KA BUKE ʻAKOLU A MOSE, I KAPA ʻIA ʻOIHANA KAHUNA 23 - Ka Baibala Hemolele

1 No nā ʻahaʻaina, me ka Sābati. 4 Ka Mōliaola; 9 nā hua mua; 15 ka Penetekota; 23 nā puʻu, 33 nā halelewa.

MOKUNA XXIII.

¹ ¶ ʻŌlelo maila hoʻi ʻo Iēhova iā Mose, ʻī maila,

² “E ʻōlelo aku i nā mamo a ʻIseraʻela, a e ʻī aku iā lākou, ‘ʻO nā ʻahaʻaina a ʻoukou e kala ai he mau hōʻuluʻulu hoʻāno, noʻu nō ia mau ʻahaʻaina:

³ ‘I nā lā ʻeono, e hana ʻia ai ka hana; akā, ʻo ka hiku o ka lā, he Sābati e hoʻomaha ai ia, he hōʻuluʻulu hoʻāno; ʻaʻole ʻoukou e hana; he Sābati ia no Iēhova ma loko o ko ʻoukou mau hale a pau.

⁴ ¶ ‘Eia nā ʻahaʻaina a Iēhova, nā hōʻuluʻulu hoʻāno a ʻoukou e kala ai i ko lākou wā pono.

⁵ ‘I ka lā ʻumikumamāhā o ka malama mua, i ke ahiahi, i laila ka Mōliaola a Iēhova.

⁶ ‘A i ka lā ʻumikumamālima o ia malama nō, ka ʻAhaʻaina o ka Berena Hū ʻOle, no Iēhova; ʻehiku lā e ʻai ai ʻoukou i ka berena hū ʻole.

⁷ ‘I ka lā mua, he hōʻuluʻulu hoʻāno ko ʻoukou, ʻaʻole ʻoukou e hana i ka hana e luhi ai i laila.

⁸ ‘Akā, e kaumaha ʻoukou i ka mōhai puhi iā Iēhova i nā lā ʻehiku; a i ka hiku o ka lā, he hōʻuluʻulu hoʻāno, ʻaʻole ʻoukou e hana i ka hana e luhi ai.’”

⁹ ¶ ʻŌlelo maila hoʻi ʻo Iēhova iā Mose, ʻī maila,

¹⁰ “E ʻōlelo aku i nā mamo a ʻIseraʻela, a e ʻī aku iā lākou, ‘Aia komo ʻoukou i ka ʻāina aʻu e hāʻawi aku ai iā ʻoukou, a ʻokiʻoki hoʻi i ka ʻai ona a laila e lawe mai ʻoukou i ka pūʻā hua mua o kā ʻoukou ʻai i ke kahuna.

¹¹ ‘A e hoʻāli aʻe ʻo ia i ka pūʻā i mua i ke alo o Iēhova, e maliu ʻia ai ia no ʻoukou i ka lā e noa ai ka Sābati, e hoʻāli ai ke kahuna.

¹² ʻA e kaumaha ʻoukou ia lā o ʻoukou i hoʻoluli ai i ka pūʻā, i keiki hipa kāne kīnā ʻole o ka makahiki hoʻokahi, i mōhai kuni no Iēhova.

¹³ ‘A ʻo kona mōhai ʻai, ʻelua hapaʻumi dila o ka palaoa wali i hui pū me ka ʻaila, he mōhai puhi no Iēhova, i mea ʻala ʻono; a ʻo kona mōhai inu, he waina, he hapahā o ka hina.

¹⁴ ‘A ʻo ka berena, a ʻo ka huapalaoa moʻa, a ʻo ka hua maka, ʻaʻole ʻoukou e ʻai a hiki i ka lā i lawe mai ai ʻoukou i ka mōhai i ko ʻoukou Akua; he kānāwai mau loa ia i ko ʻoukou mau hanauna, i loko o ko ʻoukou mau hale a pau loa.

¹⁵ ¶ ‘A e helu ʻoukou no ʻoukou iho mai ka lā e noa ai ka Sābati, mai ka lā i lawe mai ai ʻoukou i ka pūʻā i mōhai hoʻāli; ʻehiku Sābati e pau ai.

¹⁶ ‘A hiki i ka lā e noa ai ka Sābati ʻahiku, e helu ai ʻoukou i nā lā he kanalima, a e hāʻawi hou i mōhai ʻai hou iā Iēhova.

¹⁷ ‘E lawe mai hoʻi ʻoukou i ʻelua pōpō berena hoʻoluli ʻelua hapaʻumi dila, he palaoa wali ia, e hoʻomoʻa ʻia ia me ka hū; he mau hua mua ia no Iēhova.

¹⁸ ‘A e kaumaha ʻoukou me ka berena, i ʻehiku keiki hipa kīnā ʻole o ka makahiki mua, a i hoʻokahi bipi kāne ʻōpiopio, a i ʻelua hipa kāne; e lilo ia i mōhai kuni no Iēhova, me ko lākou mōhai ʻai, me ko lākou mōhai inu, he ʻālana e kaumaha ʻia ma ke ahi, he mea ʻala ʻono no Iēhova.

¹⁹ ‘A laila e kaumaha ʻoukou i hoʻokahi keiki kao, i mōhai lawehala, a i ʻelua keiki hipa o ka makahiki mua, i ʻālana o nā mōhai hoʻomalu.

²⁰ ‘A e hoʻāli ke kahuna ia mau mea me ka berena o nā hua mua i mōhai hoʻāli ma ke alo o Iēhova, me nā keiki hipa ʻelua; e laʻa ia no Iēhova na ke kahuna.

²¹ ‘E haʻi aku ʻoukou ia lā i hōʻuluʻulu hoʻāno no ʻoukou; ʻaʻole ʻoukou e hana i ka hana e luhi ai. He kānāwai mau loa i loko o ko ʻoukou mau hale a pau, i ko ʻoukou mau hanauna.

²² ¶ ‘Aia e ʻokiʻoki ʻoukou i ka ʻai o ko ʻoukou ʻāina, mai ʻoki loa i nā kihi o kāu mahina ʻai, i kou ʻoki ʻana, ʻaʻole hoʻi ʻoe e ʻohi i nā haʻulena o kāu ʻai; e waiho nō ʻoe pēlā na ka poʻe ʻilihune, a na ka malihini; ʻo wau nō Iēhova ko ʻoukou Akua.’”

²³ ¶ ʻŌlelo maila hoʻi ʻo Iēhova iā Mose, ʻī maila,

²⁴ “E ʻōlelo aku ʻoe i nā mamo a ʻIseraʻela, penei, ‘I ka hiku o ka malama, i ka lā mua o ka malama, he Sābati ko ʻoukou, he lā laʻa e hoʻokani ai i nā pū, he hōʻuluʻulu hoʻāno.

²⁵ ‘Mai hana i ka hana e luhi ai; akā, e kaumaha i ka mōhai puhi iā Iēhova.’”

²⁶ ¶ ʻŌlelo maila hoʻi ʻo Iēhova iā Mose, ʻī maila,

²⁷ “A i ka ʻumi o ka lā o ua malama ʻahiku nei, he Lā Kalahala; he hōʻuluʻulu hoʻāno ia no ʻoukou, a e hoʻokaumaha ʻoukou i ko ʻoukou mau ʻuhane, a e kaumaha i ka mōhai puhi iā Iēhova.

²⁸ “ʻAʻole hana a ʻoukou e hana ai i ua lā lā; no ka mea, he Lā Kalahala ia, e hana ai i kalahala no ʻoukou ma ke alo o Iēhova ko ʻoukou Akua.

²⁹ ‘ʻO kēlā ʻuhane kēia ʻuhane i hoʻokaumaha ʻole ʻia i ua lā lā, e ʻoki ʻia aku ia mai waena aku o kona poʻe kānaka.

³⁰ “A ʻo kēlā kanaka kēia kānaka e hana i ka hana i ua lā lā, ʻo ia kanaka kaʻu e hōʻoki aku ai mai waena aku o kona poʻe kānaka.

³¹ “Mai hana iki ʻoukou i ka hana; he kānāwai mau loa i ko ʻoukou mau hanauna i loko o ko ʻoukou mau hale a pau.

³² “E lilo ia i Sābati e hoʻomaha ai, a e hoʻokaumaha ʻoukou i ko ʻoukou mau ʻuhane; i ka iwa o ka lā o ka malama, i ke ahiahi, mai ke ahiahi a hiki i ke ahiahi, e mālama ai ʻoukou i ko ʻoukou sābati.”

³³ ¶ ʻŌlelo maila hoʻi ʻo Iēhova iā Mose, ʻī maila,

³⁴ “E ʻōlelo aku ʻoe i nā mamo a ʻIseraʻela, penei, ‘I ka lā ʻumikumamālima o ua malama ʻahiku nei, he ʻAhaʻaina Kauhalelewa i nā lā ʻehiku no Iēhova.

³⁵ ‘I ka lā mua, he hōʻuluʻulu hoʻāno, mai hana ʻoukou i ka hana e luhi ai.

³⁶ ‘I nā lā ʻehiku e kaumaha ai ʻoukou i ka mōhai puhi iā Iēhova; i ka walu o ka lā he hōʻuluʻulu hoʻāno iā ʻoukou, a e kaumaha ʻoukou i ka mōhai puhi iā Iēhova, he anaina hoʻāno, ʻaʻole hoʻi ʻoukou e hana i ka hana e luhi ai.

³⁷ ¶ ‘ʻO ia nā ʻahaʻaina a Iēhova, a ʻoukou e haʻi aku ai he mau hōʻuluʻulu hoʻāno, e kaumaha ai i ka mōhai puhi iā Iēhova, i ka mōhai kuni, i ka mōhai ʻai, i ka ʻālana a me nā mōhai inu, kēlā mea kēia mea i kona lā iho;

³⁸ ʻokoʻa nā Sābati o Iēhova; ʻokoʻa hoʻi ko ʻoukou mea hāʻawi; ʻokoʻa hoʻi kā ʻoukou mau mea hoʻohiki a pau; ʻokoʻa hoʻi kā ʻoukou mau mōhai na ka makemake, a ʻoukou e hāʻawi wale iā Iēhova.

³⁹ ¶ ‘A i ka lā ʻumikumamālima o ka malama ʻahiku, aia hōʻuluʻulu ʻoukou i ka hua o ka ʻāina, e ʻahaʻaina ʻoukou no Iēhova i nā lā ʻehiku; i ka lā mua, he sābati, a i ka lā ʻawalu, he sābati.

⁴⁰ ‘E lawe hoʻi ʻoukou no ʻoukou iho i ka lā mua i nā lālā o nā lāʻau maikaʻi, i nā lālā o nā lāʻau pāma, a me nā lālā o nā lāʻau momona, a me nā wīlou o ke kahawai; a e hauʻoli aʻe ʻoukou ma ke alo o Iēhova ko ʻoukou Akua i nā lā ʻehiku.

⁴¹ ‘E mālama ʻoukou ia i ʻahaʻaina no Iēhova, i nā lā ʻehiku o ka makahiki; he kānāwai mau loa i ko ʻoukou mau hanauna; i ka hiku o ka malama e ʻahaʻaina ai ʻoukou ia.

⁴² ‘E noho ʻoukou i loko o nā hale lālā lāʻau i nā lā ʻehiku; ʻo nā mea a pau i hānau he poʻe ʻIseraʻela, e noho nō lākou i loko o nā hale lālā lāʻau;

⁴³ i ʻike ko ʻoukou mau hanauna, ua hoʻonoho au i nā mamo a ʻIseraʻela i loko o nā hale lālā lāʻau, i ka wā i lawe mai ai au iā lākou mai ka ʻāina mai o ʻAigupita; ʻo wau nō Iēhova ko ʻoukou Akua.’”

⁴⁴ A haʻi akula ʻo Mose i nā ʻahaʻaina a Iēhova i nā mamo a ʻIseraʻela.