KA ʻEUANELIO I KĀKAU ʻIA AI E LUKA 7 - Ka Baibala Hemolele

1 ʻO ka paulele nui o ka luna haneri. 11 Hoʻōla Iesū i ke keiki a ka wahine kāne make. ʻO kā Ioane nīnau ʻana iā Iesū. 46 Ke aloha o Maria kā Magedala.

MOKUNA VII.

¹ ¶ A hoʻōki aʻela ʻo ia i kāna mau ʻōlelo a pau i ka lohe ʻana o nā kānaka, a laila komo aʻela ia i loko o Kaperenauma.

² ¶ A, he maʻi ko kekahi kauā a ka luna haneri, kokoke nō ia e make, he punahele nāna.

³ A lohe aʻela ka luna haneri iā Iesū, hoʻouna akula ʻo ia i nā lunakahiko o ka poʻe Iudaio i ona lā, nonoi akula iā ia e hele mai e hoʻōla i kāna kauā.

⁴ A hiki akula lākou i o Iesū lā, nonoi ikaika akula lākou iā ia, me ka ʻōlelo, “Ua pono kēlā nona kēia mea āna e hana ai;

⁵ no ka mea, ua aloha mai ʻo ia i ko mākou lāhui kanaka, a ua kūkulu nō hoʻi ʻo ia i ko mākou hale hālāwai.”

⁶ A laila, hele pū maila Iesū me lākou. A kokoke maila ia i ka hale, hoʻouna akula ka luna haneri i nā hoaaloha i ona lā, e ʻōlelo aku iā ia, “E ka Haku, mai hoʻoluhi ʻoe iā ʻoe iho; no ka mea, ʻaʻole oʻu pono e komo mai ai ʻoe i loko o kuʻu hale.

⁷ “No ia hoʻi ʻaʻole au i manaʻo e pono au ke hele aku i ou lā; akā hoʻi, e ʻī mai ʻoe i ka ʻōlelo, a e hoʻōla ʻia nō kuʻu kauā.

⁸ “No ka mea, he kanaka nō wau i hoʻonoho ʻia ma lalo iho o ke aliʻi, he mau koa hoʻi koʻu ma lalo iho oʻu, a ʻī aku au i kekahi, ‘E hele aku,’ a hele aku nō ia; a i kekahi, ‘E hele mai,’ a hele mai nō ia; a i kuʻu kauā hoʻi, ‘E hana ʻoe i kēia,’ a hana nō hoʻi ia.”

⁹ A lohe aʻela ʻo Iesū ia mau mea, mahalo ihola iā ia, a hāliu aʻela ia, ʻī maila i ka ʻaha kanaka e hahai ana ma hope ona, “Ke ʻī aku nei au iā ʻoukou, ʻaʻole au i ʻike i ka paulele nui e like me nēia i loko o kā ʻIseraʻela.”

¹⁰ A hoʻi mai, i ka hale ka poʻe i hoʻouna ʻia aku, ʻike maila lākou i ua kauā maʻi lā, ua ola.

¹¹ ¶ Eia hoʻi kekahi, ia lā aʻe, hele akula ia i ke kūlanakauhale, i kapa ʻia ʻo Naina; a he nui nā haumāna āna i hele pū me ia, a me nā kānaka he nui loa.

¹² A hoʻokokoke akula ʻo ia i ka ʻīpuka o ua kūlanakauhale lā, aia hoʻi, ua hali ʻia maila ma waho kekahi kanaka make, ke keiki kama kahi a kona makuahine, he wahine kāne make ia; a nui maila ko ke kūlanakauhale me ua wahine lā.

¹³ A ʻike ka Haku iā ia, hū aʻela kona aloha iā ia, ʻī maila ʻo ia iā ia, “Mai uē ʻoe.”

¹⁴ Hele aʻela Iesū a hoʻopā aʻela i ka mānele; kū mālie ihola ka poʻe e hali ana. ʻĪ aʻela ia, “E ke kanaka hou, ke kauoha aku nei au iā ʻoe, e ala aʻe!”

¹⁵ A laila noho maila i luna ua kanaka make lā, a hoʻomaka maila e ʻōlelo; a hāʻawi aʻela ʻo Iesū iā ia i kona makuahine.

¹⁶ A kau maila ka weliweli ma luna o lākou a pau, hoʻonani akula lākou i ke Akua; ʻī akula, “Ua puka mai nei ke kāula nui ma waena o kākou; ua ʻike mai ke Akua i kona poʻe kānaka!”

¹⁷ Ua kuʻi akula kona kaulana, ma Iudea a puni, a me ka ʻāina a pau e kokoke mai ana.

¹⁸ ¶ A hōʻike aʻela iā Ioane kāna mau haumāna i kēia mau mea a pau.

¹⁹ Kāhea akula ʻo Ioane i kekahi mau haumāna āna ʻelua, hoʻouna akula i o Iesū lā e nīnau aku, “ʻO ʻoe nō anei ka Mea e hele mai ana? A ʻo ka mea ʻē aʻe anei kā mākou e kali ai?”

²⁰ A hiki akula ua mau kānaka lā i o Iesū lā, ʻī akula, “Na Ioane Bapetite māua i hoʻouna mai i ou nei e nīnau, ‘ʻO ʻoe nō anei ka Mea e hele mai ana? A, ʻo ka mea ʻē aʻe anei kā mākou e kali ai?’”

²¹ Ia hora iho, hoʻōla ihola ʻo ia i nā mea he nui, i nā maʻi, i nā nāwaliwali, i nā ʻuhane ʻino hoʻi; he nui nō hoʻi nā makapō āna i hāʻawi ai i ka ʻike.

²² ʻŌlelo maila ʻo Iesū, ʻī maila iā lāua, “Ō uhoʻi, e haʻi aku ʻolua iā Ioane i kā ʻolua mea i ʻike iho nei, a i lohe iho nei; «ua ʻike nā makapō», ua hele nā ʻoʻopa, ua hoʻomaʻemaʻe ʻia nā lēpero, ua lohe nā kuli, ua hoʻāla ʻia nā make, «ua haʻi ʻia ka ʻōlelo maikaʻi i ka poʻe ʻilihune».

²³ “A e pōmaikaʻi ana ka mea e hina ʻole noʻu.”

²⁴ ¶ A hala akula ua mau ʻelele lā a Ioane, hoʻomaka akula ʻo Iesū ē ʻōlelo i ka ʻaha kanaka, no Ioane, “I hele lā ʻoukou i waho ma ka wao nahele e ʻike i ke aha? I ka ʻohe anei i hoʻoluli ʻia e ka makani?

²⁵ “A i hele lā hoʻi ʻoukou i waho e ʻike i ke aha? I ke kanaka anei i kāhiko ʻia i ke kapa paheʻe? Aia hoʻi i loko o nā hale aliʻi ka poʻe i kāhiko ʻia i ke kapa nani, e noho leʻaleʻa ana!

²⁶ “A i hele lā hoʻi ʻoukou i waho e ʻike i ke aha? I ke kāula anei? ʻOiaʻiʻo, ke haʻi aku nei iā ʻoukou, a i ka mea hoʻi e ʻoi aku i ke kāula!

²⁷ “ʻO ia hoʻi ka mea nona ka palapala, ‘«Eia hoʻi, ke hoʻouna aku nei au i kaʻu ʻelele ma mua ou, Nāna nō e hoʻomākaukau i kou alanui ma mua ou».’

²⁸ “No ka mea, ke ʻōlelo aku nei au iā ʻoukou, ma waena o nā mea a nā wāhine i hānau ai, ʻaʻole he kāula i ʻoi aku ma mua o Ioane Bapetite. Akā, ʻo ka mea ʻuʻuku loa i loko o ke aupuni o ke Akua, ua ʻoi aku ia ma mua ona.”

²⁹ A ʻo nā kānaka a pau i lohe, ʻo nā luna ʻauhau kekahi, hoʻomaikaʻi akula lākou i ke Akua, ka poʻe i bapetizo ʻia ma ka bapetizo a Ioane.

³⁰ Akā, ʻo ka poʻe Parisaio, a me ka poʻe kākau ʻōlelo, ua pale aʻela lākou i ka manaʻo o ke Akua no lākou iho, i ko lākou bapetizo ʻole ʻia e ia.

³¹ “No ia mea, me ke aha lā uaneʻi au e hoʻohālike ai i nā kānaka o kēia hanauna? He aha hoʻi ko lākou mea e like ai?

³² “Ua like nō lākou me nā kamaliʻi e noho ana ma kahi kūʻai, e kāhea ana kekahi i kekahi, a e ʻōlelo ana, ‘Ua hoʻokiokio aku mākou iā ʻoukou, ʻaʻole hoʻi ʻoukou i haʻa mai; ua kanikau aku mākou i mua o ʻoukou, ʻaʻole hoʻi ʻoukou i uē mai.’

³³ “No ka mea, hele maila ʻo Ioane Bapetite me ka ʻai ʻole i ka berena, a me ka inu ʻole i ka waina; a ʻōlelo nō ʻoukou, ‘He daimonio kona!’

³⁴ “Ua hele mai hoʻi ke Keiki a ke Kanaka e ʻai ana, a e inu ana; a ʻōlelo nō ʻoukou, ‘Aia hoʻi, he kanaka pākela ʻai, pākela inu waina, he hoaaloha pū me nā luna ʻauhau a me nā lawehala!’

³⁵ “Akā, ʻo ka naʻauao, ua hoʻopono ʻia ia e kāna mau keiki a pau.”

³⁶ ¶ Kono aʻela kekahi Parisaio iā ia e ʻai pū me ia. A komo akula ʻo ia i loko o ka hale o ua Parisaio lā, a noho hilinaʻi ihola e ʻai.

³⁷ Aia hoʻi, he wahine ma ia kūlanakauhale, he wahine lawehala ia, a ʻike akula ʻo ia e noho ana ia e ʻai ma loko o ka hale o ua Parisaio lā, lawe maila hoʻi ia i ka ipu ʻalabata poni,

³⁸ kū ihola ia ma hope, ma kona mau wāwae, e uē ana, hoʻomaka ihola ia e hoʻopulu i ko Iesū mau wāwae me ka waimaka, a holoi ihola me ka lauoho o kona poʻo, a honi ihola i kona mau wāwae, a poni ihola me ka mea poni.

³⁹ A ʻike aʻela ka Parisaio nāna i kono iā Iesū ʻōlelo ihola ia i loko ona, ʻī ihola, “Inā he kāula kēia, inā ua ʻike ia i kēia wahine i hoʻopā iā ia a me kona ʻano; no ka mea, he wahine hewa ia.”

⁴⁰ A ʻōlelo maila ʻo Iesū, ʻī maila iā ia, “E Simona, he wahi ʻōlelo kaʻu iā ʻoe.” ʻĪ akula ʻo ia, “E ke Kumu, e ʻōlelo mai nō.”

⁴¹ “ʻO kekahi kanaka ʻelua āna mea ʻaiʻē; ʻelima haneri denari ka ʻaiʻē a kekahi, a kanalima hoʻi a kekahi.

⁴² “ʻAʻole a lāua mea e hoʻokaʻa aku ai kala wale akula ʻo ia iā lāua. E haʻi mai hoʻi ʻoe, ʻo wai hoʻi ko lāua mea i aloha nui mai iā ia?”

⁴³ Haʻi akula ʻo Simona, ʻī akula, “Ke manaʻo nei au, ʻo ka mea nāna ka ʻaiʻē nui āna i kala wale ai.” ʻĪ maila ʻo ia iā ia, “Ua pono kou manaʻo.”

⁴⁴ A hāliu aʻela ia i ka wahine, ʻī maila ʻo ia iā Simona, “Ke ʻike nei anei ʻoe i kēia wahine? Ua komo mai nei au i loko o kou hale, ʻaʻole hoʻi ʻoe i hāʻawi mai i wai no koʻu mau wāwae; akā, ua hoʻopulu iho kēia wahine i koʻu mau wāwae me ka waimaka, a ua holoi iho hoʻi me ka lauoho o kona poʻo.

⁴⁵ “ʻAʻole ʻoe i honi mai iaʻu; akā, ʻo kēia wahine, mai koʻu komo ʻana mai, ʻaʻole ia i hoʻōki i ka honi ʻana i koʻu mau wāwae.

⁴⁶ “ʻAʻole ʻoe i poni mai i kuʻu poʻo me ka ʻaila; akā, ua poni mai kēia wahine i koʻu mau wāwae me ka mea poni.

⁴⁷ “No laila hoʻi, ke ʻōlelo aku nei au iā ʻoe, ʻo nā hewa ona he nui loa, ua pau ia i ke kala ʻia; no ka mea, i nui ai kona aloha; akā, ʻo ka mea iā ia ka mea ʻuʻuku i kala ʻia, ʻo ia ke aloha ʻuʻuku.”

⁴⁸ ʻĪ maila ia i ka wahine, “Ua kala ʻia nā hewa ou.”

⁴⁹ A ʻo ka poʻe e noho pū ana, ʻī ihola lākou i loko o lākou iho, “ʻO wai kēia e kala nei i ka hala?”

⁵⁰ ʻĪ maila ʻo ia i ka wahine, “Ua ola ʻoe i kou manaʻoʻiʻo ʻana; e hele aku ʻoe me ka pōmaikaʻi.”