2 Hoʻouna mai ʻo Ioane i nā haumāna āna i o Iesū lā. 7 Ko Iesū manaʻo no Ioane. 18 Ko kānaka manaʻo no lāua. 20 Ko Iesū hoʻohewa ʻana i nā kūlanakauhale. 25 Kona hoʻomaikai ʻana i ka Makua. 28 E hele i ona lā ka poʻe luhi a kaumaha i ka hewa, i maha ai.
MOKUNA XI. 1 ¶ A oki aʻela kā Iesū aʻo ʻana aku i kāna poʻe haumāna he ʻumikumamālua, hele akula ia ma laila aku, e aʻo a e ʻōlelo aku i loko o ko lākou mau kūlanakauhale.
2 ¶ Lohe aʻela ʻo Ioane i loko o ka hale paʻahao i nā hana a Kristo, hoʻouna maila ia i nā haumāna āna ʻelua,
3 nīnau akula iā ia, “ʻO ʻoe ʻiʻo nō anei ka mea e hele mai ana; e kali anei mākou i kekahi mea ʻē aʻe?”
4 ʻŌlelo maila Iesū, ʻī maila iā lāua, “Ō uhoʻi ʻolua, e haʻi aku iā Ioane i nā mea a ʻolua i lohe, a i ʻike iho nei.
5 “«Ua ʻike nā makapō», ua hele nā ʻoʻopa, ua huikala ʻia nā lēpero, ua lohe nā kuli, ua hoʻāla ʻia nā make, a «ua haʻi ʻia aku ka ʻeuanelio i ka poʻe ʻilihune».
6 “Pōmaikaʻi hoʻi ka mea i hoʻohihia ʻole ʻia noʻu.”
7 ¶ A hala akula lāua, hoʻomaka akula Iesū e ʻōlelo i ka poʻe kānaka no Ioane, ʻī akula, “I hele lā ʻoukou i ka wao nahele e ʻike i ke aha? I ka ʻohe anei i luli i ka makani?
8 “I hele hoʻi ʻoukou e ʻike i ke aha? He kanaka anei i kāhiko ʻia i ke kapa paheʻe? Aia nō ka poʻe i kāhiko ʻia i ke kapa paheʻe i loko o nā hale o nā aliʻi!
9 “I hele hoʻi ʻoukou e ʻike i ke aha? He kāula anei? ʻO ia, ke haʻi aku nei au iā ʻoukou, ʻo ka mea hoʻi e ʻoi aku i ke kāula.
10 “ʻO ia nō ka mea i palapala ʻia nona,
‘«Aia hoʻi, ke hoʻouna aku nei au i kaʻu ʻelele ma mua ou,
Nāna e hoʻomākaukau i kou alanui ma mua ou».’
11 “He ʻoiaʻiʻo kaʻu e ʻōlelo aku nei iā ʻoukou, ʻo nā mea a nā wāhine i hānau ai, ʻaʻole kekahi o lākou i ʻoi aku i mua o Ioane Bapetite; akā, ʻo ka mea liʻiliʻi loa i loko o ke aupuni o ka lani, ua ʻoi aku ia i mua ona.
12 “Mai ka wā iā Ioane Bapetite mai a hiki i ʻaneʻi, ua ʻimi ikaika ʻia ke aupuni o ka lani, a ua lawe ʻia e ka poʻe ikaika no lākou.
13 “Ua wānana mai ka poʻe Kāula a pau a me ke Kānāwai, a hiki mai ai ʻo Ioane.
14 “Inā e hiki iā ʻoukou ke hoʻomaopopo, ʻo ia nei nō ua ʻElia lā, ka mea e hele mai ana.
15 “ʻO ka mea pepeiao lohe lā, e hoʻolohe ia.
16 “Me ke aha lā au e hoʻohālike ai i kēia hanauna? Ua like nō ia me nā kamaliʻi e noho ana i kahi kūʻai, a e kāhea aku ana i ko lākou mau hoa,
17 i ka ʻī ʻana aku, ‘‘Ē, ua hoʻokiokio aku mākou iā ʻoukou, ʻaʻole ʻoukou i haʻa mai; ua makena aku mākou iā ʻoukou, ʻaʻole hoʻi ʻoukou i uē mai.’
18 “No ka mea, i hele mai nei ʻo Ioane me ka ʻai ʻole a me ka inu ʻole, a ke ʻōlelo nei lākou, ‘He daimonio kona!’
19 “I hele mai nei ke Keiki a ke Kanaka me ka ʻai ʻana a me ka inu ʻana, a ke ʻōlelo nei lākou, ‘Aia hoʻi, he kanaka pākela ʻai, pākela inu waina, a he hoalauna no nā luna ʻauhau a me nā lawehala!’ Akā, ua hoʻāpono ʻia ka naʻauao e kāna poʻe keiki.”
20 ¶ I laila kāna hoʻomaka ʻana e hoʻohewa aku i nā kūlanakauhale, kahi i hana ʻia ai ka nui loa o kāna mau hana mana; no ka mea, ʻaʻole lākou i mihi.
21 “Auē ʻoe, e Korazina! Auē ʻoe, e Betesaida! No ka mea, inā i hana ʻia ma Turo a me Sidona nā hana mana i hana ʻia aku ai i o ʻolua lā, inā ua mihi ʻē lākou, i loko o ke kapa ʻino a me ka lehu ahi.
22 “Ke ʻōlelo aku nei au iā ʻoukou, e aho nō ka hewa ʻana o Turo a me Sidona i ko ʻolua, i ka lā e hoʻokolokolo ai.
23 “ʻO ʻoe hoʻi, e Kaperenauma, kai hoʻokiʻekiʻe ʻia aʻe i ka lani, e kiola ʻia ʻoe i lalo i ka pō; no ka mea, inā i hana ʻia ma Sodoma nā hana mana i hana ʻia aku ai i loko ou, inā ua koe ia a hiki i nēia manawa.
24 “Akā hoʻi, ke ʻōlelo aku nei au iā ʻoukou, e aho nō ka hewa ʻana o Sodoma i kou i ka lā e hoʻokolokolo ai.”
25 ¶ Ia wā lā, ʻōlelo akula ʻo Iesū, ʻī akula, “Ke aloha aku nei au iā ʻoe, e ka Makua, ka Haku o ka lani a me ka honua; no ka mea, ua hūnā ʻoe i kēia mau mea i ka poʻe akamai a me ka poʻe maʻalea, a ua hōʻike mai ʻoe ia mau mea i nā keiki ʻuʻuku.
26 “ʻO ia nō, e ka Makua; no ka mea, ʻo ka pono nō ia iā ʻoe.
27 “Ua hāʻawi ʻia mai iaʻu nā mea a pau e koʻu Makua; ʻaʻohe kanaka i ʻike i ke Keiki, ʻo ka Makua wale nō; ʻaʻole hoʻi he kanaka i ʻike i ka Makua, ʻo ke Keiki wale nō, a me ka mea iā ia e hōʻike aku ai ke Keiki.
28 “E hele mai ʻoukou a pau loa i oʻu nei, e ka poʻe luhi a me ka poʻe kaumaha, naʻu ʻoukou e hoʻomaha aku.
29 “E amo ʻoukou i kaʻu ʻauamo ma luna iho o ʻoukou, a e aʻo ʻia ʻoukou e aʻu; no ka mea, ua akahai au, ua haʻahaʻa kuʻu naʻau, a «e loaʻa iā ʻoukou ka maha no ko ʻoukou mau ʻuhane».
30 “No ka mea, he ʻoluʻolu kaʻu ʻauamo, he māmā hoʻi kaʻu ukana.”
