KA ʻEUANELIO I KĀKAU ʻIA AI E LUKA 4 - Ka Baibala Hemolele

1 Hoʻowalewale ʻia Iesū. 14 Haʻi mai i ka pono i Galilaia. 38 Hoʻōla ʻo ia i ka makuahōnōai wahine o Petero.

MOKUNA IV.

¹ ¶ Hele akula hoʻi Iesū, mai Ioredane aku me ka piha i ka ʻUhane Hemolele, a alakaʻi ʻia e ka ʻUhane i ka wao nahele;

² a hoʻowalewale ʻia i nā lā hoʻokahi kanahā, e ka diabolō. ʻAʻole ia i pāʻina ia mau lā; a hala aʻela ia mau lā a ma hope iho, pōloli ihola ia.

³ ʻŌlelo aʻela ka diabolō iā ia, “Inā ʻo ʻoe ke Keiki a ke Akua, e ʻōlelo iho ʻoe i kēia pōhaku e lilo i berena.”

⁴ ʻŌlelo aʻela Iesū iā ia, ʻī aʻela, “Ua palapala ʻia, ‘«ʻAʻole i ka berena wale nō e ola ai ke kanaka; akā, i ka ʻōlelo a pau a ke Akua».’”

⁵ Alakaʻi aʻela ka diabolō iā ia i kekahi mauna kiʻekiʻe, hōʻike hoʻi iā ia i nā aupuni a pau o ke ao nei, i ke sekona hoʻokahi.

⁶ A ʻōlelo aʻela ka diabolō iā ia, “E hāʻawi aku wau iā ʻoe i kēia mana a pau a me ka nani o ia mau mea; no ka mea, ua hāʻawi ʻia mai ia iaʻu, a e hāʻawi aku hoʻi au ia mea no kaʻu mea e makemake ai.

⁷ No laila, inā e hoʻomana mai ʻoe iaʻu, e lilo nō ia mea a pau iā ʻoe.”

⁸ ʻŌlelo hou Iesū iā ia, ʻī aʻela, “E hele pēlā ma hope oʻu, e Sātana; no ka mea, ua palapala ʻia, ‘«E hoʻomana ʻoe i ka Haku, i kou Akua, ʻo ia wale nō kāu e mālama aku ai».’”

⁹ A alakaʻi hou aʻela ka diabolō iā ia, i Ierusalema, a hoʻokū iā ia ma luna o kahi ʻoiʻoi o ka luakini, ʻī aʻela iā ia, “Inā ʻo ʻoe ke Keiki a ke Akua, e lele iho ʻoe i lalo mai laila iho;

¹⁰ No ka mea, ua palapala ʻia, ‘«E kauoha ʻo ia i kona poʻe ʻānela nou e mālama iā ʻoe»;

¹¹ A, «Ma ko lākou mau lima e hāpai aʻe lākou iā ʻoe, O kū ʻia kou wāwae i ka pōhaku».’”

¹² ʻŌlelo aʻela Iesū, ʻī aʻela iā ia, “Ua ʻōlelo ʻia hoʻi, ‘«Mai hoʻāʻo ʻoe i ka Haku, i kou Akua».’”

¹³ ¶ A hoʻōki aʻela ka diabolō ia hoʻāʻo ʻana a pau, hele akula ia mai ona aku lā ia wā.

¹⁴ ¶ A hoʻi akula ʻo Iesū ma ka mana o ka ʻUhane i Galilaia; a kuʻi akula kona kaulana ia ʻāina a puni.

¹⁵ Aʻo maila ʻo ia i loko o ko lākou mau hale hālāwai, me ka hoʻonani ʻia aku e nā mea a pau.

¹⁶ ¶ A hiki hoʻi ia i Nazareta i kona wahi i hānai ʻia ai, komo ia, ma muli o kāna hana mau i ka lā Sābati, i loko o ka hale hālāwai, a kū i luna ia e heluhelu.

¹⁷ A hāʻawi ʻia aʻela iā ia ka buke a ʻIsaia ke kāula, a wehe aʻela ia i ka buke, loaʻa iā ia kahi i palapala ʻia ai,

¹⁸ “«Ma luna iho nei oʻu ka ʻUhane o Iēhova; No ka mea, ua poni maila ʻo ia iaʻu e haʻi aku i ka ʻeuanelio i ka poʻe ʻilihune; Ua hoʻouna mai kēlā iaʻu e lapaʻau i ka poʻe ʻehaʻeha ma ka naʻau, A e haʻi aku i ka hoʻōla ʻana i ka poʻe pio, A me ka ʻike hou ʻana i ka poʻe makapō, A e hoʻokuʻu i ka poʻe i hoʻoluhi hewa ʻia,

¹⁹ A e haʻi aku hoʻi i ka makahiki e aloha mai ai ka Haku».”

²⁰ Hoʻopaʻa ihola ia i ka buke, hoʻihoʻi aʻela i ke kahu, noho ihola i lalo; a kau akula nā maka o ka poʻe a pau i loko o ka hale hālāwai ma luna ona.

²¹ A hoʻomaka ʻo ia e ʻōlelo mai iā lākou, “ʻO kēia Palapala i komo aʻe nei i ko ʻoukou mau pepeiao, ua hoʻokō ʻia i nēia lā.”

²² ʻŌlelo maikaʻi aʻela lākou a pau nona, me ka mahalo i nā ʻōlelo lokomaikaʻi āna i ʻōlelo mai ai; nīnau ihola, “ʻAʻole anei kēia ʻo ke keiki a Iosepa?”

²³ ʻŌlelo maila ʻo ia iā lākou, “E hoʻopili mai auaneʻi ʻoukou iaʻu i kēia hua ʻōlelo nane, ‘E ke kahuna, e hoʻōla ʻoe iā ʻoe iho! ʻO nā mea i hana ʻia ma Kaperenauma a mākou i lohe ai, e hana hou hoʻi ʻoe ma kou ʻāina nei.’”

²⁴ A ʻōlelo hou ia, “He ʻoiaʻiʻo kaʻu e ʻōlelo aku nei, ʻaʻohe kāula i mahalo ʻia ma kona ʻāina iho.

²⁵ “Ke haʻi aku nei au iā ʻoukou i ka ʻōlelo ʻoiaʻiʻo, nui nō nā wāhine kāne make i loko o kā ʻIseraʻela i nā lā o ʻElia, i ka wā i paʻa ai ka lani ʻekolu makahiki a me nā malama ʻeono, a nui ka wī a puni ka ʻāina;

²⁶ ʻaʻole hoʻi ʻo ʻElia i hoʻouna ʻia aku i kekahi o lākou, i kahi wahine kāne make i Sarepeta ma Sidona.

²⁷ “Nui wale ka poʻe lēpero i loko o kā ʻIseraʻela i ka wā o ʻElisai ke kāula, ʻaʻole hoʻi kekahi o lākou i hoʻomaʻemaʻe ʻia; akā, ʻo Naʻamana no Suria.”

²⁸ Ukiuki loa aʻela ko loko o ka hale hālāwai a pau i ko lākou lohe ʻana ia mau mea,

²⁹ kū aʻela lākou i luna, kipaku akula lākou iā ia i waho o ke kūlanakauhale, alakaʻi akula lākou iā ia i ke kuʻemaka pali o ka puʻu i kūkulu ʻia ai ko lākou kūlanakauhale, e kiola iho iā ia i lalo.

³⁰ Akā, māʻalo aʻela ʻo ia i waenakonu o lākou, hele akula nō ia.

³¹ ¶ A hele hoʻi ia i Kaperenauma i kekahi kūlanakauhale i Galilaia, a aʻo maila iā lākou i nā lā Sābati.

³² Kāhāhā ihola ka naʻau o lākou i kāna aʻo ʻana; no ka mea, he mana ko kāna ʻōlelo.

³³ A i loko o ka hale hālāwai he kanaka iā ia kekahi ʻuhane daimonio haukaʻe, a kāhea nō ia me ka leo nui,

³⁴ ʻī akula, “ʻEā! He aha kāu iā mākou nei, e Iesū, no Nazareta? Ua hele mai anei ʻoe e luku iā mākou? Ua ʻike nō au iā ʻoe, ʻo ka Mea Hemolele nō ʻoe a ke Akua!”

³⁵ Pāpā maila Iesū iā ia, ʻī maila, “Hāmau, a e puka mai hoʻi i waho ona!” A hoʻohina ihola ka daimonio iā ia i waenakonu, a laila puka mai nō ia i waho ona, ʻaʻole i hana ʻeha iā ia.

³⁶ Mahalo ihola lākou a pau, a ʻōlelo kekahi i kekahi, ʻī aʻela, “He aha kēia ʻōlelo? No ka mea, ua kauoha ikaika aku ʻo ia i nā ʻuhane haukaʻe me ka mana, a ua puka mai nō lākou i waho.”

³⁷ Kuʻi akula kona kaulana ia wahi aku ia wahi aku, ma ia ʻāina a puni.

³⁸ ¶ A hele ia i waho o ka hale hālāwai, komo akula ia i loko o ka hale o Simona; ua loʻohia ka makuahōnōai wahine o Simona e ke kuni nui; nonoi akula lākou iā Iesū nona.

³⁹ Kū aʻela ʻo Iesū i luna ma ona lā, pāpā ihola i ke kuni; haʻalele ihola ke kuni iā ia. Ala aʻela ia wahine i luna, a lawelawe na lākou.

⁴⁰ ¶ A i ke komo ʻana a ka lā, ʻo ka poʻe a pau no lākou nā mea maʻi i kēlā maʻi i kēia maʻi, halihali maila iā lākou i o Iesū lā; a kau ihola ʻo ia i kona mau lima ma luna o lākou a pau, a hoʻōla ihola iā lākou.

⁴¹ A hemo maila nā daimonio i waho o nā mea he lehulehu e kāhea ana me ka ʻōlelo, “ʻO ʻoe nō ka Mesia, ke Keiki a ke Akua!” A pāpā akula ʻo ia iā lākou, ʻaʻole i ʻae aku iā lākou e ʻōlelo; no ka mea, ua ʻike nō lākou, ʻo ia ka Mesia.

⁴² ¶ A ao aʻela, hele akula i kahi nāhelehele; a ʻimi akula nā kānaka iā ia, a hiki i ona lā, kāohi ihola lākou iā ia e haʻalele ʻole ʻo ia iā lākou.

⁴³ ʻŌlelo maila ʻo ia iā lākou, “He pono hoʻi noʻu, e haʻi aku i ka ʻeuanelio no ke aupuni o ke Akua i nā kūlanakauhale ʻē aʻe; no ka mea, no laila wau i hoʻouna ʻia ai.”

⁴⁴ ¶ A aʻo maila hoʻi ʻo ia i loko o nā hale hālāwai o Galilaia.