KA ʻEUANELIO I KĀKAU ʻIA AI E LUKA 9 - Ka Baibala Hemolele

1 Hoʻouna ʻia nā lunaʻōlelo. 7 Kānalua ʻo Herode. Hānai ʻia nā tausani ʻelima. 18 Ka manaʻo o kānaka iā Iesū. 28 Pāhaʻohaʻo Iesū. 38 Hoʻōla ʻo Iesū i ke keiki kūpaka.

MOKUNA IX.

¹ ¶ Hoʻākoakoa maila ʻo ia i ka poʻe ʻumikumamālua o kāna mau haumāna, hāʻawi maila ia i ka mana no lākou, a me ka ikaika ma luna o nā daimonio a pau, a e hoʻōla hoʻi lākou i nā maʻi.

² A hoʻouna akula ʻo ia iā lākou e haʻi aku i ke aupuni o ke Akua, a e hoʻōla hoʻi i ka poʻe maʻi.

³ A ʻōlelo maila ʻo ia iā lākou, “Mai lawe ukana no ko ʻoukou hele ʻana, ʻaʻole i koʻokoʻo, ʻaʻole i ʻeke, ʻaʻole i berena, ʻaʻole i kālā, ʻaʻole hoʻi e pāpālua i ke kapa komo.

⁴ “A ma ka hale a ʻoukou e komo ai, ma laila ʻoukou e noho ai, a hele ʻoukou mai kēlā wahi aku.

⁵ “A ʻo ka poʻe e hoʻokipa ʻole iā ʻoukou, a hele aku ʻoukou mai kēlā kūlanakauhale aku, e lūlū aku i ka lepo mai ko ʻoukou mau wāwae aku, i mea hōʻike no lākou.”

⁶ Hele aku nō hoʻi lākou ma waena o nā kauhale e haʻi aku ana i ka ʻeuanelio, a e hoʻōla aku ana hoʻi, ma nā wahi a pau.

⁷ ¶ A lohe aʻela ʻo Herode ke aliʻi ʻokana i nā mea a pau i hana ʻia e ia; kānalua ihola ia; no ka mea, ʻōlelo kekahi poʻe, ua hoʻāla hou ʻia mai ʻo Ioane, mai waena mai o ka poʻe make;

⁸ a ʻo kekahi, ua ʻike ʻia aku ʻo ʻElia; a ʻo kekahi, ua ala hou mai kekahi o ka poʻe kāula kahiko.

⁹ A ʻōlelo ihola ʻo Herode, “Ua ʻoki aku au i ke poʻo o Ioane; akā, ʻo wai lā kēia nona wau i lohe ai i kēia mau mea?” A makemake ihola ia e ʻike iā ia.

¹⁰ ¶ A hoʻi mai ka poʻe lunaʻōlelo, hōʻike akula lākou iā Iesū i nā mea a pau a lākou i hana ai; lawe pū aʻela ʻo ia iā lākou, hele malū akula i ka wao nahele no ke kūlanakauhale i kapa ʻia ʻo Betesaida.

¹¹ A ʻike nā kānaka, hahai akula lākou iā ia; hālāwai aloha ʻo ia me lākou, ʻōlelo maila iā lākou no ke aupuni o ke Akua, a hoʻōla ihola i ka poʻe e pono ai ke hoʻōla ʻia.

¹² A kokoke i ke ahiahi, hele akula ka ʻumikumamālua, ʻōlelo akula iā ia, “E hoʻokuʻu i ka ʻaha kanaka e hele lākou i nā kauhale, a me ka ʻāina e kokoke mai ana, e moe ai, a e loaʻa ai hoʻi ka ʻai na lākou; no ka mea, ma ʻaneʻi kākou ma kahi wao nahele.”

¹³ ʻĪ maila ʻo ia iā lākou, “E hāʻawi aku ʻoukou iā lākou e ʻai!” ʻĪ akula lākou, “ʻElima wale nō pōpō berena a mākou a me nā iʻa ʻelua, ke hele ʻole mākou e kūʻai i ʻai na kēia poʻe kānaka a pau.”

¹⁴ No ka mea, ʻelima paha o lākou tausani kānaka. ʻŌlelo maila ʻo ia i kāna mau haumāna, “E hoʻonoho papa iā lākou i lalo, e pākanalima i nā papa.”

¹⁵ A pēlā ihola lākou i hana ai, hoʻonoho ihola iā lākou a pau i lalo.

¹⁶ A lālau ihola ʻo ia ia mau pōpō berena ʻelima, a me nā iʻa ʻelua, nānā aʻela i luna i ka lani, hoʻomaikaʻi ihola ia mau mea, a wāwahi ihola, hāʻawi maila hoʻi i nā haumāna e waiho aku i mua o ka ʻaha kanaka.

¹⁷ A ʻai ihola lākou a pau, a māʻona; a ua ʻohi ʻia maila nā māmala i koe maiā lākou a piha nā hīnaʻi he ʻumikumamālua.

¹⁸ ¶ Eia hoʻi kekahi, iā ia e pule kaʻawale ana, ʻo kāna mau haumāna pū me ia; nīnau maila ʻo ia iā lākou, ʻī maila, “ʻO wai lā wau i kā kānaka ʻōlelo?”

¹⁹ Haʻi akula lākou, ʻī akula, “ʻO Ioane Bapetite; a i kā kekahi, ʻo ʻElia; a i kā kekahi, ua ala hou mai kekahi o ka poʻe kāula kahiko.”

²⁰ A laila ʻī maila ʻo ia iā lākou, “ʻO wai lā hoʻi au i kā ʻoukou ʻōlelo?” Haʻi akula ʻo Petero, ʻī akula, “ʻO ka Mesia a ke Akua.”

²¹ Ao ʻiʻo maila nō ʻo ia iā lākou me ka pāpā ikaika mai, ʻaʻole loa e haʻi aku ia mea iā haʻi.

²² ʻĪ maila ia, “ʻAʻole e ʻole ka hoʻomāinoino nui ʻia mai o ke Keiki a ke Kanaka, a me ka hōʻole ʻia mai e ka poʻe lunakahiko, a me ka poʻe kāhuna nui, a me ka poʻe kākau ʻōlelo, a e pepehi ʻia hoʻi ia, a i ke kolu o ka lā e hoʻāla hou ʻia ai.”

²³ ʻŌlelo mai ʻo ia i nā mea a pau, “Inā e makemake kekahi e hele mai ma muli oʻu, e hōʻole iho ʻo ia iā ia iho, e hāpai hoʻi i kona keʻa i kēlā lā i kēia lā, a e hahai mai iaʻu.

²⁴ “No ka mea, ʻo ka mea e makemake e mālama i kona ola nei, e lilo nō kona ola; akā, ʻo ka mea e lilo kona ola noʻu, e mālama ʻo ia i kona ola.

²⁵ “No ka mea, he aha ka pōmaikaʻi o ke kanaka ke lilo mai iā ia kēia ao a pau, a lilo aku ʻo ia iho, a e kiola ʻia aku paha ia?

²⁶ “No ka mea, ʻo ka mea e hilahila mai iaʻu, a i kaʻu mau ʻōlelo, ʻo ia kā ke Keiki a ke Kanaka e hilahila ai, i kona wā e hiki mai ai me kona nani, a me ko ka Makua, a me ko ka poʻe ʻānela hemolele.

²⁷ “Ke hoʻomaopopo ʻiʻo aku nei au iā ʻoukou, eia ke kū nei kekahi poʻe, ʻaʻole e loaʻa ʻē iā lākou ka make, a ʻike lākou i ke aupuni o ke Akua.”

²⁸ ¶ Eia kekahi, a hala aʻela nā lā ʻewalu paha ma hope iho o ia mau ʻōlelo, lawe pū ihola ʻo ia iā Petero, a me Ioane, a me Iakobo, a piʻi akula i ka mauna e pule.

²⁹ Eia kekahi, i kāna pule ʻana, pāhaʻohaʻo maila kona maka, a keʻokeʻo ʻōlinolino maila kona kapa.

³⁰ Aia hoʻi, kamaʻilio maila me ia nā kānaka ʻelua, ʻo Mose lāua ʻo ʻElia;

³¹ nā mea i ʻike ʻia aku me ka nani, a ʻōlelo maila lāua no kona haʻalele ʻana i kona ola ma Ierusalema.

³² A ʻo Petero, a me nā mea me ia, ua paʻuhia i ka hiamoe. A ala aʻela, ʻike akula lākou i kona nani, a i kēlā mau kānaka ʻelua e kū pū ana me ia.

³³ Eia kekahi, i ko lāua hele ʻana aku, mai ona aku lā, ʻōlelo akula ʻo Petero iā Iesū, “E ke Kumu, he mea maikaʻi no kākou e noho ma ʻaneʻi; e kūkulu hoʻi mākou i ʻekolu hale, nou kekahi, no Mose kekahi, a no ʻElia kekahi;” ʻaʻole ia i ʻike iho i kāna mea i ʻōlelo ai.

³⁴ A i kāna ʻōlelo ʻana pēlā, hiki mai ke ao e hoʻomalumalu mai ana iā lākou; makaʻu ihola lākou i ko lākou komo ʻana aʻe i loko o ua ao lā.

³⁵ A he leo i paʻē mai no loko mai o ua ao lā, ʻī maila, “ʻO kaʻu Keiki punahele kēia; e hoʻolohe ʻoukou iā ia!”

³⁶ A i ka paʻē ʻana mai o ua leo lā, ua ʻike ʻia aku ʻo Iesū, ʻo ia hoʻokahi nō. Hūnā ihola lākou, ʻaʻole i haʻi aku iā haʻi, ia mau lā, i kahi mea a lākou i ʻike ai.

³⁷ ¶ Eia kekahi, ia lā aʻe, i ka iho ʻana mai o lākou mai ka mauna mai, he nui ka ʻaha kanaka i hālāwai me ia.

³⁸ Aia hoʻi, kāhea akula kekahi o ua ʻaha kanaka lā, ʻī akula, “E ke Kumu, ke noi aku nei au iā ʻoe e nānā mai ʻoe i kaʻu keiki; no ka mea, ʻo kaʻu keiki kama kahi nō ia.

³⁹ “Aia hoʻi, ua loʻohia ʻo ia e kekahi ʻuhane, auē koke nō ia; a ua hoʻokaʻawili ʻia e ia, a huʻahuʻa aʻe, ʻaneʻane haʻalele ʻole ua ʻuhane lā iā ia, me ka hoʻonāwaliwali loa iā ia.

⁴⁰ “A ua noi aku au i kāu mau haumāna, e mahiki aku iā ia; ʻaʻole e hiki iā lākou.”

⁴¹ A ʻōlelo maila Iesū, ʻī maila, “E ka hanauna manaʻoʻiʻo ʻole, a me ka lauwili, pehea ka lōʻihi o koʻu noho ʻana me ʻoukou, a me koʻu hoʻomanawanui ʻana aku iā ʻoukou? E lawe mai i kāu keiki i ʻaneʻi.”

⁴² A i kona hele ʻana mai, hoʻohina ihola ka daimonio iā ia me ke kūpaka. Pāpā akula ʻo Iesū i ka ʻuhane haukaʻe, a hoʻōla ihola i ke keiki, a hoʻihoʻi maila iā ia i kona makua kāne.

⁴³ Pīhoihoi wale ihola lākou a pau i ka mana o ke Akua. A i ka mahalo ʻana o lākou i kēlā mea i kēia mea a Iesū i hana ai, ʻī maila ia i kāna mau haumāna,

⁴⁴ “E hoʻokomo ʻoukou i kēia mau ʻōlelo i loko o ko ʻoukou mau pepeiao; ʻo ia, e hāʻawi ʻia aku ana ke Keiki a ke Kanaka i loko o nā lima o kānaka.”

⁴⁵ Akā, ʻaʻole lākou i hoʻomaopopo i kēia ʻōlelo; ua hūnā iho ia iā lākou, i ʻole lākou e ʻike; a hopohopo akula lākou ke nīnau aku iā ia no ia ʻōlelo.

⁴⁶ ¶ A laila kupu maila ka hoʻopaʻapaʻa ʻana i waena o lākou i ko lākou mea e ʻoi aku ana.

⁴⁷ ʻIke ihola ʻo Iesū i ke kūkākūkā ʻana o ko lākou mau naʻau, lawe ihola ia i kekahi keiki, hoʻokū ihola iā ia me ia iho;

⁴⁸ a ʻōlelo maila iā lākou, “ʻO ka mea e mālama i kēia keiki no koʻu inoa, ʻo ia ke mālama mai iaʻu; a ʻo ka mea e mālama mai iaʻu, ʻo ia ke mālama i ka Mea nāna au i hoʻouna mai; no ka mea, ʻo ka mea ʻuʻuku loa i waena o ʻoukou a pau loa, ʻo ia ke ʻoi aku ana.”

⁴⁹ ¶ ʻŌlelo akula ʻo Ioane, ʻī akula, “E ke Kumu, ua ʻike mākou i kekahi e mahiki ana i nā daimonio ma kou inoa; a pāpā akula mākou iā ia; no ka mea, ʻaʻole ia i hahai pū me mākou.”

⁵⁰ A ʻōlelo maila ʻo Iesū iā ia, “Mai pāpā aku; no ka mea, ʻo ka mea kūʻē ʻole mai iā kākou, no kākou nō ia.”

⁵¹ ¶ Eia kekahi, i ka hiki ʻana o nā lā e lawe ʻia aku ai ia, kau pono kona maka e hele nō ia i Ierusalema;

⁵² a hoʻouna akula ʻo ia i nā luna ma mua ona; a hele akula ua mau mea lā, a komo akula i kekahi kūlanakauhale o ko Samaria e hoʻomākaukau nona.

⁵³ ʻAʻole hoʻi lākou i hoʻokipa iā ia no ke kau pono ʻana o kona maka e hele i Ierusalema.

⁵⁴ A ʻike ihola nā haumāna āna, ʻo Iakobo, a me Ioane, ʻī akula lāua, “E ka Haku, e pono anei iā ʻoe ke kāhea aku māua i ahi e iho mai, mai ka lani mai, i pau ai lākou, e like me kā ʻElia hana ʻana?”

⁵⁵ A hāliu aʻela ia, pāpā maila iā lāua, ʻī maila, “ʻAʻole ʻolua i ʻike i ke ʻano o ko ʻolua naʻau;

⁵⁶ no ka mea, ʻaʻole i hele mai ke Keiki a ke Kanaka, e pepehi i nā kānaka; akā, e hoʻōla nō.” A hele akula lākou i kekahi kauhale aku.

⁵⁷ ¶ Eia kekahi, i ko lākou hele ʻana ma ke alanui, ʻōlelo akula kekahi kanaka iā ia, “E ka Haku, e hahai aku wau iā ʻoe i nā wahi āu e hele ai.”

⁵⁸ ʻĪ maila ʻo Iesū iā ia, “He mau lua ko nā ʻalopeke, he mau pūnana ko nā manu o ka lewa; akā, ʻo ke Keiki a ke Kanaka, ʻaʻole ona wahi e hoʻomoe ai i kona poʻo.”

⁵⁹ A ʻī maila ʻo ia i kekahi, “E hahai mai ʻoe iaʻu.” Akā, ʻī akula ia, “E ka Haku, e ʻae mai ʻoe iaʻu e hoʻi au e kanu mua i koʻu makua kāne.”

⁶⁰ ʻĪ maila ʻo Iesū iā ia, “Na ka poʻe make e kanu i ko lākou poʻe make; akā, e hele ʻoe e haʻi aku i ke aupuni o ke Akua.”

⁶¹ ʻŌlelo akula hoʻi kekahi iā ia, “E hahai nō au iā ʻoe, e ka Haku; akā, e ʻae mua ʻoe iaʻu e uē aku i ka poʻe ma koʻu hale.”

⁶² ʻĪ maila ʻo Iesū iā ia, “ʻO ke kanaka i lālau kona lima i ka ʻōʻō palau, a nānā aku i hope, ʻaʻole ia e pono no ke aupuni o ke Akua.”