MALAKI 1 - Ka Baibala Hemolele

1 Aloha ke Akua iā Iakoba a hoʻowahāwahā ʻia ʻEsau. 6 Ua aʻo ʻia nā Iudaio no ka mōhai pono ʻole ʻana.

MOKUNA I.

¹ ¶ Ka wānana o ka ʻōlelo a Iēhova i kā ʻIseraʻela ma o Malaki lā.

² ¶ “Ua aloha aku au iā ʻoukou,” wahi a Iēhova; akā, ke nīnau mai nei ʻoukou, “Ma ke aha lā kāu i aloha mai ai iā mākou?” “ʻAʻole anei ʻo ʻEsau ka hoahānau o Iakoba?” wahi a Iēhova. “Akā, i aloha aku au iā Iakoba,

³ a hoʻowahāwahā hoʻi au iā ʻEsau, a hoʻoneoneo akula au i kona mau mauna, a hoʻolilo ihola i kona ʻāina i mau wahi noho o ka wao nahele.”

⁴ No ka mea, ke ʻōlelo nei ko ʻEdoma, “Ua auhulihia kākou; akā, e kūkulu hou auaneʻi kākou i nā wahi neoneo; penei kā Iēhova o nā kaua i ʻōlelo mai ai, “E kūkulu lākou, a e wāwahi hoʻi au; e kapa ʻia lākou, nā ʻāina o ka ʻaiā, a ʻo nā kānaka a Iēhova e inaina mau loa ai.”

⁵ A e ʻike auaneʻi ko ʻoukou mau maka, a e ʻōlelo aku ʻoukou, “E hoʻonui ʻia auaneʻi ʻo Iēhova mai ka palena aku o ʻIseraʻela.”

⁶ ¶ “‘Ua hoʻomaikaʻi ke keiki i kona makua kāne, a ʻo ke kauā i kona haku; inā hoʻi he makua wau, ʻauhea lā kuʻu hoʻomaikaʻi ʻia? Inā hoʻi he haku wau, ʻauhea lā hoʻi kuʻu weliweli ʻia?’ Wahi a Iēhova o nā kaua iā ʻoukou, e nā kāhuna hoʻowahāwahā i kuʻu inoa. Ke nīnau mai nei ʻoukou, ‘Ma ke aha kā mākou i hoʻowahāwahā ai i kou inoa?’

⁷ “Ke mōhai mai nei ʻoukou i ka berena haumia ma luna o koʻu kuahu; ke nīnau mai nei ʻoukou, ‘Ma ke aha lā kā mākou i hoʻohaumia aku ai iā ʻoe?’ Ma ka mea a ʻoukou e ʻōlelo nei, ‘He mea wahāwahā ka papa ʻaina o Iēhova.’

⁸ “Inā paha e kaumaha ʻoukou i ka mea makapō i mea mōhai, ʻaʻole anei ia he hewa? Inā hoʻi e mōhai ʻoukou i ka mea ʻoʻopa a me ka mea maʻi, ʻaʻole anei he hewa ia? Ke ʻī aku nei au, e hāʻawi aku ia mea na kou aliʻi, e ʻoluʻolu mai anei ia iā ʻoe? E maliu mai anei kēlā iā ʻoe?” wahi a Iēhova o nā kaua.

⁹ “No laila hoʻi, ke nonoi aku nei ʻoukou i ke Akua, e aloha mai ʻo ia iā kākou; no ʻoukou aku ia mea; e maliu mai anei kēlā iā ʻoukou?” wahi a Iēhova o nā kaua.

¹⁰ “ʻO wai lā ka mea o ʻoukou e pani wale i nā puka? ʻAʻole ʻoukou e kuni makehewa ma luna o kuʻu kuahu. ʻAʻole au i ʻoluʻolu iā ʻoukou, wahi a Iēhova o nā kaua; “ʻaʻole hoʻi e maliu au i ka mōhai na ko ʻoukou lima mai.

¹¹ “No ka mea, mai ka hikina o ka lā a hiki i ke komohana, e nui auaneʻi kuʻu inoa i waena o nā lāhui kanaka; a ma nā wahi a pau loa e kuni ʻia ai ka mea ʻala no kuʻu inoa, a me ka mōhai maʻemaʻe; no ka mea, e nui auaneʻi kuʻu inoa i waena o nā lāhui kanaka,” wahi a Iēhova o nā kaua.

¹² “Akā, ua hōʻino ʻoukou ia i kā ʻoukou ʻōlelo ʻana, ‘Ua haumia ka papa ʻaina o Iēhova, a ʻo ka hua ma luna, ʻo ia ʻo kāna ʻai, he mea hoʻowahāwahā ia.’

¹³ “Ke ʻōlelo nei ʻoukou, ‘Kā! Kai ka luhi!’ A na ʻoukou ia i hoʻopailua ʻia ai,” wahi a Iēhova o nā kaua; “no ka mea, ke mōhai iho nei ʻoukou i ka mea i haehae ʻia, a me ka ʻoʻopa, a me ka maʻimaʻi, a pēlā ʻoukou i lawe mai ai i ka mōhai. E ʻoluʻolu anei au i kēia mea na ko ʻoukou lima mai?” wahi a Iēhova.

¹⁴ “Akā, auē ka mea hoʻopunipuni, ka mea nāna ka hipa kāne ma loko o kāna ʻohana; akā, ua hoʻolaʻa, a ua mōhai iho i ka mea haumia; no ka mea, he Aliʻi Nui hoʻi wau,” wahi a Iēhova o nā kaua, “A he mea weliweli koʻu inoa i waena o nā lāhui kanaka.”