KA BUKE ʻAKOLU A MOSE, I KAPA ʻIA ʻOIHANA KAHUNA 22 - Ka Baibala Hemolele

1 He mau kānāwai no nā mōhai, a no ka ʻai ʻana i nā mōhai.

MOKUNA XXII.

¹ ¶ ʻŌlelo maila hoʻi ʻo Iēhova iā Mose, ʻī maila,

² “E ʻōlelo aku iā ʻAʻarona, a i kāna mau keiki, e hoʻokaʻawale lākou iā lākou iho mai nā mea hoʻāno o nā mamo a ʻIseraʻela, i ʻole ai lākou e hōʻino mai i koʻu inoa hoʻāno i nā mea a lākou i hoʻāno mai ai noʻu; ʻo wau nō Iēhova.

³ “E ʻōlelo aku iā lākou, ‘ʻO ka mea o kā ʻoukou mau keiki a pau i waena o ko ʻoukou mau hanauna, e hele i nā mea hoʻāno a nā mamo a ʻIseraʻela i hoʻolaʻa aku ai iā Iēhova, me kona haumia ma luna ona, e ʻoki ʻia aku ʻo ia mai koʻu alo aku; ʻo wau nō Iēhova.

⁴ ‘ʻO kēlā kanaka, kēia kanaka he keiki a ʻAʻarona, he lēpero, a he hilo kahe kona; ʻaʻole ia e ʻai i nā mea hoʻāno a hiki i kona maʻemaʻe ʻana. A ʻo ke kanaka hoʻopā aku i ka mea haumia no ka mea make, a ʻo ke kanaka ua hele aku kona ʻanoʻano mai ona aku;

⁵ a ʻo ke kanaka hoʻopā aku i ka mea kolo e haumia ai, a i ke kanaka paha e haumia ai, ʻo kēlā haumia kēia haumia kona;

⁶ ʻo ke kanaka i pā aku i kekahi o ia mau mea, e haumia nō ia a hiki i ke ahiahi, ʻaʻole ia e ʻai i nā mea hoʻāno, ke holoi ʻole ʻo ia i kona ʻiʻo i ka wai.

⁷ ‘A napoʻo ka lā, e maʻemaʻe nō ia, a ma hope iho e ʻai nō ʻo ia i nā mea hoʻāno; no ka mea, ʻo kāna ʻai nō ia.

⁸ ‘ʻO ka mea make wale, a ʻo ka mea i nahae ʻia, ʻaʻole ʻo ia e ʻai ia, e hoʻohaumia ai iā ia iho; ʻo wau nō Iēhova.

⁹ ‘E mālama hoʻi lākou i kaʻu ʻoihana, o hoʻoili lākou i ka hewa ma luna ona, a make, ke hoʻohaumia lākou ia mea; naʻu na Iēhova lākou e hoʻāno nei.

¹⁰ ¶ ‘ʻAʻole e ʻai ka malihini i ka mea hoʻāno; ʻo ko ke kahuna mea e noho malihini mai, a ʻo ke kauā hoʻolimalima, ʻaʻole nō e ʻai i ka mea hoʻāno.

¹¹ ‘Akā, inā e kūʻai ke kahuna i ke kanaka me kāna kālā, e ʻai nō ʻo ia ia, a me ka mea i hānau ma loko o kona hale; ʻo lākou ke ʻai i kāna ʻai.

¹² ‘Inā e mare ke kaikamahine a ke kahuna i ka malihini, ʻaʻole ʻo ia e ʻai i ka ʻālana o nā mea hoʻāno.

¹³ ‘Akā, inā he wahine kāne make ke kaikamahine a ke kahuna, a ua hemo paha me ke keiki ʻole, a ua hoʻi mai i ka hale o kona makua kāne, e like me kona wā kamaliʻi, e ʻai nō ʻo ia i ka ʻai a kona makua kāne; akā, ʻaʻole ka malihini e ʻai ia mea.

¹⁴ ‘A inā e ʻai ke kanaka i ka mea hoʻāno, me ka ʻike ʻole, a laila e hui aku ʻo ia i ka hapalima me ia, a e hāʻawi aku i ke kahuna me ka mea hoʻāno.

¹⁵ ‘ʻAʻole lākou e hoʻohaumia i kā nā mamo a ʻIseraʻela mau mea hoʻāno a lākou i hoʻolaʻa ai iā Iēhova;

¹⁶ ʻaʻole hoʻi e waiho aku ma luna o lākou i ka hewa o ka lawehala ʻana, i kā lākou ʻai ʻana i nā mea hoʻāno; no ka mea, naʻu na Iēhova lākou e hoʻāno nei.’”

¹⁷ ¶ ʻŌlelo maila hoʻi ʻo Iēhova iā Mose, penei,

¹⁸ “E ʻōlelo aku ʻoe iā ʻAʻarona, a i kāna mau keiki, a i nā mamo a pau a ʻIseraʻela, a e ʻī aku iā lākou, ‘ʻO kēlā kanaka kēia kānaka o ka ʻohana o ʻIseraʻela, a ʻo nā malihini i loko o kā ʻIseraʻela, nāna e kaumaha i kona mōhai no kona hoʻohiki ʻana a pau, a no kāna mau ʻālana na kona makemake, ka mea a lākou e kaumaha ai iā Iēhova, i mōhai kuni;

¹⁹ na ko ʻoukou makemake iho, i ke kāne kīnā ʻole o nā bipi, ʻo nā hipa, a ʻo nā kao.

²⁰ ‘ʻO ka mea kīnā, ʻaʻole ʻoukou e kaumaha ia; no ka mea, ʻaʻole ia e maliu ʻia no ʻoukou.

²¹ ‘A ʻo ke kanaka nāna e kaumaha i ka ʻālana o nā mōhai hoʻomalu iā Iēhova, e hoʻokō ai i kāna i hoʻohiki ai, a inā he mōhai na kona makemake, ʻo nā bipi, a ʻo nā hipa paha, e hemolele ia e maliu ʻia ai; ʻaʻole aku kīnā i loko ona.

²² ‘ʻO ka makapaʻa, ʻo ka ʻoʻopa, a he puʻu kona, he puʻupuʻu, he kākiʻo, ʻaʻole ʻoukou e kaumaha ia mau mea iā Iēhova, ʻaʻole hoʻi e hoʻolilo ia mau mea i mōhai e kaumaha ʻia ma ke ahi ma luna o ke kuahu iā Iēhova.

²³ ‘ʻO ka bipi kāne, a ʻo ka hipa keiki, he ʻoi aku ko ka lālā ona, he hemahema paha, e hiki nō ke kaumaha ʻoe ia i mōhai na kou makemake nō; akā, no ka hoʻohiki ʻana ʻaʻole e maliu ʻia aku ia.

²⁴ ‘ʻO ka mea i pēpē ʻia, a i paopao ʻia, a uhae ʻia, a i poʻa ʻia, ʻaʻole ʻoukou e kaumaha ia mea iā Iēhova, ʻaʻole ʻoukou e hana ma ko ʻoukou ʻāina.

²⁵ ‘ʻAʻole hoʻi no loko mai a ko ka malihini lima, e kaumaha ai ʻoukou i ka berena a ko ʻoukou Akua, no kēia mau mea; no ka mea, i loko o lākou ko lākou popopo, he mau kīnā i loko o lākou; ʻaʻole e maliu ʻia no ʻoukou.’”

²⁶ ¶ ʻŌlelo maila hoʻi ʻo Iēhova iā Mose, ʻī maila,

²⁷ “Aia hānau ka bipi kāne, a he hipa paha, a he kao paha, a laila e noho ia ma lalo iho o ka makua, i nā lā ʻehiku; a mai ka walu o ka lā, a ma hope aku e maliu ʻia ai ia i mōhai puhi no Iēhova.

²⁸ “Inā he bipi wahine, a he hipa wahine paha, ʻaʻole ʻoukou e pepehi pū ia mea me kāna keiki i ka lā hoʻokahi.

²⁹ “Aia kaumaha aku ʻoukou i ka mōhai aloha iā Iēhova, e kaumaha ʻoukou ia na ko ʻoukou makemake nō.

³⁰ “Ia lā hoʻokahi nō, e ʻai ʻia ia, ʻaʻole e hoʻokoe ʻoukou i kauwahi ona a ao aʻe; ʻo wau nō Iēhova.

³¹ “No laila e mālama ʻoukou i kaʻu mau kauoha, a e hana ma ia mau mea; ʻo wau nō Iēhova.

³² “ʻAʻole hoʻi ʻoukou e hōʻino i koʻu inoa hoʻāno; e hoʻāno ʻia nō wau i waena o nā mamo a ʻIseraʻela; ʻo wau nō Iēhova nāna ʻoukou e hoʻāno nei,

³³ nāna hoʻi ʻoukou i lawe mai mai ka ʻāina ʻo ʻAigupita mai i Akua au no ʻoukou; ʻo wau nō Iēhova.”