KA ʻEUANELIO I KĀKAU ʻIA AI E LUKA 2 - Ka Baibala Hemolele

1 ʻO ka ʻauhau ʻana o ko Roma aupuni. 6 ʻO ka hānau ʻana o Iesū. 13 Ka hoʻoleʻa ʻana o nā ʻānela, 25 a me Simeona, 36 a me ʻAna. 41 ʻO kā Iesū ʻōlelo ʻana i nā kumu.

MOKUNA II.

¹ ¶ Eia kekahi mea ia mau lā, hoʻolaha ʻia aʻela ke kauoha a Kaisara ʻAugusato, e kākau ʻia i ka palapala ko ke aupuni a pau.

² I ke aliʻi kiaʻāina ʻana o Kurenio ma Suria, ka hoʻomaka ʻana o kēia kākau mua ʻana.

³ Pau nō i ka hele i kākau ʻia ai i ka palapala o kēlā mea kēia mea i kona kūlanakauhale iho.

⁴ ʻO Iosepa kekahi i piʻi aʻe, mai Galilaia aʻe, mai loko mai o Nazareta ke kūlanakauhale a hiki i Iudea, i ko Dāvida kūlanakauhale i kapa ʻia ʻo Betelehema; (no ka mea, no ka hale ia a me ka ʻohana a Dāvida,)

⁵ i kākau ʻia ai me Maria ka wahine i hoʻopalau ʻia nāna, e kōkō ana.

⁶ A ʻoiai lāua ma laila, hiki kona manawa e hānau ai.

⁷ Hānau ihola ʻo ia i kāna makahiapo kāne; wahī ihola iā ia i ke kapa keiki, a hoʻomoe ihola iā ia ma kahi hānai holoholona; no ka mea, ʻaʻole wahi kaʻawale no lākou ma loko o ka hale hoʻokipa.

⁸ ¶ Aia i kēlā ʻāina he mau kahu hipa e noho ana i ke kula, a e kiaʻi ana i kā lākou mau poʻe hipa i ka pō.

⁹ Aia hoʻi! Kau maila ka ʻānela o ka Haku i o lākou lā, a hoʻomālamalama maila ka nani o ka Haku iā lākou a puni, a makaʻu loa ihola lākou.

¹⁰ A ʻōlelo maila ka ʻānela iā lākou, “Mai makaʻu ʻoukou; no ka mea, eia hoʻi, ke haʻi aku nei au iā ʻoukou i ka mea maikaʻi, e ʻoliʻoli nui ai e lilo ana no nā kānaka a pau.

¹¹ “No ka mea, i kēia lā i hānau ai, ma ke kūlanakauhale o Dāvida, he Ola no ʻoukou, ʻo ia ka Mesia ka Haku.

¹² “Eia hoʻi ka hōʻailona no ʻoukou, e loaʻa auaneʻi iā ʻoukou ke keiki ua wahī ʻia i ke kapa keiki, e moe ana ma kahi hānai holoholona.”

¹³ A ʻemo ʻole maila ka lehulehu o ka pūʻali o ka lani me ua ʻānela lā, e hoʻoleʻa ana i ke Akua, e ʻōlelo ana,

¹⁴ “E hoʻonani ʻia ke Akua ma nā lani kiʻekiʻe loa, A he malu hoʻi ma ka honua; he aloha nō i kānaka.”

¹⁵ Eia hoʻi kekahi, a hoʻi akula nā ʻānela i ka lani, mai o lākou aku, ʻōlelo ihola ua mau kānaka kiaʻi hipa lā kekahi i kekahi, “ʻEā, e haele kākou i Betelehema e ʻike aku hoʻi ia mea a ka Haku i hōʻike mai nei iā kākou.”

¹⁶ Haele wikiwiki lākou, a ʻike ihola iā Maria, a me Iosepa, a me ke keiki, e moe ana ia ma kahi hānai holoholona.

¹⁷ A ʻike lākou, hoʻolaha akula lākou i ka ʻōlelo i haʻi ʻia mai iā lākou no ia Keiki.

¹⁸ A ʻo ka poʻe i lohe a pau, mahalo ihola lākou no nā mea i haʻi ʻia aku iā lākou e ka poʻe kahu hipa.

¹⁹ Kāohi ihola ʻo Maria ia mau mea a pau me ka hoʻomanaʻo iho i loko o kona naʻau.

²⁰ A hoʻi maila nā kahu hipa, me ka hoʻonani a me ka hoʻoleʻa i ke Akua no ia mau mea a pau a lākou i lohe ai a i ʻike ai hoʻi, e like me ka mea i haʻi ʻia mai iā lākou.

²¹ ¶ A hala nā lā ʻewalu i ʻoki poepoe ʻia ai ua keiki lā, kapa ʻia kona inoa ʻo Iesū, ʻo kā ka ʻānela hoʻi i kapa ai ma mua i kona hāpai ʻia i loko o ka ʻōpū.

²² ¶ A pau nā lā o ko lāua hoʻomaʻemaʻe ʻana ma muli o ke kānāwai o Mose, lawe aʻela lākou ia keiki i Ierusalema e hāʻawi iā ia i ka Haku,

²³ (e like me ka mea i kākau ʻia ma ke Kānāwai o ka Haku, “«ʻO kēlā» makahiapo «kāne, kēia» makahiapo «kāne, e ʻī ʻia aʻe he laʻa no Iēhova»”),

²⁴ a e hāʻawi hoʻi i ka mōhai i kauoha ʻia mai ma ke Kānāwai o Iēhova, “«He mau kuhukukū ʻelua, a i ʻole ia, ʻelua manu nūnū ʻōpiopio».”

²⁵ Aia hoʻi, ma Ierusalema kekahi kanaka, ʻo Simeona kona inoa; a he kanaka pono ia, he haipule, e kali ana i ka mea nāna e kōkua i kā ʻIseraʻela; aia ma luna ona ka ʻUhane Hemolele.

²⁶ A ua hōʻike ʻē ʻia mai iā ia e ka ʻUhane Hemolele, ʻaʻole ia e make ʻē, a ʻike aku ia i ka Mesia a ka Haku.

²⁷ A hele aʻela hoʻi ia ma muli o ka ʻUhane i loko o ka luakini; a lawe aʻela nā mākua i ke keiki iā Iesū i loko, e hana aku ai nona ma muli o ka ʻoihana o ke Kānāwai;

²⁸ a laila lawe ʻo ia iā ia ma kona mau lima, a hoʻomaikaʻi akula i ke Akua, ʻī akula hoʻi,

²⁹ “ʻĀnō, e ka Haku, ke kuʻu nei ʻoe i kāu kauā nei me ka pōmaikaʻi E like me kāu ʻōlelo.

³⁰ “No ka mea, ua ʻike iho nei koʻu mau maka i kāu hoʻōla,

³¹ Ka mea āu i hoʻomākaukau ai i mua o ke alo o nā kānaka a pau;

³² «He mālamalama e hoʻomālamalama ai i nā lāhui kanaka», A he nani nō kou poʻe kānaka kā ʻIseraʻela.”

³³ Mahalo ihola ʻo Iosepa a me kona makuahine ia mau mea i ʻōlelo ʻia mai ai nona.

³⁴ A hoʻomaikaʻi maila ʻo Simeona iā lāua, ʻī maila hoʻi ʻo ia iā Maria i kona makuahine, “Eia hoʻi, ua hoʻonohonoho ʻia mai ʻo ia nei i mea e hāʻule ai, a e ala hou ai nā mea he nui i waena o kā ʻIseraʻela, a i hōʻailona hoʻi e hōʻino ʻia ai;

³⁵ (a e hou ʻia nō hoʻi kou ʻuhane e ka pahi kaua;) i hōʻike ʻia ai nā manaʻo o nā naʻau he lehulehu.”

³⁶ Ma laila hoʻi kekahi kāula wahine, ʻo ʻAna, ke kaikamahine a Panuʻela, na ka ʻohana a ʻAsera; he kahiko nō ia, a ʻehiku makahiki ona i noho pū ai me ke kāne, mai kona wā puʻupaʻa mai.

³⁷ A he wahine kāne make ia, he kanawalukumamāhā makahiki ona, ʻaʻole hoʻi ia i haʻalele i ka luakini; akā, ua mālama mau ʻo ia i ke Akua me ka hoʻopōloli a me ka pule, i ka pō a me ke ao.

³⁸ A komo maila ʻo ia ia manawa, hoʻomaikaʻi akula i ka Haku, a ʻōlelo maila ia no ua Keiki lā i ka poʻe a pau e kali ana i ke ola ma Ierusalema.

³⁹ ¶ A pau aʻela i ka hana ʻia nā mea i kauoha ʻia ma ke Kānāwai o ka Haku, hoʻi aʻela lākou i Galilaia, i ko lākou kūlanakauhale i Nazareta.

⁴⁰ A nui aʻela ua Keiki lā, a ikaika aʻela hoʻi kona manaʻo, a piha i ka naʻauao, a ma luna ona ke aloha o ke Akua.

⁴¹ ¶ Hele nā mākua ona i Ierusalema i kēlā makahiki i kēia makahiki i ka ʻAhaʻaina Mōliaola.

⁴² A i ka ʻumikumamālua o kona mau makahiki, piʻi aʻela lākou i Ierusalema ma muli o ka ʻoihana o ka ʻAhaʻaina.

⁴³ A pau ia mau lā, hoʻi aʻela lāua, noho ihola ke keiki ʻo Iesū, ma Ierusalema, ʻaʻole hoʻi i ʻike ʻo Iosepa a me kona makuahine.

⁴⁴ Manaʻo nō lāua, aia nō ia ma loko o ka huakaʻi, hele nō lāua i ko kekahi lā hele ʻana; a ʻimi ihola lāua iā ia ma waena o nā hoahānau a me nā hoalauna.

⁴⁵ ʻAʻole ʻo ia i loaʻa iā lāua, hoʻi hou aʻela lāua i Ierusalema, e ʻimi ana iā ia.

⁴⁶ Eia kekahi, a hala nā lā ʻekolu, ʻike akula lāua iā ia i loko o ka luakini e noho ana ma waena o ka poʻe kumu, e hoʻolohe ana iā lākou, a e nīnau ana hoʻi iā lākou.

⁴⁷ A ʻo ka poʻe a pau i lohe iā ia, mahalo ihola i kona naʻauao a me kāna ʻōlelo ʻana.

⁴⁸ A ʻike lāua iā ia, pīhoihoi ihola; a ʻī akula kona makuahine iā ia, “E kaʻu keiki, no ke aha lā ʻoe i hana mai ai pēlā iā māua? ʻEā, ua ʻimi aʻe nei māua me kou makua kāne iā ʻoe, me ke kaumaha.”

⁴⁹ ʻĪ maila kēlā iā lāua, “No ke aha lā ʻolua i ʻimi mai nei iaʻu? ʻAʻole anei ʻolua i manaʻo he pono noʻu e lilo ma kā koʻu Makua?”

⁵⁰ ʻAʻole lāua i ʻike i ke ʻano o kāna mea i ʻōlelo mai ai iā lāua.

⁵¹ A iho aʻela ia me lāua a hiki i Nazareta, a noho ia ma lalo iho o lāua; a mālama ihola kona makuahine ia mau mea a pau ma kona naʻau.

⁵² ¶ A nui aʻela ka naʻauao, a me ke kino o Iesū, a me ke aloha ʻia e ke Akua a me nā kānaka.