KA ʻEUANELIO I KĀKAU ʻIA AI E LUKA 13 - Ka Baibala Hemolele

1 No ka mihi ʻana i ka hewa. 10 Hoʻōla Iesū i ka wahine i ka lā Sābati. 18 Ka hua mākeke. 22 Ka poʻe e ola. 34 Ka hewa o Ierusalema.

MOKUNA XIII.

¹ ¶ Ma laila hoʻi ia manawa kekahi i haʻi aku iā ia no ka poʻe o Galilaia, ʻo ko lākou koko i hui pū ʻia e Pilato me ko lākou mau mōhai.

² A ʻōlelo maila Iesū, ʻī maila iā lākou, “Ua manaʻo anei ʻoukou ua ʻoi aku ka hewa o ia poʻe o Galilaia ma mua o ko Galilaia a pau, no ko lākou hōʻinoʻino ʻia aʻe pēlā?

³ “Ke ʻōlelo aku nei au iā ʻoukou, ʻaʻole; akā, i mihi ʻole ʻoukou, e pau pū hoʻi ʻoukou a pau i ka make.

⁴ “A ʻo kēlā poʻe kānaka hoʻi he ʻumikumamāwalu i hiolo ʻia ai e ka hale kiaʻi i Siloama i make ai lākou, ua manaʻo anei ʻoukou ua ʻoi aku ko lākou hewa ma mua o ko nā kānaka a pau e noho ana ma Ierusalema?

⁵ “Ke ʻōlelo aku nei au iā ʻoukou, ʻaʻole; akā, i mihi ʻole ʻoukou, e pau pū hoʻi ʻoukou a pau i ka make.”

⁶ ¶ A ʻōlelo mai ʻo ia i kēia ʻōlelo nane: “He lāʻau fiku kā kekahi kanaka, ua kanu ʻia i loko o kona pā waina; a hele mai ia e ʻimi i ka hua ma luna ona, ʻaʻole i loaʻa.

⁷ “A laila ʻī akula ʻo ia i ka mea nāna i mālama i ka pā waina, ‘Eia hoʻi, ʻekolu aʻe nei oʻu mau makahiki i hele mai nei e ʻimi ana i ka hua ma luna o kēia lāʻau fiku, ʻaʻole hoʻi i loaʻa iaʻu; e kua aku ia; no ke aha lā ʻo ia e hoʻopilikia ai i ka ʻāina?’

⁸ “A ʻōlelo maila ia, ʻī maila iā ia, ‘E ka haku, e waiho hou iā ia i kēia makahiki hoʻi, a ʻeliʻeli au a puni ia, a e kīpulu hoʻi;

⁹ e hoʻohua mai paha ia, a i ʻole hoʻi, ma ia hope iho, e kua aku ʻoe iā ia.’”

¹⁰ ¶ E aʻo ana ia i loko o kekahi hale hālāwai ma ka lā Sābati.

¹¹ Aia hoʻi, i laila kekahi wahine, he maʻi kona he ʻumikumamāwalu makahiki, ua hoʻokūlou ʻia ʻo ia, ʻaʻole loa e hiki iā ia ke ea aʻe i luna.

¹² A ʻike maila ʻo Iesū iā ia, kāhea maila ia, ʻī maila iā ia, “E ka wahine, ua wehe ʻia ʻoe mai kou maʻi ʻana.”

¹³ A kau akula ia i kona mau lima ma luna iho ona; a ua hoʻopololei koke ʻia ʻo ia, a hoʻonani akula ia i ke Akua.

¹⁴ ʻŌlelo akula ka luna hale hālāwai me ka huhū i ko Iesū hoʻōla ʻana ma ka lā Sābati, ʻī akula ia i kānaka, “ʻEono nō lā e hana ai nā kānaka e pono ai; ia mau lā hoʻi e hele mai ai ʻoukou e hoʻōla ʻia, ʻaʻole i ka lā Sābati.”

¹⁵ ʻŌlelo maila ka Haku iā ia, ʻī maila, “E ka hoʻokamani, ʻaʻole anei kēlā mea kēia mea o ʻoukou i wehe aʻe i kāna bipi kauō, a i kāna hoki paha mai loko aʻe o kahi e hānai ʻia ai a e alakaʻi aku e hoʻohāinu i ka wai?

¹⁶ “A ʻo kēia wahine, he mamo na ʻAberahama, i paʻa ʻia e Sātana i kēia mau makahiki he ʻumikumamāwalu, ʻeā, ʻaʻole anei e pono ke wehe ʻia ʻo ia i ka lā Sābati, mai kēia mea i paʻa ai?”

¹⁷ A i kāna ʻōlelo ʻana i kēia, hilahila ihola kona poʻe ʻenemi a pau; a ʻoliʻoli ka ʻaha kanaka a pau i nā mea nani i hana ʻia ai e ia.

¹⁸ ¶ A laila nīnau maila ʻo ia, “E like ke aupuni o ke Akua me ke aha? Me ke aha lā hoʻi au e hoʻohālike ai ia?

¹⁹ “Ua like ia me ka hua mākeke a kekahi kanaka i lawe ai, a hoʻolei i loko o kāna māla; a ulu aʻela, a lilo aʻela i lāʻau nui, a «kau ihola nā manu o ka lewa ma kona mau lālā».”

²⁰ ¶ ʻŌlelo hou maila ia, “Me ke aha lā au e hoʻohālike ai i ke aupuni o ke Akua?

²¹ “Ua like ia me ka mea hū a kekahi wahine i lawe ai a hui pū me nā sato palaoa ʻekolu, a pau aʻela ia i ka hū.”

²² ¶ A hele aʻela ia ma waena o nā kūlanakauhale, a me nā kauhale e aʻo ana, e hele ana hoʻi i Ierusalema.

²³ A nīnau akula kekahi iā ia, “E ka Haku, he ʻuʻuku wale nō anei ka poʻe e hoʻōla ʻia?” ʻŌlelo maila ʻo ia iā lākou,

²⁴ “E hoʻoikaika iā ʻoukou e komo i ka ʻīpuka pilikia; no ka mea, ke haʻi aku nei au iā ʻoukou, he nui nō ka poʻe e ʻimi ana e komo, ʻaʻole nō e hiki.

²⁵ “A i kū i luna ka haku nona ka hale a i pani i ka puka, a kū ʻoukou ma waho e kīkēkē ana ma ka puka, me ka ʻōlelo, ‘E ka Haku, e ka Haku, e wehe aʻe iā mākou;’ a e ʻōlelo nō ʻo ia iā ʻoukou, ‘ʻAʻole au i ʻike i ko ʻoukou wahi i hele mai ai.’

²⁶ “A laila e ʻōlelo nō ʻoukou, ‘Ua ʻai mākou a ua inu hoʻi i mua o kou alo, a ua aʻo mai nō hoʻi ʻoe ma ko mākou mau alanui.’

²⁷ “A e ʻōlelo hou ia, ‘Ke ʻōlelo aku nei au iā ʻoukou, ʻaʻole au i ʻike iā ʻoukou i ko ʻoukou wahi i hele mai ai; «e hele aku ʻoukou mai oʻu aku nei, e ka poʻe hana hewa a pau».’

²⁸ “A laila, e uē ai, a e ʻuī ai nā niho, i ka wā e ʻike ai ʻoukou iā ʻAberahama, a me ʻIsaʻaka, a me Iakoba, a me ka poʻe kāula a pau, i loko o ke aupuni o ke Akua, a ʻo ʻoukou iho hoʻi ua kipaku ʻia aku i waho.

²⁹ “A e hele mai nō ko ka hikina, a me ko ke komohana, a me ko ke kūkulu ʻākau, a me ko ke kūkulu hema, a e noho iho e ʻai i loko o ke aupuni o ke Akua.

³⁰ “Aia hoʻi, ʻo ka poʻe hope, e lilo lākou i poʻe mua, a ʻo ka poʻe mua, e lilo lākou i poʻe hope.”

³¹ ¶ Ia lā lā, hele akula kekahi mau Parisaio i ona lā, ʻī akula iā ia, “E puka aku ʻoe, a hele aku mai kēia wahi aku; no ka mea, ua manaʻo ʻo Herode e pepehi iā ʻoe.”

³² A ʻī maila ʻo ia iā lākou, “E hele ʻoukou e haʻi aku i kēlā ʻalopeke, ‘Eia hoʻi, e mahiki ana au i nā daimonio, a e hoʻōla ana hoʻi i nā maʻi i kēia lā, a i ka lā ʻapōpō hoʻi, a i ke kolu o ka lā e hoʻopau wau.’

³³ “Akā, he pono nō wau e holoholo i kēia lā, a i ka lā ʻapōpō, a i kēlā lā aku; no ka mea, ʻaʻole e hiki i ke kāula ke pepehi ʻia i kahi ma waho o Ierusalema.

³⁴ “E Ierusalema, Ierusalema, e ka mea i pepehi i ka poʻe kāula, a i hailuku i ka poʻe i hoʻouna ʻia aʻe iā ʻoe; ua makemake pinepine au e hōʻuluʻulu mai i kāu mau keiki, e like me kā ka moa hōʻuluʻulu ʻana i kāna ʻohana ma lalo aʻe o kona mau ʻēheu, ʻaʻole hoʻi ʻoukou i makemake!

³⁵ “Aia hoʻi, ko ʻoukou hale e waiho neoneo ana no ʻoukou; he ʻoiaʻiʻo kaʻu e ʻōlelo aku nei, ʻaʻole ʻoukou e ʻike ʻē iaʻu, a hiki i ka manawa e ʻōlelo mai ai ʻoukou, ‘«E hoʻomaikaʻi ʻia aku ka Mea i hele mai nei ma ka inoa o ka Haku»!’”