MALAKI 3 - Ka Baibala Hemolele

1 Ka hiki ʻana mai o ka Mesia. 3 Kauoha ʻia mai nā kānaka e mālama i ke kānāwai. 5 Ka hele hou ʻana mai o ʻElia.

MOKUNA III.

¹ ¶ “Aia hoʻi, e hoʻouna auaneʻi au i koʻu ʻelele, nāna e hoʻomākaukau i ke alanui i mua oʻu; a e hikiwawe mai auaneʻi ka Haku, a ʻoukou e ʻimi nei, i loko o kona luakini, ʻo ia ke ʻelele o ka berita, ʻo ka mea a ʻoukou e makemake nei; ʻeā, e hele mai ana ia,” wahi a Iēhova o nā kaua.

² “Akā, ʻo wai ke hoʻomanawanui i ka lā o kona hiki ʻana mai? ʻO wai hoʻi ke kū paʻa i kona ʻike ʻia ʻana? No ka mea, e like auaneʻi ia me ke ahi o ka mea hoʻoheheʻe, a me ke sopa o ka mea hoʻomaʻemaʻe.

³ “A noho ia he mea hoʻoheheʻe a me ka hoʻomaʻemaʻe i ke kālā; a e huikala ia i nā keiki a Levi, a e hoʻomaʻemaʻe ʻo ia iā lākou e like me ke gula a me ke kālā, i mōhai aku ai lākou i ka mōhai pono na Iēhova.

⁴ “A laila, e maliu ʻia mai ai ʻo Iēhova i ka mōhai ʻana a kā Iuda a me ko Ierusalema, e like me ia i nā lā kahiko, a i nā makahiki ma mua.

⁵ “Ke hoʻokokoke aku nei au i o ʻoukou lā e hoʻokō i ke kānāwai; e wikiwiki au i ka hōʻike kūʻē i nā kāhuna ʻanāʻanā, me nā moekolohe, a i nā mea hoʻohiki wahaheʻe, me ka poʻe hoʻonele i nā mea hoʻolimalima i kā lākou uku, a i ka poʻe hoʻonele i ka wahine kāne make, a me ke keiki makua ʻole, a i ka poʻe hoʻohuli aʻe i ko ka malihini, ʻaʻole hoʻi i makaʻu iaʻu,” wahi a Iēhova o nā kaua.

⁶ “No ka mea, ʻo wau nō Iēhova, ʻaʻole au e lauwili; no laila, ʻaʻole ʻoukou i hoʻopau ʻia, e nā mamo o Iakoba.

⁷ ¶ “Mai nā lā mai o ko ʻoukou poʻe mākua, ua haʻalele ʻoukou i koʻu mau kānāwai, me ka mālama ʻole. E hoʻi hou mai ʻoukou iaʻu nei, a e hoʻi hou aku au i o ʻoukou lā,” wahi a Iēhova o nā kaua. “Akā, ke nīnau mai nei ʻoukou, ‘Ma ke aha kā mākou e hoʻi hou aku ai?’

⁸ “E pono anei i ke kanaka ke hao i kā ke Akua? Akā, ua hao ʻoukou i kaʻu; a ke nīnau mai nei ʻoukou, ‘Ma ke aha kā mākou i hao ai i kāu?’ i nā hapaʻumi o ka waiwai, a me nā mōhai.

⁹ “Ua hoʻāhewa ʻia ʻoukou i ka pōʻino; no ka mea, ua hao ʻoukou i kaʻu, ʻo kēia lāhui kanaka a pau.

¹⁰ “E lawe mai i nā waiwai hapaʻumi a pau i loko o ka hale ahu waiwai, i ʻai ma loko o koʻu hale; a e hoʻāʻo mai ʻoukou iaʻu ma ia mea,” wahi a Iēhova o nā kaua, “i wehe ai paha au i nā puka wai o ka lani, a e ninini iho i ka pōmaikaʻi ma luna o ʻoukou, a lawa a hū.

¹¹ “A no ʻoukou wau e pāpā aku ai i ka mea hōkai, i hoʻopau ʻole ai ia i ka hua o ko ʻoukou ʻāina, ʻaʻole hoʻi ia e hoʻolilo no ʻoukou i ke kumu waina o ke kula i mea hua ʻole,” wahi a Iēhova o nā kaua.

¹² “A e kapa mai auaneʻi nā lāhui kanaka a pau iā ʻoukou, he pōmaikaʻi; no ka mea, e lilo ʻoukou i poʻe mea ʻāina i makemake ʻia,” wahi a Iēhova o nā kaua.

¹³ ¶ “Ua ʻoʻoleʻa kā ʻoukou mau ʻōlelo kūʻē mai iaʻu,” wahi a Iēhova; “a ke nīnau mai nei ʻoukou, ‘He aha kā mākou i ʻōlelo kūʻē ai iā ʻoe?’

¹⁴ “Ua ʻōlelo ʻoukou, ‘He mea ʻole ka mālama i ke Akua; he aha hoʻi ka pōmaikaʻi ke mālama kākou i ka mea āna i kauoha mai ai, a ke hele hoʻi me ke kapa ʻeleʻele i mua o Iēhova o nā kaua?

¹⁵ ‘No laila, ke kapa nei kākou i ka poʻe hoʻokiʻekiʻe he pōmaikaʻi; he ʻoiaʻiʻo, ua kūkulu ʻia aʻe i luna ka poʻe hana ʻino; inā hoʻi e hoʻāʻo lākou i ke Akua, ua pakele nō lākou.’”

¹⁶ ¶ A laila, ʻo ka poʻe makaʻu iā Iēhova, kamaʻilio pū iho lākou i kekahi i kekahi; a hāliu maila ʻo Iēhova, a hoʻolohe maila, a ua kākau ʻia ka buke hoʻomanaʻo i mua ona no lākou, no ka poʻe makaʻu iā Iēhova, a me ka poʻe hoʻomanaʻo i kona inoa.

¹⁷ “Noʻu nō lākou,” wahi a Iēhova o nā kaua, “i ka lā aʻu e ahu iho ai i kuʻu waiwai; a e lokomaikaʻi au iā lākou, e like me ka lokomaikaʻi ʻana o ka makua i kāna keiki nāna ia i mālama.”

¹⁸ A laila, e huli mai auaneʻi ʻoukou, a e nānā maopopo i waena o ka poʻe pono a ʻo ka poʻe hewa, i waena hoʻi o ka mea mālama i ke Akua, a me ka mea mālama ʻole.