MALAKI 2 - Ka Baibala Hemolele

1 Ua aʻo ʻia nā kāhuna no ka uhaʻi ʻana i ka berita a Levi. 10 Hewa lākou no ka mare ʻana i nā wāhine malihini; 17 a no ka ʻaiā.

MOKUNA II.

¹ ¶ “ʻĀnō hoʻi, e nā kāhuna, no ʻoukou kēia ʻōlelo paipai.

² “Inā, ʻaʻole ʻoukou e hoʻolohe, ʻaʻole hoʻi e hoʻolilo i ko ʻoukou naʻau, e hoʻonani i koʻu inoa,” wahi a Iēhova o nā kaua, “e hoʻouna auaneʻi au i ka pōpilikia i o ʻoukou lā, a e hoʻolilo au i ko ʻoukou pōmaikaʻi ʻana i pōʻino, a e hoʻopōʻino aku nō au; no ka mea, ʻaʻole ʻoukou i hoʻopili ia i ko ʻoukou naʻau iho.

³ “Aia hoʻi, e pāpā aku nō wau i kā ʻoukou hua, e lūlū aku hoʻi au i ka lepo ma luna o ko ʻoukou mau maka, i ka lepo o kā ʻoukou mau ʻahaʻaina; a e lawe aku ia iā ʻoukou i laila.

⁴ “A e ʻike auaneʻi ʻoukou, naʻu nō i kauoha i kēia ʻōlelo paipai iā ʻoukou, ʻo ia kaʻu berita me Levi,” wahi a Iēhova o nā kaua.

⁵ “ʻO kuʻu berita me ia, no ke ola ia a me ka maluhia; ʻo ia mau mea kaʻu i hāʻawi aku ai iā ia no ka weliweli ʻana i weliweli mai ai iaʻu, a ua makaʻu hoʻi i mua o koʻu inoa.

⁶ “Ma loko o kona waha ka ʻōlelo ʻoiaʻiʻo, ʻaʻole nō i loaʻa ka hewa ma kona lehelehe; ua hele pū nō ia me aʻu ma ke aloha a me ka pono, a hoʻohuli aʻela ia i nā mea he nui mai ka hewa aku.

⁷ “No ka mea, he pono nō e mālama nā lehelehe o ke kahuna i ka naʻauao, a e ʻimi ʻia ke kānāwai ma kona waha; no ka mea, ʻo ia ka ʻelele o Iēhova o nā kaua.

⁸ “Akā, ua kāpae aʻe ʻoukou mai ka ʻaoʻao aku; ua hoʻohina ʻoukou i nā mea he nui loa i loko o ke kānāwai; ua hoʻolilo ʻoukou i ka berita a Levi i mea ʻole,” wahi a Iēhova o nā kaua.

⁹ “Eia hoʻi, e hoʻolilo auaneʻi au iā ʻoukou, i poʻe wahāwahā ʻia a me ka ʻinoʻino i mua o nā kānaka a pau, me kā ʻoukou i mālama ʻole i koʻu mau ʻaoʻao, a ua nānā ʻoukou ma ko ka helehelena i loko o ke kānāwai.

¹⁰ ¶ “ʻAʻole anei no kākou a pau ka makua hoʻokahi? ʻAʻole anei na ke Akua hoʻokahi kākou i hana? No ke aha lā kākou e hana hoʻopunipuni, ʻo kekahi hoahānau i kekahi hoahānau, ma ka haʻihaʻi ʻana i ka berita o ko kākou poʻe kūpuna?

¹¹ “Ua hana hoʻopunipuni kā Iuda, a ua hana ʻia ka mea haumia ma loko o kā ʻIseraʻela a me Ierusalema; no ka mea, ua hoʻohaumia kā Iuda i ka mea laʻa no Iēhova, i ka mea āna i aloha ai, a ua mare ʻo ia i ke kaikamahine a ke akua ʻē.

¹² “E hōʻoki auaneʻi ʻo Iēhova i kānaka e hana ana i kēia mea, i ka mea kāhea aku a me ka mea e ō mai, mai loko mai o nā halelewa o kā Iakoba, a me ka mea hoʻi e kaumaha ana i ka mōhai na Iēhova o nā kaua.

¹³ “Eia hou kekahi a ʻoukou i hana ai: ua hoʻouhi ʻoukou i ke kuahu o Iēhova i nā waimaka, a me ka uwē ʻana, a me ka ʻū ʻana; no laila, ʻaʻole ia e nānā hou mai i ka mōhai, ʻaʻole hoʻi e maliu ʻoluʻolu mai ia mea na ko ʻoukou lima mai.

¹⁴ “Ke nīnau mai nei ʻoukou, ‘No ke aha?’ No ka mea, he mea ʻike maka ʻo Iēhova ma waena ou a ʻo ka wahine o kou wā ʻōpiopio, i ka mea āu i hana hoʻopunipuni aku ai; akā, ʻo ia nō kou hoalauna, ʻo ka wahine o kāu berita.

¹⁵ “ʻAʻole anei i hana ʻo ia i hoʻokahi? Akā, iā ia ke koena o ka ʻUhane. I mea aha hoʻi ka hoʻokahi? I ʻimi ai ʻo ia i ʻohana no ke Akua. No laila e mālama i ko ʻoukou naʻau iho, mai hana hoʻopunipuni kekahi i ka wahine o kona wā ʻōpiopio.

¹⁶ “No ka mea, inaina aku au i ka hoʻohemo ʻana,” wahi a Iēhova ke Akua o kā ʻIseraʻela, “a me ka uhi ʻana o kekahi i kona kapa i ke kolohe,” wahi a Iēhova o nā kaua; no laila, e mālama i ko ʻoukou naʻau iho, o hana hoʻopunipuni ʻoukou.”

¹⁷ ¶ Ua hoʻoluhi ʻoukou iā Iēhova i kā ʻoukou ʻōlelo ʻana. Akā, ke nīnau mai nei ʻoukou, “Ma ke aha lā kā mākou i hoʻoluhi ai?” I ka mea a ʻoukou i ʻōlelo ai, “ʻO ka mea hana hewa, he pono ia i mua o Iēhova, a he leʻaleʻa kona iā lākou”; a ʻo kēia hoʻi, “ʻAuhea lā ke Akua nāna e hoʻohewa mai?”