KA BUKE ʻAKOLU A MOSE, I KAPA ʻIA ʻOIHANA KAHUNA 21 - Ka Baibala Hemolele

1 He mau kānāwai no nā kāhuna pule.

MOKUNA XXI.

¹ ¶ ʻŌlelo maila hoʻi ʻo Iēhova iā Mose, “E ʻōlelo aku i nā kāhuna, i nā keiki a ʻAʻarona, a e ʻī aku iā lākou, ‘ʻAʻohe kanaka e hoʻohaumia ʻia no ka make i waena o kona poʻe kānaka;

² akā, no kona ʻiʻo iho; no ka mea kokoke mai iā ia, no kona makuahine, a me kona makua kāne a me kāna keiki, a me kāna kaikamahine, a me kona hoahānau kāne,

³ a me kona kaikuahine, he puʻupaʻa, i kokoke mai iā ia, ʻaʻole i loaʻa iā ia ke kāne, e hiki nō ke hoʻohaumia ʻia ʻo ia nona.

⁴ ‘ʻAʻole e hoʻohaumia ʻo ia iā ia iho, he haku i waena o kona poʻe kānaka, e hōʻino iā ia iho.

⁵ ‘ʻAʻole lākou e hoʻoʻōhule i ko lākou mau poʻo, ʻaʻole hoʻi e kahi i nā kihi o ko lākou ʻumiʻumi, ʻaʻole hoʻi e ʻokiʻoki i ko lākou ʻiʻo iho.

⁶ ‘E hoʻāno auaneʻi lākou i ko lākou Akua, ʻaʻole hoʻi e hoʻohaumia i ka inoa o ko lākou Akua; no ka mea, ʻo nā mōhai o Iēhova i kaumaha ʻia ma ke ahi, a me ka berena na ko lākou Akua, ʻo ia kā lākou i kaumaha ai, no laila, e pono ke hoʻāno lākou.

⁷ ‘ʻAʻole lākou e lawe i ka wahine hoʻokamakama, a he haumia paha; ʻaʻole hoʻi lākou e lawe i ka wahine i hoʻokaʻawale ʻia aʻe mai kāna kāne aʻe; no ka mea, he hoʻāno ʻo ia i kona Akua.

⁸ ‘No laila e hoʻāno ʻoe iā ia; no ka mea, ʻo ka berena na kou Akua kāna i kaumaha ai; e hoʻāno auaneʻi ʻo ia iā ʻoe; no ka mea, he hoʻāno nō wau ʻo Iēhova kou Akua nāna ʻoukou i hoʻāno.

⁹ ‘ʻO ke kaikamahine a ke kahuna pule, inā e hoʻohaumia ʻo ia iā ia iho i ka moekolohe, ua hoʻohaumia ʻo ia i kona makua kāne; e puhi ʻia ʻo ia i ke ahi.

¹⁰ ¶ ‘A ʻo ke kahuna nui i waena o kona poʻe hoahānau, ma luna iho o kona poʻo i ninini ʻia ka ʻaila poni, a ua hoʻolaʻa ʻia e komo i ke kapa, ʻaʻole hoʻi e uhae i kona mau kapa;

¹¹ ʻaʻole hoʻi e komo aʻe i ka mea i make, ʻaʻole hoʻi no kona makua kāne, a no kona makuahine paha, e hoʻohaumia ai ʻo ia iā ia iho.

¹² ‘ʻAʻole hoʻi ʻo ia e puka aʻe i waho o ke keʻena kapu, ʻaʻole hoʻi e hoʻohaumia i ke keʻena kapu o kona Akua; no ka mea, ma luna ona ka lei o ka ʻaila poni o kona Akua; ʻo wau nō Iēhova.

¹³ ‘E mare nō hoʻi ʻo ia i ka wahine i kona puʻupaʻa ʻana.

¹⁴ ‘ʻO ka wahine kāne make, a ʻo ka wahine hemo, a ʻo ka haumia, ʻo ka hoʻokamakama, ʻo ia mau mea kāna e lawe ʻole ai; akā, e lawe ʻo ia i ka wahine puʻupaʻa o kona poʻe kānaka i wahine.

¹⁵ ‘ʻAʻole hoʻi ʻo ia e hoʻohaumia i kāna keiki i waena o kona poʻe kānaka; no ka mea, ke hoʻāno nei au ʻo Iēhova iā ia.’”

¹⁶ ¶ ʻŌlelo maila hoʻi ʻo Iēhova iā Mose, ʻī maila,

¹⁷ “E ʻōlelo aku ʻoe iā ʻAʻarona, penei, ‘ʻO ka mea o kāu mau keiki i ko lākou hanauna, he kīnā kona, ʻaʻole ia e hoʻokokoke e kaumaha i ka berena a kona Akua.

¹⁸ ‘No ka mea, ʻo kēlā kanaka kēia kānaka he kīnā kona, ʻaʻole ia e hoʻokokoke mai: ʻo ke kanaka makapō, ʻo ka ʻoʻopa, ʻo ka ihu pēpē, a he lālā ʻoi aku kona,

¹⁹ a ʻo ke kanaka ua haʻi kona wāwae, a ua haʻi kona lima paha,

²⁰ a he kuapuʻu, a he ʻāʻā, a he kīnā ma kona maka, a he puʻupuʻu, a he kākiʻo, a he hua pēpē ʻia.

²¹ ‘ʻO kēlā kanaka kēia kanaka o nā keiki a ʻAʻarona he kīnā kona, ʻaʻole ia e hoʻokokoke mai e kaumaha i nā mōhai no Iēhova i kaumaha ʻia ma ke ahi; he kīnā kona, ʻaʻole ia e hele kokoke mai e kaumaha i ka berena a kona Akua.

²² ‘ʻO ka berena a kona Akua, ʻo ka mea hoʻāno loa, a me ka mea hoʻāno, ʻo ia kāna e ʻai ai.

²³ ‘ʻAʻole hoʻi ia e komo i ka pākū, ʻaʻole hoʻi e hoʻokokoke i ke kuahu, no kona kīnā ʻana; o hoʻohaumia ʻo ia i kuʻu mau keʻena kapu; no ka mea, naʻu na Iēhova lākou e hoʻāno nei.’”

²⁴ A haʻi aʻela ʻo Mose iā ʻAʻarona, a i kāna mau keiki, a i nā mamo a pau a ʻIseraʻela.