KA ʻEUANELIO I KĀKAU ʻIA AI E LUKA 22 - Ka Baibala Hemolele

1 ʻŌhumu ʻia ʻo Iesū e make. 7 Ka Mōliaola. 19 Ka ʻAhaʻaina a ka Haku. 39 Pule Iesū ma ʻOliveta. 47 Kumakaia Iuda iā Iesū. 54 Hōʻole Petero iā ia. 63 Hōʻino ʻia Iesū.

MOKUNA XXII.

¹ ¶ A e kokoke mai ana ka ʻAhaʻaina Berena Hū ʻOle, i kapa ʻia ka Mōliaola.

² A ʻimi ihola nā kāhuna nui a me ka poʻe kākau ʻōlelo i mea e make ai ʻo ia iā lākou; no ka mea, ua hopohopo lākou i kānaka.

³ ¶ A laila komo ihola ʻo Sātana i loko o Iuda i kapa ʻia ʻo ʻIsekariota, ʻo ia kekahi o ka ʻumikumamālua.

⁴ A hele akula ia, a kūkā pū me nā kāhuna nui, a me nā luna kiaʻi, i mea e hāʻawi aku ai ʻo ia iā ia iā lākou.

⁵ A ʻoliʻoli ihola lākou, a ʻōlelo maila e hāʻawi i kālā iā ia.

⁶ Hōʻoia akula ʻo ia, a ʻimi akula e kumakaia iā ia i ka wā e kaʻawale aku ai ka ʻaha kanaka.

⁷ ¶ A hiki mai ka lā o ka ʻAhaʻaina Berena Hū ʻOle, ka lā e pono ai ke pepehi i ke keiki hipa Mōliaola.

⁸ Hoʻouna aʻela hoʻi ʻo ia iā Petero, a me Ioane, ʻī maila, “E hele ʻolua e hoʻomākaukau no kākou i ka Mōliaola e ʻai ai kākou.”

⁹ Nīnau akula lāua iā ia, “Ma hea lā i kou makemake e hoʻomākaukau ai māua?”

¹⁰ A haʻi maila ʻo ia iā lāua, “Aia hoʻi, i ko ʻolua komo ʻana i loko o ke kūlanakauhale, e hālāwai mai me ʻolua kekahi kanaka e hali ana i ke kīʻaha ʻoʻoma wai; e hahai ʻolua iā ia i loko o ka hale āna e komo ai.

¹¹ “A e ʻōlelo ʻolua i ka mea nona ka hale, ‘Ke nīnau nei ke Kumu iā ʻoe, “ʻAuhea ke keʻena ʻahaʻaina, kahi e ʻai ai au me kaʻu mau haumāna i ka Mōliaola?”’

¹² “A hōʻike mai nō ʻo ia iā ʻolua i ke keʻena nui ma luna i hoʻolakolako ʻia; ma laila ʻolua e hoʻomākaukau ai.”

¹³ Hele akula lāua, a ʻike akula e like me kāna ʻōlelo ʻana iā lāua; a hoʻomākaukau ihola lāua i ka Mōliaola.

¹⁴ ¶ A hiki mai ka hora, noho ihola ia e ʻai, a me ka poʻe lunaʻōlelo he ʻumikumamālua me ia.

¹⁵ A ʻōlelo maila ʻo ia iā lākou, “He nui ka makemake aʻu i makemake ai e ʻai pū me ʻoukou i kēia Mōliaola ma mua o koʻu make ʻana;

¹⁶ no ka mea, ke haʻi aku nei au iā ʻoukou, ʻaʻole au e ʻai hou aku ia, a hoʻokō ʻē ʻia mai ia i loko o ke aupuni o ke Akua.”

¹⁷ A laila, lālau ihola ʻo ia i ke kīʻaha, a hoʻomaikaʻi akula, ʻī maila, “E lawe ʻoukou i kēia, a e kaʻi like iā ʻoukou iho;

¹⁸ no ka mea, ke ʻōlelo aku nei au iā ʻoukou, ʻaʻole au e inu i ko ke kumu waina, a hiki ʻē mai ke aupuni o ke Akua.”

¹⁹ A laila lālau ihola ia i ka berena, hoʻomaikaʻi akula, a wāwahi ihola, a hāʻawi maila iā lākou, ʻī maila, “ʻO koʻu kino kēia i hāʻawi ʻia no ʻoukou; e hana hoʻi ʻoukou i kēia me ka hoʻomanaʻo mai iaʻu.”

²⁰ Pēlā nō hoʻi i ke kīʻaha, ma hope iho o ka ʻaina, ʻī maila, “ʻO kēia kīʻaha, ʻo ke kauoha hou ia i loko o koʻu koko i hoʻokahe ʻia no ʻoukou.

²¹ “Eia hoʻi ʻeā, ʻo ka lima o ka mea nāna au e kumakaia, eia pū me aʻu ma ka papa ʻaina.

²² “E hele ana nō hoʻi ke Keiki a ke Kanaka e like me ka mea i hoʻomaopopo ʻia ai; akā, e pōʻino kēlā kanaka nāna ia e kumakaia!”

²³ A laila ʻimi ihola lākou iā lākou iho i ko lākou mea nāna e hana ia mea.

²⁴ ¶ Ua hoʻopaʻapaʻa ʻē lākou iā lākou iho i ko lākou mea e manaʻo ʻia ana he poʻokela.

²⁵ A ʻōlelo maila ʻo ia iā lākou, “Ua hoʻoaliʻi nā aliʻi ʻo nā lāhui kanaka ma luna o lākou; a ʻo ka poʻe i hoʻokoʻikoʻi ma luna o lākou, ua kapa ʻia lākou ‘He poʻe hana lokomaikaʻi.’

²⁶ “Akā, mai mea ʻoukou pēlā; ʻo ke poʻokela naʻe i waena o ʻoukou, e like ia me ka mea ʻuʻuku; a ʻo ka luna, e like ia me ka mea lawelawe.

²⁷ “ʻO wai lā ka mea nui, ʻo ka mea e noho ana e ʻai, a ʻo ka mea lawelawe anei? ʻAʻole anei ʻo ka mea e noho ana e ʻai? Akā, ua like au me ka mea lawelawe i waena o ʻoukou.

²⁸ “ʻO ʻoukou ka poʻe i noho pū mai me aʻu i loko o koʻu pōpilikia ʻana.

²⁹ “A ke hāʻawi aku nei au iā ʻoukou i ke aupuni, me koʻu Makua i hāʻawi mai ai iaʻu.

³⁰ “E ʻai ʻoukou a e inu hoʻi ma kaʻu papa ʻaina i loko o koʻu aupuni, a e noho hoʻi ma nā noho aliʻi e hoʻopono ana i nā ʻohana he ʻumikumamālua a ʻIseraʻela.”

³¹ ¶ ʻŌlelo maila hoʻi ka Haku, “E Simona, e Simona, ʻeā, ua noi mai ʻo Sātana e loaʻa ʻoukou iā ia e kānana ʻo ia iā ʻoukou e like me ka huapalaoa;

³² akā, ua pule au nou i pau ʻole kou manaʻoʻiʻo; aia hoʻohuli ʻia mai ʻoe e hoʻoikaika ʻoe i kou poʻe hoahānau.”

³³ ʻĪ akula hoʻi ʻo ia iā ia, “E ka Haku, ua mākaukau wau e hele pū me ʻoe i ka hale paʻahao, a i ka make!”

³⁴ ʻĪ maila hoʻi ia, “Ke ʻōlelo aku nei au iā ʻoe, e Petero, ʻaʻole e kani ka moa i kēia lā ma mua o kou hōʻole ʻakolu ʻana i kou ʻike ʻana iaʻu.”

³⁵ ¶ A laila ʻōlelo maila ʻo ia iā lākou, “I ka wā i hoʻouna aku ai au iā ʻoukou me ka ʻaʻa kālā ʻole, a me ke kīʻeke ʻai ʻole, a me ke kāmaʻa ʻole, i nele anei ʻoukou i kekahi mea e pono ai?” Haʻi akula hoʻi lākou, “ʻAʻole.”

³⁶ A laila ʻōlelo maila ʻo ia iā lākou, “Akā ʻānō, ʻo ka mea ʻaʻa kālā, e lawe ia, a pēlā hoʻi i ke kīʻeke ʻai; a ʻo ka mea nele i ka pahi kaua, e kūʻai lilo aku i kona ʻaʻahu, a e kūʻai lilo mai i ka pahi kaua.

³⁷ “No ka mea, ke haʻi aku nei au iā ʻoukou, iaʻu nō e hoʻokō ʻia ai ka mea i palapala ʻia, ‘«Ua helu pū ʻia ʻo ia me ka poʻe hana hewa»’; no ka mea, e pau auaneʻi nā mea noʻu.

³⁸ ʻŌlelo akula hoʻi lākou, “E ka Haku, eia hoʻi, nā pahi kaua ʻelua.” ʻĪ maila ʻo ia iā lākou, “He nui ihola ia.”

³⁹ ¶ A laila puka ia i waho, a hele i ka mauna ʻo ʻOliveta, me kāna i hana mau ai; a hahai akula kāna mau haumāna iā ia.

⁴⁰ A hiki aku ia i laila, ʻī maila ʻo ia iā lākou, “E pule ʻoukou o lilo i ka hoʻowalewale ʻia.”

⁴¹ Mamao akula hoʻi ʻo ia mai o lākou aku, me he nou ʻana lā o ka pōhaku, a kukuli ihola i lalo, pule akula ia,

⁴² ʻī akula, “E ka Makua, inā e pono iā ʻoe, e lawe aku ʻoe i kēia kīʻaha mai oʻu aku nei; ʻaʻole hoʻi ʻo koʻu makemake; akā, ʻo kou nō ke hana ʻia.”

⁴³ A ʻike ʻia aʻela e ia ka ʻānela, mai ka lani mai, e hoʻoikaika ana iā ia.

⁴⁴ A ua puni ia i ka ʻeha nui, pule ikaika akula ia; a ua like hoʻi kona hou me nā kulu nui o ke koko e hāʻule ana i lalo i ka lepo.

⁴⁵ A kū aʻela ia mai ka pule ʻana, hoʻi maila ia i kāna mau haumāna, ʻike maila iā lākou e hiamoe ana no ke kaumaha;

⁴⁶ ʻī maila hoʻi ʻo ia iā lākou, “No ke aha lā ʻoukou e hiamoe nei? E ala aʻe i luna, e pule hoʻi ʻoukou, o lilo ʻoukou i ka hoʻowalewale ʻia.”

⁴⁷ ¶ A iā ia e ʻōlelo ana, aia hoʻi, ka lehulehu, a ʻo ka mea i kapa ʻia ʻo Iuda, ʻo kekahi o ka poʻe ʻumikumamālua, hele aʻe ia ma mua o lākou, a hoʻokokoke nō ia i o Iesū lā e honi iā ia.

⁴⁸ Nīnau maila hoʻi ʻo Iesū iā ia, “E Iuda, ke kumakaia nei anei ʻoe i ke Keiki a ke Kanaka me ka honi?”

⁴⁹ A ʻike ihola ka poʻe me ia i ka mea e hana ʻia ana, nīnau akula lākou iā ia, “E ka Haku, e hahau anei mākou me ka pahi kaua?”

⁵⁰ A hahau ihola kekahi o lākou i ke kauā a ke kahuna nui, a ʻoki aʻela i kona pepeiao ʻākau.

⁵¹ A laila ʻōlelo maila ʻo Iesū, ʻī maila, “Uoki pēlā!” A hoʻopā aʻela ʻo ia i kona pepeiao, hoʻōla ihola iā ia.

⁵² A laila ʻōlelo maila Iesū i ka poʻe i kiʻi aku iā ia, i nā kāhuna nui, a me nā luna o ka luakini, a me nā lunakahiko, “Ua hele mai anei ʻoukou ma waho me nā pahi kaua, a me nā newa, e like me ka hahai ʻana i ka pōā?

⁵³ ”I koʻu noho ʻana me ʻoukou i kēlā lā, a i kēia lā, i loko o ka luakini, ʻaʻole i lālau mai ko ʻoukou mau lima iaʻu. Akā, ʻo ko ʻoukou hora kēia, a me ka mana o ka pouli.”

⁵⁴ ¶ A laila lālau aʻela lākou iā ia, kaʻi akula, a alakō iā ia i loko o ka hale o ke kahuna nui; a hahai kaʻawale akula ʻo Petero ma hope.

⁵⁵ A hoʻā ihola lākou i ke ahi ma waenakonu o ka pā hale, noho nui ihola lākou i lalo, noho pū ihola ʻo Petero i waena o lākou.

⁵⁶ A ʻike aʻela kekahi kaikamahine iā ia e noho ana ma ke ahi, a haka pono iā ia, ʻī aʻela ia, “ʻO ia nei nō kekahi me ia.”

⁵⁷ A hōʻole akula ʻo ia iā Iesū, ʻī akula, “E ka wahine, ʻaʻole au i ʻike iā ia.”

⁵⁸ A liʻuliʻu iki aʻela, ʻike maila kekahi mea ʻē iā ia, ʻī maila ia, “ʻO ʻoe nō kekahi o lākou!” ʻĪ akula Petero, “E ke kanaka, ʻaʻole au!”

⁵⁹ A hoʻokahi paha hora ma ia hope iho, hōʻoiaʻiʻo aʻela kekahi, ʻī aʻela, “ʻOiaʻiʻo, ʻo ia nei nō hoʻi kekahi me ia; no ka mea, no Galilaia ia nei.”

⁶⁰ ʻŌlelo akula hoʻi ʻo Petero, “E ke kanaka, ʻaʻole au i ʻike i kāu i ʻōlelo mai nei.” A i kāna ʻōlelo ʻana, kani koke ihola ka moa.

⁶¹ Hāliu maila nō hoʻi ka Haku, nānā maila iā Petero; a hoʻomanaʻo ihola ʻo Petero i ka ʻōlelo a ka Haku i ʻōlelo mai ai iā ia, “Ma mua o ke kani ʻana o ka moa, ʻakolu ou hōʻole ʻana mai iaʻu.”

⁶² A hele akula ʻo Petero i waho, uē mihi nui ihola ia.

⁶³ ¶ ʻO ka poʻe kānaka hoʻi e paʻa ana iā Iesū, hoʻomāʻewaʻewa akula lākou iā ia, me ka pepehi iā ia.

⁶⁴ A pani aʻela lākou i kona mau maka, pepehi akula ma kona wahi maka, a nīnau akula iā ia, ʻī akula, “E koho ʻoe, na wai ʻoe i pepehi?”

⁶⁵ He nui nō hoʻi nā ʻōlelo ʻē aʻe a lākou i hōʻino aku ai iā ia.

⁶⁶ ¶ A ao aʻela, ʻākoakoa koke maila ka poʻe lunakahiko o kānaka, a me nā kāhuna nui, a me ka poʻe kākau ʻōlelo, a lawe aʻela lākou iā ia i loko o ko lākou ʻaha luna kānāwai, ʻī akula,

⁶⁷ “ʻO ʻoe anei ka Mesia? E haʻi mai iā mākou.” ʻĪ maila hoʻi ʻo ia iā lākou, “Inā e haʻi aku au iā ʻoukou, ʻaʻole nō ʻoukou e manaʻoʻiʻo mai.

⁶⁸ “A inā e nīnau aku au iā ʻoukou, ʻaʻole ʻoukou e haʻi mai iaʻu, ʻaʻole hoʻi e hoʻokuʻu iaʻu.

⁶⁹ “Ma hope aku nei hoʻi, «e noho nō ke Keiki a ke Kanaka ma ka lima ʻākau» o ka mana o «ke Akua».”

⁷⁰ Nīnau akula lākou a pau, “ʻO ʻoe nō anei ke Keiki a ke Akua?” Haʻi maila hoʻi ʻo ia. “ʻO wau nō ʻo kā ʻoukou e ʻōlelo nei.”

⁷¹ ʻĪ aʻela nō hoʻi lākou, “He aha kā kākou hemahema e pono ai ka mea hou e maopopo ai? No ka mea, ua lohe kākou no loko mai o kona waha ponoʻī.”