KA BUKE ʻAKOLU A MOSE, I KAPA ʻIA ʻOIHANA KAHUNA 25 - Ka Baibala Hemolele

1 Ka Makahiki Sābati. 8 Ka Makahiki Iubilē. 14 Ka hoʻoluhi hewa. 18 Ka hoʻolohe. 25 Ka hoʻihoʻi ʻana i ka ʻāina. 35 Ke kōkua ʻana i ka mea pilikia.

MOKUNA XXV.

¹ ¶ ʻŌlelo maila hoʻi ʻo Iēhova iā Mose ma ka mauna Sinai, ʻī maila,

² “E ʻōlelo aku ʻoe i nā mamo a ʻIseraʻela, a e ʻī aku iā lākou, ‘Aia komo ʻoukou i ka ʻāina aʻu e hāʻawi aku nei iā ʻoukou, a laila e mālama ka ʻāina i ka sābati no Iēhova.

³ ‘I nā makahiki ʻeono e lūlū hua ai ʻoe ma kāu mahina ʻai, a i nā makahiki ʻeono e paʻipaʻi ai ʻoe i kou māla waina, a e ʻohi hoʻi i kona hua.

⁴ ‘Akā, ʻo ka hiku o ka makahiki, e lilo ia i sābati e hoʻomaha ia no ka ʻāina, i sābati no Iēhova; mai lūlū hua ʻoe ma kāu mahina ʻai, ʻaʻole hoʻi ʻoe e paʻipaʻi i kou māla waina.

⁵ ‘ʻO ka mea ulu wale nō kāu ʻai, mai ʻokiʻoki ʻoe ia, ʻaʻole hoʻi e ʻohi i nā hua waina o kou kumu waina paʻipaʻi ʻole ʻia; he makahiki ia e hoʻomaha ai no ka ʻāina.

⁶ ‘A ʻo ka sābati o ka ʻāina he ʻai na ʻoukou, nāu, a na kāu kauā, a na kāu kaikamahine, a na kāu kauā hoʻolimalima ʻia, a na kou malihini e noho pū ana me ʻoe,

⁷ ‘A na kāu mau holoholona, me nā holoholona ma kou ʻāina, he ʻai kona hua a pau.

⁸ ¶ ‘A e helu ʻoe i nā sābati makahiki ʻehiku nou, i ʻehiku hiku mau makahiki, a ʻo ka wā o nā sābati makahiki ʻehiku, he kanahākumamāiwa mau makahiki nou.

⁹ A laila e hoʻokani ai ʻoe i ka pū Iubilē, i ka lā ʻumi o ka malama ʻahiku, i ka Lā Kalahala, e hoʻokani ai ʻoukou i ka pū ma ko ʻoukou ʻāina a puni.

¹⁰ ‘A e hoʻāno ʻoukou i ke kanalima o ka makahiki, a e haʻi aku i ke kuʻu wale ʻana a puni ka ʻāina, i ka poʻe a pau e noho ana i laila; e lilo ia i Iubilē iā ʻoukou, a e hoʻi ʻoukou kēlā kanaka kēia kanaka i kona ʻāina iho, a e hoʻi ʻoukou kēlā kanaka kēia kanaka i kona ʻohana iho.

¹¹ ‘He Iubilē auaneʻi ia makahiki kanalima iā ʻoukou. Mai lūlū hua ʻoukou, ʻaʻole hoʻi e ʻokiʻoki i ka mea ulu wale ia makahiki, ʻaʻole hoʻi e ʻohi i ko ke kumu waina paʻipaʻi ʻole ʻia.

¹² ‘No ka mea, he Iubilē ia, e hoʻāno auaneʻi ia iā ʻoukou; mai loko mai o ka mahina ʻai, e ʻai ai ʻoukou i kona hua.

¹³ ¶ ‘I ka makahiki o ua Iubilē nei, e hoʻi ai ʻoukou kēlā kanaka kēia kanaka i kona ʻāina iho.

¹⁴ ‘Inā e kūʻai lilo aku ʻoe i kekahi mea i kou hoalauna, a inā kūʻai lilo mai ʻoe i kekahi mea mai ka lima mai o kou hoalauna, mai noho ʻoukou a hoʻoluhi hewa kekahi i kekahi.

¹⁵ ‘E like me ka helu o nā makahiki ma hope aʻe o ka Iubilē, e kūʻai lilo mai me kou hoalauna, a e like me ka helu o nā makahiki o nā hua, a kūʻai lilo aku ʻo ia iā ʻoe.

¹⁶ ‘Ma muli o ka nui o nā makahiki e hoʻonui ai ʻoe i ke kumu kūʻai o ia mea; a ma muli o ka ʻuʻuku o nā makahiki, e hōʻuʻuku ai i kona kumu kūʻai; no ka mea, ma ka helu o nā makahiki hua, e kūʻai lilo aku ai ʻo ia iā ʻoe.

¹⁷ ‘No laila, mai hoʻoluhi hewa kekahi i kekahi; akā, e weliweli ʻoe i kou Akua; ʻo wau nō Iēhova ko ʻoukou Akua.

¹⁸ ¶ ‘No ka mea, e hana ʻoukou ma kaʻu kauoha, a e mālama hoʻi i koʻu mau kānāwai, a e hana ma ia mau mea; a e noho nō ʻoukou ma ka ʻāina me ka maluhia.

¹⁹ ‘A e hoʻohua mai ka ʻāina i kona mau hua, a e ʻai ʻoukou a māʻona, a e noho maluhia ʻoukou i laila.

²⁰ ‘A inā ʻōlelo ʻoukou, “He aha lā kā kākou mea e ʻai ai, i ka hiku o ka makahiki? Aia hoʻi, ʻaʻole kākou e lūlū hua, ʻaʻole hoʻi e hōʻuluʻulu i ko kākou mau hua.”

²¹ ‘A laila e kauoha ai au i kaʻu hoʻomaikaʻi ʻana ma luna o ʻoukou i ke ono o ka makahiki, a e hoʻohua mai ia i ka hua no nā makahiki ʻekolu.

²² ‘A i ka walu o ka makahiki e lūlū hua ai ʻoukou, a e ʻai nō i ka hua kahiko, a hiki i ka iwa o ka makahiki; a komo mai nā hua ona, e ʻai nō ʻoukou i ka mea kahiko.

²³ ¶ ‘ʻAʻole e kūʻai lilo mau ʻia aku ka ʻāina; no ka mea, noʻu nō ka ʻāina; no ka mea hoʻi, he poʻe malihini ʻoukou, e noho malihini ana me aʻu nei.

²⁴ ‘A ma ka ʻāina a pau o ʻoukou, e hāʻawi aku ʻoukou e kūʻai hou ʻia ka ʻāina.

²⁵ ‘Inā i ʻilihune aʻe kou hoahānau, a ua kūʻai lilo aku i kauwahi o kona ʻāina, a hele mai kekahi o kona poʻe hoahānau, e kūʻai hou, a laila e kūʻai lilo mai ʻo ia i ka mea a kona hoahānau i kūʻai lilo aku.

²⁶ ‘A inā ʻaʻole o ke kanaka mea nāna e kūʻai lilo hou mai, a e hiki iā ia iho ke kūʻai lilo hou mai;

²⁷ a laila e helu ʻo ia i nā makahiki o kona lilo ʻana i ke kūʻai ʻia, a hoʻihoʻi aku i ke koena i ke kanaka iā ia ka ʻāina āna i kūʻai lilo aku ai; i hoʻi ai ʻo ia i kona ʻāina iho.

²⁸ ‘Akā, inā e hiki ʻole iā ia ke hoʻihoʻi aku ia mea, a laila ka mea i kūʻai lilo aku e waiho nō ia i loko o ka lima o ka mea kūʻai lilo mai ia mea, a hiki i ka Makahiki Iubilē; a e hemo ia i ka Iubilē, a hoʻi ʻo ia i kona ʻāina iho.

²⁹ ¶ ‘A inā e kūʻai lilo aku kekahi kanaka i ka hale noho ma loko o ke kūlanakauhale paʻa i ka pā, a laila e hiki iā ia ke kūʻai lilo hou mai ma loko o ia makahiki ʻokoʻa, ma hope iho o ke kūʻai lilo ʻana aku. Ia makahiki a puni e pono iā ia ke kūʻai lilo hou mai.

³⁰ ‘A inā i ʻole e kūʻai lilo mai ia i loko o ka wā e puni ai ka makahiki, a laila ka hale i loko o ke kūlanakauhale paʻa i ka pā, e hoʻomau loa ia i ka mea nāna i kūʻai lilo mai, i kona mau hanauna; ʻaʻole ia e hemo i ka Iubilē.

³¹ ‘Akā, ʻo nā hale ma nā kauhale ʻaʻole i puni i ka pā, e helu ʻia lākou e like me nā mahina ʻai o ka ʻāina; e hiki nō iā lākou ke kūʻai lilo hou ʻia mai, a e hemo nō i ka Iubilē.

³² ‘Akā, ʻo nā kūlanakauhale o kā Levi a me nā hale o lākou, e hiki nō i nā pua a Levi ke kūʻai lilo hou mai i kēlā manawa kēia manawa.

³³ ‘Inā e kūʻai lilo mai kekahi i ko nā pua a Levi, a laila ka hale i kūʻai lilo ʻia aku, a me ke kūlanakauhale ona, e hemo nō ia i ka Iubilē; no ka mea, ʻo nā hale o nā kūlanakauhale o ka poʻe pua a Levi, ʻo ko lākou waiwai nō ia i waena o nā mamo a ʻIseraʻela.

³⁴ ‘Akā, ʻo ka mahina ʻai e pili ana i ko lākou kūlanakauhale, ʻaʻole ia i kūʻai lilo ʻia aku; no ka mea, ʻo ko lākou waiwai mau nō ia.

³⁵ ¶ ‘A inā ua lilo kou hoahānau i ʻilihune, a ua nāwaliwali aʻela kona lima, a laila e kōkua ʻoe iā ia; inā hoʻi he malihini, a he mea noho malihini, i ola pū ia me ʻoe.

³⁶ ‘Mai lawe ʻoe i ka uku kuala ona, ʻaʻole hoʻi i ka māhuahua ʻana; akā, e weliweli ʻoe i kou Akua, i hiki i kou hoahānau ke ola pū me ʻoe.

³⁷ ‘ʻAʻole ʻoe e hāʻawi lilo ʻole aʻe i kāu moni, no ka uku kuala, ʻaʻole hoʻi e hāʻawi i kāu ʻai iā ia no ka hoʻonui ʻia.

³⁸ ‘ʻO wau nō ʻo Iēhova ʻo ko ʻoukou Akua, ka mea i lawe mai iā ʻoukou mai ka ʻāina mai o ʻAigupita, e hāʻawi iā ʻoukou i ka ʻāina ʻo Kanaʻana, i Akua au no ʻoukou.

³⁹ ¶ ‘A inā i ʻilihune aʻe kou hoahānau, e noho kokoke ana me ʻoe, a kūʻai lilo ʻia aku ia nou, ʻaʻole ʻoe e hoʻohana iā ia nou me he kauā paʻa lā.

⁴⁰ ‘Akā, me he paʻaua lā, a, me he mea noho malihini lā, e noho ai ʻo ia me ʻoe, a e hoʻokauā ʻo ia nāu a hiki i ka Makahiki Iubilē.

⁴¹ ‘A laila e hele aku ʻo ia, mai ou aku lā, ʻo ia pū me kāna mau keiki me ia, a e hoʻi aku nō i kāna ʻohana, a i ka ʻāina o kona mau mākua.

⁴² ‘No ka mea, he mau kauā naʻu lākou, aʻu i lawe mai nei mai ka ʻāina mai ‘o ʻAigupita; ʻaʻole lākou e kūʻai lilo ʻia aku me he mau kauā paʻa lā.

⁴³ ‘ʻAʻole ʻoe e hoʻohaku ma luna ona me ke ʻoʻoleʻa; akā, e weliweli ʻoe i kou Akua.

⁴⁴ ‘ʻO kāu mau kauā kāne paʻa, a me kāu mau kauā wahine paʻa, i lilo iā ʻoe, no nā lāhui kanaka e puni ana iā ʻoe lākou; no lākou mai e kūʻai ʻoukou i mau kauā kāne paʻa, a i mau kauā wahine paʻa.

⁴⁵ ‘A no nā keiki a nā malihini e noho malihini ana i waena o ʻoukou, no lākou e kūʻai ai ʻoukou, a no ko lākou mau ʻohana me ʻoukou, i loaʻa iā lākou ma ko ʻoukou ʻāina; a e lilo lākou i waiwai nāu.

⁴⁶ ‘A e lawe hoʻi ʻoukou iā lākou i waiwai na kā ʻoukou mau keiki ma hope o ʻoukou, e ili iho i waiwai na lākou; a e lilo lākou i kauā mau na ʻoukou; akā, ma luna o ko ʻoukou mau hoahānau, nā mamo a ʻIseraʻela, ʻaʻole e hoʻohaku kekahi ma luna o kekahi me ke ʻoʻoleʻa.

⁴⁷ ¶ ‘A inā e waiwai nui aʻe ka mea noho, a ʻo ka malihini me ʻoe, a e ʻilihune aʻe kou hoahānau e noho kokoke ana me ia, a kūʻai lilo aku ʻo ia iā ia iho i ka malihini, a i ka mea noho ma ou lā, a i ka pua paha o ka ʻohana a ka malihini;

⁴⁸ ma hope o kona kūʻai lilo ʻia aku, e hiki ke kūʻai lilo hou ʻia mai. E hiki i kekahi o kona mau hoahānau ke kūʻai lilo hou mai.

⁴⁹ ‘E pono i ka hoahānau o kona makua kāne, a me ke keiki a ka hoahānau o kona makua kāne, ke kūʻai lilo hou mai, a e hiki i kekaki o kona ʻiʻo iho, no kona ʻohana iho, ke kūʻai lilo hou mai iā ia; a inā e hiki i kona lima iho, he pono nō ke kūʻai hou mai ʻo ia iā ia iho.

⁵⁰ ‘A e kūkā pū ʻo ia me ka mea nāna ia i kūʻai lilo mai, mai ka makahiki mai i kūʻai lilo ʻia aku ai ʻo ia iā ia, a hiki i ka Makahiki Iubilē, a ʻo ke kumu kūʻai ona e hoʻolike ʻia ia me ka helu o nā makahiki, e like me ka wā o ka paʻaua, pēlā nō iā ia.

⁵¹ ‘Inā he nui nā makahiki i koe, e like me ia e hāʻawi ai ʻo ia i ke kumu kūʻai, e kūʻai lilo hou mai, mai loko mai o ka moni i kūʻai lilo ʻia mai ai ʻo ia.

⁵² ‘A inā he ʻuʻuku nā makahiki i koe a hiki i ka Makahiki Iubilē, a laila e helu pū me ia, a e like me nā makahiki, e hāʻawi hou ai ʻo ia iā ia i ke kumu kūʻai, e kūʻai lilo hou ʻia mai ai ʻo ia.

⁵³ ‘Me he paʻaua lā i hoʻolimalima ʻia ma ka makahiki e noho ai ʻo ia me ia; ʻaʻole naʻe e hoʻohaku ma luna ona me ke ʻoʻoleʻa ma mua o kou mau maka.

⁵⁴ ‘A inā i ʻole e kūʻai lilo hou ʻia mai, ma ia mau mea, a laila e hele aku nō ia i ka Makahiki Iubilē, ʻo ia pū me kāna mau keiki me ia.

⁵⁵ ‘No ka mea, iaʻu nei, he poʻe kauā nā mamo a ʻIseraʻela; ʻo kaʻu mau kauā lākou, aʻu i lawe mai nei mai ka ʻāina mai ‘o ʻAigupita; ʻo wau nō Iēhova ko ʻoukou Akua.