KA ʻEUANELIO I KĀKAU ʻIA AI E LUKA 1 - Ka Baibala Hemolele

1 No ka hānau ʻana o Ioane Bapetite. 26 Ka hōʻike ʻana iā Maria i ka hānau ʻana o Iesū.

MOKUNA I.

¹ ¶ No ka mea, he nui ka poʻe i hoʻāʻo i ka hoʻoponopono i ka moʻoʻōlelo no nā mea i hana ʻia i waena o mākou,

² e like me ka haʻi ʻana mai iā mākou a ka poʻe ʻike maka, mai ke kumu mai, ka poʻe hoa lawehana hoʻi no ka ʻōlelo.

³ Manaʻo ihola au he mea pono noʻu, i koʻu huli ikaika ʻana a maopopo ia mau mea a pau, mai kinohi mai, e palapala hoʻākāka iā ʻoe, e Teopilo ka mea kaulana;

⁴ i ʻike ʻoe i ka ʻoiaʻiʻo o ua mau mea lā i aʻo ʻia aku ai ʻoe.

⁵ ¶ I ke au iā Herode ke aliʻi o Iudea, e noho ana kekahi kahuna, ʻo Zakaria kona inoa, no ka papa o ʻAbia; a ʻo kāna wahine, no nā kaikamāhine ia a ʻAʻarona, ʻo ʻElisabeta kona inoa.

⁶ Ua pono pū lāua i mua o ke Akua, e hele hala ʻole ana ma nā kānāwai a me nā ʻoihana a pau a ka Haku.

⁷ ʻAʻohe hoʻi a lāua keiki; no ka mea, he pā ʻo ʻElisabeta; a he nui nō hoʻi kā lāua mau makahiki.

⁸ ¶ Eia kekahi, i kāna hana ʻana i ka ʻoihana kahuna i mua o ke Akua, i ka manawa o kona papa,

⁹ ma muli o ka ʻoihana mua a ke kahuna, ʻo kāna hana kēia, e kuni i ka mea ʻala i kona hele ʻana i loko o ka luakini o ka Haku.

¹⁰ E pule ana ka ʻaha kanaka a pau ma waho, i ka hora i kukuni ʻia ai ka mea ʻala.

¹¹ A laila ʻike ʻia akula ka ʻānela a ka Haku, e kū ana ma ka ʻaoʻao ʻākau o ke kuahu mea ʻala.

¹² A ʻike aku ʻo Zakaria iā ia, pīhoihoi ihola ia, a kau maila ka makaʻu iā ia.

¹³ ʻĪ maila ka ʻānela iā ia, “Mai makaʻu ʻoe, e Zakaria; no ka mea, ua lohe ʻia kāu pule; a e hānau ana kāu wahine ʻo ʻElisabeta i keiki kāne nāu, a e kapa aku ʻoe i kona inoa ʻo Ioane.

¹⁴ “A e hauʻoli ana hoʻi ʻoe me ka ʻoliʻoli, a he nui nō hoʻi ka poʻe e hauʻoli i kona hānau ʻana.

¹⁵ “No ka mea, e nui auaneʻi ʻo ia i mua o ka Haku; ʻaʻole ia e inu i ka waina, ʻaʻole hoʻi i ka mea ʻawaʻawa; e piha nō hoʻi ia i ka ʻUhane Hemolele, mai ka ʻōpū mai o kona makuahine.

¹⁶ “E nui nō hoʻi nā mamo a ʻIseraʻela āna e hoʻohuli ai ma ka Haku, ma ko lākou Akua.

¹⁷ “E hele ana hoʻi ia ma mua ona, me ka ʻuhane a me ka mana o ʻElia, «e hoʻohuli i ka naʻau o nā mākua i kā lākou mau keiki», a i ka poʻe lohe ʻole ma muli o ka naʻauao o ka poʻe pono; e hoʻoponopono ai i kānaka mākaukau no ka Haku.”

¹⁸ ¶ Nīnau akula ʻo Zakaria i ka ʻānela, “Ma hea lā wau e ʻike ai ia mea? No ka mea, he kanaka kahiko wau, a he nui nō hoʻi nā makahiki o kaʻu wahine.”

¹⁹ ʻŌlelo maila ka ʻānela, ʻī maila iā ia, “ʻO wau nō ʻo Gaberiʻela, ka mea e kū ana i mua o ke Akua; a ua hoʻouna ʻia mai nei au e ʻōlelo iā ʻoe, a e haʻi aku iā ʻoe ia mau mea ʻoliʻoli.

²⁰ “Aia hoʻi, e paʻa ana kou leo, ʻaʻole e hiki iā ʻoe ke ʻōlelo, a hiki i ka lā e kō ai ia mau mea; no ka mea, ʻaʻole ʻoe i manaʻoʻiʻo mai i kaʻu mau ʻōlelo, e hoʻokō ʻia auaneʻi ia i ko lākou manawa.”

²¹ Kakali aʻela nā kānaka iā Zakaria, haʻohaʻo ihola i kona lōʻihi ʻana ma loko o ka luakini.

²² A puka ia i waho, ʻaʻole i hiki iā ia ke ʻōlelo mai iā lākou; a ʻike ihola lākou, ua ʻike ʻo ia i ka mea ʻikea i loko o ka luakini; no ka mea, kūnou ʻo ia iā lākou, a ua paʻa nō kona leo.

²³ Eia kekahi, i ka pau ʻana aʻe o nā lā o kāna hana, hoʻi koke nō ia i kona hale.

²⁴ ¶ A, ma hope iho o ia mau lā, hāpai ihola kāna wahine, ʻo ʻElisabeta, a noho mehameha ihola ia i nā malama ʻelima, ʻī ihola,

²⁵ “ʻO ia kā ka Haku i hana mai ai noʻu ia mau lā āna i manaʻo mai ai e lawe aku i ka mea aʻu i hōʻino ʻia mai ai i waena o kānaka.”

²⁶ ¶ A i ke ono o ka malama, ua hoʻouna ʻia mai ʻo Gaberiʻela, mai ke Akua mai, i kekahi kūlanakauhale i Galilaia, ʻo Nazareta ka inoa,

²⁷ i ka wahine puʻupaʻa i hoʻopalau ʻia na kekahi kanaka, ʻo Iosepa ka inoa, no ka ʻohana a Dāvida; a ʻo Maria ka inoa o ua wahine puʻupaʻa lā.

²⁸ A komo ka ʻānela i ona lā, ʻī maila ia, “Aloha ʻoe, e ka mea i aloha nui ʻia, ʻo ka Haku pū me ʻoe. Pōmaikaʻi loa ʻoe i waena o nā wāhine.”

²⁹ A ʻike akula, hopohopo ihola ʻo ia i kāna ʻōlelo, a nalu ihola i ke ʻano o kēia aloha ʻana.

³⁰ ʻĪ maila ka ʻānela iā ia, “Mai makaʻu ʻoe, e Maria; no ka mea, ua loaʻa iā ʻoe ka lokomaikaʻi ʻia mai e ke Akua.

³¹ “Eia hoʻi, e hāpai auaneʻi ʻoe, a e hānau i ke keiki kāne, a e kapa iho ʻoe i kona inoa, ʻo Iesū.

³² “E nui auaneʻi ʻo ia, a e kapa ʻia aku, ʻo ke Keiki a ka Mea Kiʻekiʻe Loa; a e hāʻawi hoʻi nona ʻo Iēhova ke Akua i ka noho aliʻi o Dāvida ʻo kona makua kāne.

³³ “E mau loa nō hoʻi kona aliʻi ʻana ma luna o ka ʻohana a Iakoba; a ʻo kona aupuni ʻaʻole ia e pau.”

³⁴ A laila, nīnau akula ʻo Maria i ka ʻānela, “Pehea lā uaneʻi ia mea? No ka mea, ʻaʻole au ʻike i ke kāne.”

³⁵ ʻŌlelo maila ka ʻānela, ʻī maila iā ia, “E kau mai nō ka ʻUhane Hemolele ma luna iho ou; a e hoʻomalu mai ka mana o ka Mea Kiʻekiʻe Loa iā ʻoe, no ia mea lā hoʻi, e kapa ʻia ka Mea Hemolele āu e hānau ai, ʻo ke Keiki a ke Akua.

³⁶ “Aia hoʻi, ʻo ʻElisabeta ʻo kou hoahānau, ua hāpai aʻe nei i ke keiki kāne i kona wā luahine; eia hoʻi ke ono o ka malama o ka wahine i ʻī ʻia aʻe he pā.

³⁷ “No ka mea, ʻaʻohe mea hiki ʻole i ke Akua.”

³⁸ ʻĪ akula ʻo Maria, “Eia hoʻi ke kauā wahine a ka Haku; e like me kāu ʻōlelo, pēlā e hana ʻia mai ai noʻu.” A laila, hele akula ka ʻānela mai ona aku.

³⁹ ¶ Ia mau lā, ʻeu aʻela ʻo Maria, a hele wikiwiki akula i ka ʻāina mauna, i kekahi kūlanakauhale o Iuda;

⁴⁰ a komo aku ia i loko o ka hale o Zakaria, a aloha akula iā ʻElisabeta.

⁴¹ Eia kekahi, i ka wā i lohe ai ʻo ʻElisabeta i ko Maria aloha, lele ihola ke keiki i loko o kona ʻōpū; a hoʻopiha ʻia ʻo ʻElisabeta i ka ʻUhane Hemolele.

⁴² A ʻōlelo maila ʻo ia me ka leo nui, ʻī maila, “Pōmaikaʻi loa ʻoe i waena o nā wāhine, Pōmaikaʻi hoʻi ka hua o kou ʻōpū!

⁴³ “No hea mai kēia iaʻu, i hele mai nei ka makuahine o koʻu Haku i oʻu nei?

⁴⁴ “No ka mea, aia hoʻi, i ka paʻē ʻana mai o kou aloha i loko o koʻu mau pepeiao, lele koke aʻe nei ke keiki i ka ʻoliʻoli i loko o koʻu ʻōpū.

⁴⁵ “Pōmaikaʻi hoʻi ka wahine i manaʻoʻiʻo; e hana ʻia nō nā mea i haʻi ʻia mai iā ia e ka Haku.”

⁴⁶ A laila, ʻī akula ʻo Maria, “Ke hoʻonani aku nei kuʻu ʻuhane i ka Haku;

⁴⁷ Hauʻoli nō hoʻi koʻu ʻuhane i ke Akua i koʻu Mea e ola ai;

⁴⁸ No ka mea, ua nānā aloha mai ʻo ia i ka haʻahaʻa o kāna kauā wahine. Eia hoʻi, ma nēia hope aku e ʻī ʻia mai au e nā hanauna a pau, he pōmaikaʻi.

⁴⁹ “No ka mea, ʻo ka Mea Mana, ua hana mai ia i nā mea nani noʻu. He hemolele hoʻi kona inoa.

⁵⁰ “«E mau ana kona aloha i ka poʻe makaʻu iā ia, Ia hanauna aku ia hanauna aku».

⁵¹ “Ua hōʻike mai ʻo ia i ka mana ma kona lima. Ua hoʻopuehu i ka poʻe i haʻaheo i ka manaʻo o ko lākou naʻau.

⁵² “Ua kiola ihola ʻo ia i nā aliʻi i lalo mai luna mai o ko lākou mau noho aliʻi; A ua hoʻokiʻekiʻe aʻe hoʻi ʻo ia i ka poʻe haʻahaʻa.

⁵³ “«Ua hoʻomāʻona mai ʻo ia i ka pōloli i nā mea maikaʻi»; A ua hoʻokuke hoʻi ʻo ia i ka poʻe waiwai me ka nele.

⁵⁴ “Ua kōkua mai ʻo ia i kāna hānai iā ʻIseraʻela, Me ka hoʻomanaʻo i ke aloha,

⁵⁵ Ma muli o kāna ʻōlelo na ko kākou poʻe kūpuna, Iā ʻAberahama, a me kona hua a mau loa aku.”

⁵⁶ ¶ Noho pū ihola ʻo Maria me ʻElisabeta ʻekolu paha malama, a laila, hoʻi ia i kona hale.

⁵⁷ ¶ A hiki ko ʻElisabeta manawa e hānau ai; hānau ihola ʻo ia i ke keiki kāne.

⁵⁸ Lohe ihola nā hoalauna, a me nā hoahānau ona, i ko ka Haku lokomaikaʻi nui ʻana iā ia; a ʻoliʻoli pū aʻela lākou me ia.

⁵⁹ Eia kekahi, i ka walu o ka lā hele mai lākou e ʻoki poepoe i ke keiki; kapa aʻela lākou iā ia ma muli o ka inoa o kona makua kāne, ʻo Zakaria.

⁶⁰ ʻŌlelo akula kona makuahine, ʻī akula, “ʻAʻole; akā, e kapa ʻia aku nō ia ʻo Ioane.”

⁶¹ ʻĪ maila lākou iā ia, “ʻAʻole ou hoahānau i kapa ʻia aku ma kēia inoa.”

⁶² Nīnau aʻela lākou ma ke kūnou ʻana i kona makua kāne i ka inoa āna i makemake ai e kapa ʻia aku ʻo ia.

⁶³ Noi aʻela ia i papa palapala, kākau ihola, ʻī aʻela, “ʻO Ioane kona inoa.” A kāhāhā ihola ko loko o lākou a pau.

⁶⁴ A wehe koke ʻia ihola kona waha a me kona elelo, a ʻōlelo akula ia me ka hoʻoleʻa i ke Akua.

⁶⁵ Kau maila hoʻi ka makaʻu ma luna o ka poʻe a pau e kokoke mai ana iā lākou. Kukuʻi aʻela ka lono o ua mau mea lā a puni ka ʻāina mauna o Iudea.

⁶⁶ A ʻo ka poʻe a pau i lohe, nalu ihola lākou ma ko lākou mau naʻau, e ʻī iho ana, “He aha lā uaneʻi ke ʻano o kēia keiki?” Aia me ia ka lima o ka Haku.

⁶⁷ ¶ A ʻo Zakaria kona makua kāne, ua piha ia i ka ʻUhane Hemolele, wānana maila ʻo ia, ʻī maila:

⁶⁸ “E hoʻomaikaʻi ʻia ka Haku ke Akua o kā ʻIseraʻela; No ka mea, ua ʻike mai, a ua hoʻōla hoʻi ia i kona poʻe kānaka.

⁶⁹ “Ua kūkulu mai nei ʻo ia i mea mana e ola ai no kākou, I loko o ka hale o Dāvida ʻo kāna kauā;

⁷⁰ E like me kāna i haʻi mai ai ma ka waha o kāna mau kāula hemolele mai ke kumu mai o ke ao nei;

⁷¹ E pakele ai kākou «i ko kākou poʻe ʻenemi», A «i ka lima hoʻi o ka poʻe a pau e inaina mai iā kākou»;

⁷² E hana lokomaikaʻi ana mai i ko kākou poʻe kūpuna, A me ka hoʻomanaʻo ʻana hoʻi i kāna berita hemolele;

⁷³ I ka mea hoʻohiki āna i hoʻohiki ai no ʻAberahama, no ko kākou kupuna,

⁷⁴ E hāʻawi mai ʻo ia iā kākou, i ka pakele ʻana i ka lima o ko kākou poʻe ʻenemi, E mālama wiwo ʻole aku kākou iā ia,

⁷⁵ Me ka hemolele a me ka pono i mua o kona alo, i nā lā a pau o ke ola ʻana o kākou.

⁷⁶ “A ʻo ʻoe, e ke keiki nei, e kapa ʻia aʻe ʻoe, He kāula na ka Mea Kiʻekiʻe Loa; No ka mea, e hele ana ʻoe «i mua o ka maka o ka Haku, e hoʻomākaukau i nā alanui nona»;

⁷⁷ E hōʻike ana i kona poʻe kānaka i ke ola, Ma ke kala ʻana iho i ko lākou mau hewa,

⁷⁸ No ka lokomaikaʻi ʻiʻo o ko kākou Akua; No kahi mea i puka mai ai ka Mālamalama iā kākou mai luna mai,

⁷⁹ «E hoʻomālamalama i ka poʻe e noho ana i ka pouli, a i loko hoʻi o ka malu o ka make», A e alakaʻi hoʻi i ko kākou mau wāwae ma ka ʻaoʻao e maluhia ai.”

⁸⁰ ¶ A nui aʻela ua keiki lā, ikaika aʻela hoʻi kona manaʻo; ma nā wahi nahele nō hoʻi ia, a hiki i ka lā o kona hōʻike ʻia i kā ʻIseraʻela.