KA ʻEUANELIO I KĀKAU ʻIA AI E LUKA 24 - Ka Baibala Hemolele

1 ʻO ke ala hou ʻana o Iesū. 13 ʻIke ʻia ia e nā haumāna ʻelua. 36 A me nā lunaʻōlelo. 50 Ko Iesū piʻi ʻana i ka lani.

MOKUNA XXIV.

¹ ¶ A i ka lā mua o ka hebedoma, i ka wanaʻao, hele akula ua mau wāhine lā me kekahi poʻe, i ka lua kupapaʻu, e hali aku ana i nā mea ʻala a lākou i hoʻomākaukau ai.

² ʻIke aʻela lākou i ka pōhaku ua ʻolokaʻa ʻia aʻe mai ka lua kupapaʻu aʻe.

³ Komo ihola lākou i loko, ʻaʻole hoʻi i loaʻa iā lākou ke kino o ka Haku ʻo Iesū.

⁴ A i ko lākou haʻohaʻo nui ʻana ia mea, aia hoʻi, ʻelua kānaka e kū mai ana i o lākou lā me nā kapa ʻālohilohi.

⁵ Weliweli ihola hoʻi lākou, a kūlou ihola ke alo i ka lepo; ʻī maila lāua iā lākou, “No ke aha lā ʻoukou e ʻimi ai i ka Mea ola i waena o ka poʻe make?

⁶ “ʻAʻole ʻo ia ma ʻaneʻi; akā, ua ala aʻe nei ia. E hoʻomanaʻo i kāna i ʻōlelo mai ai iā ʻoukou, iā ia ma Galilaia,

⁷ i ka ʻī ʻana, e hāʻawi ʻia aku nō ke Keiki a ke Kanaka i loko o nā lima o kānaka hewa, a e make ia ma ke keʻa, a i ke kolu o ka lā e ala hou mai.”

⁸ A laila hoʻomanaʻo lākou i kāna ʻōlelo;

⁹ a hoʻi maila lākou mai ka lua kupapaʻu mai, hōʻike maila lākou ia mau mea i ka poʻe ʻumikumamākahi, a i nā mea ʻē aʻe o lākou a pau.

¹⁰ ʻO Maria Magedalene, a me Ioane, a me Maria ka makuahine o Iakobo, a me nā wāhine ʻē aʻe me lākou, ʻo lākou ka poʻe i haʻi mai ia mau mea i ka poʻe lunaʻōlelo.

¹¹ A ua like hoʻi kā lākou ʻōlelo, i ko lākou nei manaʻo, me he mea ʻole lā, ʻaʻole hoʻi i manaʻo lākou he ʻoiaʻiʻo.

¹² Kū aʻela ʻo Petero i luna, a holo akula i ka lua kupapaʻu, kūlou ia i lalo, a ʻike akula i ka lole olonā wale nō e waiho ana, hele hoʻi ia mai laila aku e haʻohaʻo ana i ka mea i hana ʻia.

¹³ ¶ Aia hoʻi, ʻelua o lākou e hele ana ia lā, i ke kūlanakauhale i mamao kanaono setadia aku mai Ierusalema aku, ʻo ʻEmausa ka inoa.

¹⁴ A kamaʻilio ihola lāua ia mau mea a pau i hana ʻia.

¹⁵ Eia kekahi, i ko lāua kamaʻilio ʻana me ke kūkā pū, hiki maila ʻo Iesū, a hele pū akula me lāua.

¹⁶ A ua hoʻopaʻa ʻia ko lāua mau maka ʻaʻole i hoʻomaopopo lāua iā ia.

¹⁷ ʻŌlelo maila ʻo ia iā lāua, “He aha kēia mau mea a ʻolua e kamaʻilio nei i ko ʻolua hele ʻana me ke kaumaha?”

¹⁸ ʻŌlelo akula kekahi o lāua, ʻo Keleopa kona inoa, ʻī akula. “ʻO ʻoe wale nō anei ka malihini ma Ierusalema, ʻaʻole i ʻike i nā mea i hana ʻia ma laila i kēia mau lā?”

¹⁹ Nīnau maila ʻo ia iā lāua, “Nā mea hea?” Haʻi akula lāua iā ia, “No Iesū o Nazareta, he kanaka kāula ia, he mana i ka hana a me ka ʻōlelo, i mua o ke Akua, a me nā kānaka a pau.

²⁰ “A ua hāʻawi akula nā kāhuna nui a me nā aliʻi o mākou iā ia e hoʻāhewa ʻia aʻe e make ia, a ua kau aʻela lākou iā ia ma ke keʻa.

²¹ “Akā, ua hoʻolana mākou i ka manaʻo ʻana, ʻo ia ka mea nāna e hoʻōla i kā ʻIseraʻela. ʻO ia mau mea, a, eia hoʻi ke kolu o ka lā, mai ka hana ʻana mai ia mau mea.

²² A ua pīhoihoi mākou i kekahi mau wāhine o mākou, ua hele aku lākou i kakahiaka nui nei i ka lua kupapaʻu;

²³ ʻaʻole hoʻi i loaʻa iā lākou kona kino, a hoʻi mai, haʻi maila lākou, ua ʻike ʻia e lākou nā ʻānela, nā mea i ʻōlelo mai, ua ola ia.

²⁴ “A ua hele aku kekahi mau mea o mākou i ka lua kupapaʻu, ʻike akula hoʻi e like me ka mea a nā wāhine i ʻōlelo mai ai, ʻaʻole hoʻi i ʻike iā ia.”

²⁵ ʻŌlelo maila ʻo ia iā lāua, “E nā mea manaʻo ʻole, e nā mea naʻau manaʻoʻiʻo ʻole i nā mea a pau a nā kāula i ʻōlelo mai ai!

²⁶ “ʻAʻole anei e pono ka Mesia ke hana ʻia pēlā, a komo aku i kona nani?”

²⁷ A laila wehewehe maila ʻo ia i nā Palapala Hemolele iā lāua, maiā Mose mai a pau nā kāula i nā mea a pau i kākau ʻia nona iho.

²⁸ A kokoke akula lākou i ke kauhale i kahi o lāua e hele ai, hoʻohele loa akula nō hoʻi ia.

²⁹ Kāohi ihola lāua iā ia, ʻī akula, “E noho me māua; no ka mea, ua ahiahi, a ua kokoke pau kēia lā.” A komo aʻela ia a noho pū ihola me lāua.

³⁰ Eia kekahi, i kona noho ʻana e ʻai me lāua, lālau ihola ia i ka berena, hoʻomaikaʻi akula, a wāwahi ihola, a hāʻawi maila iā lāua.

³¹ A laila wehe ʻia aʻela ko lāua mau maka, a hoʻomaopopo ihola lāua iā ia; a nalo koke akula nō hoʻi ia mai o lāua aku.

³² A ʻōlelo aʻela kekahi i kekahi, “ʻAʻole anei i mehana ko kāua naʻau i loko o kāua, i kona kamaʻilio ʻana me kāua ma ke alanui, a i kona hoʻomōakāka ʻana mai i ka Palapala Hemolele?”

³³ Ia hora nō, kū aʻela lāua i luna a hoʻi maila i Ierusalema, ʻike maila lāua i ka poʻe he ʻumikumamākahi ua ʻākoakoa, a me kekahi poʻe pū me lākou;

³⁴ ʻī akula lākou, “Ua ala hou ka Haku, a ua ʻike ʻia ʻo ia e Simona.”

³⁵ A haʻi maila lāua i nā mea i hana ʻia ma ke alanui, a me kona maopopo ʻana iā lāua i ka wāwahi berena ʻana.

³⁶ ¶ A i ko lākou kamaʻilio ʻana ia mau mea, kū ihola Iesū i waenakonu o lākou, a ʻōlelo maila ʻo ia iā lākou, “Aloha ʻoukou!”

³⁷ A makaʻu ihola lākou me ka weliweli, e manaʻo ana he ʻuhane ka mea a lākou i ʻike ai.

³⁸ A ʻōlelo maila ʻo ia iā lākou, “No ke aha lā ʻoukou e makaʻu ai? No ke aha lā hoʻi e kupu ai ka haʻohaʻo ʻana i loko o ko ʻoukou mau naʻau?

³⁹ “E nānā mai ʻoukou i koʻu mau lima a me koʻu mau wāwae, ʻo wau nō kēia; e lawelawe iaʻu i maopopo iā ʻoukou; no ka mea, ʻaʻohe ʻiʻo a me nā iwi ko ka ʻuhane, e like me koʻu a ʻoukou e ʻike nei.”

⁴⁰ A i kāna ʻōlelo ʻana pēlā, hōʻike maila ʻo ia iā lākou i kona mau lima a me kona mau wāwae.

⁴¹ A i ko lākou manaʻoʻiʻo ʻole ʻana no ka ʻoliʻoli, a me ka pīhoihoi ʻana, nīnau maila ʻo ia iā lākou, “He wahi ʻai anei kā ʻoukou ma ʻaneʻi?”

⁴² Hāʻawi akula hoʻi lākou iā ia i kauwahi iʻa i kōʻala ʻia, a i kauwahi waihona meli.

⁴³ Lālau ihola ʻo ia ia, a ʻai ihola ma ko lākou alo.

⁴⁴ ¶ ʻŌlelo maila hoʻi ʻo ia iā lākou, “Eia nā ʻōlelo aʻu i ʻōlelo aku ai iā ʻoukou, i koʻu noho ʻana me ʻoukou, e pono e hoʻokō ʻia nā mea a pau i kākau ʻia ma ke Kānāwai o Mose, a ma nā Kāula, a ma nā Halelū, noʻu.”

⁴⁵ A laila wehewehe ihola ʻo ia i ko lākou manaʻo i hoʻomaopopo lākou i nā Palapala Hemolele,

⁴⁶ a ʻōlelo maila ʻo ia iā lākou, “Pēlā i palapala ʻia ai, a pēlā hoʻi e pono ai ka Mesia ke make, a e ala hou mai i ke kolu o ka lā, mai waena mai o ka poʻe make;

⁴⁷ a e haʻi ʻia aku hoʻi ka mihi a me ke kala ʻana i ka hala ma kona inoa ma waena o nā lāhui kanaka a pau, e hoʻomaka ana ma Ierusalema.

⁴⁸ “ʻO ʻoukou hoʻi nā mea e hōʻike i kēia mau mea.

⁴⁹ “Eia hoʻi, e hoʻoili ana au ma luna o ʻoukou i ka mea a koʻu Makua i ʻōlelo hoʻopōmaikaʻi iho ai; akā, e noho ʻoukou ma Ierusalema, a hoʻolako ʻia mai ʻoukou me ka mana no luna mai.”

⁵⁰ ¶ A laila alakaʻi ʻo ia iā lākou i waho a hiki i Betania, hāpai aʻela i kona mau lima, a hoʻomaikaʻi maila iā lākou.

⁵¹ Eia hoʻi kekahi, i kona hoʻomaikaʻi ʻana iā lākou, ua hoʻokaʻawale ʻia aʻela ia mai o lākou aʻe, a lawe ʻia akula i luna i ka lani.

⁵² Hoʻomana akula lākou iā ia, a hoʻi maila i Ierusalema, me ka ʻoliʻoli nui.

⁵³ A, ma loko o ka luakini lākou i kēlā lā a i kēia lā, e hoʻoleʻa ana, a e hoʻomaikaʻi ana i ke Akua. ʻĀmene.