KA ʻEUANELIO I KĀKAU ʻIA AI E LUKA 23 - Ka Baibala Hemolele

1 Hoʻokolokolo ʻia ʻo Iesū e Pilato. 8 Hoʻowahāwahā ʻo Herode. 13 Wehe ʻia ʻo Baraba, a hoʻāhewa ʻia Iesū. 33 Kau ʻia Iesū i ke keʻa. 34 Pule ia no nā ʻenemi. 46 Make ia. Kanu ʻia ia.

MOKUNA XXIII.

¹ ¶ A kū aʻe ko lākou poʻe a pau, alakaʻi akula lākou iā ia i o Pilato lā.

² A hoʻohewa akula lākou iā ia, ʻī akula, “Ua ʻike mākou iā ia nei e hoʻohuli hewa ana i kānaka, e pāpā ana i ka hoʻokupu iā Kaisara, e ʻōlelo ana, ʻO ia iho nō ka Mesia, ke Aliʻi.”

³ A laila nīnau akula ʻo Pilato iā ia, ʻī akula, “ʻO ʻoe nō anei ke aliʻi o ka poʻe Iudaio?” Haʻi maila hoʻi ʻo Iesū iā ia, ʻī maila, “ʻO ia kāu i ʻōlelo mai nei.”

⁴ ʻŌlelo maila Pilato i nā kāhuna nui, a me ka ʻaha kanaka, “ʻAʻohe hewa iki o kēia kanaka i loaʻa iaʻu.”

⁵ Koi ikaika akula nō naʻe lākou, e ʻōlelo ana, “Ua hoʻohaunaele ʻo ia nei i kānaka i kāna aʻo ʻana a puni Iudea, mai Galilaia kahi i hoʻomaka ai, a hiki mai i kēia wahi.”

⁶ A lohe Pilato i ka hua Galilaia, nīnau maila ia, he kanaka Galilaia paha ia.

⁷ A maopopo iā ia no ka ʻāina iā Herode kēlā, hoʻouna akula ʻo ia iā ia i o Herode lā, e noho ana ʻo ia ma Ierusalema ia mau lā.

⁸ ¶ A ʻike ʻo Herode iā Iesū, ʻoliʻoli nui ihola ia; no ka mea, he lōʻihi kona manawa i makemake ai e ʻike iā ia, no nā mea he nui āna i lohe ai nona; a manaʻo nō hoʻi ia e ʻike i kekahi hana mana e hana ʻia e ia.

⁹ A he nui nā mea āna i nīnau aku ai iā ia, ʻaʻole hoʻi ʻo Iesū i haʻi iki mai iā ia.

¹⁰ Kū aʻela nā kāhuna nui, a me ka poʻe kākāʻōlelo, hoʻohewa ikaika lākou iā ia.

¹¹ Hoʻowahāwahā akula nō hoʻi ʻo Herode, a me kona poʻe koa iā ia, me ka hoʻomāʻewaʻewa, kāhiko akula iā ia me ka ʻaʻahu nani, a hoʻihoʻi maila iā ia i o Pilato lā.

¹² Lilo aʻela nō hoʻi ʻo Pilato a me Herode i mau hoaaloha pū, ia lā; no ka mea, ua kūʻē kekahi i kekahi ma mua.

¹³ ¶ A hoʻākoakoa maila ʻo Pilato i nā kāhuna nui, a me nā luna, a me nā kānaka;

¹⁴ ʻī maila ʻo ia iā lākou, “Ua lawe mai nei ʻoukou i kēia kanaka i oʻu nei me he mea lā e hoʻohuli ʻē ana i kānaka; a ua hoʻokolokolo au iā ia i mua o ʻoukou, ʻeā, ʻaʻole hoʻi i loaʻa iaʻu ka hewa o ua kanaka nei a ʻoukou i niʻaniʻa ai iā ia.

¹⁵ ʻAʻole hoʻi ʻo Herode; no ka mea, ua hoʻouna aku au iā ʻoukou i ona lā; i ʻike hoʻi ʻoukou, ʻaʻole ʻo ia nei i hana i ka mea e pono ai ka make ʻana.

¹⁶ “No laila e hahau au iā ia, a e hoʻokuʻu aku.”

¹⁷ No ka mea, he pono ke hoʻokuʻu aku ʻo ia i kekahi iā lākou, ia ʻahaʻaina.

¹⁸ Hea nui aʻela lākou a pau e ʻōlelo ana, “E kaʻi ʻia aku kēia, a e hoʻokuʻu mai ʻoe iā Baraba iā mākou!”

¹⁹ ʻO ka mea ia i hahao ʻia i loko o ka hale paʻahao, no ka hoʻohaunaele ʻana ma loko o ke kūlanakauhale, a me ka pepehi kanaka.

²⁰ No laila ʻōlelo hou maila Pilato iā lākou me ka makemake e hoʻokuʻu iā Iesū.

²¹ A ʻōlelo leo nui akula lākou, “E kau ma ke keʻa! E kau ma ke keʻa iā ia!”

²² A ʻōlelo hou maila ia, ʻo ke kolu kēia, iā lākou, “No ke aha lā, he aha ka mea hewa āna i hana ai? ʻAʻole au i ʻike i kona hewa e pono ai ka make; no laila e hahau aku au iā ia, a hoʻokuʻu aku.”

²³ Akā hoʻi, koi akula lākou me ka leo nui, e noi ana e make ia ma ke keʻa; a kō aʻela ko lākou mau leo a me ko nā kāhuna nui.

²⁴ A ʻōlelo ihola ʻo Pilato e hana ʻia ka mea a lākou i noi ai.

²⁵ A laila hoʻokuʻu aʻela ʻo ia i kā lākou mea i noi ai, i ka mea i hahao ʻia i loko o ka hale paʻahao no ka hoʻohaunaele ʻana, a me ka pepehi kanaka; a hāʻawi aʻela iā Iesū ma ko lākou manaʻo.

²⁶ ¶ A i ko lākou kaʻi ʻana aku iā ia, lālau iho lākou iā Simona no Kurene e hele mai ana mai ka ʻāina mai, kau akula lākou i ka lāʻau keʻa ma luna ona, e hali aku ia ma hope o Iesū.

²⁷ ¶ A hahai akula iā ia ka ʻaha kanaka he nui loa, ʻo nā wāhine kekahi nā mea i uē aku, a ʻū aku hoʻi iā ia.

²⁸ A laila hāliu maila Iesū iā lākou, ʻī maila, “E nā kaikamāhine o Ierusalema, mai uē ʻoukou noʻu; akā, e uē ʻoukou no ʻoukou iho, a no kā ʻoukou mau keiki.

²⁹ No ka mea, e hiki mai ana nā lā e ʻōlelo ai lākou, ‘Pōmaikaʻi ka poʻe i pā, a me nā ʻōpū i hānau ʻole, a me nā ū i omo ʻole ʻia.’

³⁰ “A laila e hoʻomaka lākou «e ʻōlelo aku i nā mauna, ‘E hiolo mai ma luna iho o mākou;’ a i nā puʻu hoʻi, ‘E uhi mai iā mākou».’

³¹ “No ka mea, inā e hana lākou i kēia mau mea i ka lāʻau maka, he aha ka mea e hana ʻia ai i ka lāʻau maloʻo?”

³² ¶ A ua alakaʻi ʻia aku nā mea ʻē aʻe ʻelua, nā kānaka hana hewa, e make pū me ia.

³³ ¶ A hiki akula lākou i ka wahi i kapa ʻia ʻo Kalevari, ma laila lākou i kau aku ai iā ia ma ke keʻa, a me nā lawehala, ma ka ʻākau kekahi, a ma ka hema kekahi.

³⁴ A laila ʻōlelo akula ʻo Iesū, “E ka Makua, e kala iho ʻoe i ko lākou nei hewa; no ka mea, ʻaʻole o lākou ʻike i kā lākou mea e hana nei.” Puʻunaue aʻela lākou i kona mau kapa, hailona ihola.

³⁵ Kū ihola nō hoʻi nā kānaka e mākaʻikaʻi ana: a hoʻomāʻewaʻewa akula me ko lākou mau aliʻi, ʻī akula, “Ua hoʻōla kā ʻo ia iā haʻi, a inā ʻo ia ka Mesia, ka Hiwahiwa a ke Akua, e hoʻōla kēlā iā ia iho.”

³⁶ Hoʻomāʻewaʻewa akula hoʻi nā koa iā ia, hele akula lākou, a hāʻawi aku i ka vīnega iā ia;

³⁷ a ʻōlelo akula lākou, “Inā ʻo ʻoe ke Aliʻi o ka poʻe Iudaio, e hoʻōla ʻoe iā ʻoe iho!”

³⁸ He palapala hoʻi ma luna ona, he Helene, he Roma, a he Hebera ka ʻōlelo i kākau ʻia ai ia, “ʻO IA NEI KE ALIʻI O KA POʻE IUDAIO.”

³⁹ ¶ A ʻo kekahi o nā lawehala i kau ʻia, hōʻino akula ʻo ia iā ia, ʻī akula, “Inā ʻo ʻoe ka Mesia, e hoʻōla ʻoe iā ʻoe iho, a me māua!”

⁴⁰ A ʻōlelo aʻela kekahi e aʻo ana iā ia, ʻī aʻela, “ʻAʻole anei ou makaʻu i ke Akua? Ma loko pū hoʻi ʻoe o ia make hoʻokahi.

⁴¹ “A iā kāua, he pono ia; no ka mea, ua loaʻa iā kāua ka uku pono o kā kāua hana ʻana; akā ʻo ia nei, ʻaʻole ia i hana hewa iki.”

⁴² ʻŌlelo akula hoʻi ʻo ia iā Iesū, “E hoʻomanaʻo mai ʻoe iaʻu, e ka Haku, i ka wā e hiki ai ʻoe i kou aupuni!”

⁴³ ʻĪ maila hoʻi ʻo Iesū iā ia, “He ʻoiaʻiʻo kaʻu e ʻōlelo aku nei iā ʻoe, i kēia lā ʻo ʻoe pū kekahi me aʻu i loko o ka Paradaiso.”

⁴⁴ ¶ A i ke ono o ka hora, he pouli ma luna o ka honua a pau, a hiki i ka iwa o ka hora.

⁴⁵ Ua hoʻopouli ʻia hoʻi ka lā, a nahae ihola ma waenakonu ka pākū o ka luakini.

⁴⁶ A kāhea akula ʻo Iesū me ka leo nui, ʻī akula, “E ka Makua, «i loko o kou mau lima ke waiho aku nei au i koʻu ʻuhane».” A pau kāna ʻōlelo ʻana ia, make ihola ia.

⁴⁷ A ʻike ka luna haneri ia mea i hana ʻia ai, hoʻomaikaʻi akula ia i ke Akua, ʻī akula, “ʻOiaʻiʻo, he kanaka pono nō kēia.”

⁴⁸ ʻO ka poʻe kānaka hoʻi a pau i ʻākoakoa mai ma kēia mea i ʻike ʻia, a ʻike lākou i nā mea i hana ʻia, papaʻi ihola lākou ma ko lākou umauma iho, a hoʻi akula.

⁴⁹ Kū mamao akula hoʻi kona poʻe hoalauna a pau, a me nā wāhine i hahai iā ia mai Galilaia mai, e mākaʻikaʻi ana lākou ia mau mea.

⁵⁰ ¶ Aia hoʻi, he kanaka, ʻo Iosepa kona inoa, he kākāʻōlelo, he kanaka maikaʻi, he hoʻopono;

⁵¹ (ʻaʻole ʻo ia i ʻae pū aku ma ko lākou manaʻo, a me kā lākou hana;) no ʻArimataia, no ke kūlanakauhale o ka poʻe Iudaio ia, e kali ana nō ʻo ia i ke aupuni o ke Akua.

⁵² Hele akula ia i o Pilato lā, a noi akula i ke kino o Iesū.

⁵³ Kuʻu ihola nō hoʻi ʻo ia iā ia i lalo, wahī ihola iā ia i ka lole olonā, a waiho aʻela iā ia i loko o ka lua kupapaʻu i kālai ʻia i loko o ka pōhaku, ʻaʻole i waiho ʻē ʻia ke kanaka ma laila.

⁵⁴ ʻO ka lā ia e hoʻomākaukau ai, a e kokoke mai ana ka lā Sābati.

⁵⁵ A ʻo ka poʻe wāhine i hele pū me ia mai Galilaia mai, hahai akula lākou a ʻike i ka lua kupapaʻu, a me ka waiho ʻana o kona kino.

⁵⁶ Hoʻi maila lākou, a hoʻomākaukau i nā mea ʻala, a me ka hinu; a hoʻomaha ihola i ka lā Sābati, ma muli o ke kauoha.