KA ʻEUANELIO I KĀKAU ʻIA AI E LUKA 16 - Ka Baibala Hemolele

1 Ka puʻukū pono ʻole. 14 Nā Parisaio puni waiwai. 19 Ke kanaka waiwai, a me Lazaro.

MOKUNA XVI.

¹ ¶ A ʻōlelo maila ʻo Iesū i kāna mau haumāna, “ʻO kekahi kanaka waiwai he puʻukū kāna; a ua haʻi ʻia iā ia ua puʻukū lā i kona hōkai ʻana i kāna waiwai.

² “A kiʻi akula ʻo ia iā ia, ʻī akula iā ia, ‘He aha kēia aʻu i lohe iho nei iā ʻoe? E hōʻike mai ʻoe i kou mālama ʻana; no ka mea, ʻaʻole ʻoe e puʻukū hou aku.’

³ “ʻĪ ihola ka puʻukū iā ia iho, ‘Pehea lā wau e hana ai? No ka mea, e lawe ana kuʻu haku i ka puʻukū mai oʻu aku nei; ʻaʻole hiki iaʻu ke mahi, a hilahila nō wau i ke noi.

⁴ ‘Ua ʻike au i kaʻu mea e hana aku ai, i hoʻokipa kekahi poʻe iaʻu i ko lākou mau hale, i ka wā e hemo aku ai koʻu puʻukū.’

⁵ “A kiʻi akula ia i kēlā mea ʻaiʻē kēia mea ʻaiʻē a kona haku, nīnau akula ʻo ia i kekahi, ‘Pehea ka nui o kāu ʻaiʻē i kuʻu haku?’

⁶ “Haʻi maila hoʻi ia, ‘Hoʻokahi haneri bato ʻaila.’ A ʻī akula ʻo ia iā ia, ‘E lawe ʻoe i kāu palapala, a noho koke iho ʻoe e kākau i kanalima.’

⁷ “A laila nīnau akula ʻo ia i kekahi, ‘Pehea lā ka nui o kāu ʻaiʻē?’ A haʻi maila ia, ‘Hoʻokahi haneri homera huapalaoa.’ ʻĪ akula hoʻi ʻo ia iā ia, ‘E lawe i kāu palapala, a e kākau iho i kanawalu.’

⁸ “A mahalo ihola ua haku lā i ka puʻukū pono ʻole, no kāna hana akamai ʻana. ʻO ia hoʻi, ua ʻoi aku ke akamai o nā keiki o nēia ao i kā lākou hanauna ma mua o ko nā keiki o ka mālamalama.

⁹ “Ke ʻōlelo aku nei nō hoʻi au iā ʻoukou, me ka waiwai ʻoiaʻiʻo ʻole, e hoʻomakamaka ai ʻoukou i mau makamaka no ʻoukou, i hoʻokipa lākou iā ʻoukou i loko o nā hale pau ʻole, i ka wā e hāʻule ai ʻoukou.

¹⁰ “ʻO ka mea i mālama pono i ka mea ʻuʻuku, ʻo ia ke mālama pono i ka mea nui; a ʻo ka mea i hana hewa ma ka mea ʻuʻuku, ʻo ia hoʻi ke hana hewa ma ka mea nui.

¹¹ “No laila, inā i ʻole ʻoukou e mālama pono i ka waiwai ʻoiaʻiʻo ʻole, na wai lā e waiho iā ʻoukou i ka waiwai ʻoiaʻiʻo?

¹² “A inā i ʻole ʻoukou i mālama pono i kā haʻi waiwai, na wai lā hoʻi e hāʻawi i waiwai na ʻoukou ponoʻī?

¹³ “ʻAʻohe kauā e hiki ke hoʻokauā na nā haku ʻelua; no ka mea, e hoʻowahāwahā ʻo ia i kekahi me ka makemake i kekahi, a i ʻole ia, e hahai aku ia i kēlā, me ka haʻalele i kēia. ʻAʻole hoʻi e hiki iā ʻoukou ke hoʻokauā na ke Akua a me ka mamona.”

¹⁴ ¶ A lohe aʻela nā Parisaio ka poʻe puni waiwai i kēia mau mea, henehene ihola lākou iā ia.

¹⁵ ʻĪ maila ʻo ia iā lākou, “ʻO ʻoukou ka poʻe e hoʻopono iā ʻoukou iho i mua o nā kānaka; akā, ua ʻike mai ke Akua i ko ʻoukou mau naʻau; no ka mea, ʻo kahi mea nani i kānaka, he ʻino ia i mua o ke Akua.

¹⁶ “E mau mai ana ke Kānāwai a me ka poʻe Kāula a hiki iā Ioane; a mai ia manawa mai, ua haʻi ʻia aku ke aupuni o ke Akua, a ma ka hoʻoikaika loa, e komo ai nā mea a pau.

¹⁷ “E lilo ka lani a me ka honua ma mua o ka hāʻule ʻana o kekahi huna o ke Kānāwai.

¹⁸ “ʻO ka mea i hoʻohemo i kāna wahine, a e mare aku hoʻi i kekahi, ʻo ia ke moekolohe. A ʻo ka mea i mare i ka wahine i hoʻohemo ʻia, ʻo ia ke moekolohe.

¹⁹ ¶ “ʻO kekahi kanaka waiwai ua ʻaʻahu ʻia i ka lole mākuʻe a me ka ʻie nani, ua ʻahaʻaina ʻoliʻoli ia i kēlā lā i kēia lā.

²⁰ “A ʻo kekahi kanaka ʻilihune, ʻo Lazaro kona inoa, ua waiho ʻia akula ia ma kona ʻīpuka, ua paʻapū i nā maʻi hēhē;

²¹ e ake ia e hānai ʻia mai i nā hunahuna i hāʻule mai luna iho o ka papa ʻaina o ua kanaka waiwai lā. A hele mai hoʻi nā ʻīlio a palu ihola i kona mau maʻi.

²² “Eia hoʻi kekahi, make akula ia kanaka ʻilihune, a lawe ʻia akula ʻo ia e nā ʻānela ma ka poli o ʻAberahama; a make akula hoʻi ua kanaka waiwai lā, a kanu ʻia ihola.

²³ “A ma loko o ka pō ʻo ia i nānā aku ai, me ka ʻeha nui, ʻike akula iā ʻAberahama i kahi lōʻihi aku a me Lazaro ma kona poli.

²⁴ “A kāhea akula ia, ʻī akula, ‘E ka makua, e ʻAberahama, e aloha mai ʻoe iaʻu, a e hoʻouna mai iā Lazaro e ʻō iho ia i ka wēlau o kona manamana lima i loko o ka wai, a e hoʻomaʻalili mai i koʻu alelo; no ka mea, ua ʻeha loa au i loko o kēia lapalapa.’

²⁵ “A laila ʻī maila ʻo ʻAberahama, ‘E ke keiki, e hoʻomanaʻo ʻoe, ua loaʻa iā ʻoe kāu mau mea maikaʻi i kou wā e ola ana; a iā Lazaro hoʻi nā mea ʻino. ʻĀnō hoʻi ua hōʻoluʻolu ʻia ʻo ia nei, a ua hōʻehaʻeha ʻia hoʻi ʻoe.

²⁶ ‘A he mea ʻē aʻe nō hoʻi, ua waiho ʻia mai he awāwa nui i waena o mākou a me ʻoukou, i ʻole ai e hiki ka poʻe e manaʻo ana e hele aku mai kēia wahi aku i o ʻoukou lā; a ʻo ko laila poʻe ʻaʻole e hiki ke hele mai o mākou nei.’

²⁷ “ʻĪ akula hoʻi ʻo ia, ‘No laila ke noi aku nei au iā ʻoe, e ka makua, e hoʻouna ʻoe iā ia i ka hale o koʻu makua kāne;

²⁸ no ka mea, he mau hoahānau kāne koʻu ʻelima, e ao aku ʻo ia iā lākou, o hiki mai lākou i kēia wahi ʻeha.’

²⁹ “ʻĪ maila ʻo ʻAberahama iā ia, ‘Aia nō hoʻi iā lākou ʻo Mose a me ka poʻe Kāula, i lohe lākou ia mau mea.’

³⁰ “A ʻī akula ʻo ia, ‘ʻAʻole, e ka makua, e ʻAberahama; akā, inā e hele aku kekahi mai waena aku o ka poʻe make, e mihi nō lākou!’

³¹ “ʻĪ maila hoʻi ʻo ia iā ia, ‘Inā i lohe ʻole lākou iā Mose a me ka poʻe Kāula, ʻaʻole nō lākou e hoʻohuli ʻia ke ala hou kekahi mai waena aku o ka poʻe make.’”