KA BUKE ʻAKOLU A MOSE, I KAPA ʻIA ʻOIHANA KAHUNA 24 - Ka Baibala Hemolele

1 No ka ʻaila; 5 no ka berena hōʻike; 10 no ka hōʻino wale; 17 no ka pepehi kanaka.

MOKUNA XXIV.

¹ ¶ ʻŌlelo maila ʻo Iēhova iā Mose, ʻī maila,

² “E kauoha ʻoe i nā mamo a ʻIseraʻela, e lawe mai iā ʻoe i ka ʻaila ʻoliva maʻemaʻe i kuʻi ʻia, i mālamalama, e mau ai ka ʻaʻā ʻana o nā ipukukui.

³ “Ma waho o ka pākū o ka Mea Hōʻike, i loko o ka halelewa o ke anaina, e hoʻoponopono mau ai ʻo ʻAʻarona ia mai ke ahiahi a kakahiaka ma ke alo o Iēhova; he kānāwai mau ia i ko ʻoukou mau hanauna.

⁴ “E hoʻoponopono mau ʻo ia i nā kukui ma luna o ka ipukukui maʻemaʻe i mua o Iēhova.

⁵ ¶ “A e lawe ʻoe i ka palaoa wali, a e hoʻomoʻa i nā pōpō ona he ʻumikumamālua; ʻelua hapaʻumi dila i loko o ka pōpō hoʻokahi.

⁶ “A e hoʻonoho ʻoe ia mau mea ma nā lālani ʻelua ʻeono i ka lālani hoʻokahi, ma luna o ka papa maʻemaʻe, ma ke alo o Iēhova.

⁷ “A e kau aku ʻoe i ka mea ʻala maʻemaʻe ma luna o nā lālani, i kau ia ma luna o ka berena i mea hoʻomanaʻo, he mōhai puhi no Iēhova.

⁸ “I kēlā Sābati kēia Sābati e hoʻonoho mau ai ʻo ia ia mea ma ke alo o Iēhova, na nā mamo mai a ʻIseraʻela, ma ka berita mau loa.

⁹ “E lilo hoʻi ia na ʻAʻarona a na kāna mau keiki, a e ʻai lākou ia ma kahi hoʻāno; no ka mea, he hoʻāno loa ia nona, no nā mōhai puhi no Iēhova ma ke kānāwai mau loa.”

¹⁰ ¶ A ʻo ke keiki a ka wahine o kā ʻIseraʻela, he kanaka ʻAigupita kona makua kāne, ua hele aʻe ia i waena o nā mamo a ʻIseraʻela; a ʻo kēia keiki a kā ʻIseraʻela, a me kekahi kanaka ʻIseraʻela, ua hakakā pū i kahi hoʻomoana.

¹¹ A ua hōʻino wale ke keiki a ka wahine ʻIseraʻela, i ka inoa, a ua kūamuamu hoʻi; a lawe mai lākou iā ia i o Mose lā. (ʻO Selomita ka inoa o kona makuahine, ke kaikamahine a Diberi, no ka ʻohana a Dana.)

¹² Hahao aʻela lākou iā ia i kahi e paʻa ai, i hōʻike ʻia mai ka manaʻo o Iēhova iā lākou.

¹³ ʻŌlelo maila hoʻi ʻo Iēhova iā Mose, ʻī maila,

¹⁴ “E lawe aʻe i ka mea kūamuamu ma waho aʻe o kahi hoʻomoana; a ʻo ka poʻe a pau i lohe, e kau ko lākou mau lima ma luna o kona poʻo, a e hailuku ke anaina a pau iā ia.

¹⁵ “E ʻōlelo hoʻi ʻoe i nā mamo a ʻIseraʻela, penei, ‘ʻO kēlā kanaka kēia kanaka i kūamuamu i kona Akua, e kau nō kona hewa ma luna ona iho.

¹⁶ ‘A ʻo ka mea hōʻino wale i ka inoa ʻo Iēhova, e make ʻiʻo nō ia; e hailuku ʻiʻo aku ke anaina a pau iā ia; ʻo ka malihini, e like pū me ke kamaʻāina, i ka wā e hōʻino ai i ka inoa, e make nō ia.

¹⁷ ¶ ‘A ʻo ka mea pepehi i ke kanaka, e make ʻiʻo nō ia.

¹⁸ ‘A ʻo ka mea pepehi i ka holoholona, e hoʻihoʻi aku nō ʻo ia i holoholona no ka holoholona.

¹⁹ ‘Inā hāʻawi ke kanaka i kona hoalauna i kīnā i loko o kona kino, e like me kāna hana ʻana aku, pēlā nō e hana ʻia mai ai ia;

²⁰ he ʻeha no ka ʻeha, he maka no ka maka, he niho no ka niho; me kāna i hāʻawi ai i ke kanaka i kīnā i loko ona, pēlā nō e hana ʻia aʻe ai ia.

²¹ ‘ʻO ka mea pepehi i ka holoholona, e hoʻihoʻi nō ʻo ia ia; a ʻo ka mea pepehi i ke kanaka, e make ia.

²² ‘I hoʻokahi kānāwai ko ʻoukou no ka malihini, a no ka mea o ko ʻoukou ʻāina iho; no ka mea; ʻo wau nō Iēhova ko ʻoukou Akua.’”

²³ ʻŌlelo aʻela ʻo Mose i nā mamo a ʻIseraʻela, e lawe aʻe i ka mea kūamuamu i waho o kahi hoʻomoana, a e hailuku aku iā ia me nā pōhaku; hana ihola nā mamo a ʻIseraʻela e like me ke kauoha a Iēhova iā Mose.