KA BUKE ʻAKOLU A MOSE, I KAPA ʻIA ʻOIHANA KAHUNA 6 - Ka Baibala Hemolele

1 Mōhai hala no ka hewa. 8 Mōhai kuni. 14 Mōhai ʻai. 19 Mōhai a nā kāhuna pule. 24 Mōhai lawehala.

MOKUNA VI.

¹ ¶ ʻŌlelo maila hoʻi ʻo Iēhova iā Mose, ʻī maila,

² “Inā e lawehala kekahi ʻuhane a e hana hewa iā Iēhova, a e hoʻopunipuni i kona hoalauna i ka mea i hāʻawi ʻia iā ia e mālama, a i ka hoʻolimalima paha, a i ka mea kāʻili wale ʻia paha, a ua hoʻopunipuni ʻo ia i kona hoalauna;

³ a inā i loaʻa iā ia kekahi mea hāʻule, a hoʻopunipuni ʻo ia no ia mea, a hoʻohiki wahaheʻe hoʻi; i kahi o nēia mau mea a pau a ke kanaka i hana ai, a hewa i laila;

⁴ penei hoʻi ia; no ka mea ua lawehala ia, a ua hewa, e hoʻihoʻi aku nō ia i ka mea āna e kāʻili wale ai, a i ka mea i loaʻa iā ia ma ka wahaheʻe, a i ka mea i hāʻawi ʻia iā ia e mālama, a i ka mea hāʻule paha i loaʻa iā ia;

⁵ a i kēlā mea kēia mea āna i hoʻohiki wahaheʻe ai, e hoʻihoʻi ʻokoʻa aku nō ʻo ia ia i kona kino, a e hui i ka hapalima hou me ia, a e hāʻawi aku i ka mea nāna ia, i ka lā o kona mōhai hala.

⁶ “A e lawe mai ʻo ia i kona mōhai hala iā Iēhova, he hipa kāne kīnā ʻole no loko mai o ka ʻohana, me kāu mea i manaʻo ai, i mōhai hala, i ke kahuna.

⁷ “A e hana ke kahuna i kalahala nona, ma ke alo o Iēhova, a e kala ʻia nō ia; no ka mea āna i hana ai, i ka mea i hewa ai.”

⁸ ¶ ʻŌlelo maila ʻo Iēhova iā Mose, ʻī maila,

⁹ “E kauoha iā ʻAʻarona a me kāna mau keiki, e ʻī aku, ‘Eia ke kānāwai o ka mōhai kuni: he mōhai kuni nō ia no ka ʻaʻā ʻana o ke ahi ma ke kuahu a pau ka pō, a kakahiaka, e ʻaʻā ana hoʻi ke ahi kuahu i laila.

¹⁰ ‘E komo hoʻi ke kahuna i kona kapa olonā, a komo nō kona lole wāwae olonā i kona ʻiʻo, a e hao ia i ka lehu i pau i ke ahi me ka mōhai, ma luna o ke kuahu, a e waiho iho ma ka ʻaoʻao o ke kuahu.

¹¹ ‘A e hemo iā ia kona mau kapa, a e komo hou i kekahi mau kapa ʻokoʻa, a e lawe aku i ka lehu ma waho o kahi hoʻomoana ai a kahi maʻemaʻe.

¹² ‘A ʻo ke ahi ma luna o ke kuahu e ʻaʻā mau nō ia ma laila, ʻaʻole e kinai ʻia ia; a e puhi ke kahuna i ka wahie ma luna, i kēlā kakahiaka i kēia kakahiaka, a e kau pono i ka mōhai kuni ma luna ona; a e kuni hoʻi ʻo ia ma luna iho i ka momona o nā mōhai hoʻomalu.

¹³ ‘E ʻaʻā mau nō ke ahi ma ke kuahu, ʻaʻole loa e pio.

¹⁴ ¶ ‘Eia hoʻi ke kānāwai o ka mōhai ʻai; e mōhai aku nō nā keiki a ʻAʻarona ia ma ke alo o Iēhova i mua o ke kuahu.

¹⁵ ‘A e lālau ʻo ia a piha kona lima i ka palaoa o ka mōhai ʻai a i kona ʻaila, a i kona libano a pau e kau ana ma luna o ka mōhai ʻai, a e kuni aku hoʻi ia he mea ʻala ʻono, ʻo kona mea hoʻomanaʻo iā Iēhova.

¹⁶ ‘A ʻo ke koena o ia mea, na ʻAʻarona ia a me kāna mau keiki e ʻai; me ka berena hū ʻole e ʻai ʻia ai ia ma kahi hoʻāno; ma ka pā o ka halelewa o ke anaina e ʻai ai lākou ia mea.

¹⁷ ‘ʻAʻole ia e moʻa me ka hū; ua hāʻawi aku wau ia he kuleana no lākou no loko o kuʻu mau mōhai puhi; he mea hoʻāno loa, e like me ka mōhai lawehala a me ka mōhai hala.

¹⁸ ‘E ʻai nā kāne o kā ʻAʻarona mau keiki a pau ia mea; he kānāwai mau ia i ko ʻoukou hanauna, no nā mōhai puhi iā Iēhova; ʻo ka mea e hoʻopā ia mau mea, e hoʻāno ia.’”

¹⁹ ¶ ʻŌlelo maila hoʻi ʻo Iēhova iā Mose, ʻī maila,

²⁰ “Eia ka mōhai a ʻAʻarona a me kāna mau keiki, a lākou e mōhai aku ai iā Iēhova i ka lā i poni ʻia ai ʻo ia, ʻo ka hapaʻumi o ka ʻepa palaoa wali, e mōhai mau ai, ʻo ka hapalua ona i ke kakahiaka, a ʻo ka hapalua ona i ke ahiahi.

²¹ “Ma ke pā e hana ʻia ai ia me ka ʻaila a moʻa, e lawe mai ʻoe ia, a ʻo nā ʻāpana moʻa, ʻo kā mōhai ʻai kāu e mōhai ai i mea ʻala ʻono iā Iēhova.

²² “A ʻo ke kahuna no nā keiki mai āna i poni ʻia no kona wahi, ʻo ia ka mea nāna ia e mōhai aku; he kānāwai mau ia no Iēhova, e pau loa ia i ke ahi.

²³ “ʻO nā mōhai ʻai a pau no ke kahuna e pau nō ia i ke ahi; ʻaʻole e ʻai ʻia.”

²⁴ ¶ A ua ʻōlelo maila ʻo Iēhova iā Mose, ʻī maila,

²⁵ “E ʻōlelo aku ʻoe iā ʻAʻarona a me kāna mau keiki, penei, ‘Eia ke kānāwai o ka mōhai lawehala; ma kahi i pepehi ʻia ai ka mōhai kuni, ma laila e pepehi ʻia ai ka mōhai lawehala, ma ke alo o Iēhova; he mea hoʻāno loa ia.

²⁶ ‘ʻO ke kahuna nāna ia i mōhai aku, ʻo ia ke ʻai ia mea; ma kahi hoʻāno nō ia e ʻai ʻia ai, ma loko o ka pā o ka halelewa o ke anaina.

²⁷ ‘ʻO ka mea nāna e hoʻopā aku i ka ʻiʻo ona, e hoʻāno nō ia; a inā e pīpī ʻia ke koko ona ma ke kapa komo, e holoi aʻe ʻoe i ka mea i pīpī ʻia ai ia, ma kahi hoʻāno.

²⁸ ‘Akā, ʻo ka ipu lepo i hoʻolapalapa ʻia ai ia, e wāwahi ʻia ia; a inā he ipu keleawe i hoʻolapalapa ʻia ai ia, a laila e ʻānai ʻia ia a e holoi ʻia me ka wai.

²⁹ ‘E ʻai nā kāne a pau i waena o nā kāhuna ia mea; he mea hoʻāno loa nō ia.

³⁰ ‘A ʻo ka mōhai lawehala, i lawe ʻia kona koko i loko o ka halelewa o ke anaina, e hoʻolauleʻa ma kahi hoʻāno, ʻaʻole ia e ʻai ʻia, e hoʻopau ʻia ia i ke ahi.