KA BUKE ʻAKOLU A MOSE, I KAPA ʻIA ʻOIHANA KAHUNA 20 - Ka Baibala Hemolele

1 Ke kānāwai no ka mālama kiʻi. 7 Kānāwai no ka hōʻino i nā mākua; 10 no ka moekolohe; 27 no ka nīnau ʻuhane.

MOKUNA XX.

¹ ¶ ʻŌlelo maila ʻo Iēhova iā Mose, ʻī maila,

² “E ʻōlelo hou aku ʻoe i nā mamo a ʻIseraʻela, ‘ʻO kēlā kanaka kēia kanaka, ʻo nā mamo a ʻIseraʻela, a ʻo nā malihini e noho ana ma kā ʻIseraʻela, nāna e hāʻawi i kahi keiki āna iā Moleka, e make ʻiʻo nō ua kanaka lā; na nā kānaka o ka ʻāina ia e hailuku aku me nā pōhaku.

³ ‘A e hoʻokūʻē au i koʻu maka i kēlā kanaka, a e ʻoki aku hoʻi au iā ia mai waena aku o kona poʻe kānaka, no kona hāʻawi ʻana i kekahi keiki āna iā Moleka; e hoʻohaumia i kuʻu keʻena kapu, a me ka hōʻino i koʻu inoa hoʻāno.

⁴ ‘A inā e hūnā iki nā kānaka o ka ʻāina i ko lākou mau maka i ua kanaka lā, i kona wā e hāʻawi ai i kekahi keiki āna iā Moleka, ʻaʻole hoʻi hoʻomake iā ia;

⁵ a laila, naʻu nō e hoʻokūʻē i kuʻu maka i ua kanaka lā a me kona ʻohana, a e ʻoki aku au iā ia, a me ka poʻe a pau e hele moekolohe ma muli ona, e moekolohe me Moleka, mai waena aku o ko lākou poʻe kānaka.

⁶ ¶ ‘A ʻo ke kanaka huli ma muli o nā mea nīnau ʻuhane, a ma muli hoʻi o nā kupua, e hele moekolohe ma muli o lākou, e hoʻokūʻē au i kuʻu maka i kēlā kanaka, a e ʻoki aku hoʻi au iā ia mai waena aku o kona poʻe kānaka.

⁷ ‘No laila, e huikala ʻoukou iā ʻoukou iho, i hoʻāno hoʻi ʻoukou; no ka mea, ʻo wau nō Iēhova ko ʻoukou Akua.

⁸ ‘E mālama ʻoukou i koʻu mau kānāwai, a e hana hoʻi ma ia mau mea; ʻo wau nō Iēhova nāna ʻoukou e hoʻolaʻa nei.

⁹ ¶ ‘No ka mea, ʻo kēlā kanaka kēia kanaka i kūamuamu i kona makua kāne a i kona makuahine paha, e make ʻiʻo nō ia; ua hōʻino aku ʻo ia i kona makua kāne, a i kona makuahine paha; ma luna ona kona koko iho.

¹⁰ ¶ ‘ʻO ke kanaka moekolohe aku i ka wahine a kekahi kanaka, ʻo ka mea moekolohe i ka wahine a kona hoalauna, e make ʻiʻo nō ke kanaka moekolohe a me ka wahine moekolohe.

¹¹ ‘ʻO ke kanaka moe me ka wahine a kona makua kāne, ua wehe aʻe ʻo ia i kahi huna o kona makua kāne; e make ʻiʻo nō lāua pū; ma luna o lāua ko lāua koko iho.

¹² ‘Inā e moe ke kanaka me kāna hūnōna wahine, e make ʻiʻo nō lāua pū, ua hana lāua i ka mea haumia hilahila; ma luna o lāua ko lāua koko iho.

¹³ ‘Inā e moe aku ke kanaka i ke kāne e like me kona moe aku i ka wahine, ua hana pū lāua i ka mea haumia hilahila; e make ʻiʻo nō lāua pū; ma luna o lāua ko lāua koko.

¹⁴ ‘Inā e mare ke kanaka i ka wahine a me kona makuahine, he hewa ia; e puhi pū ʻia lākou i ke ahi, ʻo ia pū me lāua lā; i ʻole ai he hewa i waena o ʻoukou.

¹⁵ ‘A inā e moe ke kanaka i ka holoholona, e make ʻiʻo nō ia; a e pepehi ʻoukou ia holoholona.

¹⁶ ‘A inā e hoʻokokoke aku ka wahine i ka holoholona e moe iho iā ia, e pepehi ʻoe ia wahine, a me ka holoholona; e make ʻiʻo nō lāua pū; ma luna o lāua ko lāua koko.

¹⁷ ¶ ‘A inā e lawe ke kanaka i kona kaikuahine, i ke kaikamahine a kona makua kāne, a i ke kaikamahine a kona makuahine paha, a ʻike aku i kona wahi huna, a ʻike mai kēlā i kona wahi huna, he mea hewa ʻiʻo nō ia; e ʻoki ʻia lāua ma ke alo o ko lāua poʻe kānaka; ua wehe ʻo ia i kahi huna o kona kaikuahine; e kau nō kona hewa ma luna ona.

¹⁸ ‘A inā e moe aku ke kanaka i ka wahine i kona maʻi ʻana, a wehe aʻe i kona wahi huna; ua wehe aʻe ia i kona pūnāwai, a ua wehe aʻe ia wahine i ke kumu o kona koko, e ʻoki pū ʻia aku hoʻi lāua mai waena aku o ko lāua poʻe kānaka.

¹⁹ ‘Mai wehe ʻoe i kahi huna o ka hoahānau wahine o kou makuahine, a ʻo ke kaikuahine a kou makua kāne paha; no ka mea, ʻo ia ka wehe i kona ʻiʻo iho; e kau nō ko lāua hewa ma luna o lāua.

²⁰ ‘A inā e moe aku ke kanaka me ka wahine a ka hoahānau kāne o kona makua kāne, ua wehe aʻe ʻo ia i kahi huna o kēlā makua kāne; e kau nō ko lāua hewa ma luna o lāua, e make keiki ʻole lāua.

²¹ ‘A inā e lawe ke kanaka i ka wahine a kona hoahānau kāne, he mea haumia ia; ua wehe aʻe ʻo ia i kahi huna o kona hoahānau kāne, ʻaʻole aku keiki a lāua.

²² ¶ ‘No laila, e mālama ʻoukou i kaʻu mau kauoha a pau, a me koʻu mau kānāwai a pau; i ʻole ai ka ʻāina kahi aʻu e lawe aku ai iā ʻoukou e noho ma laila, e luaʻi aku iā ʻoukou.

²³ ‘Mai hele ʻoukou ma nā ʻoihana a nā lāhui kanaka, aʻu e kiola aku ai i mua o ʻoukou; no ka mea, ua hana lākou i kēia mau mea a pau; no lailai hoʻowahāwahā aku ai au iā lākou.

²⁴ ‘Akā, ua ʻōlelo aku au iā ʻoukou, “E loaʻa iā ʻoukou ko lākou ʻāina; naʻu ia e hāʻawi aku no ʻoukou ponoʻī, he ʻāina e kahe ai ka waiū a me ka meli.” ʻO wau nō Iēhova ko ʻoukou Akua nāna ʻoukou i hoʻokaʻawale aʻe mai nā lāhui kanaka ʻē aʻe.

²⁵ ‘No laila e hoʻokaʻawale aʻe ʻoukou i waena o nā holoholona maʻemaʻe, a me ka haumia, a ma waena o nā manu haumia, a me ka maʻemaʻe; mai hoʻohaumia i ko ʻoukou mau ʻuhane ma kahi holoholona, a me kahi manu, a me kahi mea e kolo ana ma ka lepo, nā mea aʻu i hoʻokaʻawale aʻe mai o ʻoukou aʻe, me he haumia lā.

²⁶ ‘E hoʻāno hoʻi ʻoukou noʻu; no ka mea, he hoʻāno nō wau, ʻo Iēhova, a ua hoʻokaʻawale aʻe au iā ʻoukou mai nā lāhui kanaka ʻē i lilo ʻoukou noʻu.

²⁷ ¶ ‘ʻO ke kanaka, a ʻo ka wahine paha, he nīnau ʻuhane, a he kupua paha, e make nō ia; e hailuku lākou iā lāua me nā pōhaku; e kau nō ko lāua koko ma luna o lāua.’”