KA ʻEUANELIO I KĀKAU ʻIA AI E LUKA 3 - Ka Baibala Hemolele

1 ʻO ke aʻo ʻana o Ioane. 20 Paʻa ʻo Ioane iā Herode. 21 Bapetizo ʻia ʻo Iesū. 23 Kona kūʻauhau.

MOKUNA III.

¹ ¶ A i ka ʻumikumamālima o ka makahiki o ko Tiberio Kaisara aupuni; e aliʻi kiaʻāina ana ʻo Ponetio Pilato no Iudea, a e aliʻi ʻokana ana ʻo Herode no Galilaia, a e aliʻi ʻokana ana ʻo Pilipo kona kaikaina no ʻIturea a me nā ʻāina ʻo Terakoniti, a e aliʻi ʻokana ana ʻo Lusania no ʻAbilene,

² a e kahuna nui ana ʻo ʻAna a me Kaiapa, hiki maila ka ʻōlelo a ke Akua iā Ioane ke keiki a Zakaria, ma ka wao nahele.

³ A kaʻahele aʻela ia i nā ʻāina a pau e kokoke mai ana ma Ioredane, e aʻo ana i ka bapetizo no ka mihi i mea e kala ʻia mai ai nā hewa;

⁴ e like me ka mea i kākau ʻia ma ka buke ʻōlelo a ʻIsaia ke kāula e ʻī ana, “«ʻO ka leo o ka mea e kala ana ma ka wao nahele, ‘E hoʻomākaukau ʻoukou i ke alanui no Iēhova, E hana hoʻi i kona mau kuamoʻo i pololei.

⁵ ‘E hoʻopiha ʻia nā awāwa a pau, A e hoʻohaʻahaʻa ʻia nā mauna a me nā puʻu a pau, A e hoʻopololei ʻia nā ʻaoʻao kekeʻe, A e hoʻomania ʻia hoʻi nā ala ʻāpuʻupuʻu;

⁶ A e ʻike nā kānaka a pau i ka hoʻōla a ke Akua».’”

⁷ ¶ A laila ʻōlelo maila ʻo ia i nā ʻaha kanaka i hele aku i ona lā e bapetizo ʻia e ia, “E ka poʻe hanauna moʻo niho ʻawa, na wai ʻoukou i ao aku e holo i pakele ai i ka inaina e kau mai ana?

⁸ “E hoʻohua hoʻi ʻoukou i nā hua e kū i ka mihi, mai hoʻomaka e ʻōhumu i loko o ʻoukou iho, ‘ʻO ʻAberahama ko kākou makua;’ no ka mea, ke ʻōlelo aku nei au iā ʻoukou, e hiki nō i ke Akua ke hoʻāla mai i mau keiki na ʻAberahama no kēia mau pōhaku mai.

⁹ “ʻĀnō hoʻi, ke waiho ʻia nei ke koʻi ma ke kumu o nā lāʻau; no laila, ʻo kēlā lāʻau kēia lāʻau i hoʻohua ʻole mai i ka hua maikaʻi, ʻo ia ke kua ʻia i lalo a kiola ʻia aku i ke ahi.”

¹⁰ Nīnau akula ia poʻe kānaka iā ia, ʻī akula lākou, “He aha lā kā mākou e hana ai?”

¹¹ Haʻi maila ʻo ia, ʻī maila iā lākou, “ʻO ka mea nona nā kapa komo ʻelua, e hāʻawi aku ʻo ia i kekahi no ka mea i nele; a pēlā nō e hana aku ai ka mea nāna ka ʻai.”

¹² A laila hele aʻela hoʻi nā luna ʻauhau e bapetizo ʻia, ʻī akula iā ia, “E ke kumu, he aha kā mākou e hana ai?”

¹³ ʻĪ maila ʻo ia iā lākou, “Mai hōʻoi ʻoukou ma mua o ka mea i hoʻopono ʻia no ʻoukou.”

¹⁴ A nīnau akula ka poʻe koa iā ia, ʻī akula, “He aha hoʻi kā mākou e hana ai?” ʻĪ maila ʻo ia iā lākou, “Mai kolohe iā haʻi, mai ʻālunu, a e ʻoluʻolu ʻoukou i ko ʻoukou uku.”

¹⁵ ¶ A i ke kānalua ʻana o nā kānaka, kūkākūkā ihola ka naʻau o lākou a pau, no Ioane, ʻo ka Mesia paha ia?

¹⁶ ʻŌlelo maila ʻo Ioane iā lākou a pau, ʻī maila, “ʻO wau nō ke bapetizo nei iā ʻoukou me ka wai; akā, e hele mai ana Kekahi, he ʻoi aku kona mana i koʻu, ʻaʻole au e pono ke wehe aʻe i nā kaula o kona mau kāmaʻa; ʻo ia ke bapetizo iā ʻoukou me ka ʻUhane Hemolele a me ke ahi.

¹⁷ “A ʻo kona peʻahi, aia nō i kona lima, a e hoʻomaʻemaʻe loa ʻo ia i kāna huapalaoa, a e hōʻiliʻili i kāna huapalaoa i loko o kona hale papaʻa, a e hoʻopau hoʻi ʻo ia i ka ʻōpala i ke ahi pio ʻole.”

¹⁸ ¶ He nui nō hoʻi nā mea ʻē aʻe āna i hōʻike mai ai i nā kānaka i kāna ʻōlelo hoʻoikaika.

¹⁹ A ʻo Herode ke aliʻi kiaʻāina, ua aʻo ʻia e ia no Herodia ka wahine a Pilipo a kona hoahānau, a no nā mea hewa hoʻi a pau a Herode i hana ai,

²⁰ hoʻohui hou nō ʻo ia i kēia mea ia mau mea a pau, a hana paʻa ʻo ia iā Ioane i loko o ka hale paʻahao.

²¹ ¶ Eia hoʻi kekahi, i ka bapetizo ʻia ʻana o nā kānaka a pau, ʻo Iesū nō kekahi i bapetizo ʻia; a i kāna pule ʻana aʻe, wehe ʻia maila ka lani;

²² a iho maila ma luna ona ka ʻUhane Hemolele me ko ke kino ʻano o ka manu nūnū, a paʻē mai ka leo mai ka lani mai, e ʻī mai ana, “ʻO ʻoe nō kaʻu Keiki punahele, he ʻoluʻolu loa koʻu iā ʻoe.”

²³ ¶ A ʻo Iesū, noho nō ia he kanakolu paha makahiki, he keiki, (i ka manaʻo ʻia) na Iosepa, ʻo ia na Heli,

²⁴ ʻo ia na Matata, ʻo ia na Levi, ʻo ia na Meleki, ʻo ia na Iana, ʻo ia na Iosepa,

²⁵ ʻo ia na Matatia, ʻo ia na ʻAmosa, ʻo ia na Nauma, ʻo ia na ʻEseli, ʻo ia na Nagai,

²⁶ ʻo ia na Maʻata, ʻo ia na Matatia, ʻo ia na Semei, ʻo ia na Iosepa, ʻo ia na Iuda,

²⁷ ʻo ia na Ioana, ʻo ia na Resa, ʻo ia na Zorobabela, ʻo ia na Salatiʻela, ʻo ia na Neri,

²⁸ ʻo ia na Meleki, ʻo ia na ʻAdi, ʻo ia na Kosama, ʻo ia na ʻElemodama, ʻo ia na ʻEra,

²⁹ ʻo ia na Iose, ʻo ia na ʻEliezera, ʻo ia na Iorima, ʻo ia na Matata, ʻo ia na Levi,

³⁰ ʻo ia na Simeona, ʻo ia na Iuda, ʻo ia na Iosepa, ʻo ia na Ionana, ʻo ia na ʻEliakima,

³¹ ʻo ia na Melea, ʻo ia na Menana, ʻo ia na Matata, ʻo ia na Natana, ʻo ia na Dāvida,

³² ʻo ia na Iese, ʻo ia na ʻObeda, ʻo ia na Boaza, ʻo ia na Salemona, ʻo ia na Naʻasona,

³³ ʻo ia na ʻAminadaba, ʻo ia na ʻArama, ʻo ia na ʻEseroma, ʻo ia na Paresa, ʻo ia na Iuda,

³⁴ ʻo ia na Iakoba, ʻo ia na ʻIsaʻaka, ʻo ia na ʻAberahama, ʻo ia na Tara, ʻo ia na Nahora,

³⁵ ʻo ia na Saruka, ʻo ia na Ragau, ʻo ia na Paleka, ʻo ia na ʻEbera, ʻo ia na Sala,

³⁶ ʻo ia na Kainana, ʻo ia na ʻArepakada, ʻo ia na Sema, ʻo ia na Noa, ʻo ia na Lameka,

³⁷ ʻo ia na Metusala, ʻo ia na ʻEnoka, ʻo ia na Iareda, ʻo ia na Maleleʻela, ʻo ia na Kainana,

³⁸ ʻo ia na ʻEnosa, ʻo ia na Seta, ʻo ia na ʻAdamu, ʻo ia na ke Akua.