KA ʻEUANELIO I KĀKAU ʻIA AI E MATAIO 1 - Ka Baibala Hemolele

1 Ke kūʻauhau no Iesū, 25 a me kona hānau ʻana.

MOKUNA I.

¹ ¶ ʻO ke kūʻauhau na ka hanauna o Iesū Kristo, ka mamo a Dāvida, ka mamo a ʻAberahama:

² ¶ Na ʻAberahama ʻo ʻIsaʻaka; na ʻIsaʻaka ʻo Iakoba; na Iakoba ʻo Iuda a me kona poʻe hoahānau.

³ Na Iuda lāua me Tamara ʻo Paresa a me Zara; na Paresa ʻo Hezerona; na Hezerona ʻo ʻArama.

⁴ Na ʻArama ʻo ʻAminadaba; na ʻAminadaba ʻo Naʻasona; na Naʻasona ʻo Salemona.

⁵ Na Salemona lāua me Rahaba ʻo Boaza; na Boaza lāua me Ruta ʻo ʻObeda; na ʻObeda ʻo Iese.

⁶ Na Iese ʻo Dāvida ke aliʻi; na Dāvida na ke aliʻi lāua me ka wahine a ʻUria ʻo Solomona.

⁷ Na Solomona ʻo Rehoboama; na Rehoboama ʻo ʻAbia; na ʻAbia ʻo ʻAsa.

⁸ Na ʻAsa ʻo Iosapata; na Iosapata ʻo Iorama; na Iorama ʻo ʻOzia.

⁹ Na ʻOzia ʻo Iotama, na Iotama ʻo ʻAhaza; na ʻAhaza ʻo Hezekia.

¹⁰ Na Hezekia ʻo Manase; na Manase ʻo ʻAmona; na ʻAmona ʻo Iosia.

¹¹ Na Iosia ʻo Iekonia a me kona poʻe hoahānau, i ka manawa o ka lawe ʻana i Babulona.

¹² ¶ A ma hope mai o ka lawe ʻana i Babulona, na Iekonia ʻo Saletiʻela; na Saletiʻela ʻo Zerubabela.

¹³ Na Zerubabela ʻo ʻAbiuda; na ʻAbiuda ʻo ʻEliakima; na ʻEliakima ʻo ʻAzora.

¹⁴ Na ʻAzora ʻo Sadoka; na Sadoka ʻo ʻAkima; na ʻAkima ʻo ʻEliuda.

¹⁵ Na ʻEliuda ʻo ʻEleazara; na ʻEleazara ʻo Mahetana; na Mahetana ʻo Iakoba.

¹⁶ Na Iakoba ʻo Iosepa ke kāne a Maria nāna i hānau ʻo Iesū, i kapa ʻia ʻo Kristo.

¹⁷ ¶ ʻO nā hanauna a pau maiā ʻAberahama mai a hiki iā Dāvida, he ʻumi ia hanauna a me kumamāhā; a maiā Dāvida mai a hiki i ka lawe ʻana i Babulona, he ʻumi ia hanauna a me kumamāhā; a mai ka lawe ʻana aku i Babulona mai, a hiki iā Kristo he ʻumi ia hanauna a me kumamāhā.

¹⁸ ¶ Penei hoʻi ka hānau ʻana o Iesū Kristo: i hoʻopalau ʻē ʻia kona makuahine ʻo Maria na Iosepa, ʻaʻole naʻe lāua i pili, a ʻikea ʻo ia, ua hāpai na ka ʻUhane Hemolele.

¹⁹ Akā, he kanaka pono kāna kāne ʻo Iosepa, ʻaʻole ia i makemake e hōʻino iā ia ma ke ākea; manaʻo ihola ia e kipaku malū iā ia.

²⁰ A i kona noʻonoʻo ʻana ma ia mau mea, aia hoʻi, ʻike ʻia aku ka ʻānela a ka Haku e ia ma ka moe, ʻī maila, “E Iosepa, e ka mamo a Dāvida, mai makaʻu ʻoe ke lawe iā Maria i wahine nāu; no ka mea, ua hāpai ʻo ia na ka ʻUhane Hemolele.

²¹ “A e hānau mai ʻo ia i Keiki Kāne, a e kapa aku ʻoe i kona inoa ʻo Iesū; no ka mea, e hoʻōla ia i kona poʻe kānaka mai ko lākou hewa.”

²² Ma ia mau mea i kō ai ka mea a ka Haku i ʻōlelo mai ai ma ke kāula, i ka ʻī ʻana mai:

²³ “«Aia hoʻi, e hāpai ana kekahi wahine puʻupaʻa, a e hānau mai ia i Keiki Kāne, a e kapa ʻia kona inoa ʻo ʻEmanuʻela»;” ʻo ke ʻano kēia, “«ʻo ke Akua me kākou».”

²⁴ A ala aʻela ʻo Iosepa mai ka hiamoe ʻana, hana akula ia e like me kā ka ʻānela a ka Haku i kauoha mai ai iā ia, a lawe maila ia i kāna wahine;

²⁵ ʻaʻole naʻe i moe aku iā ia, a hiki i ka wā i hānau ai ʻo ia i kāna Makahiapo Kāne, a kapa akula ia i kona inoa ʻo Iesū.