole me aʻu nei, ʻo koʻu ʻenemi nō ia; a ʻo ka mea hōʻiliʻili pū ʻole me aʻu, ua hoʻoleilei wale aku nō ia.

³¹ “Ke ʻōlelo aku nei hoʻi au iā ʻoukou, ʻo nā hala a pau, a me nā ʻōlelo hōʻino e kala ʻia ana nō nā kānaka; akā, ʻo ka ʻōlelo hōʻino aku i ka ʻUhane Hemolele, ʻaʻole ia e kala ʻia nō nā kānaka.

³² “ʻO ka mea ʻōlelo hōʻino mai i ke Keiki a ke Kanaka, e kala ʻia ana ʻo ia; akā, ʻo ka mea ʻōlelo hōʻino i ka ʻUhane Hemolele, ʻaʻole loa e kala ʻia ana ʻo ia i kēia ao, ʻaʻole hoʻi i kēlā ao aku.

³³ “Inā e hoʻomaikaʻi aku ʻoukou i ka lāʻau, e hoʻomaikaʻi pū nō hoʻi i ko nā hua; akā i ʻole, a laila e hōʻino aku i ka lāʻau me ka hōʻino pū i kona hua; no ka mea, ua ʻikea ka lāʻau ma kona hua.

³⁴ “E ka hanauna moʻo niho ʻawa! Pehea lā e hiki ai iā ʻoukou ka poʻe ʻino ke ʻōlelo i nā mea maikaʻi? No ka mea, no ka piha o ka naʻau e ʻōlelo ai ka waha.

³⁵ “ʻO ke kanaka maikaʻi, ua lawe mai ia i nā mea maikaʻi mai loko aʻe o ka waiwai maikaʻi o ka naʻau; a ʻo ke kanaka ʻino, ua lawe mai ia i nā mea ʻino mai loko aʻe o ka waiwai ʻino.

³⁶ “Ke ʻōlelo aku nei au iā ʻoukou, ‘ʻO nā hua ʻōlelo ʻino a pau a nā kānaka e ʻōlelo ai, e hoʻokolokolo ʻia ana lākou ia mea, i ka lā e hoʻokolokolo ai.’

³⁷ “No ka mea, ma kāu mau ʻōlelo e hoʻāpono ʻia ai ʻoe, a ma kāu mau ʻōlelo e hoʻāhewa ʻia ai ʻoe.”

³⁸ ¶ A laila, ʻōlelo maila kekahi poʻe kākau ʻōlelo a me nā Parisaio, ʻī maila, “E ke Kumu, ke ake nei mākou e ʻike aku i hōʻailona nou.”

³⁹ ʻŌlelo akula ia, ʻī akula iā lākou, “Ke ʻimi nei ka hanauna hewa, moekolohe, i hōʻailona; ʻaʻole loa e hāʻawi ʻia ka hōʻailona iā lākou, ʻo ka hōʻailona a ke kāula a Iona wale nō.

⁴⁰ “E like me «Iona ʻekolu lā ʻekolu pō i loko o ka ʻōpū o ka iʻa nui», pēlā auaneʻi ke Keiki a ke Kanaka, ʻekolu lā ʻekolu pō i loko o ka ʻōpū o ka honua.

⁴¹ “E kūʻē mai auaneʻi nā kānaka o Nineva i kēia hanauna i ka lā hoʻokolokolo, a e hoʻohewa mai iā lākou nei; no ka mea, mihi ihola lākou i ka ʻōlelo ʻana a Iona; eia hoʻi, ma ʻaneʻi kekahi i ʻoi aku ma mua o Iona.

⁴² “I ka lā hoʻokolokolo e kūʻē mai auaneʻi ke aliʻi wahine o ke Kūkulu Hema i kēia hanauna, a e hoʻohewa mai iā lākou nei; no ka mea, i hele mai ia mai nā palena o ka honua e hoʻolohe i ka ʻōlelo naʻauao a Solomona; eia hoʻi, ma ʻaneʻi kekahi i ʻoi aku ma mua o Solomona.

⁴³ “A puka mai ka ʻuhane ʻino mai loko mai o kekahi kanaka, hele aku nō ia ma nā wahi panoa, e ʻimi ana i kahi e maha ai, a loaʻa ʻole.

⁴⁴ “A laila, ʻōlelo iho nō ia, ‘E hoʻi ana au i koʻu hale, kahi aʻu i puka mai ai.’ A hiki mai, ʻike ihola ia, ua kaʻawale ia, ua kāhili ʻia, a ua hoʻolakolako ʻia.

⁴⁵ “A laila, hele aku nō ia, a lawe pū mai me ia i nā ʻuhane ʻē aʻe i ʻehiku, ua ʻoi aku ko lākou ʻino i kona iho; komo lākou i loko, a noho i laila; a hewa loa aku ka hope o ua kanaka lā i kona noho ʻana ma mua. Pēlā auaneʻi nō hoʻi kēia hanauna hewa.”

⁴⁶ ¶ Iā ia i ʻōlelo ai i nā kānaka, aia kū maila i waho kona makuahine, a me kona poʻe hoahānau, e ake e ʻōlelo pū me ia.

⁴⁷ ʻĪ akula kekahi iā ia, “Aiʻa, ke kū maila i waho kou makuahine a me ou mau hoahānau, e ake e ʻōlelo pū me ʻoe.”

⁴⁸ ʻŌlelo maila ia, ʻī maila i ka mea nāna i haʻi aku iā ia, “ʻO wai lā koʻu makuahine a me oʻu mau hoahānau?”

⁴⁹ ʻŌ maila ia i kona lima i nā haumāna āna, ʻī akula ia, “Aia hoʻi, koʻu makuahine a me oʻu mau hoahānau!

⁵⁰ “ʻO ka mea i hana i ka makemake o koʻu Makua i ka lani, ʻo ia koʻu kaikaina a me koʻu kaikuahine, a me koʻu makuahine.”