KA BUKE ʻAKOLU A MOSE, I KAPA ʻIA ʻOIHANA KAHUNA 7 - Ka Baibala Hemolele

1 Kānāwai no nā kāhuna pule, no ka mōhai hala. 11 No ka mōhai hoʻomalu.

MOKUNA VII.

¹ ¶ ‘Eia hoʻi ke kānāwai o ka mōhai hala, he hoʻāno loa ia.

² ‘Ma kahi e pepehi ai lākou i ka mōhai kuni, ma laila nō e pepehi ai lākou i ka mōhai hala, a e pīpī i ke koko ona ma luna o ke kuahu a puni.

³ ‘A e mōhai aku ʻo ia i kona kaikea a pau; ʻo ka huelo, a me ka nikiniki ma luna o ka naʻau,

⁴ a ʻo nā puʻupaʻa ʻelua, a me ke konāhua ma luna o lāua, ka mea ma ka pūhaka, a me ka ʻaʻa o ke au ma ke akepaʻa, me nā puʻupaʻa, ʻo ia kāna e lawe ai;

⁵ a e kuni aku ke kahuna ia mau mea, ma luna o ke kuahu, he mōhai kaumaha ia ma ke ahi iā Iēhova; he mōhai hala ia.

⁶ ‘A e ʻai nā kāne a pau i waena o nā kāhuna ia mea; e ʻai ʻia ma kahi hoʻāno; he mea hoʻāno loa ia.

⁷ ‘E like me ka mōhai lawehala, pēlā nō ka mōhai hala, he kānāwai hoʻokahi no ia mau mea; e lilo nō ia i ke kahuna, nāna ia e hoʻolilo i kalahala.

⁸ ‘A ʻo ke kahuna nāna i mōhai aku i ka mōhai kuni o kekahi kanaka, e lilo nona ka ʻili o ka mōhai kuni āna i mōhai ai.

⁹ ‘A ʻo ka mōhai ʻai a pau i moʻa i ka umu, a i moʻa i ke pā parai, a me ke pā, e lilo nō ia na ke kahuna nāna ia i mōhai aku.

¹⁰ ‘A ʻo nā mōhai ʻai a pau i hui ʻia me ka ʻaila, a maloʻo, e lilo na nā keiki a pau a ʻAʻarona e like kā kekahi me kā kekahi.

¹¹ ¶ ‘Eia hoʻi ke kānāwai o ka ʻālana o nā mōhai hoʻomalu āna e mōhai aku ai iā Iēhova.

¹² ‘A inā e mōhai ʻo ia ia i mea e hoʻomaikaʻi ai, a laila, e mōhai aku ʻo ia me ka ʻālana hoʻomaikaʻi i nā pōpō palaoa hū ʻole i hui ʻia me ka ʻaila, a me nā papa palaoa hū ʻole i hamo ʻia me ka ʻaila, a me nā pōpō palaoa i hui ʻia me ka ʻaila, no ka palaoa wali i parai ʻia.

¹³ ‘A he mea ʻē aʻe kāna e mōhai ai he mōhai nāna, ʻo ka berena hū me ka ʻālana hoʻomaikaʻi no kāna mau mōhai hoʻomalu.

¹⁴ ‘A no loko o ia mea e mōhai aku ai ia i hoʻokahi no ka mōhai ʻokoʻa, i mōhai hoʻāli iā Iēhova; a e lilo ia na ke kahuna nāna i pīpī i ke koko o nā mōhai hoʻomalu.

¹⁵ ¶ ‘A ʻo ka ʻiʻo o ka ʻālana, ʻo kāna mau mōhai hoʻomalu no ka hoʻomaikaʻi, e ʻai ʻia ia i ka lā i mōhai ʻia ai ia; ʻaʻole ʻo ia e hoʻokoe i kauwahi a kakahiaka.

¹⁶ ‘Akā, inā he mea hoʻohiki paha, a he mōhai hāʻawi wale, ka ʻālana o kona mōhai, e ʻai ʻia ia i ka lā i mōhai aku ai ʻo ia i kāna mōhai; a ia lā aʻe, ʻai ʻia ai ko laila koena;

¹⁷ akā, ʻo ke koena o ka ʻiʻo o ka ʻālana, i ke kolu o ka lā, e hoʻopau ʻia ia i ke ahi.

¹⁸ ‘A inā e ʻai ʻia kauwahi o ka ʻiʻo o ka ʻālana o kāna mau mōhai hoʻomalu, i ke kolu o ka lā, ʻaʻole ia e maliu ʻia mai, ʻaʻole hoʻi e helu ʻia ia na ka mea nāna ia e mōhai aku; e lilo ia i mea e hoʻowahāwahā ʻia, a ʻo ka mea nāna e ʻai ia mea, e kau ma luna ona kona hewa.

¹⁹ ¶ ‘A ʻo ka ʻiʻo i pili i ka mea maʻemaʻe ʻole, ʻaʻole ia e ʻai ʻia, e hoʻopau ʻia ʻo ia i ke ahi. A ʻo ka ʻiʻo hoʻi, e ʻai ka poʻe maʻemaʻe a pau i ka ʻiʻo.

²⁰ ‘Akā, ʻo ka mea nāna e ʻai i ka ʻiʻo o ka ʻālana o nā mōhai hoʻomalu, nā mea o Iēhova, e kau ana kona haumia ma luna ona, e ʻoki ʻia aku ia mai kona poʻe kānaka aku.

²¹ ‘A ʻo ke kanaka nāna e hoʻopā aku i ka mea haumia, i ka haumia paha o ke kanaka, a i ka holoholona haumia, a i kekahi mea haumia e hoʻowahāwahā ʻia, a e ʻai hoʻi i ka ʻiʻo o ka ʻālana o nā mōhai hoʻomalu, nā mea o Iēhova, e ʻoki ʻia aku ʻo ia mai kona poʻe kānaka aku.’”

²² ¶ ʻŌlelo maila hoʻi ʻo Iēhova iā Mose, ʻī maila,

²³ “E ʻōlelo aku ʻoe i nā mamo a ʻIseraʻela, penei, ‘Mai ʻai ʻoukou i ke kaikea o ka bipi kauō, a ʻo ka hipa, a ʻo ke kao.

²⁴ ‘A ʻo ke kaikea o ka holoholona make wale, a ʻo ke kaikea o ka mea i haehae ʻia e nā holoholona, e pono ia i kā kēlā mea kēia mea ʻē aʻe, ʻaʻole loa hoʻi ʻoukou e ʻai ia mea.

²⁵ ‘A ʻo ka mea nāna e ʻai i ke kaikea o ka holoholona a nā kānaka i kaumaha ai i ka mōhai ma ke ahi iā Iēhova, ʻo ka mea i ʻai ia mea, ʻo ia ke ʻoki ʻia aku mai kona poʻe kānaka aku.

²⁶ ‘ʻAʻole hoʻi ʻoukou e ʻai i ke koko, ʻo ke koko o ka manu, a ʻo ka holoholona, i loko o kahi o ko ʻoukou mau hale.

²⁷ ‘ʻO ke kanaka i ʻai i ke koko, ʻo ia ke ʻoki ʻia aku mai kona poʻe kānaka aku.’”

²⁸ ¶ ʻŌlelo maila hoʻi ʻo Iēhova iā Mose, ʻī maila,

²⁹ “E ʻōlelo aku ʻoe i nā mamo a ʻIseraʻela, penei, ‘ʻO ka mea mōhai i ka ʻālana o kāna mau mōhai hoʻomalu iā Iēhova, e lawe mai ʻo ia i kāna mōhai iā Iēhova no loko o ka ʻālana o kāna mau mōhai hoʻomalu.

³⁰ ‘Na kona mau lima nō e lawe mai i nā mōhai o Iēhova i kaumaha ʻia ma ke ahi, ʻo ke kaikea me ka umauma, ʻo ia kāna e lawe mai ai, i hoʻoluli ʻia ka umauma i mōhai hoʻāli ma ke alo o Iēhova.

³¹ ‘A e kuni ke kahuna i ke kaikea ma luna o ke kuahu; a e lilo ka umauma na ʻAʻarona a me kāna mau keiki.

³² ‘A ʻo ka ʻūhā mua ʻākau, ʻo ia kā ʻoukou e hāʻawi aku ai i ke kahuna, i mōhai hoʻāli, no loko o nā ʻālana o nā mōhai hoʻomalu a ʻoukou.

³³ ‘ʻO kekahi o kā ʻAʻarona mau keiki nāna e mōhai aku i ke koko o nā mōhai hoʻomalu a me ke kaikea, e lilo nāna ka ʻūhā mua ʻākau i kuleana nona.

³⁴ ‘No ka mea, ʻo ka umauma luli, a me ka ʻūhā hoʻāli, ʻo ia kaʻu i lawe ai mai nā mamo a ʻIseraʻela, no luna mai hoʻi o nā ʻālana o kā lākou mau mōhai hoʻomalu, a ua hāʻawi hoʻi au ia mau mea iā ʻAʻarona ke kahuna, a i kāna mau keiki; he kānāwai mau i waena o nā mamo a ʻIseraʻela.’”

³⁵ ¶ ʻO ia hoʻi ko ka poni ʻana o ʻAʻarona, a me ko ka poni ʻana o kāna mau keiki no loko mai o nā mōhai o Iēhova i kaumaha ʻia ma ke ahi, i ka lā i hāʻawi ai ʻo ia iā lākou e lawelawe i mua o Iēhova ma ka ʻoihana kahuna.

³⁶ ʻO ka mea a Iēhova i kauoha mai ai e hāʻawi ʻia na lākou ko nā mamo a ʻIseraʻela, i ka lā i poni ai ʻo ia iā lākou, he kānāwai mau no ko lākou mau hanauna.

³⁷ ¶ ʻO ia ke kānāwai o ka mōhai kuni, ʻo ka mōhai ʻai, a ʻo ka mōhai lawehala, a me ka mōhai hala, a ʻo nā mōhai poni, a me ka ʻālana o nā mōhai hoʻomalu;

³⁸ ka mea a Iēhova i kauoha mai ai iā Mose ma ka mauna Sinai, i ka lā i kauoha mai ai ʻo ia i nā mamo a ʻIseraʻela e kaumaha lākou i ko lākou mau mōhai iā Iēhova, ma ka wao nahele ʻo Sinai.