KA ʻEUANELIO I KĀKAU ʻIA AI E LUKA 10 - Ka Baibala Hemolele

1 Hoʻouna ʻia nā haumāna 70. 17 Hoʻi mai lākou. 21 Hauʻoli Iesū. 25 Hoʻāʻo ke kākau ʻōlelo iā Iesū. 30 No ke kanaka i mālama ʻia e ka Samaria. 38 ʻO Mareta lāua ʻo Maria.

MOKUNA X.

¹ ¶ A ma hope iho o kēia mau mea, hoʻomaopopo maila ka Haku i kekahi poʻe ʻē he kanahiku, a hoʻouna pāpālua akula ʻo ia iā lākou ma mua ona, i nā wahi a pau āna i manaʻo ai e hele aku ana.

² A laila ʻōlelo maila ʻo ia iā lākou, “He nui ka ʻai i oʻo, he ʻuʻuku ka poʻe nāna e ʻohi; no laila e pule aku ai ʻoukou i ka Haku o ke kīhāpai, e hoʻouna ʻo ia i poʻe hana e ʻohi i kāna ʻai.

³ “E haele ʻoukou; eia hoʻi ke hoʻouna aku nei au iā ʻoukou me he mau keiki hipa lā i waena o nā ʻīlio hae.

⁴ “Mai hali i ʻaʻa moni, ʻaʻole i kīʻeke ʻai, ʻaʻole hoʻi i kāmaʻa; a mai uē aku i ke kanaka ma ke alanui.

⁵ “A i ka hale a ʻoukou e komo aku ai, e ʻōlelo mua aku, ‘Aloha kēia hale.’

⁶ “A inā i laila ke keiki a ke aloha, a laila e waiho nō ko ʻoukou aloha ma luna ona; akā, i ʻole, e hoʻi mai nō ia ma luna o ʻoukou iho.

⁷ “A ma ia hale e noho ai ʻoukou, e ʻai ana a e inu ana hoʻi i nā mea a lākou e hāʻawi mai ai; no ka mea, e pono ke uku ʻia mai ka paʻahana. Mai hele ia hale aku ia hale aku.

⁸ “A ʻo ke kūlanakauhale a ʻoukou e komo aku ai, a e hoʻokipa mai lākou iā ʻoukou, e ʻai ʻoukou i nā mea e waiho ʻia ma ko ʻoukou alo;

⁹ e hoʻōla i ko laila poʻe maʻi, a e ʻōlelo aku iā lākou, ‘Ke kokoke mai nei ke aupuni o ke Akua iā ʻoukou.’

¹⁰ “A ʻo ke kūlanakauhale a ʻoukou e komo aku ai, ʻaʻole hoʻi lākou e hoʻokipa iā ʻoukou, e hele ʻoukou i waho ma ko laila mau alanui, a e ʻōlelo aku;

¹¹ ‘ʻO ka lepo o ko ʻoukou kūlanakauhale i pili mai nei iā mākou, ʻo ia kā mākou e holoi aku ai no ʻoukou; akā, e ʻike ʻoukou i kēia, ke kokoke mai nei ke aupuni o ke Akua iā ʻoukou.’

¹² “Ke ʻōlelo aku nei au iā ʻoukou, a i kēlā lā, e aho ko Sodoma pōʻino ʻana, i ko ua kūlanakauhale lā.

¹³ “Auē ʻoe, e Korazina! Auē hoʻi ʻoe, e Betesaida! No ka mea, inā i hana ʻia i loko o Turo, a me Sidona nā hana mana i hana ʻia i loko o ʻolua, inā ua mihi lāua ma mua loa e noho ana me ke kapa ʻino a me ka lehu.

¹⁴ “No laila, i ka hoʻopaʻi ʻana, e aho ko Turo a me ko Sidona i ko ʻolua pōʻino ʻana.

¹⁵ “A ʻo ʻoe, e Kaperenauma, ka mea i hoʻokiʻekiʻe ʻia aʻe i ka lani, e kiola ʻia auaneʻi ʻoe i lalo i ka pō!

¹⁶ “ʻO ka mea e hoʻolohe iā ʻoukou, ʻo ia ke hoʻolohe mai iaʻu; a ʻo ka mea e hoʻowahāwahā iā ʻoukou, ʻo ia ke hoʻowahāwahā mai iaʻu; a ʻo ka mea e hoʻowahāwahā mai iaʻu, ʻo ia ke hoʻowahāwahā i ka Mea nāna au i hoʻouna mai.”

¹⁷ ¶ A hoʻi maila ua poʻe kanahiku lā, me ka ʻoliʻoli, ʻī akula, “E ka Haku, ua hoʻolohe mai nā daimonio iā mākou ma kou inoa.”

¹⁸ A ʻī maila ʻo ia iā lākou, “Ua ʻike au iā Sātana e hāʻule ana e like me ka uila mai ka lani mai.

¹⁹ “Eia hoʻi, ke hāʻawi aku nei au iā ʻoukou i ka mana e hehi ma luna iho o nā nahesa a me nā moʻo huelo ʻawa, a ma luna o ka mana a pau o ka ʻenemi; ʻaʻole loa he mea e ʻeha ai ʻoukou.

²⁰ “Mai ʻoliʻoli naʻe ʻoukou i kēia mea, i ka hoʻolohe ʻana o nā ʻuhane iā ʻoukou; akā, e ʻoliʻoli ʻoukou, no ke kākau ʻia ʻana ko ʻoukou mau inoa i loko o ka lani.”

²¹ ¶ Ia manawa, hauʻoli ihola ʻo Iesū ma ka ʻUhane, a ʻōlelo akula, “Ke hoʻomaikaʻi nei au iā ʻoe, e ka Makua, ka Haku o ka lani a me ka honua; no ka mea, ua hūnā ʻoe i kēia mau mea i ka poʻe naʻauao, a me ka poʻe akamai, a ua hōʻike mai nei ʻoe ia i nā keiki hou. ʻOiaʻiʻo nō, e ka Makua; no ka mea, ʻo ka pono nō ia iā ʻoe.

²² “Ua hāʻawi ʻia mai nei iaʻu nā mea a pau e koʻu Makua; ʻaʻole hoʻi mea i ʻike i ke Keiki, ʻo ka Makua wale nō; a i ka Makua hoʻi, ʻo ke Keiki wale nō, a me ke kanaka a ke Keiki e makemake e hōʻike ai.”

²³ A hāliu aʻe ia i ka poʻe haumāna, ʻōlelo malū mai ia, “Pōmaikaʻi nā maka i ʻike i nā mea a ʻoukou e ʻike nei;

²⁴ no ka mea, ke haʻi aku nei au iā ʻoukou, he nui nō ka poʻe kāula a me nā aliʻi i makemake e ʻike i nā mea a ʻoukou e ʻike nei, ʻaʻole hoʻi lākou i ʻike; a e lohe i nā mea a ʻoukou e lohe nei, ʻaʻole hoʻi lākou i lohe.”

²⁵ ¶ Aia hoʻi, kū aʻela i luna kekahi kākāʻōlelo e hoʻāʻo ana iā ia, nīnau akula, “E ke Kumu, he aha kaʻu e hana ai i loaʻa mai ai iaʻu ke ola mau loa?”

²⁶ A nīnau maila ʻo ia iā ia, “He aha ka mea i kākau ʻia ai i loko o ke kānāwai? Pehea kāu heluhelu ʻana?”

²⁷ Haʻi akula ke kākāʻōlelo, ʻī akula, “«E aloha aku ʻoe i ka Haku i kou Akua me kou naʻau a pau, a me kou ʻuhane a pau, a me kou ikaika a pau, a me kou manaʻo a pau, a i kou hoalauna e like me ʻoe iho».”

²⁸ ʻĪ maila ʻo ia iā ia, “Ua haʻi pololei mai nei ʻoe; «ʻo kāu ia e hana ai, a e ola nō ʻoe».”

²⁹ Akā, i kona makemake ʻana e hoʻāpono iā ia iho, nīnau akula ʻo ia iā Iesū, “ʻO wai lā hoʻi koʻu hoalauna?”

³⁰ ʻŌlelo hou maila ʻo Iesū, ʻī maila, “ʻO kekahi kanaka e iho ana mai Ierusalema i Ieriko, a hāʻule ihola i waena o nā pōā, kāʻili aʻela lākou i kona kapa, pepehi ihola, a haʻalele akula iā ia, e waiho ana me ka ʻaneʻane make.

³¹ “A iho nō kekahi kahuna pule ma ia alanui, a ʻike akula iā ia, māʻalo wale aʻela ma kekahi ʻaoʻao.

³² “Pēlā nō hoʻi kekahi pua na Levi, i kona hiki ʻana ma ia wahi, hele ia a nānā akula, māʻalo aʻela ia ma kekahi ʻaoʻao.

³³ “Akā, ʻo kekahi kanaka no Samaria, i kona hele ʻana, hiki akula ia i kahi ona e waiho ana; a ʻike akula iā ia, hū aʻela kona aloha iā ia.

³⁴ “Hele ihola i ona lā, a wahī ihola i kona mau ʻeha e ninini ana i ka ʻaila a me ka waina i loko, a kau aʻela iā ia ma luna o kona holoholona iho, a lawe aʻela iā ia i ka hale hoʻokipa, a mālama ihola iā ia.

³⁵ “A ia lā aʻe, i kona hele ʻana aku, unuhi aʻela ia i nā denari ʻelua, a hāʻawi aku i ka mea nona ka hale, ʻī akula iā ia, ‘E mālama ʻoe iā ia nei; a ʻoi aku kāu mea lilo, a hoʻi mai au, naʻu e uku aku iā ʻoe.’

³⁶ “A ʻo kēia mau kānaka a ʻekolu, ʻo wai lā ka hoalauna, i kou manaʻo, no ke kanaka i hāʻule i waena o nā pōā?”

³⁷ Haʻi akula ia, “ʻO ka mea i hana lokomaikaʻi iā ia.” ʻĪ maila ʻo Iesū, “E hele ʻoe a e hoʻohālike me ia.”

³⁸ ¶ Eia kekahi, i ko lākou hele ʻana, komo akula ia i loko o kekahi kauhale; a ʻo kekahi wahine, ʻo Mareta kona inoa, i hoʻokipa iā ia i kona hale.

³⁹ A he kaikaina kona i kapa ʻia ʻo Maria, ua noho ia ma nā wāwae o Iesū, e hoʻolohe ana i kāna ʻōlelo.

⁴⁰ Akā ʻo Mareta, ua paʻapū ia i ka lawelawe nui ʻana, a hele ia, a ʻōlelo aku, “E ka Haku, he mea ʻole anei iā ʻoe ka haʻalele ʻana mai o koʻu kaikaina iaʻu e lawelawe hoʻokahi au? No laila, e ʻōlelo ʻoe iā ia e kōkua mai ia iaʻu.”

⁴¹ ʻŌlelo maila ʻo Iesū, ʻī maila iā ia, “E Mareta, e Mareta, ua nui kou manaʻo a me kou pīhoihoi, i nā mea he nui;

⁴² akā, hoʻokahi nō mea e pono ai. A ua koho mai nei ʻo Maria ia mea maikaʻi, ʻaʻole loa ia e lawe ʻia aku mai ona aku.”