KA ʻEUANELIO I KĀKAU ʻIA AI E LUKA 20 - Ka Baibala Hemolele

1 Ko Iesū pono e aʻo mai. 9 ʻO ka māla waina. 19 No ka hoʻokupu iā Kaisara. 27 No ke ala hou ʻana. 41 Iesū ke keiki a Dāvida. 45 Ka hewa o nā kākau ʻōlelo.

MOKUNA XX.

¹ ¶ Eia hoʻi kekahi, i kekahi o ia mau lā, i kāna aʻo ʻana i kānaka i loko o ka luakini me ka haʻi mai i ka ʻeuanelio, kau aʻela nā kāhuna nui, a me ka poʻe kākau ʻōlelo, a me nā lunakahiko;

² ʻōlelo akula lākou iā ia, ʻī akula, “E haʻi mai ʻoe iā mākou, ma ka mana hea i hana ai ʻoe i kēia mau mea? Na wai hoʻi ia mana i hāʻawi iā ʻoe?”

³ ʻŌlelo maila ʻo ia, ʻī maila iā lākou, “Hoʻokahi aʻu mea hoʻi e nīnau aku ai iā ʻoukou, e haʻi mai hoʻi ʻoukou iaʻu.

⁴ “ʻO ka bapetizo ʻana o Ioane, no ka lani mai anei ia, no nā kānaka anei?”

⁵ A kūkākūkā lākou lākou iho, ʻī ihola, “Inā e ʻōlelo aku kākou, ‘No ka lani;’ e nīnau mai nō ia, ‘No ke aha lā hoʻi i manaʻoʻiʻo ʻole ai ʻoukou iā ia?’

⁶ “A inā e ʻōlelo kākou, ‘No nā kānaka;’ e hailuku mai kānaka a pau iā kākou; no ka mea, i ko lākou manaʻo he kāula ʻo Ioane.”

⁷ A ʻōlelo akula lākou, ʻaʻole lākou i ʻike i kahi no laila mai ia.

⁸ ʻĪ maila hoʻi ʻo Iesū iā lākou, “ʻAʻole hoʻi au e haʻi aku iā ʻoukou, i ka mana aʻu i hana aku ai i kēia mau mea.”

⁹ ¶ A laila ʻōlelo mai ʻo ia i kānaka i kēia ʻōlelo nane: “Kanu ihola kekahi kanaka i ka māla waina, a waiho aku ia i nā hoaʻāina, a hele akula a liʻuliʻu loa ma ka ʻāina ʻē.

¹⁰ “A i ka manawa pono, hoʻouna maila ia i kahi kauā i ka poʻe hoaʻāina i hāʻawi lākou iā ia i ka hua o ka māla waina; a pepehi ihola nā hoaʻāina iā ia, a hoʻihoʻi nele akula iā ia.

¹¹ “A laila hoʻouna hou maila ʻo ia i kekahi kauā; a pepehi hou lākou iā ia, a hoʻomāinoino, a hoʻihoʻi nele akula iā ia.

¹² “A ma hope iho, hoʻouna hou maila ʻo ia i ke kolu; a hana ʻeha akula lākou iā ia, a kipaku akula.

¹³ “A laila ʻī ihola ka haku o ka māla waina, ‘Pehea lā wau e hana ai? E hoʻouna aku au i kaʻu keiki punahele, aia ʻike lākou iā ia, e manaʻo mahalo mai paha lākou iā ia.’

¹⁴ “A ʻike ua poʻe hoaʻāina lā iā ia, kamaʻilio ihola lākou iā lākou iho, ʻī ihola, ‘Eia ka hoʻoilina; inā hoʻi! E pepehi kākou iā ia a make, i lilo ʻiʻo mai ka ʻāina iā kākou.’

¹⁵ “A kipaku akula lākou iā ia ma waho o ka māla waina, pepehi ihola a make. He aha lā hoʻi kā ka haku nona ka māla waina e hana mai ai iā lākou?

¹⁶ “E hele mai nō ia a luku mai ia poʻe hoaʻāina, a e hāʻawi aku i ka māla waina i kekahi poʻe ʻē.” ʻŌlelo ihola ka poʻe e hoʻolohe ana, “ʻAʻole loa ia!”

¹⁷ A nānā maila ʻo ia iā lākou, ʻī maila, “He aha hoʻi ke ʻano o kēia i palapala ʻia: ‘«ʻO ka pōhaku a ka poʻe hana hale i haʻalele ai, ʻO ia ke hoʻolilo ʻia i pōhaku kumu no ke kihi»’?

¹⁸ “ʻO ka mea e hāʻule ma luna iho o ua pōhaku lā, e haʻihaʻi ʻia ʻo ia, a ʻo ka mea e hiolo ʻia ai e ia, e pēpē loa nō ia.”

¹⁹ ¶ A ʻimi ihola ka poʻe kāhuna nui, a me ka poʻe kākau ʻōlelo e kau nā lima ma luna ona ia manawa; akā, ua makaʻu lākou i kānaka; no ka mea, ua ʻike lākou, ua ʻōlelo mai ʻo ia i kēia ʻōlelo nane no lākou.

²⁰ A kiaʻi akula lākou iā ia, a hoʻouna aʻela i nā kiu e hoʻokamani iā lākou iho he mau kānaka pono; e hoʻohihia iā ia i kāna ʻōlelo, e hāʻawi aku lākou iā ia i ka lima a me ka mana o ke kiaʻāina.

²¹ A nīnau aku lākou iā ia, ʻī akula, “E ke Kumu, ua ʻike mākou he pololei kāu ʻōlelo ʻana a me kāu aʻo ʻana, ʻaʻole ʻoe i manaʻo iā waho; akā, ua hōʻike ʻoe i ka ʻaoʻao o ke Akua me ka ʻoiaʻiʻo.

²² “He pono anei ke hoʻokupu mākou iā Kaisara, ʻaʻole anei?”

²³ ʻIke nō hoʻi ʻo ia i ko lākou maʻalea, ʻī maila iā lākou, “No ke aha lā ʻoukou i hoʻohuahualau mai nei iaʻu?

²⁴ “E hōʻike mai ʻoukou iaʻu i kahi denari; no wai kona kiʻi a me ka palapala?” Haʻi akula lākou, ʻī akula hoʻi, “No Kaisara.”

²⁵ ʻĪ maila ʻo ia iā lākou, “E hāʻawi aku hoʻi i kā Kaisara iā Kaisara, a i kā ke Akua i ke Akua.”

²⁶ ʻAʻole e hiki iā lākou ke hoʻohihia iā ia ma kāna ʻōlelo i mua o ke alo o kānaka: a hakanū ihola lākou me ka mahalo i ka ʻōlelo āna i haʻi mai ai.

²⁷ ¶ A laila hele aʻela kekahi o ka poʻe Sadukaio, ka poʻe i hōʻole i ke ala hou ʻana: nīnau akula lākou iā ia;

²⁸ ʻī akula, “E ke Kumu, ua palapala mai ʻo Mose iā mākou, «ʻo ka mea ua make kona kaikuaʻana» ka mea wahine, «a i make keiki ʻole, e mare aku kona kaikaina i kāna wahine, a e hoʻohānau keiki na kona kaikuaʻana».

²⁹ “ʻEhiku nō hoahānau kāne; a mare akula ka mua i ka wahine, a make keiki ʻole ia.

³⁰ “A mare ihola kona hope mai i ua wahine lā, a make keiki ʻole nō hoʻi ia.

³¹ “A ʻo ke kolu hoʻi, ua mare akula ʻo ia iā ia, a pēlā nō hoʻi lākou a ʻehiku; make ihola lākou, ʻaʻole a lākou keiki.

³² “A ma hope o lākou a pau, make ihola nō hoʻi ua wahine lā.

³³ “A i ke ala hou ʻana, ʻo wai lā ka mea o lākou iā ia ka wahine? No ka mea, ua mare lākou a ʻehiku iā ia.”

³⁴ Haʻi maila Iesū, ʻī maila iā lākou, “ʻO ko ke ao nei, ua mare lākou, a ua hoʻopalau ʻia nō hoʻi;

³⁵ akā, ʻo ka poʻe e pono ke loaʻa pū iā lākou kēlā ao aku me ka hoʻāla hou ʻia mai mai waena mai o ka poʻe make, ʻaʻole o lākou e mare, ʻaʻole nō hoʻi e hoʻopalau ʻia.

³⁶ “No ka mea, ʻaʻole e hiki iā lākou ke make hou; no ka mea, e like nō lākou me ka poʻe ʻānela; he poʻe keiki hoʻi lākou na ke Akua, nā keiki hoʻi o ke ala hou ʻana.

³⁷ “A no ka hoʻāla hou ʻana o ka poʻe i make, ua hōʻike mai ʻo Mose ma ka lāʻau i kona kapa ʻana i ka Haku, «ke Akua no ʻAberahama, ke Akua no ʻIsaʻaka, ke Akua no Iakoba».

³⁸ “ʻAʻole hoʻi ia he Akua no ka poʻe make; akā, no ka poʻe ola; no ka mea, e ola ana lākou a pau iā ia.”

³⁹ A laila ʻōlelo akula kekahi poʻe kākau ʻōlelo, ʻī akula, “E ke Kumu, ua pono kāu ʻōlelo ʻana.”

⁴⁰ ʻAʻole hoʻi o lākou i ʻaʻa e nīnau hou aku iā ia.

⁴¹ ¶ A ʻī maila ʻo ia iā lākou, “Pehea lā hoʻi lākou i ʻōlelo ai, He keiki ka Mesia na Dāvida?

⁴² “A ʻo Dāvida kekahi i ʻōlelo mai ma ka Buke Halelū, ‘«ʻĪ maila ʻo Iēhova i kuʻu Haku, “E noho ʻoe ma koʻu lima ʻākau,

⁴³ A hoʻolilo iho au i kou poʻe ʻenemi i paepae no kou mau wāwae».”’

⁴⁴ “No laila, inā pēlā ʻo Dāvida i kapa ai iā ia i ‘Haku,’ pehea lā hoʻi ia e keiki ai nāna?”

⁴⁵ ¶ A i ka hoʻolohe ʻana o ka poʻe kānaka, ʻōlelo maila ʻo ia i kāna poʻe haumāna,

⁴⁶ “E mālama iā ʻoukou iho i ka poʻe kākau ʻōlelo, ka poʻe i makemake e hele me ka lole hoʻoluʻeluʻe, a me ke aloha ʻia mai ma kahi kānaka, a me nā noho kiʻekiʻe ma loko o nā hale hālāwai, a me nā wahi maikaʻi loa i nā ʻahaʻaina;

⁴⁷ ka poʻe i hoʻopau i nā hale o nā wāhine kāne make, a hoʻolōʻihi hoʻi i ka pule i ʻike ʻia mai ai; e nui auaneʻi hoʻi ko lākou make.”