KA ʻEUANELIO I KĀKAU ʻIA AI E LUKA 18 - Ka Baibala Hemolele

1 No ka pule mau. 9 Ka Parisaio a me ka luna ʻauhau. 15 Nā kamaliʻi i lawe ʻia iā Kristo. 18 Kahi aliʻi waiwai. 28 Pōmaikaʻi ka poʻe hahai iā Iesū. 31 No kona make. 35 Batimea.

MOKUNA XVIII.

¹ ¶ A laila aʻo maila ʻo ia iā lākou ma ka ʻōlelo nane, he pono ke pule mau, ʻaʻole e hoʻonāwaliwali.

² ʻĪ maila ia, “Ma kekahi kūlanakauhale he luna kānāwai, ʻaʻole ia i makaʻu i ke Akua, ʻaʻole hoʻi i manaʻo i kānaka.

³ “A ma kēlā kūlanakauhale kekahi wahine kāne make; a hele maila ia i ona lā, ʻī maila, ‘E hoʻopono mai ʻoe iaʻu i koʻu ʻenemi.’

⁴ “ʻAʻole aʻela hoʻi ia i makemake ia manawa; a ma hope iho, ʻī ihola ʻo ia i loko ona, ‘ʻAʻole oʻu makaʻu i ke Akua, ʻaʻole oʻu manaʻo i kānaka;

⁵ akā hoʻi, no ke noi nui ʻana mai o kēia wahine kāne make iaʻu, e hoʻopono aku au iā ia nei, o hoʻoluhi mai ia iaʻu i kona hele pinepine ʻana mai.’”

⁶ ʻĪ maila hoʻi ka Haku, “E lohe ʻoukou i ka mea a ka luna kānāwai pono ʻole i ʻōlelo mai ai.

⁷ “A ʻo ke Akua hoʻi, ʻaʻole anei ia e hoʻopono mai i kona poʻe i wae ʻia, ka poʻe kāhea iā ia i ke ao a me ka pō, me ke ahonui hoʻi iā lākou?

⁸ “Ke haʻi aku nei au iā ʻoukou, e hoʻopono koke mai nō ʻo ia iā lākou. Akā hoʻi, i ka hiki ʻana mai o ke Keiki a ke Kanaka, e ʻike anei ʻo ia ma ka honua ia manaʻoʻiʻo?”

⁹ ¶ A laila ʻōlelo maila ʻo ia i kēia ʻōlelo nane i kekahi poʻe i manaʻo iā lākou iho he maikaʻi, a hoʻowahāwahā aku iā haʻi.

¹⁰ “Hele aʻela nā kānaka ʻelua i ka luakini e pule; he Parisaio kekahi, a he luna ʻauhau kekahi.

¹¹ “Kū akula ka Parisaio ʻo ia iho nō, a pule akula penei, ‘E ke Akua, ke aloha aku nei au iā ʻoe; no ka mea, ʻaʻole au e like me nā kānaka ʻē: ka poʻe hoʻokaha, ka poʻe pono ʻole, ka poʻe moekolohe, ʻaʻole hoʻi me kēia luna ʻauhau.

¹² ‘ʻElua koʻu hoʻokē ʻai ʻana i ka hebedoma hoʻokahi, ua hāʻawi hoʻi au i ka hapaʻumi o koʻu waiwai a pau.’

¹³ “A ʻo ka luna ʻauhau hoʻi, kū mamao akula ia, ʻaʻole hoʻi i leha iki kona mau maka i ka lani; akā, papaʻi ihola ia ma kona umauma iho, ʻī akula, ‘E ke Akua, e aloha mai ʻoe iaʻu i ka mea i hewa!’

¹⁴ “Ke haʻi aku nei au iā ʻoukou, ʻo ia ka mea i iho i kona hale me ka hoʻāpono ʻia, ʻaʻole kēlā; no ka mea, ʻo ka mea i hoʻokiʻekiʻe aʻe iā ia iho, ʻo ia ke hoʻohaʻahaʻa ʻia; a ʻo ka mea i hoʻohaʻahaʻa iā ia iho, ʻo ia ke hoʻokiʻekiʻe ʻia aʻe.”

¹⁵ ¶ A laila lawe aʻela lākou i nā kamaliʻi ʻuʻuku iā ia e hoʻopā ʻo ia iā lākou; a ʻike ka poʻe haumāna, pāpā akula lākou iā lākou lā.

¹⁶ Akā, kāhea maila Iesū iā lākou e hele mai, ʻī maila, “E ʻae aku i nā kamaliʻi e hele mai i oʻu nei, mai hōʻole aku iā lākou; no ka mea, no ka poʻe me nēia ke aupuni o ke Akua.

¹⁷ “He ʻoiaʻiʻo kaʻu e ʻōlelo aku nei iā ʻoukou, ʻo ka mea ʻaʻole i hoʻolauna i ke aupuni o ke Akua me he keiki ʻuʻuku lā, ʻaʻole loa ʻo ia e komo i laila.”

¹⁸ ¶ A laila nīnau akula kekahi aliʻi iā ia, “E ke Kumu maikaʻi, he aha kaʻu e hana ai i loaʻa mai ai iaʻu ke ola pau ʻole?”

¹⁹ A ʻī maila ʻo Iesū iā ia, “No ke aha lā ʻoe i kapa mai ai iaʻu he maikaʻi? Hoʻokahi wale nō mea maikaʻi, ʻo ke Akua.

²⁰ “Ua ʻike hoʻi ʻoe i nā kānāwai, ‘«Mai moekolohe ʻoe; Mai pepehi kanaka ʻoe; Mai ʻaihue ʻoe; Mai hōʻike wahaheʻe ʻoe; E mālama i kou makua kāne a me kou makuahine».’”

²¹ A ʻī akula ʻo ia, “Ua mālama au i kēia mau mea a pau mai kuʻu wā kamaliʻi mai.”

²² A lohe aʻela ʻo Iesū ia, ʻī maila ʻo ia iā ia, “Hoʻokahi āu mea hemahema; e kūʻai lilo aku i kou waiwai a pau, a e hāʻawi i ka poʻe ʻilihune, a e loaʻa iā ʻoe ka waiwai ma ka lani; a laila e hele mai a hahai mai iaʻu.”

²³ A lohe aʻela ʻo ia ia mea, minamina loa ihola ia; no ka mea, he nui loa kona waiwai.

²⁴ ʻIke aʻela hoʻi Iesū i kona minamina loa ʻana, ʻī maila ia, “ʻAne hiki ʻole i ka poʻe waiwai ke komo i loko o ke aupuni o ke Akua!

²⁵ “E hiki i ke kāmelo ke komo ʻē i ka puka o ke kui kele ma mua o ke komo ʻana o ke kanaka waiwai i loko o ke aupuni o ke Akua.”

²⁶ ʻĪ ihola hoʻi ka poʻe e lohe ana, “E hiki hoʻi iā wai lā ke hoʻōla ʻia?”

²⁷ ʻĪ maila hoʻi Iesū, “ʻO nā mea hiki ʻole i kānaka, e hiki nō ia i ke Akua.”

²⁸ A laila ʻī akula ʻo Petero, “Eia hoʻi, ua haʻalele mākou i nā mea a pau, a ua hahai aku iā ʻoe.”

²⁹ ʻĪ maila hoʻi ʻo ia iā lākou, “He ʻoiaʻiʻo kaʻu e ʻōlelo aku nei iā ʻoukou, ʻo ka mea i haʻalele i ka hale, a me nā mākua, a me nā hoahānau, a me ka wahine, a me nā keiki no ke aupuni o ke Akua,

³⁰ e loaʻa hou nō iā ia he nui wale i kēia ao, a me ke ola pau ʻole i kēlā ao aku.”

³¹ ¶ A lawe aʻela ʻo ia i ka ʻumikumamālua, ʻī maila iā lākou, “Eia hoʻi, e piʻi ana kākou i Ierusalema, a e hoʻokō ʻia nā mea a pau i kākau ʻia e ka poʻe kāula no ke Keiki a ke Kanaka.

³² “No ka mea, e hāʻawi ʻia aku ʻo ia i kānaka ʻē, a e hoʻomāʻewaʻewa ʻia mai, a e hoʻomaʻau ʻia mai, a e kuha ʻia mai hoʻi;

³³ a e hahau mai lākou iā ia, a e pepehi mai iā ia a make; a i ke kolu o ka lā, e ala hou mai ia.”

³⁴ Akā, ʻaʻole lākou i hoʻomaopopo ia mau mea; ua hūnā ʻia hoʻi iā lākou kēia ʻōlelo, ʻaʻole lākou i ʻike i ke ʻano o nā mea i ʻōlelo ʻia mai.

³⁵ ¶ Eia kekahi, i kona hoʻokokoke ʻana i Ieriko, e noho ana kekahi makapō ma kapa alanui e nonoi ana.

³⁶ A lohe aʻela i ka ʻaha kanaka e hele aʻe ana, nīnau maila ia i ke ʻano o ia mea.

³⁷ Haʻi akula nō hoʻi lākou iā ia, e māʻalo ana aʻe ʻo Iesū no Nazareta.

³⁸ A laila kāhea aʻela ia, ʻī aʻela, “E Iesū ke Keiki a Dāvida, e aloha mai ʻoe iaʻu!”

³⁹ A ʻo ka poʻe e hele mua ana, pāpā ihola lākou iā ia e noho mālie. Akā, kāhea nui hou aʻela ia, “E ke Keiki a Dāvida, e aloha mai ʻoe iaʻu!”

⁴⁰ Kū mālie ihola hoʻi ʻo Iesū, hoʻokina aʻela e kaʻi ʻia mai i ona lā; a kokoke akula, nīnau mai ʻo ia iā ia,

⁴¹ ʻī maila, “He aha kou makemake e hana aku ai au iā ʻoe?” ʻĪ akula hoʻi ʻo ia, “I ʻike au, e ka Haku!”

⁴² A ʻī maila ʻo Iesū iā ia, “E ʻike ʻoe, ua ola ʻoe i kou manaʻoʻiʻo.”

⁴³ A ʻike koke ihola nō ia, a hahai akula ʻo ia iā ia, me ka hoʻonani aku i ke Akua; a ʻo ka poʻe kānaka a pau e ʻike ana, hoʻoleʻa akula lākou i ke Akua.